Ju isꞌatsucunti ju Abraham tachi ju va lhilaktsꞌintaiti junita
4
Pus tas anonaꞌitꞌit ju uxijnan.
Ju makꞌaniya quimpaiꞌan Abraham ja ixlacata tuꞌuꞌ kꞌox ju navilhch ju punaulh ju Dios ni salaka ixjunita ju ixꞌalhunut.
2 Pus ni va ixlacata cava ju tuchi ixnavich ju Abraham ju punaulich ju Dios ni salaka ixjunita ju ixꞌalhunut pus ca laich ixlhitakꞌayalh laꞌixmacni ju ixtꞌaꞌlapanacni.
Para jantu lai ixtilhitakꞌaya ju laꞌixmacni Dios ixlacatach tuchi laich xanavi.
3 Aktsꞌiya chunch ixjunita laꞌisꞌatsucunti tachi ju najun laꞌixchivinti Dios ju tsꞌokcanta.
Pus chani najun:
“Ju Abraham ma quiclacaꞌilh ju Dios chai ma ixlhiyuchach lhilaktsꞌincalh ju Abraham ni salaka ixjunita ju ixꞌalhunut”.
Chunch najun laꞌixchivinti Dios.
4 Pus ju laquiꞌatsucuntiꞌan jantu lai actinaulh ni va lhikꞌailaktsꞌincan ju ixtalhaja ju tam lapanac ju quichꞌalhcatnalh.
Alai va lhiꞌanican ni quichꞌalhcatnantach.
5 Para jantu lai tapꞌastu actijunilh ju Dios ni na salakach aquilaktsꞌilh ni acnavilh ju tuꞌuꞌ ju kꞌox.
Ju yuchi va lacaꞌamapaininti laktsꞌin ixꞌalhunut ju tam lapanac ni salaka acsni lhilacaꞌanta ju Cristo.
Chai ni chunch lai ju Dios pus ju yuchi lai laktsꞌin tam lapanac ni salaka ixꞌalhunut mas lana jantu ixtalhoni ju Dios ju pꞌulhnan.
6 Chunch ju ixnomputun ju makꞌaniya lapanac ju David ixjuncan acsni naulh ni na kꞌachan tam lapanac acsni laktsꞌin ju Dios ni salaka ju ixꞌalhunut.
Para jantu va ixlacata ju tuchi navitach.
7 Ju David chani ixnajun:
Ma na takꞌachanch ju lapanacni ju amacꞌacxanicanta ixtalakꞌalhinꞌan chai xacanicanta ju ixꞌalactuꞌuntiꞌan.
8 Ma na kꞌachanch tam lapanac ju jantuch ulani ixtalakꞌalhin ju quiꞌucxtinꞌan Dios.
Chunch ju naulh ju David.
9 Pus ju ani kꞌachat quilacataꞌan quinchuxꞌan junita mas israelitanin juntau chai vachuꞌ ixlacataꞌan ju yuꞌunch ju jantu israelitanin tajunita.
Pus iclajuntau ni Dios laktsꞌilh ju Abraham ni salaka ixꞌalhunut acsni lhilacaꞌalh ju yuchi.
10 Para anavitꞌit cuenta tavananch ju laktsꞌilh ju Abraham ju Dios ni salaka ixꞌalhunut.
Pus ixlhilaktsꞌincantach ni salaka ixꞌalhunut mas tucaꞌ ixchꞌucꞌucanta.
11 Ju Abraham pꞌulhnan lhilacaꞌalh ju Dios chai astan chꞌucꞌunicalh ju ixꞌaxtꞌakꞌa.
Chai acsni chꞌucꞌucalh pus ixpumispacanch va ni salaka ixjunita ju ixꞌalhunut laꞌixmacni Dios va ixlacaꞌatalh ni lhilacaꞌalh ju Dios mas tucaꞌ ixchꞌucꞌucanta.
Pus vana va chun tachi chun ju uxijnan ju vachuꞌ lhilacꞌapꞌinatꞌit ju Cristo ju jantu israelitanin untꞌatꞌit.
Ju Dios vachuꞌ talaktsꞌinan ni salaka ju miꞌalhunutꞌan chai ixlhiyuchi lai laktsꞌinatꞌit ju Abraham tachi ju va mimpaichꞌan mas jantu chꞌucꞌucꞌantꞌatꞌit ju uxijnan.
12 Vachuꞌ xapaich lhitalacxtulh ju Abraham tachi chun ju quijnanꞌan ju chꞌucꞌucantauch.
Para jantu va yuchi ni calacchꞌucꞌucauch.
Para vachuꞌ ni maklacaꞌaniu ju Dios tachi ju lalhch ju makꞌaniya quimpaiꞌan Abraham acsni tucaꞌ ixchꞌucꞌucanta.
Ju Dios amuctaxtuni ju ixchivinti tachi chun ju talacaꞌini ju yuchi
13 Pus ju Dios ajunilh ju Abraham chai ju isꞌaskꞌatꞌan ni ixꞌanuchꞌan cajunaꞌ ju ani lacamunutpaꞌ.
Para jantiyuꞌ apujunicalh chunch va ixlacaꞌatalh ni tamuctaxtulh tachi ju najun laꞌixlhamapꞌaksin yuchi.
Alai va apujunicalh chunch ni taquiclacaꞌilh ju yuchi.
Chai ixlhiyuchi ju Dios alaktsꞌilh ni salaka ju ixꞌalhunutꞌan.
14 Pus ni yuꞌunch cava ju ixtaꞌamaklhtayanalh ju ani lacamunutpaꞌ ju ixtamuctaxtuta tachi ju najun laꞌixlhamapꞌaksin Moisés pus jantu tuꞌuꞌ ixtapalh ixva ni lhilacaꞌanau ju Dios.
Chai jantu tuꞌuꞌ ixtapalh ixva ju tuchi ixnajuntach ju Dios.
15 Acsni icnajun ni laich quilaktsꞌin ju Dios ni salaka ju quiꞌalhunut va ixlacaꞌatalh ni acmuctaxtulh tachi ju najun laꞌixlhamapꞌaksin pus alai va icpulhitajui quimakꞌalhkꞌajnat ni va iclakꞌalhi.
Pus va acsnich ju lai acjunicalh ni jantu iclakꞌalhita ju tuꞌuꞌ lhamapꞌaksin acsni va matich cava ju lhamapꞌaksin.
16 Ju Dios junilh ju Abraham ni caxtakniyaꞌ ju lacamunutpaꞌ va ixlacata ni quiclacaꞌinilh ju ixchivinti.
Ju chunch va lamapainin ju xanavi.
Chai ni va lamapainin ju xanavi pus yuchi lhicꞌatsacan ni ixlacataꞌan junita tachi chun ju isꞌaskꞌatꞌan ju Abraham tuchi naulh ju Dios.
Chai jantu va yuꞌunch ju talhilaksi ju ixlhamapꞌaksin ju ajunilh chunch ju Dios.
Para vachuꞌ ju uxijnan ju qꞌuiclacꞌaꞌitꞌatꞌit ju Dios tachi ju lalh ju Abraham.
Pus ju chunch ju Abraham xapai lhixajcha tachi chun ju quijnanꞌan ju lhilacaꞌantauch ju Dios.
17 Chai ju Dios chunch ju xalaktsꞌin ju Abraham tachi ju atsꞌoknuncanta laꞌixchivinti Dios junta chani juncan ju Abraham:
“Uxintꞌi ju iclhilhcatan ni unaꞌ xapai na lhu lapanacni”.
Chunch najun laꞌixchivinti Dios.
Chai ju Abraham quiclacaꞌilh ju Dios.
Pus ju Dios lai axtaknichokoi ju isꞌatsucuntiꞌan ju lapanacni mas tanitach.
Chai ju yuchi lhichivininch ju taxtokni ju jantucaꞌ tapasai tachi ju va uctaxtutach.
18 Pus ju Abraham aktsꞌiya ixlacaꞌi mas istasui tachi ju va jantu lai catimuctaxtunicalh.
Ju yuchi lacaꞌilh ni cajunaꞌ xapai na lhu lapanacni tachi ju junilh ju Dios acsni tavanan junilh ni na lhu cajunaꞌ ju ixꞌapapanatnich.
19 Ju Abraham va tachi lhilaksilh ixchivinti Dios ju ixjunita mas iscꞌatsai ni lana jantu lai catiꞌalilh ju isꞌaskꞌatꞌaꞌan ju va laꞌisꞌakstuꞌan ixtꞌiyunꞌan.
Ju yuchi ju Abraham ixpacxanta tachi tam cientos cꞌata chai ju ixꞌamachakaꞌ ju Sara ixjuncan lana jantu lai ixꞌalin ju isꞌaskꞌatꞌa.
20 Nin yuchi ni lai tam canaulh ju Abraham ixlacata ju tuchi ixjunita ju Dios.
Va palai pꞌas lhilacaꞌalh ju Dios.
Ixnajunch ni yuchi ju xakꞌai ju Dios.
21 Ixlhichux ixꞌalhunut ixlacaꞌi ni laich canavi ju tuchi ixkꞌalhtasunitach ju Dios.
22 Chai ju Dios ni cꞌatsalh ni na ixlacaꞌinich ju Abraham pus yuchi lhilaktsꞌilh ju Dios ni salaka ixjunita ju ixꞌalhunut.
23 Para jantu va ixlacata isꞌakstu ju Abraham ju chunch lhitsꞌokcanta laꞌixchivinti Dios junta chani najun:
“Ju Abraham lhilacaꞌalh ju Dios.
Yuchi lhilaktsꞌincalh ni salaka ixꞌalhunut”.
Chunch ju najun laꞌixchivinti Dios.
24 Para ju ani vachuꞌ tsꞌokcanta ju quilacataꞌan.
Vachuꞌ calaktsꞌincanau ni salaka ju quiꞌalhunutꞌan ni lhilacaꞌanauch ju Dios ju macxtuchokolh ju quiꞌucxtinꞌan Jesús junta ixmacnucanta.
25 Ju Jesús tamakꞌaxtakli laꞌixꞌaninti ixlacata ju quiꞌalactuꞌuntiꞌan.
Chai mas nilh macxtuchokocalh junta ixmacnucanta.
Pus ixlhiyuchach vachuꞌ aquintalaktsꞌinan ju Dios ni salaka juntau ni lhilacaꞌanau ju Cristo.