―Jantu tavanan ju jantu caꞌalilh ju pukꞌalhkꞌoscan.

Para painich ju anuꞌ lapanac ju amakꞌalhkꞌosnun.

2 Palai kꞌox caꞌixva ju ixlacata ni caꞌixpixtuchꞌimucꞌacalh ju tsasnatpuchꞌipi chai caꞌixmacaꞌancalh lacaꞌalama acsni tucaꞌ ixmakꞌalhkꞌosui tam xamatiꞌ.

Palai na macxcai cava ni camakꞌalhkꞌosu tam xamatiꞌ ju jantucaꞌ kꞌox quilhilacaꞌanta.

3 Alhistꞌacchꞌokꞌocꞌantꞌit miꞌakstuꞌan.

Chai ni calactuꞌuyan tam milakꞌau pus akꞌaich.

Chai ni lhilatolai ni alactuꞌunulh chai najun ni jantu catailhiꞌanaꞌ pus amacꞌacxaninch.

4 Mas paktujun calactuꞌun ju tam vilhchan chai paktujun ju calakmin ju tam vilhchan chai cajunin ni alactuꞌun chai catapaininiyan ni amacꞌacxaninch chai najun ni jantu canavichokoyaꞌ pus amacꞌacxaninch.

5 Chai ju ixtamalakachan ju Jesús tajuni:

―Aquilaꞌaktaijuyau ni lai palai aclalhilaksiyau.

6 Para ju Jesús ajuni:

―Ju satalhtsꞌi mostaza na lacatꞌicstꞌi para lakꞌajunta chai astan kꞌai qꞌuiu jun.

Pus vana va chun ju uxijnan.

Mas va lacatsꞌunincaꞌ ju quilalhilaksiyau para ni vasalh quilalhilaksiyau pus laich aꞌunaꞌitꞌit ju ani makakꞌai qꞌuiu ni catatipꞌulhulhch.

Caꞌalh lacaꞌalama.

Chai catalacaꞌiniyanch.

7 Ju pumatam milhiꞌuxijnan laich caꞌalilh ju ixlapanac ju caꞌalhoknulh u camalhistacni ju ixborregojni.

Pus ju yuchi acsni caminchalh laꞌixlhichꞌalhcat ja laich aꞌun ni soko catavi lacamixa chai cavailh.

8 Ca jantu.

Alai aꞌunaꞌich ni calakꞌoxiniyan ju mivaiti.

Pus ju yuchi calakꞌoxiyaꞌ ju ixpumpuꞌ chai caꞌiniyanch ju mivaiti tus acsni alhilayaꞌich.

Tus acsnich aꞌunaꞌich ni cavenaꞌ ju yuchi.

9 Chai astan acsni navikꞌota chux tuchi ixlhiꞌunich pus ju uxintꞌi jantu uni lakꞌailaktsꞌiuch.

10 Pus vana va chun lamiꞌatsucuntiꞌan ju uxijnan.

Acsni navikꞌotꞌatꞌit tachi chun ju ixtalhijuntan ju Dios pus va anaꞌuntꞌit ni jantu kꞌox xalapanacni untꞌatꞌit ni jantu tuꞌuꞌ atumpa ju xanaviyatꞌit.

Va yuchi ju ixlhiꞌuncꞌantꞌatꞌit ixnavica.

11 Pus ju Jesús acsni ixꞌanta ju lakꞌachakꞌan Jerusalén pus puꞌalh junta mactai ju xaꞌestado Samaria chai ju xaꞌestado Galilea.

12 Pus acsni tanucha lakatam lakꞌachakꞌan pus tamilh pakxtoknin pumacau lapanacni ju na ixtalacatsꞌitsꞌita chai ju istsꞌitsꞌiꞌan va ixtapuchꞌiꞌan.

Para ju yuꞌunch ixlhimakat tataya.

13 Chai pꞌas tachivinilh.

Tajuni ju Jesús:

―Jesús amamakaꞌunuꞌ.

Lamapainin aquilaꞌaktaiju ju quijnan.

14 Chai ju Jesús acsni alaktsꞌilh pus ajunich:

―Apꞌinchitꞌit talacasuninin ju palijni.

Pus chunch ixtalhilanita ju lapanacni acsni ixtalacatsꞌitsꞌita chai astan palaich ixtajun.

Pus ju anuꞌ ixpumacauꞌan taꞌalh.

Chai acsni ixtaꞌanta pus lana palaich tava.

15 Pus ju pumatam sia lhiyuꞌunch acsni laktsꞌilh ni palaich ixjunita pus taspꞌitchokolh.

Minchokolh junta ixya ju Jesús.

Chai na pꞌas ixchivinin acsni lakꞌayalh ju Dios.

16 Chai lana taquilhputanilh ju lacatꞌun junta ixchꞌantaiti ju Jesús chai junilh lakꞌailaktsꞌiuch.

Chai ju yuchi amachakaꞌ ju xaꞌestado Samaria ixjunita.

17 Pus ju acsnich ju Jesús naulh:

―Ja jantu pumacau ju palai xatajun.

Tas anchach ju xataꞌan ju ixpumanajatsiꞌan.

18 Ja jantu xamatiꞌ ju xataspꞌitacha ni laich catalakꞌaya ju Dios.

Ja va yuchi ju ani ju jantu quintꞌaꞌamachakꞌan junita.

19 Pus ju acsnich ju Jesús chani xajuni ju anuꞌ ju palaich xajun:

―Atꞌaich.

Aꞌinchich.

Palaich xaꞌun ni vasalh xaqꞌuilhilaksi.

20 Chai ju fariseonin tasacmi tavananch ju cachinaꞌ ju avilhchan acsni calhinonaꞌ ju Dios.

Chai ju Jesús ajunich:

―Jantu lai laktsꞌincan acsni chin ju avilhchan acsni calhinonaꞌ ju Dios.

21 Nin yuchi ni lai catanaulh:

“Alaktsꞌich.

Ani ya”.

U “Alaktsꞌich.

Anuꞌ vilhcha”.

Jantu lai chun canoncalh ni laꞌisꞌatsucuntiꞌan ju lapanacni ju lhinajun ju Dios.

22 Chai ajuni ju ixꞌamamakaꞌui:

―Caminaꞌ avilhchan acsni alaktsꞌimpꞌutꞌunaꞌitꞌit ju anuꞌ pantsꞌiquis acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.

Para jantu acs ju alaktsꞌinaꞌitꞌit.

23 Pus ju aliꞌin catajunan:

“Alaktsꞌintꞌit ju ani.

Ca va nomputun ni caminchokoyaꞌ”.

U catajunan:

“Alaktsꞌintꞌit ju anuꞌ ju tꞌajun tapasanaꞌ”.

Para jantu apꞌitꞌit nin yuchi ni lai achꞌakꞌokꞌatꞌit.

24 Pus ju tuꞌuꞌ makꞌalipniꞌ va tam pantsꞌiquis mapulhcukꞌojui ju ixlhilacaputsꞌun ju lactꞌiyan chai makat laktsꞌincan.

Pus vana va chun cajunaꞌ acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.

Va tam pantsꞌiquis acchinaꞌ chai chux aquintalaktsꞌinaꞌ.

25 Para jantu chavai lana ju catapasayaꞌ ju chunch.

Alai tasqꞌuini ni pꞌulhnan aclhimakꞌalhkꞌajnanaꞌ lhu taxtokni.

Chai ju lapanacni ju tatꞌajun ju chavai jantu aquintalhilaksiyaꞌ.

26 Tachi ju ixtatꞌajun ju lapanacni acsni ixtꞌajun ju Noé pus vana va chunch catajunaꞌ acsni acminchokoyaꞌ ju quitꞌin ju quimalakachatachilh Dios ni lapanac actsucuyaꞌ ju ani.

27 Pus va chunch ju tatailhiꞌalh tachi aktsꞌiya ixtalai.

Ixtalacvajin.

Ixtaꞌakꞌotnun.

Ixtatamakꞌaxtꞌokꞌach chai ju chakolun ixꞌaꞌican.

Chai chunch ju talalh tus acsni chilh ju avilhchan ni tanu ju Noé ju laꞌixbarco.

Chai milh ju akmuxtut chai amamuxtukꞌo tachi chun ju yuꞌunch.

28 Chai chunch vachuꞌ talalh ju lapanacni ju ixtatꞌajun acsni ixtꞌajun ju Lot.

Tatailhiꞌalh isꞌatsucuntiꞌan tachi aktsꞌiya ixtalai.

Ixtavajin chai ixtaꞌakꞌotnun chai ixꞌatamonan chai istaꞌastꞌanan chai ixtaꞌachꞌananan chai ixtayajui ixchakaꞌan.

29 Para ju avilhchan acsni taxtucha ju Lot ju lakꞌachakꞌan Sodoma pus lana mintacha lactꞌiyan ju jipi chai ju azufre.

Chai lana amaknikꞌo ixchuxꞌan ju amachakꞌan anch.

30 Pus vana va chun catapasayaꞌ acsni actalacasuchokoyach ju quitꞌin ju quimalakachatachilh Dios ni lapanac actsucuyaꞌ ju ani.

31 Pus ju acsnich ju vilhcha laꞌisꞌakstiꞌ ixchakaꞌ jantu catitakꞌalhtaju chai catanu laꞌixchakaꞌ ni va caꞌiputulh ju ixtaxtokni.

Vana va chun ju tꞌajun chꞌalhcatnaꞌ lacacuxtu.

Jantu catiminchokolh laꞌixchakaꞌ iniꞌ tuꞌuꞌ.

32 Apꞌastꞌactꞌit ni matsat xatapalai ixꞌamachakaꞌ ju Lot acsni talakꞌaspꞌitlh.

33 Pus va tichi chavaich ju va yuchi canavi cuenta ju ixmaktasqꞌuinit ju isꞌatsucunti pus jantu catiꞌalilh ju isꞌatsucunti jonkꞌalhita ju lactꞌiyan.

Para va tichi chavaich ju jantu va yuchi canaviyaꞌ cuenta ju tuchi maktasqꞌuini laꞌisꞌatsucunti para alai canaviyaꞌ cuenta ixtaxtokni Dios pus ju yuchi caꞌalinaꞌ isꞌatsucunti ju jonkꞌalhita ju lactꞌiyan.

34 Acsni acminchokoyaꞌ ju quitꞌin pus cataꞌalinaꞌ ixtꞌiyunꞌan ju kꞌaixtam tamanalh lacaputaman ju anuꞌ atatsꞌisni.

Ju pumatam calhiꞌancanaꞌ ju lactꞌiyan chai ju pumatam catamaconach.

35 Chai ixtꞌiyunꞌan tꞌacunin ixlhiꞌacsni catatꞌonaꞌ squitinin.

Ju pumatam calhiꞌancanaꞌ.

Ju pumatam catamaconach.

36 Ixtꞌiyunꞌan lapanacni catachꞌalhcatnanaꞌ ju lacacuxtu.

Ju pumatam calhiꞌancanaꞌ.

Chai ju pumatam catamaconach.

37 Pus ju ixꞌamamakaꞌui tajunich:

―Tas anchach ji ucxtin ju catapasayaꞌ ju chunch.

Chai ju yuchi ajuni lakatam chivinti ju ixnoncan ju acsni:

―Vanta anchach ju catamayach ju lacatuna pus anchach ju catatakꞌaixtꞌokꞌaꞌ ju chꞌunin.

Ju chunch va nomputun ni aktsꞌiya caꞌamamakꞌalhkꞌajnicanaꞌ ju tachi ju va tanita tajunita laꞌixmacni Dios ni jantu talhilaksi ju yuchi.