3
Pus laich aquilasacmiuch ni palai kꞌox junita ju quiꞌatsucuntiꞌan ju israelitanin tsucutauch.
Chai ja tuꞌuꞌ xtaknicantauch va ixlacata ni chꞌucꞌucantauch.
2 Pus aktsꞌiya.
Pus yuꞌunch ju quintꞌaꞌisraelitanin ju pꞌulhnan axtaknicalh ixchivinti Dios.
3 Para aktsꞌiya ixꞌalin ju sia yuꞌunch ju jantu lai ixtalacaꞌi.
Para mas chunch talalh ju aliꞌin ja laich acnaulh ni ixlhiyuchach jantu camuctaxtuyaꞌ ju Dios tuchi najuntach ju yuchi.
4 Jantu lai actinaulh ju chunch.
Chach tacꞌatsa ju lapanacni ni aktsꞌiya muctaxtui ju ixchivinti ju Dios mas va taꞌaklhtamanin catalhixajcha tachi chun ju lapanacni.
Tachi junta tsꞌokcanta laꞌixchivinti Dios junta chani najun:
Aktsꞌiya sok ju naꞌun ji Dios.
Chai mas tamucꞌaniputunan ju mintalakꞌalhin ju lapanacni ni tanajun ni jantu muctꞌaxtꞌutꞌa tachi ju ixnaꞌuntꞌa para vasalh tasui ni muctꞌaxtꞌui tachi ju naꞌun.
Chunch najun laꞌixchivinti Dios ju tsꞌokcanta.
5 Pus ju aliꞌin laich catanaulh ni ma acsnich ju palai tasui ni vasalh soknicꞌa ju Dios acsni jantu sok anau ju quijnanꞌan.
Chai ju chunch pus ja ma sok navi ju Dios acsni caꞌamamakꞌalhkꞌajniyaꞌ ju lapanacni ixlacata ixꞌalactuꞌuntiꞌan.
Chunch ju tachivinin ju aliꞌin lapanacni.
6 Para jantu lai actinaulh ni jantu sok navi ju Dios acsni amamakꞌalhkꞌajni ju lapanacni.
Ni jantu cava sok navi tuꞌuꞌ ju Dios pus jantu lhijun ni camucꞌanilh ixtalakꞌalhin tam xamatiꞌ.
7 Chai ju aliꞌin lapanacni tanajun ni ma acsnich ju tasui ni vas najun ju Dios acsni acnaulh tuꞌuꞌ taꞌaklhtamat.
Ju chunch ma palai pulakꞌayacan ju Dios.
Chai ni chunch cava vasalh pus ma jantu lai vanach aquintilhimispa ju Dios ni icꞌalactuꞌunuꞌ.
8 Chai vana lai catanaulh ni canaviuch ju amacxcai ni laich capuꞌalilh ju kꞌox.
Pus ju aliꞌin lapanacni ju macxcai quintalhichivinan tanajun ni ma chunch icnonau ju quijnan.
Pus ju va kꞌaya tanajun camamakꞌalhkꞌajnicanaꞌ tachi ju lhijun ni caꞌulhtucalh.
Tachi chun ju quijnanꞌan si alactuꞌunin juntau
9 Para jantu lai actinaulh ni palai salaka junita ju quiꞌalhunutꞌan ju quijnanꞌan ju israelitanin juntau.
Palai jantu ju jantu israelitanin.
Iclamasunitauch ni sich alactuꞌunin juntau mas israelitanin juntau u jantu.
10 Laꞌixchivinti Dios tsꞌokcanta ta yu junita ju quiꞌatsucuntiꞌan.
Chani najun:
Ma matiꞌ ju lapanac ju soknicꞌa cava.
Nin tachi pumatam.
11 Ma jantu xamatiꞌ ju lai kꞌox camachakxanilh ixtaxtokni ju Dios.
Ma jantu xamatiꞌ ju va laꞌisꞌakstu lai capuxcaulh ju Dios.
12 Ma tamaconkꞌo ju ixti Dios.
Chai tachi ixchuxꞌan ma si takꞌalhikꞌo ju isꞌatsucuntiꞌan.
Ma jantu xamatiꞌ ju navi ju kꞌox.
Nin tachi pumatam.
13 Ju yuꞌunch ma va tachi na macxcai tachivinin.
Chai ju laꞌixquilhniꞌan ma tapuꞌokxchokꞌoi ju aliꞌin ixtꞌalapanacniꞌan.
Chai laꞌixchivintiꞌan ma tamaxcayani ixꞌalhunutꞌan ju ixtꞌalapanacniꞌan.
14 Ma si macxcai chivinti chai lacatalhkꞌamti ju tachivinin.
15 Ma va yuchi ju talhimakꞌancujtach ju va ixꞌamaknintichꞌan.
16 Junta tatꞌajun ju yuꞌunch ma na talakꞌalhini ju isꞌatsucuntiꞌan ju aliꞌin lapanacni chai na tamamakꞌalhkꞌajni ju ixtꞌalapanacniꞌan.
17 Ju yuꞌunch ma jantu tavanan lai va lhikꞌachach tatꞌatolai ju aliꞌin lapanacni.
18 Nin lacatsꞌunin ma jantu tatalhoni ju Dios.
Chunch najun laꞌixchivinti Dios ju tsꞌokcanta.
19 Pus matiꞌ xamatiꞌ ju lai canaulh ni jantu alactuꞌununta.
Mas quijnanꞌan ju israelitanin juntau.
Pus ju Dios quintaxtaknitan ju ixlhamapꞌaksin para jantu lai xamuctaxtuyau.
Pus ixlhiyuchi quintamucꞌanitan ju quintalakꞌalhinꞌan ju quijnanꞌan chai vachuꞌ chux ju aliꞌin lapanacni ni jantu xamatiꞌ ju soknicꞌa cava ju isꞌatsucunti.
20 Pus jantu lai xamatiꞌ catilhimispacalh ni salaka laꞌixmacni Dios va ixlacaꞌatalh ni canavi cava tachi ju najun laꞌixlhamapꞌaksin ni jantu xamatiꞌ lai muctaxtui.
Pus ju laꞌixlhamapꞌaksin Dios va pumispacan ni alactuꞌunin juntau.
Lai takꞌalhtaxtucan acsni lhilacaꞌancan ju Jesús
21 Pus ju laꞌixlhamapꞌaksin Dios najun ta yu apulaktsꞌinch ju Dios ju lapanacni ni na salaka ixꞌalhunutꞌan.
Chai vana va chun ixtanajun ju makꞌaniya lapanacni ju ixtanajun ixchivinti Dios.
Chai ju chavai malacasucanta tuchi ixtalhichivinin ju yuꞌunch.
Malacasucanta ni jantu apulaktsꞌin ju Dios ju lapanacni ni salaka ixꞌalhunutꞌan va ixlacaꞌatalh ni muctaxtucan tachi ju najun laꞌixlhamapꞌaksin.
22 Para ju chavai ju Dios alaktsꞌin ju lapanacni ni na salaka ju ixꞌalhunutꞌan acsni talhilacaꞌan ju Jesucristo.
Chunch alaktsꞌinkꞌocan tachi chun ju talhilacaꞌanta ju yuchi mas va tichi cavalhch u quintꞌaꞌisraelita u jantu.
Chunch navi ju Dios ni vaklhtam chun alaktsꞌin ju lapanacni ju yuchi.
23 Chux ju quijnanꞌan ju lapanacni juntau alactuꞌununtauch.
Jantu xamatiꞌ ju vasalh soknicꞌa cava tachi ju lhcatach ju Dios.
24 Para ju Dios quintanavinitan lamapainin ni soknicꞌa quintalaktsꞌinan acsni lhilacaꞌanauch ju Jesús.
Chai jantu tuꞌuꞌ quintasqꞌuiniyan ju ixtapalh cava ju anuꞌ amapaininti.
Salaka alaktsꞌincantach ju quiꞌalhunutꞌan va ixlacata ju Jesucristo ni yuchi ju quintamalakxtutan.
25 Pus ju Dios yuchi lhimalakachachilh ju Jesús ni caꞌalhimalakxtuyaꞌ ju lapanacni laꞌixꞌacꞌalhni.
Chai ni lhilacaꞌanauch ju Cristo ni taxtulh ju ixꞌacꞌalhni ju quilacataꞌan pus ju Dios jantu aquintamamakꞌalhkꞌajniyan ixtapalh quiꞌalactuꞌuntiꞌan ni mapalhkꞌotach ju Jesús.
Chai ju chunch vachuꞌ putasui ni soknicꞌa navi ju Dios mas ixchꞌixkꞌojui ju ixꞌalactuꞌuntiꞌan ju makꞌaniya lapanacni.
Chunch ju lalh ni iscꞌatsai ni astan caniyaꞌ ju Cristo ixlacata ixꞌalactuꞌuntiꞌan ju makꞌaniya lapanacni vachuꞌ.
26 Chai vachuꞌ chunch ju punavita ju Dios ni laich camalacasuyaꞌ ni na sok ju navi ju yuchi ixlacata ju alactuꞌunti ju navican ju chavai avilhchan.
Chai vachuꞌ caputasuyach ni sok navi ju Dios acsni ajuncan ju alactuꞌuni lapanacni ni salaka ixꞌalhunutꞌan acsni talhilacaꞌan ju Jesús.
Lai chunch ajuni ni yuchi ju mapalalh ixtapalh ixꞌalactuꞌuntiꞌan.
27 Chai ni chunch quintaꞌulhtuyan ju Dios pus jantu lai xamatiꞌ catilhitakꞌaya ni navita ju tuꞌuꞌ kꞌox.
Jantu lai chun caticꞌatsa ni jantu lai aquintitalaktsꞌin ju Dios ni salaka ju quiꞌalhunutꞌan mas lai cava canaviu tachi ju najun laꞌixlhamapꞌaksin ju yuchi.
Va acsnich ju laich aquintalaktsꞌinan ni salaka ju quiꞌalhunutꞌan acsni calhilacaꞌanau ju Jesús.
28 Pus lana tasui ni alaktsꞌin ju lapanacni ni salaka ixꞌalhunutꞌan acsni tamaklacaꞌani ju Jesús.
Jantu ixlhiyuchi ni lai cava catamuctaxtulhch tachi ju najun laꞌixlhamapꞌaksin ju Moisés.
29 Pus ju quijnanꞌan ju israelitanin juntau jantu lai catinaju ni va quiDios quiꞌakstuꞌan junita ni vachuꞌ isDiosꞌan ju jantu israelitanin tajunita.
30 Ju Dios isDiosꞌan junita tachi chun ju lapanacni ni va pumatam ju Dios.
Chai ju yuchi alaktsꞌin ni salaka ixꞌalhunutꞌan ju lapanacni ju talhilacaꞌanta ju Cristo mas quintꞌaꞌisraelitanin u jantu quintꞌaꞌisraelitanin catava.
31 Para mas lhitajuyau ju salaka quiꞌatsucuntiꞌan acsni lhilacaꞌanauch ju Jesús para jantu nomputun ni jantu xtuꞌuꞌ ixtapalh navican ju ixlhamapꞌaksin Dios.
Alai va acsni ju lai quiclacaꞌiyau ju ixlhamapꞌaksin Dios acsni lhilacaꞌanau ju Cristo.