―Ixꞌalin pumatam lapanac ju na makꞌaliꞌ ixjunita.

Chai ju yuchi ixꞌalin pumatam ju ixlhistacni ju ixꞌalinta ju ixꞌucxtin.

Chai ju ani chivimakꞌancalh laꞌixꞌucxlacapuꞌ ju ixꞌucxtin.

Va juni ni va ixlhakꞌamanani ju ixtumin ju ixꞌucxtin.

2 Pus ju yuchi tꞌasanilh ju ixlapanac chai junich:

“Tijuch ju ani ju ickꞌasmatꞌa ju milacata.

Aqꞌuiꞌunch tas junitach ju chavai ju quiꞌalinta ni jantu vana lai atꞌilhistꞌactꞌi”.

3 Pus ju anuꞌ alhistacnaꞌ chani pastaclh laꞌixꞌalhunut.

“Tas aclayach ju chavai ni va quintaiꞌini ju ixlhistꞌacꞌa ju ixchakaꞌ ju quiꞌucxtin.

Pus matiꞌ ju quintachaput ni lai actiꞌalacpucutunulh.

Chai na lhimaxan ni acꞌalacapusacnalh.

4 Iccꞌatsai tuchi aclayaꞌ ni aquintaꞌamaklhtayananaꞌ pantsꞌiquis laꞌixchakaꞌan ju lapanacni acsni actaiꞌinicanaꞌ ju quilhichꞌalhcat”.

5 Pus tꞌasanilh pumatamin ju ixtalhiꞌani ju ixꞌucxtin chai junilh ju xapꞌulhnan:

“Tas chunchach ju lhipꞌini ju quiꞌucxtin”.

6 Chai ju yuchi junich:

“Tam cientos alhcanti ju aceite”.

Pus ju anuꞌ alhistacnaꞌ ixjunita junilh:

“Anich ma ju xaꞌalhiqui.

Va tsꞌalhti atꞌaꞌulhch chai atsꞌokꞌulatꞌi ju sastꞌi junta najun ni va tꞌupꞌuxamcau alhcanti ju lhipꞌini”.

7 Astan ju anuꞌ alhistacnaꞌ junilh ju akꞌantam:

“Ju uxintꞌi tas chunchach ju lhipꞌini”.

Chai ju yuchi junilh:

“Tam cientos alhcanti ju trigo iclhiꞌani”.

Chai ju xalapanac juni:

“Anich ma ju xaꞌalhiqui.

Anavitꞌi ju sastꞌi junta najun ni va ochenta alhcanti ju lhipꞌini”.

8 Pus ju xaꞌucxtin naulh ni aktsꞌiya na ixꞌacꞌatsananta ju anuꞌ aꞌokxchokꞌonuꞌ xalapanac ni cꞌatsalh ta yu capuꞌaktaijucanaꞌ astan mas jantu sok tachi ju xanavi.

Pus chunch ju xaꞌajuni ju lapanacni ju Jesús chai astan nonchokopa:

―Ju lapanacni ju jantu quilhilaksi aktsꞌiya palai tacꞌatsai ta yu lai tatꞌanavi tuꞌuꞌ ju ixtꞌalapanacni.

Palai jantu na chun talai ju yuꞌunch ju tamispai ixchivinti Dios.

9 Pus ju quitꞌin iclajunau ni apꞌuꞌaktꞌaiꞌutꞌit ju aliꞌin ju mintuminꞌan.

Pus ju chunch caꞌalinaꞌ ju miꞌamigojniꞌan va ixlacata ju xatumin ju ani lacamunutpaꞌ ju xapꞌuchꞌalhcꞌatnanatꞌit ju uxijnan mas na tapuꞌalactuꞌunun ju aliꞌin.

Ju chunch acsni tavanan aniyaꞌitꞌit pus ju yuꞌunch lhikꞌach cataꞌamaklhtayanananch lacachakaꞌ lactꞌiyan junta jonkꞌalhita.

10 Pus ju jantu aꞌokxchokꞌonun ixlacata ju tuꞌuꞌ mas va lacatsꞌunin pus vachuꞌ jantu aꞌokxchokꞌonun ixlacata ju tuꞌuꞌ lhu.

Chai ju aꞌokxchokꞌonun ixlacata ju tuꞌuꞌ lacatsꞌunin pus vachuꞌ aꞌokxchokꞌonun ixlacata ju na lhu.

11 Pus ni na ixꞌaꞌokxchꞌokꞌonun ixlacata ju xamakꞌalit ju ani lacamunutpaꞌ pus tis chavaich ju catalhilaksiyan chai cataxtakniyan ju vasalh makꞌalit.

Yuchi ni lai anaviyaꞌitꞌit ju ixlhichꞌalhcat ju Dios.

12 Pus ju mintuminꞌan ju ani lacamunutpaꞌ va tamachꞌixtaknitan ju Dios.

Jantu miꞌanuꞌan.

Chai ni ixpꞌuꞌaꞌokxchꞌokꞌonunatꞌit ju anuꞌ tumin mas jantu miꞌanuꞌan pus ju Dios jantu catitaxtaknin ju palai kꞌai ixmakꞌalit ju miꞌanuꞌan caꞌixva ju ixjonkꞌalhi lactꞌiyan.

13 Ju tam xalapanac jantu lai pumatꞌui cativa ju ixꞌucxtin ju vaktam.

Pus aktsꞌiya camapainiyaꞌ ju pumatam chai jantu tuꞌuꞌ calhiulayaꞌ ju akꞌantam.

U ni jantu para aktsꞌiya calhilaksiyaꞌ ju pumatam chai jantu tuꞌuꞌ canaviyaꞌ cuenta ju apumatam.

Pus vana va chun ju uxijnan.

Jantu lai atꞌimapꞌainitꞌit ju Dios chai vana amapꞌainitꞌit ju tumin.

14 Pus ju fariseonin na ixtamapaini ju tumin.

Chai acsni takꞌasmatlh tachi chun ju ani chivinti pus va ixtalhitsꞌiꞌinch ju Jesús.

15 Para ju yuchi ajunich:

―Ju uxijnan tꞌalacꞌasuyatꞌit laꞌixꞌucxlacapuꞌan ju lapanacni tachi ju na va soknicꞌa untꞌatꞌit.

Para ju tuꞌuꞌ lamiꞌatsucuntiꞌan ju kꞌox talhiulai ju mintꞌalapanacniꞌan ju Dios va lhitsꞌisi ni tamispaniyan ju miꞌalhunutꞌan ju yuchi.

16 Acsni tucaꞌ ixtꞌajun ju Xivan ju ixꞌamakpaxanaꞌ pus ju lapanacni ixtaquiclacaꞌi ju ixlhamapꞌaksin ju Moisés chai ixchivintiꞌan ju lapanacni ju ixtanajun ixchivinti Dios.

Para tus acsni milh ju Xivan tus chavai pus ju lapanacni ajuncan ni jantu anch lacalhamapꞌaksin ju alin ju atsucunti jonkꞌalhita.

Alai va lhinomputun ju Dios laꞌisꞌatsucuntiꞌan ju lapanacni.

Chai ni takꞌasmatꞌa ju chunch chivinti pus pumalhu slivasalh tanavi cuenta ixlhichux ixꞌalhunutꞌan ni calhinaulh ju Dios laꞌisꞌatsucuntiꞌan.

17 Para mas tamch ju ajuncan ju lapanacni ju chavai para aktsꞌiya jonkꞌalhita ju makꞌaniya ixchivinti Dios.

Pus palai jantu xcai ni catsꞌankꞌa ju lactꞌiyan chai ju lacatꞌun.

Palai xcai ni jantu lhitapalai cava ju tuꞌuꞌ laꞌixlhamapꞌaksin Dios mas va lacatsꞌunin cava.

18 Va tichi chavaich ju camaconaꞌ ju ixꞌamachakaꞌ chai catꞌatsucuchokoyaꞌ akꞌantam pus alactuꞌununta.

Chai ju catꞌatsucuchokoyaꞌ ju va maconcanta pus vachuꞌ alactuꞌununta.

19 Pus ixꞌalin pumatam jokꞌat ju na makꞌaliꞌ ixjunita.

Chai ju yuchi ixlakchꞌi ju smumu ixpumpuꞌ tachi ixtalakchꞌi ju ucxtinin.

Vachuꞌ ixlakchꞌi ju lackꞌox ixpumpuꞌ ju lino ixjuncan.

Chai chux avilhchan ixnavi ju kꞌai lacvaiti.

20 Chai vachuꞌ ixꞌalin pumatam quilhpatiniꞌ ju Lázaro ixjuncan.

Chai ju yuchi na ixlacatsꞌitsꞌita.

Pus ixmamacan vanin laꞌixquilhtalacxtutu ju anuꞌ makꞌaliꞌ.

21 Chai na ixꞌuputun mas va yuchi ju xaꞌatanxajnaꞌ ju ixniꞌ ju anuꞌ makꞌaliꞌ.

Chai vachuꞌ ju xkꞌoyun ixtalakmin chai istasnaunich ju ixlacatsꞌitsꞌi.

22 Pus chilh avilhchan acsni nilh ju anuꞌ quilhpatiniꞌ chai talhiꞌalh ju anquilhnin ju lactꞌiyan junta vachuꞌ vilhcha ju Abraham.

Chai vachuꞌ nilh ju anuꞌ makꞌaliꞌ.

Chai macnucalh.

23 Pus ju anuꞌ makꞌaliꞌ na ixmakꞌalhkꞌajnan junta taꞌan ju tanita ju jantu talhilacaꞌanta ju Jesús.

Chai alacꞌavanalh chai laktsꞌilh ju Abraham ixlhimakat chai ju Lázaro ni anch ixvi vachuꞌ.

24 Pus ju acsnich ju yuchi pꞌas chivinilh.

Junich ju Abraham:

“Quimpai Abraham lamapainin aqꞌuiꞌaktꞌaiꞌutꞌich ju quitꞌin.

Amalakꞌachꞌachitꞌich ju Lázaro.

Chach quimilh kꞌavaniniꞌ lacaxcan ju quisimakꞌat mas va laꞌixkꞌelili ixmacaꞌ ni aquimatsꞌucꞌuncꞌulhch ni na ictꞌajun makꞌalhkꞌajnanch ju ani lacajipi”.

25 Para ju Abraham junich:

“Quintsꞌalh apꞌastꞌactꞌich ni amaklhtꞌayanantꞌa chux ju kꞌox mintaxtokni acsni ixtꞌaꞌuncaꞌ.

Para ju Lázaro na ixmakꞌalhkꞌajnan.

Para ju chavai ju yuchi alin ju ixkꞌachat ju ani chai ju uxintꞌi makꞌalhkꞌajnan.

26 Chai jantu va yuchi.

Para vachuꞌ junta vilatꞌit ju uxijnan quilhpamacatutam junta pucutucanta.

Ju chunch ju tataxtuputun ju ani ni va cataꞌamputulh ju anch jantu lai.

Nin lai cataxtucha xamatiꞌ ju camimputunach ju ani”.

27 Pus ju acsnich ju anuꞌ makꞌaliꞌ junich:

“Pus na ictapaininiyan ji quimpai.

Amalakꞌachꞌatꞌich ju Lázaro laꞌixchakaꞌ ju quimpai.

28 Tatꞌajuncaꞌ ixpumaquisiꞌan ju quiꞌalakꞌavin.

Chach ancha ju yuchi ajuniniꞌ ju ixchivinti Dios ni jantu catamilh ju yuꞌunch vachuꞌ ju ani junta icmakꞌalhkꞌajnan”.

29 Para ju Abraham junich:

“Ju yuꞌunch tapacxanta ju ixchivinti ju Moisés chai ixchivintiꞌan ju lapanacni ju ixtanajun ixchivinti Dios.

Chach takꞌasmatniyanta ju yuꞌunch”.

30 Para ju makꞌaliꞌ junich:

“Janti quimpai Abraham.

Para ni xamatiꞌ ju nita calokꞌonchokolh chai caꞌalakꞌalh pus catamaconaꞌ ju ixꞌalactuꞌuntiꞌan”.

31 Para ju Abraham junich:

“Ni jantu takꞌasmatputun ixchivinti ju Moisés chai ju lapanacni ju ixtanajun ixchivinti Dios pus vana jantu camalacaꞌinicalh mas va calokꞌonchokolh tam xamatiꞌ ju nita chai calakꞌalh”.