Ixꞌalin ju ixlhamakꞌan pumatam chakoꞌulh ju ixnimacontilacanta
18
Ju Jesús alacjuni ju ixꞌamamakaꞌui lakatam chivinti ju apumavasalanilh ni va tachi catatꞌachivinilh ju Dios chai jantu tavanan catanaulh ni jantu lhitapalai ni catatꞌachivinilh ju yuchi.
Lucas 18.1-43
―Ju lakatam lakꞌachakꞌan ixꞌalin pumatam lacatꞌicstꞌi ucxtin.
Chai ju yuchi jantu ixtalhoni ju Dios chai jantu ixꞌatalhoni ju ixtꞌalapanacni.
3 Chai vachuꞌ ixꞌalin ju anch pumatam chakoꞌulh ju va ixnimacontilacanta.
Pus ju yuchi va tsa ixlakꞌan ju anuꞌ ucxtin.
Ixjuni:
“Aqꞌuilakꞌoxininch ju quilhamakꞌan ixlacata ju quintꞌalasan”.
4 Pus ju anuꞌ ucxtin na lakalhu avilhchan jantu ixnavini ju tuchi isqꞌuini ju anuꞌ chakoꞌulh.
Para astan pus naulh laꞌixꞌalhunut:
“Ju quitꞌin jantu ictalhoni ju Dios nin tuꞌuꞌ iclhiulai ju quintꞌalapanacni.
5 Para va ixlacaꞌatalh ni na jeks quimavai ju ani chakoꞌulh yuchi aclhilakꞌoxiniyaꞌ ju ixlhamakꞌan.
Ni jantu pus ca na jeks aquimavakꞌalhiyaꞌ”.
6 Chai ju Jesús ajunich ju ixꞌamamakaꞌui:
―Anavitꞌit cuenta tuchi naulh ju anuꞌ lacatꞌicstꞌi ucxtin ju jantu sok ixlakꞌoxi ju tuꞌuꞌ lhamakꞌan.
7 Chai ja va a ti yuchach ju Dios jantu caꞌalakꞌoxiniyaꞌ ju ixlhamakꞌanꞌan ju ixlapanacni ju asacxtuta ju yuchi acsni tatapainini chux tuncujun chai chux atatsꞌisni.
Tꞌas anonaꞌitꞌit.
Ja jantu sai catiꞌalakꞌoxinilh ju ixlhamakꞌanꞌan.
8 Iclajunau ni vatsꞌalhti caꞌaꞌaktaijuyaꞌ.
Pus mas chunch ju canaviyaꞌ ju Dios para ja acꞌalhitajuyaꞌ ju yuꞌunch ju vasalh quintalhilaksi acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
Ju fariseo chai ju achꞌiniꞌ
9 Ju Jesús ajuni ju ani chivinti ixlacata ju yuꞌunch ju ixtanajun ni lackꞌoxin lapanacni ixtajunita chai jantu tuꞌu ixtalhiulai ju aliꞌin.
Naulhch:
10 ―Pumatꞌuiꞌan lapanacni taꞌalh lacpujitat tꞌachivinin ju Dios.
Ju pumatam fariseo ixjunita chai ju pumatam achꞌiniꞌ ixjunita.
11 Pus ju anuꞌ fariseo taya chai tsuculh juniniꞌ ju Dios ta yu ixjunita.
Naulh:
“Icjunan lakꞌailaktsꞌiuch ji Dios ni jantu chun icjunita tachi ju aliꞌin lapanacni.
Pus ju yuꞌunch va akꞌalhonin tajunita chai aꞌokxchokꞌonin chai va tatꞌatsucui ju jantu ixꞌamachakaꞌan.
Nin chunch icjunita tachi ju ani ya achꞌiniꞌ.
12 Ju quitꞌin ictascajai paktꞌui ju tamin semana.
Chai icxtꞌakꞌa ju lacpujitat lactsꞌunin tachi chun ju iclhajai”.
13 Chunch ju naulh ju anuꞌ fariseo.
Para ju achꞌiniꞌ makat ixyacha.
Chai ju yuchi jantu lana ixlacaꞌamputun ju lactꞌiyan.
Va ixtanquilhacsacan ni chunch ju ixlacan ju acsni ni tuꞌuꞌ ixlhixcani ixꞌalhunutꞌan.
Chai ju yuchi ixnajun:
“Ji Dios lamapainin aqꞌuiꞌaktꞌaiꞌutꞌich ni na icꞌalactuꞌunuꞌ”.
14 Pus iclajunau ni Dios laktsꞌilh ni soknicꞌa ju anuꞌ achꞌiniꞌ acsni anchokolh laꞌixchakaꞌ.
Ju fariseo jantu.
Pus chunch ju pulaktsꞌincalh ju anuꞌ achꞌiniꞌ ni calalacatꞌicstꞌicanaꞌ va tichi chavaich ju lakꞌayachokocan isꞌakstu.
Para va tichi chavaich ju calalacatꞌicstꞌichokocalh isꞌakstu pus ju yuchi calakꞌayacanaꞌ.
Ju Jesús sqꞌuinlh ixlacataꞌan ju askꞌatꞌan
15 Chai alhiminicalh ju askꞌatꞌan ju Jesús ni caꞌamokslanilh ixmacaꞌ laꞌixlacatunaꞌan chai catapaininilh ju Dios ixlacataꞌan ni kꞌox catatsuculh.
Para acsni taꞌalaktsꞌinilh ju ixꞌamamakaꞌui pus taꞌalackꞌaima ju ixtalhichaꞌan ju isꞌaskꞌatꞌan.
16 Para ju Jesús atꞌasanilh ju askꞌatꞌan chai chani ajuni ju ixꞌamamakaꞌui:
―Amacꞌaꞌuntꞌit ju askꞌatꞌan.
Chach quintalakmilh.
Jantu asaspꞌitꞌit ni quintalhilaksich juyuꞌunch.
Chai va tichi chavaich ju aquilhilaksiyaꞌ tachi ju quintalhilaksi ju ani tayanalh askꞌatꞌan yuchi ju lai catanuyanta ju lactꞌiyan.
17 Pus slivasalh ju iclajunau.
Tachi chun ju lapanacni ju jantu quilhilaksi ju quitꞌin tachi ju tam askꞌatꞌa lhilaksi ju ixpai pus jantu tavanan lai catitanu junta lhinajun ju Dios ju lactꞌiyan.
Tam makꞌaliꞌ tꞌachivinilh ju Jesús
18 Chai pumatam xakꞌai sacmilh ju Jesús.
Junich:
―Amamakaꞌunuꞌ ju uxintꞌi na kꞌox lapanacꞌat.
Tijuch ju lai acnavi ni caꞌalilh ju quiꞌatsucunti ju jonkꞌalhita.
19 Chai ju Jesús junich:
―Ju uxintꞌi ni naꞌun ni va iclapanac pus tajuch ni va qꞌuiꞌuni ni ickꞌox.
Jantu xamatiꞌ ju kꞌox.
Va yuchi ju Dios.
20 Ju uxintꞌi cꞌatsꞌaich tuchi najun lamilhamapꞌaksinꞌan.
Najun ni jantu atꞌatsꞌucꞌu ju jantu miꞌamachakaꞌ.
Jantu amaknitꞌi xamatiꞌ.
Jantu akꞌalhonan.
Jantu anauch taꞌaklhtamat chivinti ixlacata akꞌantam.
Atꞌalhoninch ju mimpai chai ju minatich.
21 Pus ju anuꞌ xakꞌai junich:
―Tachi chun ju ani taxtokni icmuctaxtukꞌota tus quilhitalacatꞌicstꞌin.
22 Pus ju Jesús acsni kꞌasmatnilh ju ixchivinti junich:
―Va lakatam taxtokni ju tꞌimakꞌancꞌacxniyan.
Astꞌakꞌochiꞌ chux ju miꞌalinta chai ju tumin ju amaxtꞌuyaꞌ axtꞌaknin ju quilhpatinin.
Ju chunch ni caꞌalinach ju mimakꞌalit ju lactꞌiyan.
Chai acsni anavikꞌoyaꞌ chux ju ani pus atꞌatꞌich.
Aqꞌuinchꞌakꞌokꞌach.
23 Para ju yuchi acsni kꞌasmatnilh ixchivinti Jesús pus slivasalh na amakꞌaninilh ni na kꞌox makꞌaliꞌ ixjunita.
24 Chai acsni laktsꞌilh ju Jesús ni na ixꞌamakꞌanininta pus naulh:
―Slivasalh na lhixcai ni lai catanu lactꞌiyan tam makꞌaliꞌ.
25 Tachi ju tuꞌuꞌ camello ni jantu lai catitapasalh junta tilhucucu ju macscat pus vana va chun tam makꞌaliꞌ.
Ju yuchi jantu lai catiꞌalh tus lactꞌiyan.
26 Pus ju ixtakꞌasmatꞌa ju ixchivinti tajunich:
―Ni na xcai tatakꞌalhtaxtui ju makꞌalinin pus tis chavaich ju lai catakꞌalhtaxtulh.
27 Para ju Jesús ajunich:
―Ju va lapanac aktsꞌiya palai tuꞌuꞌ lhiulai ju tuꞌuꞌ makꞌalit.
Palai jantu ixtaxtokni Dios.
Para ju Dios lai mapaxani ixꞌatalacpastꞌacꞌat.
28 Pus ju acsnich ju Pitaluꞌ junilh ju Jesús:
―Pus ju quijnan icmaconkꞌotauch chux quintaxtokni quincꞌan chai iclachꞌakꞌokꞌatauch ju uxintꞌi.
29-30 Chai ju Jesús ajuni:
―Pus slivasalh ju iclajunau.
Va tichi chavaich ju tamacajunta ixchakaꞌ u ixpai u ixnati u ixꞌalakꞌavin u ixꞌamachakaꞌ u isꞌaskꞌatꞌan va ixlacaꞌatalh ni lhinajun ju Dios laꞌisꞌatsucunti chai chunch ju xalacasqꞌuin ju yuchi pus palai na lhu ju caꞌamaklhtayananaꞌ ju chavai acsni tꞌajuncaꞌ ju ani chai ju astan caꞌamaklhtayananaꞌ ju isꞌatsucunti jonkꞌalhita.
Ju Jesús najun ni caniyaꞌ
31 Ju Jesús alacatam alhiꞌalh ju ixpumacautꞌuiꞌan chai ajunich:
―Ju chavai caꞌanauch ju lakꞌachakꞌan Jerusalén.
Chai caꞌuctaxtuyanta tachi chun ju taxtokni ju tatsꞌokꞌula ju makꞌaniya lapanacni ju ixtanajun ixchivinti Dios.
Caꞌuctaxtuyaꞌ tachi chun ju taꞌatsꞌoknulh ju quilacata quitꞌin ju quimalakachatachilh ju Dios ni lapanac actsucuyaꞌ ju ani.
32 Pus acmakꞌaxtakcananta laꞌixmacaꞌan ju yuꞌunch ju jantu quintꞌaꞌisraelitanin tajunita.
Chai aquintalhitsꞌiꞌinach.
Chai aquintajunach macxcai chivinti.
Chai aquintalakachujvayach.
33 Chai astan acsni aquintalakanekmakꞌoyach pus aquintamakniyach.
Para ju ixlhilakatꞌutu avilhchan aclokꞌonchokoyaꞌ.
34 Para ju ixꞌamamakaꞌui ju Jesús lana jantu ixtamachakxai ju ani chivinti.
Lana jantu ixtacꞌatsai tuchi ixnajun ju Jesús.
Jantu lai ixtapastꞌacꞌa tuchi canomputulh ju chivinti ju xaꞌalacjuni ju Jesús.
Palaich navicalh pumatam alakꞌachꞌix
35 Pus acsni vanin ixchaꞌamputun ju Jesús ju lakꞌachakꞌan Jericó pus pumatam alakꞌachꞌix ixvi laꞌixquilhtuꞌ ti.
Isqꞌuinch ju tumin.
36 Chai ju yuchi acsni kꞌasmatlich ni ixtatꞌajun tapasanin na lhu lapanacni pus asacminilh tichi chavaich.
37 Pus tajuni ni ixtꞌajun tapasanaꞌ ju Jesús amachakaꞌ Nazaret.
38 Pus ju acsnich na pꞌas ju chivinilh ju anuꞌ alakꞌachꞌix chai junilh ju Jesús:
―Jesús istsꞌalhꞌat ju kꞌai ucxtin David.
Lamapainin aqꞌuiꞌaktꞌaiꞌutꞌich.
39 Para ju ixtaꞌapꞌulananta takꞌailich.
Tajuni ni va sek catavi.
Para va apalai pꞌas ju ixchivinin.
Ixnajun:
―Ji istsꞌalh David lamapainin aqꞌuiꞌaktꞌaiꞌutꞌich.
40 Pus ju acsnich ju Jesús lana taya.
Chai lhinaulh ixꞌica.
Chai acsni lakchaꞌalh pus sacmilh.
Junich:
41 ―Tijuch ju acnaviniyan.
Chai ju yuchi junich:
―Quiꞌucxtin va icꞌalacꞌavamputun.
42 Chai ju Jesús junich:
―Alacꞌavanch.
Pus laich alacꞌavanan va ixlacaꞌatalh ni xaqꞌuilhilaksich.
43 Pus lana alacꞌavanalh chai chꞌakꞌokꞌalh ju Jesús.
Ixlakꞌayaꞌanta ju Dios ju lacati.
Chai chux ju lapanacni vachuꞌ talakꞌayalh ju Dios acsni talaktsꞌilh.