Amacꞌaꞌuntꞌit ju miꞌalactuꞌuntiꞌan
13
Pus ju acs pantsꞌiquis tachinchalh ju aliꞌin ju tamacꞌatsani ju Jesús ixlacataꞌan ju amachakꞌan ju xaꞌestado Galilea ju alhinaulh ixꞌamaknicaꞌan ju gobernador Pilato.
Tajuni ni anch ju amakni junta makninican ju atapacxat ju Dios.
Pus ju ixꞌacꞌalhniꞌan lhitayalh ju ixꞌacꞌalhni ju atapacxat.
Lucas 13.1-35
―Ja va nonatꞌit ni palai na alactuꞌunin ixtajunita ju anuꞌ amachakꞌan Galilea.
Palai jantu ju aliꞌin ixtꞌaꞌamachakꞌan.
Chai yuchi alhimaknicalh.
3 Iclajunau ni jantu.
Para ni jantu amacꞌonaꞌitꞌit ju miꞌalactuꞌuntiꞌan ju uxijnan pus vachuꞌ atsꞌankꞌayaꞌitꞌit.
4 Chai ju anuꞌ pumacautsajin amachakaꞌan Jerusalén ju atantꞌalhma ju putankꞌai chakaꞌ ju lacSiloé chai tanikꞌo ja va nonatꞌit ni palai na alactuꞌunin ixtajunita ju yuꞌunch.
Palai jantu ju aliꞌin ixtꞌaꞌamachakꞌan.
Chai yuchi alhimaknicalh.
5 Iclajunau ni jantu.
Para ni jantu amacꞌonaꞌitꞌit ju miꞌalactuꞌuntiꞌan ju uxijnan pus vachuꞌ atsꞌankꞌayaꞌitꞌit.
Lakatam xaqꞌuiu higuera
6 Ju Jesús ajuni ju lapanacni ju ani chivinti ju ixtꞌalaktsꞌipaxcavaich ju tuꞌuꞌ:
―Pumatam lapanac chꞌanlh lakatam qꞌuiu ju higuera juncan.
Anch ju xachꞌan laꞌixpuꞌuvas.
Chai astan ju yuchi milh puxconiniꞌ ju xalhiꞌut.
Para jantu lhitajunilh.
7 Chai junilh ju ixlhistacnaꞌ ju puꞌuvas:
“Ju chavai ixlhilakatꞌutu cꞌata icminta puxconaꞌ ju xalhiꞌut ju ani ya higuera chai jantu tuꞌuꞌ iclhitajunita.
Atꞌichꞌakxtꞌatꞌi.
Va lakꞌaich atankꞌasinin ju ani lacatꞌun”.
8 Para ju anuꞌ alhistacnaꞌ junich ju ixꞌucxtin:
“Quiꞌucxtin va yuchi ju chavai cꞌata ju amacꞌoninch.
Aclacpujniyaꞌ ju tꞌun ju ixtalakachoko chai acmamayaꞌ ju ixꞌilhtꞌi borrego.
9 Chai ni caꞌalinach ju xalhiꞌut pus kꞌoxich.
Para ni jantu pus acsnich ju laich atꞌichꞌakxtꞌayaꞌich”.
Cꞌuchꞌucalh pumatam chakoꞌulh
10 Lakatam savat ju Jesús ixꞌamalanininch laꞌixpujitatꞌan ju istꞌaꞌisraelitanin.
11 Chai ju anch ixtanun pumatam chakoꞌulh ju ixpacxanta ju lhacaticuru laꞌixlacatuna chai ixlhiyuchi va ixtakꞌankꞌai.
Va ixlakatumich.
Jantu tavanan lai sok ixtayai.
Lakacautsajin cꞌata ju ixtakꞌankꞌai.
12 Chai ju Jesús acsni laktsꞌilh tꞌasanilh chai junich:
―Chakoꞌulh macaxnitan ju mintakꞌankꞌat.
13 Chai mokslanilh ju ixmacaꞌ laꞌixlacatuna chai lana tasoknicꞌa ju ixlacatuna.
Chai ju yuchi lakꞌayalh ju Dios.
14 Para ju xaꞌucxtin lacpujitat na lhitalhkꞌamalh ni ixꞌacꞌuchꞌununta ju Jesús ju avilhchan paꞌastacni.
Chai ajunich ju ixtalhavat lapanacni ju ixtamakvilanalh:
―Alin lakachaxan avilhchan acsni lai chꞌalhcatnancan.
Pus acsnich ju atꞌatꞌit tꞌacꞌuchꞌunin.
Para jantu ju avilhchan paꞌastacni.
15 Pus ju acsnich ju Jesús junilh ju anuꞌ xaꞌucxtin lacpujitat:
―Ju uxintꞌi va acxpꞌutꞌiyunun.
Ju pumatamin ju milhiꞌuxijnan ja jantu xkꞌotꞌatꞌit ju mivacaxꞌan u mimpuruꞌan ju laꞌixchakaꞌ ju avilhchan paꞌastacni chai pꞌinatꞌit makꞌotꞌunin ju xcan.
16 Pus ju ani chakoꞌulh ixpapanti Abraham junita.
Chai lakacautsajin cꞌata ju ixchꞌita ju Satanás.
Chai ja jantu lhijun ni acxkꞌotnilh ju yuchi ju avilhchan paꞌastacni.
17 Chai acsni naulh ju ani chivinti ju Jesús pus na tamaxanalh chux ju ixtꞌalaxcai.
Chai tachi chun ju lapanacni na ixtalhikꞌachanch tachi chun ju kꞌoxi taxtokni ju ixtꞌajun naviniꞌ ju Jesús.
Ju xatꞌin mostaza
18 Pus ju acsnich ju Jesús ajuni ju lapanacni:
―Tamalhch nuꞌ ju ixtꞌachunch jumputun tachi acsni lhinajun ju Dios laꞌisꞌatsucuntiꞌan ju lapanacni.
19 Acsni lhinajun ju Dios laꞌixꞌalhunutꞌan ju lapanacni pus na lhu talhilacaꞌan ju Dios.
Chunch ju tapasai tachi ju tapasai acsni chꞌancan ju xatꞌin mostaza.
Pus tam lapanac ni cachꞌanlh ju yuchi laꞌixlacatꞌun pus ju anuꞌ achꞌananti takꞌayai chai tasui tachi ju lacatꞌicstꞌi qꞌuiu.
Chai ju tsꞌokꞌo tamucꞌai ixpamalhiquiꞌan laꞌixꞌacatan.
Ju Jesús apumalani ju xatꞌin xkapavati
20 Ju Jesús vachuꞌ chani ajuni ju lapanacni:
―Tas malhch nuꞌ ju va ixtꞌachunch acnaviyaꞌ tachi acsni lhinajun ju Dios laꞌisꞌatsucuntiꞌan ju lapanacni.
21 Pus ju anuꞌ lapanacni chunch tajunita tachi ju tuꞌuꞌ xatꞌin xkapavati ju calhiyaulh tam chakoꞌulh ju lakatꞌutu achꞌapanta harina.
Pus lhitayakꞌojui chux.
Ju xamalhtich ju lactꞌiyan
22 Ju Jesús aktam chꞌapachokopa ju xati ju Jerusalén.
Chai acsni ixtapasatilai ju kꞌai lakꞌachakꞌanixni u ju lactꞌicstꞌi lakꞌachakꞌanixni pus ixꞌamalani ju lapanacni.
23 Chai pumatam junilh:
―Quiꞌucxtin ja na lacatsꞌunin ju tatakꞌalhtaxtui.
Chai ju Jesús junich:
24 ―Laꞌixlhichux miꞌalhunutꞌan anavitꞌit cuenta ni atꞌanuyaꞌitꞌit ju lactꞌiyan ni na acsatꞌicstꞌi ju xamalhtich.
Iclajunauch chunch ni astan na pumalhu ju catatanuputunach ju anch para jantu lai catitanu.
25 Jantu lai ni cakꞌostolaꞌ ju amachakaꞌ chai camalacchoyach ju malhtich.
Chai astan ju uxijnan atꞌayayaꞌitꞌit makspaꞌ chai atsꞌucꞌuyaꞌitꞌit sanin ju malhtich chai anonaꞌitꞌit:
“Ucxtin aquilamalhtekꞌaniuch”.
Para ju yuchi catakꞌalhtayan chai catajunanch:
“Jantu iclamispayau.
Jantu iccꞌatsai ta anchach ju xatꞌanachitꞌit”.
26 Chai ju acsnich ju uxijnan atsꞌucꞌuyaꞌitꞌit nonin:
“Pus xaclatꞌavenau ju uxintꞌi chai xaclatꞌakꞌotꞌau.
Chai laxalacti ju quilakꞌachakꞌan quincꞌan ju ixꞌamalaninin ju uxintꞌi”.
27 Para ju yuchi catajunanch:
“Iclajunau ni jantu iclamispayau.
Jantu iccꞌatsai ta anchach ju xatꞌanachitꞌit.
Akꞌostꞌit ju laquimacni tachi chun ju uxijnan ju va alactuꞌunin untꞌatꞌit”.
28 Chai ju uxijnan akꞌalhununaꞌitꞌit chai alamatsꞌacꞌayaꞌitꞌit ju mintatsalatꞌan acsni alaktsꞌinaꞌitꞌit ju Abraham chai ju Isaac chai ju Jacob chai tachi chun ju lapanacni ju ixtanajun ixchivinti Dios ni tavilanalh junta lhinonkꞌojui ju Dios ju lactꞌiyan.
Para ju uxijnan va xcꞌoxtꞌucꞌantꞌatꞌit.
29 Pus cataminanta ju lapanacni ju lhichꞌatoꞌanta chai ju lhitsꞌastꞌai chai ju lhisur chai ju lhinorte chai catatolanta lacamixa junta lhinajun ju Dios.
30 Chai ju acsnich cataꞌalinanta ju lapanacni ju makꞌanch xaquintalhilaksi.
Para jantu lai actinaulh ni va ixlhiyuchi palai kꞌox caꞌalhiulacanaꞌ.
Chai vachuꞌ cataꞌalinanta ju lapanacni ju jantucaꞌ makꞌan xaquintalhilaksi.
Para jantu lai actinaulh ni va ixlhiyuchi palai jantu kꞌox caꞌalhiulacanaꞌ.
Ju Jesús lhikꞌalhun ju amachakꞌan Jerusalén
31 Pus ju acsnich avilhchan tachincha ju aliꞌin fariseonin chai tajunich ju Jesús:
―Atꞌaxtꞌuch ju ani.
Aꞌinchich.
Pus ju Herodes najun ni camakniyan.
32 Para ju Jesús ajunich:
―Aꞌinchꞌokꞌochitꞌit juninin ju anuꞌ aꞌokxchokꞌonu lapanac ni actixcoxtuyaꞌ ju lhacaticuru laꞌixlacatunaꞌan ju lapanacni chai palaich acꞌanaviyaꞌ ju takꞌankꞌanin ju chavai chai ju lhi.
Chai ju ixlhilakatꞌutu avilhchan acnavikꞌoyach ju quilhichꞌalhcat.
Chunchach ju aꞌunaꞌitꞌit.
33 Para mas jantu ictalhoni ju Herodes aktsꞌiya tasqꞌuini ni acꞌalhtanatsucuyaꞌ ju chavai chai ju lhi chai ju tꞌuxam.
Tasqꞌuini ni chunch aclalh ni jantu lhijun ni jantu canichalh ju lakꞌachakꞌan Jerusalén tam lapanac ju najun ixchivinti Dios.
34 Ji amachakꞌan Jerusalén ju uxijnan makniyatꞌit ju lapanacni ju tajunan ixchivinti Dios.
Chai alacꞌatꞌalhmatꞌit ju yuꞌunch ju amalakꞌachꞌanicꞌantꞌachitꞌit.
Pus na paklhu xaclamakꞌaixtokputunau ju uxijnan tachi ju navi isꞌaskꞌatꞌan ju tuꞌuꞌ chilaꞌ acsni amakatai laꞌixpakꞌachu ni laich caꞌalhistꞌacꞌaꞌ.
Vachuꞌ xaclamakꞌaixtokputunau ju uxijnan tachi ju quiꞌaskꞌatꞌan ni laich xaclalhistacvi.
Para ju uxijnan jantu xalacꞌasqꞌuinatꞌit.
35 Pus ju chavai Dios macoꞌulata ju milakꞌachakꞌanꞌan.
Chai iclajunau ni jantu lai aquintilalaktsꞌinchoko ju chavai.
Va acsni ju aquilalaktsꞌinchokoyau acsni cachinaꞌ ju avilhchan ni acminchokoyaꞌ chai chani anonaꞌitꞌit ju quilacata:
“Paxcat ju ani ju minta laꞌixtapakaꞌut ju Dios”.