Ju Pablo ya laꞌixpuꞌucxtin Festo
25
Ju ixlhilakatꞌutu avilhchan acsni tanulh laꞌixpuꞌucxtin ju Festo pus ju yuchi taxtulh ju lakꞌachakꞌan Cesarea.
Alh ju lakꞌachakꞌan Jerusalén.
2 Chai ju anch talakmilh ju xalackꞌajin palijni chai ju xalackꞌajin israelitanin.
Va tachivimakꞌalh ju Pablo.
3 Tasqꞌuinilh lamapainin ju gobernador ni calhinaulh istꞌasanica ju Pablo ju lakꞌachakꞌan Jerusalén.
Para ju yuꞌunch va ixtalhipuxconi ta yu laich catapukꞌalhaumakni ju lacati.
4 Para ju Festo alacjuni:
―Chach tolhcha ju Pablo junta vilhcha.
Ju quitꞌin acꞌananta ju anch ni catapasayaꞌ lakatꞌui lakatꞌutu avilhchan.
5 Vachuꞌ alacjunich:
―Ju aliꞌin ju lamilhiꞌuxijnan ju laich cataꞌanaꞌ chach quintatꞌaꞌalh.
Anch ju laich catachivimakꞌanach ju anuꞌ lapanac ni alin tuꞌuꞌ ixtalakꞌalhin.
6 Pus tachi lakatsajin lakacau avilhchan tavilhcaꞌ ju lakꞌachakꞌan Jerusalén ju Festo.
Chai ni tuncunchokopa pus lana alhch ju lakꞌachakꞌan Cesarea.
Chai acsni alakatam avilhchan jumpa pus alh lacakꞌai chakaꞌ chai lhinaulh ixꞌica ju Pablo.
7 Chai acsni lhichincancha ju Pablo pus lana talactayalh ju israelitanin ju ixtamintachalh ju Jerusalén.
Tachivimakꞌalh ju Pablo.
Na lhu chai na kꞌai talakꞌalhin ju ixtaꞌulani mas jantu lai ixtamavasalai ni vasalh chunch ju canavi.
8 Pus ju acsnich ju Pablo chivinilh.
Junich ju gobernador:
―Ju quitꞌin jantu tuꞌuꞌ icnavita ju jantu lhijun ju quilhamapꞌaksin quincꞌan ju israelitanin icjuntau.
Jantu tuꞌuꞌ icnavita ju lacakꞌai quimpujitat quincꞌan ju jantu lhijun ni acnavi.
Chai jantu tuꞌuꞌ icnavita ju lhikꞌalhtsꞌajui ju César ju xakꞌai tucan ju ani lacatꞌun Roma.
9 Para ju Festo ni ixꞌamigojni ixꞌanaviputun ju israelitanin pus junich ju Pablo:
―Ja pꞌimpꞌutꞌun ju lakꞌachakꞌan Jerusalén.
Anchach ju aclakꞌoxiniyanta ju milhamakꞌan.
10 Para ju Pablo kꞌalhtailh.
Junich:
―Icya lamiꞌucxlacapuꞌ ju uxintꞌi ju ixlapanac unitꞌa ju César ju xakꞌai tucan ju ani lacatꞌun Roma.
Chai tasqꞌuini ni anich aclakꞌoxinicalh ju quilhamakꞌan.
Ju uxintꞌi kꞌoxich cꞌatsꞌai ni jantu icꞌanavinita tuꞌuꞌ talakꞌalhin ju quintꞌaꞌisraelitanin.
11 Pus ni tuꞌuch icnavita ju lai aclhimapalalh ju quiꞌaninti pus jantu icnajun ni jantu actini.
Para ni jantu slivasalh tuchi quintalhichivimakꞌan pus jantu xamatiꞌ lai aquintimakꞌaxtaklh laꞌixmacniꞌan ju yuꞌunch.
Iclacasqꞌuin ni yuchi ju aquilakꞌoxinilh ju quilhamakꞌan ju César ju xakꞌai tucan ju ani lacatꞌun Roma.
12 Pus ju acsnich ju Festo alactꞌachivinilh ju ixtꞌaꞌucxtinin chai astan junich ju Pablo:
―Ju uxintꞌi naꞌuntꞌa ni lacꞌasqꞌuin ni yuchi ju César ju calakꞌoxiniyan ju milhamakꞌan.
Pus kꞌoxich.
Acmalakachaniyan ju yuchi.
Ju Pablo tꞌachivinilh ju kꞌai ucxtin Agripa
13 Pus acsni tapasalh lakatꞌui lakatꞌutu avilhchan apumatam xakꞌai ucxtin ju Agripa ixjuncan tꞌamilh ju ixꞌamachakaꞌ ju Berenice ixjuncan.
Tamilh ju lakꞌachakꞌan Cesarea ni va ixtamacꞌamiputun ju Festo.
14 Chai tatolhcha lakatꞌui lakatꞌutu avilhchan.
Pus ju Festo chivintanunilh ju ixtꞌaxakꞌai ucxtin ixlacata ju Pablo.
Chanich juni:
―Ju Félix acsni tavanan taxtulh laꞌixpuꞌucxtin maconulh lacapulachꞌin pumatam lapanac.
15 Chai acsni icquilalh ju lakꞌachakꞌan Jerusalén pus ju xalackꞌajin ixpalijniꞌan chai ju xalacpaꞌitniꞌan ju israelitanin quintalakchaꞌalh.
Tachivimakꞌalh ju anuꞌ lapanac chai va ixtalacasqꞌuin ni aclhinaulh ixmaknica.
16 Para ju quitꞌin icꞌajunilh ni jantu chun ju lacan ju ani xalacatꞌun Roma.
Jantu lai makꞌaxtakcan laꞌixꞌaninti pumatam acsni tucaꞌ tꞌalalaktsꞌinta ju taꞌachivimakꞌanan chai acsni tucaꞌ najun ni stavasalanti u jantu ju tuchi lhichivimakꞌancanch.
17 Pus ixlhiyuchi jantu lana icpacxalh acsni tavanan taminchalh ju ixtachivimakꞌan ju anuꞌ lapanac.
Ni tuncunchokolh pus lana icmilh lacakꞌai chakaꞌ chai iclhinaulh ixꞌica ju anuꞌ lapanac.
18 Pus ju quitꞌin xacnajunta ni ca na kꞌai talakꞌalhin ju xanavi ju anuꞌ lapanac.
Para jantu.
Acsni tavanan tatsuculh chivinin ju taꞌachivimakꞌanin jantu tuꞌuꞌ kꞌai talakꞌalhin ju tamucꞌanilh.
19 Va jantu kꞌox talhiulai tachi ju lhichivinilh ju tuchi talhilanitach ju yuꞌunch.
Vachuꞌ jantu kꞌox talhiulai ni va najun ju Pablo ni ma va taꞌacxtuchokolh pumatam lapanac ju Jesús ixjuncan acsni ixmaknicanta.
20 Pus ju quitꞌin jantu xaccꞌatsai ta yu laich aclakꞌoxi ju tuꞌuꞌ lhamakꞌan ju chunch.
Pus icsacmilh ju Pablo ni jantu caꞌamputulh ju lakꞌachakꞌan Jerusalén.
Anch aclakꞌoxinilh ju ixlhamakꞌan.
21 Para ju Pablo sqꞌuinlh ni yuchi ju xakꞌai tucan César ju calakꞌoxinilh ju ixlhamakꞌan.
Pus ni chunch ju sasqꞌuin pus iclhinaulh ixlhistꞌacꞌa tus acsni laich acmacaꞌanilh ju yuchi.
22 Pus ju acsnich ju Agripa junich ju Festo:
―Ju quitꞌin vachuꞌ ickꞌasmatniputun ju ixchivinti ju anuꞌ lapanac.
Pus ju Festo junich:
―Lhich akꞌasmatniyach.
23 Pus acsni alakatam avilhchan jumpa ju Agripa chai ju Berenice tamilh lacapuꞌucxtin.
Salh kꞌox ixtamalakchꞌininta ju yuꞌunch.
Chai alactꞌatanucha ju ixꞌucxtinꞌan ju taropajni chai ju xalackꞌajin ju anuch lakꞌachakꞌan.
Pus ju Festo lana lhinaulh ixꞌica ju Pablo.
24 Chai acsni chincha ju Pablo pus ju Festo chani ajunilh ju ixtavilanancha:
―Ji kꞌai ucxtin Agripa chai chux ju uxijnan ju quilatꞌavilau ju ani.
Anich ya ju lapanac ju iclalhijuniuch.
Pus acsni xacvilhcha ju lakꞌachakꞌan Jerusalén chai acsni icminchokolh ju ani na lhu israelitanin quintachivitanunita ixlacata ju yuchi.
Pꞌas quintajuni ni jantu lhijun ni vanach catsuculh.
25 Para ju quitꞌin jantu tuꞌuꞌ iclhitajunita ju ixtalakꞌalhin ju lai calhimapalalh laꞌixꞌaninti.
Chai ni isꞌakstu ju Pablo ju sqꞌuinlh ni laich calakꞌalh ju César pus yuchi iclhimalakachaniputun.
26 Para jantu tuꞌuꞌ iclhitajunita ju lai aclhiꞌatsꞌoknunilh ju xakꞌai tucan.
Yuchi xaclalhimaxtuniyau ju uxijnan.
Va iclacasqꞌuin ni uxintꞌi ji kꞌai ucxtin Agripa aqꞌuilhasacmiyaꞌich.
Ta tsꞌa jantu catasu ju tuꞌuꞌ ju laich acꞌatsꞌoknunilh ju César.
27 Jantu kꞌox iclhiulai ni lai acmalakacha pumatam tachꞌin chai jantu acjuni ta lhijunitach ixtalakꞌalhin.