Ju Dios sok mucꞌai ju talakꞌalhin
2
Pus ju uxijnan ji lapanacni ju amucꞌaniyatꞌit ixtalakꞌalhinꞌan ju mintꞌalapanacꞌan jantu tuꞌuꞌ lai atꞌinaꞌuntꞌit mas va tichi chavaich untꞌatꞌit.
Ju Dios catamucꞌaniyan ju mintalakꞌalhinꞌan vachuꞌ.
Pus ni laich amucꞌaniyatꞌit ixtalakꞌalhinꞌan ju mintꞌalapanacꞌan pus lana tasui ni catamucꞌaniyan ju Dios ju mintalakꞌalhinꞌan vachuꞌ ni vana va chun ju malacꞌasupꞌalatꞌit ju lamiꞌatsucuntiꞌan tachi ju junitach ju akꞌantam.
2 Para cꞌatsayau ju ani.
Ju Dios sok caꞌalacmucꞌaniyaꞌ ixtalakꞌalhinꞌan ju lapanacni ju chunch taꞌalactuꞌunun tachi ju iclajuntau.
3 Chai ju uxijnan ji lapanacni ni lai mucꞌaniyatꞌit ixꞌalactuꞌunti ju akꞌantam para ni vana va chun navipꞌalatꞌit ju uxijnan ja va nonatꞌit ni lai catajunin ju Dios ni matiꞌ ju mintalakꞌalhinꞌan.
4 Tachi ju va jantu tuꞌuꞌ lhiulayatꞌit ju uxijnan ni na taꞌaktaijuputunan lacaꞌamapaininti ju Dios.
Tachi ju va jantu tuꞌuꞌ lhiulayatꞌit ni tachꞌixnikꞌotan ju Dios mas na alactꞌuꞌununatꞌit.
Tachi ju va jantu tuꞌuꞌ lhiulayatꞌit ni va jantu lana tamamakꞌalhkꞌajniyan ju Dios.
Tachi ju va jantuch cꞌatsꞌayatꞌit ni yuchi talhiꞌaktaijuputunan lacaꞌamapaininti ju Dios ni tsꞌa ma amacꞌaꞌuntꞌit ju miꞌalactuꞌuntiꞌan.
5 Para ju uxijnan na va pꞌasnich ju miꞌalhunutꞌan chai lana jantu macꞌompꞌutꞌunatꞌit ju miꞌalactuꞌuntiꞌan.
Chai ni chunch ju layatꞌit pus miꞌakstuꞌan lalhavachꞌokꞌoyatꞌit ju mimakꞌalhkꞌajnatꞌan ju anuꞌ avilhchan acsni camalacasuyach ju ixtalhkꞌamti ju Dios.
Chai acsnich ju catasuyach ni sok navi ju Dios acsni ulani ixtalakꞌalhin xamatiꞌ.
6 Pus ju acsnich ju Dios caxtakniyaꞌ ju pumatam pumatam tachi ju lhijunch ixlacata ju tuchi navita.
7 Ju aliꞌin lapanacni va tachi tanavi ju kꞌox ni tapuxcajui ta yu laich capunaulh ju Dios ni xalackꞌajin tajunita laꞌixmacni yuchi chai ta yu laich kꞌox calhiulacanaꞌ laꞌixmacni yuchi.
Chai tapuxcajui ju atsucunti ju jonkꞌalhita lactꞌiyan.
Pus ju yuꞌunch caꞌaxtaknicanaꞌ isꞌatsucuntiꞌan ju conkꞌalhiyanta ju lactꞌiyan.
8 Para ju aliꞌin lapanacni va yuchi ni talaclasai chai jantu lana talacaꞌiputun ju stavasalanti.
Va yuchi ju talacaꞌich ju jantu soknicꞌa.
Pus ju Dios caꞌamalacasuniyach ju ixtalhkꞌamti ju yuꞌunch.
Chai caꞌaxtakniyach ju kꞌai ixmakꞌalhkꞌajnatꞌan.
9 Tachi chun ju lapanacni ju tanavich ju jantu kꞌox pus slivasalh catamakꞌalhkꞌajnanaꞌ chai cataꞌamakꞌanininaꞌ.
Pus ju tucan chunch caꞌaꞌulhtucanaꞌ yuꞌunch ju aliꞌin sia lhiquijnanꞌan ju israelitanin juntau.
Para vachuꞌ ju yuꞌunch ju jantu israelitanin.
10 Para va tichi chavaich ju canaviyaꞌ ju kꞌox pus ju Dios calaktsꞌinaꞌ tachi ju tam xakꞌai chai kꞌox calhiulayaꞌ chai jantu calacꞌalh ixꞌalhunut.
Pus ju tucan chunch caꞌaꞌulhtucanaꞌ yuꞌunch ju aliꞌin sia lhiquijnanꞌan ju israelitanin juntau.
Para vachuꞌ ju yuꞌunch ju jantu israelitanin tajunita.
11 Ju Dios chunch ju canaviyaꞌ ni vaklhtam chun ju alaktsꞌin ju lapanacni.
12 Ju makꞌaniya ixlapanac Dios ju Moisés ixjuncan atsꞌoknulh ixlhamapꞌaksin ju Dios.
Pus tachi chun ju lapanacni ju jantu tamispai ju anuꞌ lhamapꞌaksin chai taꞌalactuꞌunun aktsꞌiya caꞌamamakꞌalhkꞌajnikꞌalhicanaꞌ.
Va yuchi ni jantiyuꞌ caꞌalhimamakꞌalhkꞌajnicanaꞌ ni jantu tanavita tachi ju najun lacalhamapꞌaksin.
Alai yuchi caꞌalhimamakꞌalhkꞌajnicanaꞌ ni va taꞌalactuꞌununta.
Para tachi chun ju tamispai ju anuꞌ lhamapꞌaksin para ixlaquilhtu taꞌalactuꞌunun pus camucꞌanicanaꞌ ixtatsꞌinqꞌuit ju anuꞌ lhamapꞌaksin.
13 Ju Dios najun ni jantu salaka ixꞌalhunutꞌan ju lapanacni ju va takꞌasmatꞌa ju lhamapꞌaksin ju atsꞌoknulh ju Moisés.
Ju Dios najun ni va yuꞌunch ju salaka ixꞌalhunutꞌan ju catamuctaxtuyach tachi ju najun lacalhamapꞌaksin.
14 Ju lapanacni ju jantu israelitanin tajunita jantu tamispai tuchi najun laꞌixlhamapꞌaksin Dios ju atsꞌoknulh ju Moisés.
Para mas jantu tamispai tuchi najun ju anuꞌ lhamapꞌaksin para aktamixnin isꞌakstuꞌan tanavi tachi ju najun laꞌixlhamapꞌaksin Dios.
Chai ni chunch ju talai pus tasui ni alin ju ixlhamapꞌaksinꞌan laꞌixꞌalhunutꞌan mas jantu tamispai ju lhamapꞌaksin ju atsꞌoknulh ju Moisés.
15 Chai ju laꞌisꞌatsucuntiꞌan lana tasui ni tsꞌoknicanta ju lhamapꞌaksin laꞌixꞌalhunutꞌan.
Pus laꞌixꞌatalacpastꞌacꞌatꞌan putasui ni vasalh alin ju ixlhamapꞌaksinꞌan ni isꞌakstuꞌan tacꞌatsai u kꞌox ju tanavi u jantu.
16 Chai tacꞌatsai u kꞌox calhiulayaꞌ ju Dios u jantu ju anuꞌ avilhchan acsni ucxtin cajunaꞌ ju Jesucristo.
Chai ju Jesús caꞌulaniyaꞌ ixtalakꞌalhinꞌan tachi chun ju lapanacni ixlacata tuchi sek tanavita chai sek tapastacta.
Pus chunchach caꞌulhtucanaꞌ tachi chun ju lapanacni ju jantu talhilacaꞌanta ju Jesucristo.
Chai chunch ju icꞌajuni ju lapanacni.
Ju Moisés atsꞌokꞌulanilh ixlhamapꞌaksin Dios ju israelitanin
17 Pus ju uxijnan vachuꞌ lhitꞌapꞌakꞌaꞌuyatꞌit ni israelitanin untꞌatꞌit ni Dios makꞌanch asacxtulh ju quilacpaiꞌan.
Chai nonatꞌit ni atꞌakꞌalhtꞌaxtꞌuyaꞌitꞌit ni pꞌacxantꞌatꞌit ju ixlhamapꞌaksin Dios ju atsꞌoknulh ju Moisés.
Chai na lhitꞌakꞌayayatꞌit ni nonatꞌit ni mispꞌayatꞌit ju Dios.
18 Chai nonatꞌit ni mispꞌayatꞌit ixkꞌachat ju Dios.
Chai nonatꞌit ni lai sacxtꞌuyatꞌit ju kꞌox ni va tachi malanicꞌantꞌatꞌit laꞌixlhamapꞌaksin Dios.
19 Chai nonatꞌit ni uxijnan ju palai mispꞌayatꞌit ju ixtaxtokni Dios.
Chai ixlhiyuchi laich apꞌulhniyaꞌitꞌit ju tachi va alakꞌachꞌixnin tajunita laꞌistacꞌatsanꞌan.
Chai nonatꞌit ni laich amalacpꞌucꞌuꞌuyaꞌitꞌit ju tatꞌajun tachi ju va lacaꞌatatsꞌisni ni jantucaꞌ tamispai ixti ju Dios.
20 Chai nonatꞌit ni xaꞌamalaninin untꞌatꞌit ju jantucaꞌ tuꞌuꞌ tamispai ixtaxtokni Dios.
Chai nonatꞌit ni ixꞌamamakaꞌunin untꞌatꞌit ju va tatꞌajuncaꞌ laninin ixtaxtokni Dios.
Chai nonatꞌit ni lai chun naviyatꞌit ni lacalhamapꞌaksin ju tsꞌokta ju Moisés ju lhitꞌaꞌutꞌatꞌit ju soknicꞌa atalaninti chai ju stavasalanti.
21 Pus ju uxijnan ni malaniyatꞌit ju apumatam tachi ju va jantu machꞌakxayatꞌit tuchꞌi nonatꞌit.
Ju uxijnan alhamapꞌaksininatꞌit ni jantu kꞌox ni akꞌalhaunancanch.
Para ja jantu vachuꞌ taꞌakꞌalhaunan ju aliꞌin lamilhiꞌuxijnanꞌan.
22 Ju uxijnan lhamapꞌaksininatꞌit ni jantu lai tꞌatsucucan ju jantu quiꞌamachakaꞌ u jantu quimpapa.
Para ja jantu vachuꞌ chunch talai ju aliꞌin ju lamilhiꞌuxijnan.
Ju uxijnan lhamapꞌaksininatꞌit ni jantu kꞌox lhiulayatꞌit ju tuꞌuꞌ santo.
Para ju aliꞌin lamilhiꞌuxijnanꞌan ca jantu vasalh ni jantu kꞌox talhiulai ni laich taꞌan ju lacpujitat junta ya ju anuꞌ santo ju tanajun ni jantu kꞌox talhiulai.
Taꞌan ni va takꞌalhauputun ju tumin ju anch.
23 Ju uxijnan na lhitꞌakꞌayayatꞌit ni pꞌacxantꞌatꞌit ju ixlhamapꞌaksin Dios.
Para ni jantu muctꞌaxtꞌuyatꞌit tachi ju najun ju anch pus yuchi macxcai talhilhichivinin ju lapanacni ixtaxtokni Dios.
24 Tachi ju tsꞌokcanta laꞌixchivinti Dios junta chani najun:
“Ju aliꞌin ju jantu israelitanin tajunita ma va macxcai talhichivinin ju Dios ma va ixlacata ni jantu muctꞌaxtꞌuyatꞌit ju uxijnan tachi ju najun lacalhamapꞌaksin.
Ju uxijnan ma chunch ju layatꞌit mas israelitanin untꞌatꞌit”.
Chunch najun laꞌixchivinti Dios.
25 Ju makꞌanch ju Dios ajunilh ju makꞌaniya quintꞌaꞌisraelitaninꞌan ni catachꞌucꞌunilh ju ixꞌaxtꞌakꞌa tachi chun ju tsꞌalan ju catatsuculh.
Ju chunch va ixpumispacanch va ni ixlapanacni Dios tajunita.
Chai slivasalh ni lhitapalai ni chꞌucꞌucꞌantꞌatꞌitch ni quintꞌaꞌisraelitanin untꞌatꞌit.
Para va acsnich ju lhitapalai acsni muctꞌaxtꞌuyatꞌit tachi ju najun laꞌixlhamapꞌaksin Dios.
Para ni lakꞌalhiyatꞌit ju ixlhamapꞌaksin Dios pus jantu lhitapalai mas chꞌucꞌucꞌantꞌatꞌit.
26 Chai ju tam lapanac mas jantu chꞌucꞌucanta para ni camuctaxtulh tachi ju najun laꞌixlhamapꞌaksin Dios pus va ixtꞌachunch laktsꞌin ju Dios tachi ju va chꞌucꞌucanta ni muctaxtuich.
27 Pus ju jantu chꞌucꞌucanta laꞌixlacatuna para ni muctaxtui tachi ju najun laꞌixlhamapꞌaksin Dios pus anchach ju apꞌuꞌulanicꞌanaꞌitꞌit ju mintalakꞌalhinꞌan ju uxijnan ni jantu muctꞌaxtꞌuyatꞌit mas alinch ju milhamapꞌaksinꞌan ju tsꞌokta ju Moisés chai mas chꞌucꞌucꞌantꞌatꞌit.
28 Pus ju va israelita tsucuta jantiyuꞌ ju lai lhilakamispacan ni isꞌaskꞌatꞌa Dios cava.
Chai jantiyuꞌ ju lhitapalai laꞌixmacni Dios ni va cachꞌucꞌunicalh ju ixlacatuna tam lapanac.
29 Para ju vasalh isꞌaskꞌatꞌa Dios yuchi ju chunchach junita laꞌixꞌalhunut.
Chai tachi ju va achꞌucꞌunti laktsꞌin ju Dios.
Chai yuchach ju Spiritu Santu ju aquintachꞌakꞌaniyan ju quiꞌalhunutꞌan.
Jantiyuꞌ ni va acchꞌucꞌucalh ju quilacatuna tachi ju najun lacalhamapꞌaksin.
Chai ju salaka ixꞌalhunut pus isꞌakstu Dios ju canonaꞌ ni na kꞌox tachi ju junita.
Jantiyuꞌ ju tam ixtꞌalapanac ju canonaꞌ ni kꞌox junita u jantu.