2 Para ju fariseonin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin ixtalhichivinin ju Jesús.

Ixtanajun:

―Ju yuchi kꞌox alactꞌalalhiꞌan ju alactuꞌunin chai alactꞌavajin ju yuꞌunch.

3 Pus ju acsnich ju Jesús ajunich ju ani chivinti ju ixꞌapumavasalaniputun tuchi ixꞌamalaniputun.

Ajunich:

4 ―Ju pumatam milhiꞌuxijnan ni capacxalh tam cientos ixborregojni chai ni camakꞌatsꞌankꞌa lakatam ja jantu calacmacoyoyaꞌ ju noventa y nueve junta tatꞌajun venin chai caꞌalh puxconaꞌ ju istsꞌankꞌata tus calhitajuyaꞌ.

5 Chai acsni calhitajuyach pus camucꞌayaꞌ laꞌixꞌakxpꞌun chai calhiminaꞌ chai na cakꞌachanach.

6 Chai acsni cachinach laꞌixchakaꞌ pus caꞌalactꞌasaniyaꞌ ju ixꞌamigojni chai ixtꞌatolhnin chai caꞌalacjunach:

“Quilatꞌakꞌachauch ni iclhitajulh ju quimborrego ju xacmakꞌatsꞌankꞌata”.

7 Pus iclajunau ni vana va chun ju lactꞌiyan.

Palai calhikꞌachancanaꞌ ju tam alactuꞌunuꞌ acsni macajun ju ixꞌalactuꞌunti.

Palai jantu calhikꞌachancanaꞌ ju noventa y nueve lapanacni ju tanajun ni na soknicꞌa junita ju isꞌatsucuntiꞌan chai ixlhiyuchi jantu tasqꞌuini ni catamacaulh ju ixꞌalactuꞌuntiꞌan.

8 Ju tam chakoꞌulh ju capacxalh lakacau tumin ni camakꞌatsꞌankꞌa ju lakatam ja jantu caxavayaꞌ ju ixmaclhcu chai caꞌapꞌalhnanach laꞌixchakaꞌ.

Lacsni lacsni capuxcoyaꞌ tus calhitajuyaꞌ.

9 Chai acsni calhitajuyach caꞌalactꞌasaniyaꞌ ju ixꞌamigojni chai ju vanin alactꞌavi chai caꞌalacjunach:

“Aquilatꞌakꞌachauch ni iclhitajulh ju quintumin ju xacmakꞌatsꞌankꞌata”.

10 Pus iclajunau ni vana va chun talhikꞌachan ju ixꞌanquilhnin ju Dios acsni camaconach ixꞌalactuꞌunti ju tam alactuꞌunuꞌ.

11 Chai ju Jesús axakꞌalachokopa ju lapanacni.

Ajunich:

―Pumatam lapanac ixꞌalin ixtꞌiyunꞌan istsꞌalan.

12 Chai ju salacatꞌicstꞌi istsꞌalh junilh ju ixpai:

“Quimpai aqꞌuilhvakninch ju miꞌalinta ju quiꞌanuch cajunach”.

Pus ju ixpai alaclhvaknilh.

13 Chai jantu makꞌan va ju salacatꞌicstꞌi istsꞌalh makꞌaixtoklich ju ixꞌalinta.

Alh makat alacatam lacatꞌun.

Chai ju anch quilhakꞌamanankꞌo lacaꞌalactuꞌunti tachi chun ju ixtaknicanta.

14 Chai acsni lhakꞌamanankꞌo pus milh lakatam kꞌai chavan ju anuꞌ lakꞌachakꞌan chai ju yuchi tsuculh makꞌalhkꞌajnaꞌ.

15 Chai lakxcavatailich pumatam amachakaꞌ anch.

Chai ju yuchi malakacha laꞌixpotrero ni va caꞌalh alhistacnaꞌ ju ixpꞌaxnin.

16 Chai ju yuchi na ixꞌuputun mas yuchi ju ixtaꞌui ju pꞌaxnin.

Yuchi ju xatocꞌat lakatam qꞌuiu.

Para jantu xamatiꞌ xaxtakni tuꞌuꞌ nin yuchi ju anuꞌ xalhiꞌut.

17 Para acsni takꞌoxinilh ju ixꞌatalacpastꞌacꞌat pus naulh:

“Na lhu alin ju makchꞌalhcatnin ju laꞌixchakaꞌ ju quimpai chai ju yuꞌunch slivasalh na kꞌox tavajin.

Chai ju quitꞌin na icmakꞌalhkꞌajnan ju quinchavanti ju ani.

18 Alai actaxtuyach ju ani.

Aclakꞌanchokoyach ju quimpai chai acjunach:

Quimpai iclactuꞌu ju Dios chai iclactuꞌun ju uxintꞌi.

19 Pus jantu lhijun ni vanach aqꞌuilhimispꞌatꞌi ni mintsꞌalh.

Va aqꞌuilaktsꞌich tachi ju va milapanac”.

20 Pus taxtucha chai lakꞌalh ju ixpai.

Para acsni laktsꞌistucli ixlhimakat ju ixpai pus lana na mapaini.

Pus atsꞌalalakꞌalh.

Lakatanu chai puquilhchꞌuchꞌulh.

21 Para ju istsꞌalh junich:

“Quimpai iclactuꞌu ju Dios chai iclactuꞌun ju uxintꞌi.

Chai jantu lhijun ni vanach aqꞌuilhimispꞌatꞌi ni mintsꞌalh ju quitꞌin”.

22 Para ju ixpai ajunilh ju ixlapanacni:

“Vatsꞌalhti amacꞌutꞌuchitꞌit ju palai kꞌoxi pumpuꞌ chai amalakchꞌinitꞌit.

Chai amamactꞌanutꞌit lakatam mactanut.

Chai amachꞌantꞌanutꞌit ju ixchꞌanxtꞌakꞌan.

23 Chai aꞌinchitꞌit inin ju askꞌatꞌa vacax ju na kꞌonta.

Amaknitꞌitch chai calacꞌuyau chai canaviyau ju cꞌatan.

24 Chunch canaviyau ni tachi ju va ixnita ju ani quintsꞌalh para ju chavai tachi ju va lokꞌonchokolh.

Istsꞌankꞌata para ju chavai lhitajuchokocalh”.

Pus tatsuculh lhicꞌataninin.

25 Para ju xakꞌai istsꞌalh ixtꞌonachalhcaꞌ chꞌalhcatnaꞌ lacacuxtu.

Chai acsni taspꞌitcha chai chincha vanin laꞌixchakaꞌ pus kꞌasmatlich ni na asanancanch chai ni tꞌoncan lacatꞌininca.

26 Chai tꞌasanilh pumatam ixlapanac chai sacmi tuchi ju alin.

27 Chai ju yuchi junich:

“Pus minchokolhch ju mimpꞌisekꞌe chai ju mimpai lhinaulh ixmaknica ju askꞌatꞌa vacax ju na ixkꞌonta.

Chunch ju navilh ni xaminchokoi ju istsꞌalh chai jantu tuꞌuꞌ xatapasayacha chai ni kꞌox tꞌajun”.

28 Pus ju acsnich lana na talhkꞌamalh ju xakꞌai istsꞌalh chai jantu ixtanuputun laꞌixchakaꞌ.

Pus taxtulh ju ixpai chai tapaininilh ni catanu.

29 Para ju yuchi akꞌalhtayanalh.

Junich ju ixpai:

“Ju quitꞌin va ta lakachux cꞌata ictꞌonan aktaijunun.

Chai jantu tavanan ju jantu acnavi tuchꞌi qꞌuiꞌuni.

Para jantu tavanan qꞌuixtꞌaknitꞌa mas va minchivoch ni laich acꞌatꞌacꞌatanilh ju quiꞌamigojni.

30 Para acsni xaminchokoich ju ani mintsꞌalh ju xaquimacaꞌankꞌojui tuchi ju ixtꞌaknitꞌa va ixlacata ni ixtꞌaꞌucxuntꞌajun ju alactuꞌunin chakolun pus lana lhimakninin miꞌaskꞌatꞌa vacax ju na ixkꞌonta”.

31 Para ju ixpai junich:

“Quintsꞌalh ju uxintꞌi aktsꞌiya tꞌaꞌun laquimacni chai tachi chun ju quiꞌalinta sich miꞌanuꞌ.

32 Para aktsꞌiya istasqꞌuini ni acmacꞌatanilh chai caꞌalilh lackꞌachat.

Pus ju ani mimpꞌisekꞌe tachi ju va ixnita chai tachi ju va lokꞌonchokolh.

Va istsꞌankꞌata para lhitajuchokocalh”.