Ju Jesús cꞌuchꞌu pumatam lapanac
14
Pus lakatam avilhchan paꞌastacni ju Jesús alh venaꞌ laꞌixchakaꞌ pumatam xakꞌai fariseo.
Chai ju aliꞌin fariseonin na ixtalhistactꞌajun ju Jesús.
Lucas 14.1-35
2 Chai vachuꞌ anch ixya pumatam lapanac laꞌixꞌucxlacapuꞌ ju Jesús.
Chai ju yuchi va ixlacacꞌunta.
3 Pus ju acsnich ju Jesús axakꞌala ju fariseonin chai ju ixtalhatalanininta ju ixlhamapꞌaksinꞌan ju istꞌaꞌisraelitanin.
Ajunich:
―Ja lhijunch ni acꞌacꞌuchꞌunulh ju avilhchan paꞌastacni u jantu.
4 Para ju yuꞌunch jantu tuꞌuꞌ taꞌakꞌalhtayanalh.
Pus ju acsnich ju Jesús macchꞌapalh ju anuꞌ lapanac chai lana palaich va.
Chai astan malakachachokolh laꞌixchakaꞌ.
5 Chai alacjuni ju fariseonin:
―Tis chavaich ju milhiꞌuxijnan ju jantu vatsꞌalhti camacutulh mas avilhchan paꞌastacni ju mimpuru u mivacax ni catinꞌalh junta puculhucnicꞌa.
6 Pus ju yuꞌunch jantu lai tuꞌuꞌ ixtamapuspꞌitni ju ani chivinti.
Chani alatꞌit acsni kꞌailhipꞌincꞌanaꞌitꞌit junta tamakꞌaxtokcan
7 Pus ju aktam acsni tatsuculh tolhnin lacamixa pus ju Jesús alaktsꞌilh ni ixchuxꞌan ixtatolhputun lacatantsꞌi junta ixtatolai ju xalackꞌajin.
Pus yuchi alhijunilh lakatam chivinti ju ixꞌapumavasalaniputun ta yu catalalh.
Ajunich ju ixtamakvajin vachuꞌ ju yuchi:
8 ―Acsni xamatiꞌ ju catakꞌailhiꞌanan junta alin ju tamakꞌaxtoknut pus jantu anch ju atꞌolatꞌit junta tatolai ju xalackꞌajin.
Pus jantu xcai ni cakꞌailhimincalh pumatam ju palai xakꞌai.
Palai jantu ju uxintꞌi.
9 Chai ju xakꞌailhiminan ju uxintꞌi catꞌalakminan ju akꞌantam chai cajunan:
“Axtꞌakninch ju mimputolan ju ani ya lapanac”.
Pus ju acsnich na amaxananaꞌich chai apꞌinaꞌ tolhnaꞌ junta tatolai ju yuꞌunch ju palai jantu tuꞌuꞌ ixtapalhniꞌan.
10 Alai chani alatꞌit acsni jintaꞌ kꞌailhipꞌincꞌanaꞌitꞌit.
Pus anchach ju atꞌolatꞌit junta tatolai ju jantu tuꞌuꞌ ixtapalhniꞌan.
Chai ju chunch acsni catalaktsꞌinan ju takꞌailhiꞌantan laich catajunan:
“Quiꞌamigo anchach ju atꞌolaꞌ junta tatolai ju xalackꞌajin”.
Pus ju acsnich na alakꞌayacꞌanaꞌ laꞌixꞌucxlacapuꞌan ju va kꞌaixtam tatꞌatolan lacamixa.
11 Pus chunchach ju alatꞌit ni calalacatꞌicstꞌicanaꞌ va tichi chavaich ju lakꞌayachokocan isꞌakstu.
Para ju tichi tꞌalacatꞌicstꞌi pus calakꞌayacanaꞌ.
12 Vachuꞌ chani juni ju Jesús ju anuꞌ ju xakꞌailhiꞌan laꞌixchakaꞌ:
―Ju uxintꞌi acsni anaviyaꞌ ju tuꞌuꞌ kꞌai lacvaiti pus jantu va yuꞌunch ju atꞌasani ju miꞌamigojni u miꞌalakꞌavin u yuꞌunch ju milhiꞌalakꞌavin u yuꞌunch ju na makꞌalinin ju vanin alactꞌavilhtꞌi.
Pus ni chunch ju alatꞌi pus jantu xcai ni catakꞌailhiꞌanchokoyan vachuꞌ ju yuꞌunch chai ju chunch va catamapalhnichokoyan.
13 Para acsni anaviyaꞌ ju tuꞌuꞌ cꞌatan pus alai yuꞌunch ju atꞌasanitꞌi ju quilhpatinin chai ju macmututu chai ju chꞌantakꞌalhita chai ju alakꞌachꞌixnin.
14 Chai ju chunch lhikꞌach atsꞌucꞌuyaꞌ ni jantu lai catamapalhnichokoyan ju yuꞌunch.
Para amapꞌalhcꞌanaꞌ acsni catalokꞌonchokoyach ju yuꞌunch ju soknicꞌa alaktsꞌin ju Dios.
Caꞌalinaꞌ ju vaiti ju lactꞌiyan
15 Pus acsni kꞌasmatlh ju ani chivinti pumatam ju ixmakvi lacamixa pus junilh ju Jesús:
―Slivasalh lhikꞌach ju isꞌatsucunti ju camakvenaꞌ acsni cataiꞌulayaꞌ ixpuꞌucxtin ju Dios.
16 Pus ju acsnich ju Jesús juni:
―Pumatam lapanac navilh lakatam kꞌai tokꞌoxayavaiti.
Chai na pumalhu ju alactꞌasanilh.
17 Chai acsni tucanch cavencanaꞌ pus malakachalh pumatam ixlapanac ni caꞌalh atꞌasaniniꞌ ju catamakvenaꞌ.
Cajunilh:
“Ma inchitꞌit.
Ma alinch ju chavai ju vaiti”.
18 Para ixchuxꞌan tatsuculh nonin ni jantu lai catitaꞌalh.
Pus ju xapꞌulhnan junilh:
“Ictamaulh lakatam kꞌai lacatꞌun chai tasqꞌuini ni acꞌalh laktsꞌiniꞌ.
Icsqꞌuiniyan lamapainin.
Aqꞌuimacꞌacxanin ni jantu lai actiꞌancha”.
19 Chai ju apumatam junich:
“Ictamaulh lakacau vacax chai acꞌanaꞌ alaktsꞌintanunuꞌ.
Icsqꞌuiniyan lamapainin.
Aqꞌuimacꞌacxaninch ni jantu lai actiꞌancha”.
20 Chai ju apumatam junich:
“Ju quitꞌin va ictamakꞌaxtoklicaꞌ chai yuchi jantu lai actilhiꞌalh”.
21 Pus anchokolh ju anuꞌ xalapanac.
Alh juniniꞌ ju ixꞌucxtin tuchi ixtanajunch ju lapanacni.
Pus ju acsnich na talhkꞌamalh ju amachakaꞌ.
Chai junchokolh ju ixlapanac:
“Vatsꞌalhti aꞌinchich ju lacakꞌai ti chai lacalactꞌicstꞌi ti ju lakꞌachakꞌan.
Akꞌailhitꞌanaꞌich ju quilhpatinin chai ju macmututu chai ju chꞌantakꞌalhita chai ju alakꞌachꞌixnin”.
22 Chai acsni navikꞌolh ju chunch ju xalapanac pus junchokopa ju ixꞌucxtin:
“Quiꞌucxtin icnavita tachi ju xaqꞌuiꞌuni para tiꞌalincaꞌ ju tantsꞌi ju lacamixa”.
23 Chai ixꞌucxtin juni ju ixlapanac:
“Apꞌinchich ju kꞌai ti ju lacamacni chai ju macatꞌicstꞌi ti ju lacacuxtu.
Kꞌasi ajuni ju lapanacni ni catamilh.
Chach aktsamalh ju quinchakaꞌ.
24 Chunch ju anaviyaꞌ ni icjunan ni jantu xamatiꞌ ju pꞌulhnan icꞌatꞌasanilh ju caquilhcꞌatsayaꞌ ju quivaiti”.
Tuchi tamapalai ju tachꞌakꞌokꞌai ju Jesús
25 Pus na lhu lapanacni ixtatꞌaꞌanta ju Jesús.
Chai ju yuchi talakaspꞌitlh chai ajunich:
26 ―Ni xamatiꞌ quilakmin chai ni cajumputulh quintamamakaꞌun tasqꞌuini ni palai tuꞌuꞌ aquilhiulayaꞌ ju quitꞌin.
Palai jantu ju ixpai,
ixnati,
chai ixꞌamachakaꞌ chai isꞌaskꞌatꞌan chai ixꞌalakꞌavin tsꞌalan chai ixꞌalakꞌavin atsiꞌin chai mas isꞌatsucunti isꞌakstu.
Para ni jantu quimapaini ju chunch pus jantu lai cativa ju quintamamakaꞌun.
27 Chai va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai mamakꞌalhkꞌajnicalh pus jantu lai cativa ju quintamamakaꞌun.
28 Pus pumatam ju milhiꞌuxijnan ni cayoputulh lakatam putankꞌai chakaꞌ aktsꞌiya pꞌulhnan calacalhcaxtulh tas chunchach calhiꞌanaꞌ ju ixtapalh.
U ni laich chaꞌan tachi ju maktasqꞌuinich ju capunavikꞌoyach u jantu.
29 Pus ni jantu chun calalh pus jantu xcai ju astan ni taiꞌulata jantu lai navikꞌojui.
Camakꞌancꞌacxlh tuꞌuꞌ chai jantu calhiva ju capunavikꞌo.
Pus ju acsnich tachi chun ju lapanacni ju catalaktsꞌinach catalhitsꞌiꞌinach.
30 Chai catanaulh:
“Ju ani lapanac taiꞌulalh ixnavica ixchakaꞌ para jantu lai xanavikꞌojui”.
31 Chai ju tam kꞌai ucxtin ni caꞌamputunach tꞌalasanaꞌ ju ixtꞌakꞌai ucxtin aktsꞌiya pꞌulhnan capastꞌacꞌaꞌ u ni laich caputꞌalalhajalh ju lhiminta lakapꞌuxam milh taropajni u jantu.
Ju yuchi ni va lakacau milh ju ixtaropajni.
32 Chai ni najun ni jantu lai catitꞌalalhajalh pus camalakachanilh pumatam ixlapanac chai casacmiyach tas laich catꞌatakꞌoxi ni jantu catalaclasa.
Chunch ju canaviyaꞌ acsni na makatcaꞌ ju mintacha ju ixtꞌakꞌai ucxtin.
33 Pus vana va chun ju uxijnan.
Kꞌoxich apꞌastꞌactꞌit u ni lai aꞌunaꞌitꞌit ju quintamamakaꞌun u jantu.
Pus va tichi chavaich ju milhiꞌuxijnan ju jantu lacasqꞌuin ni quitꞌin ju aclhinonkꞌoyaꞌ tachi chun ju ixtaxtokni ju pacxanta pus jantu lai cativa ju quintamamakaꞌun.
Aktamixnin jantu kꞌox ju matsat