Chani jun ju quiꞌatsucuntiꞌan ni salaka jun
5
Ju Dios quintalaktsꞌinan ju chavai ni salaka juntau ju laquiꞌalhunutꞌan ni lhilacaꞌantauch ju Cristo.
Ju chavai matich ixtalhkꞌamti ju Dios ju quilacataꞌan va ixlacata ni nilhch ju quilacataꞌan ju quiꞌucxtinꞌan Jesucristo.
2 Chai ju Dios quintanavinin lamapainin va ixlacata ju Cristo acsni quintalaktsꞌinan ni salaka junita ju quiꞌalhunutꞌan.
Pus chunch ju quintalaktsꞌinan acsni lhilacaꞌanauch ju Cristo.
Chai va tachi aquintanaviniyanch ju ani lamapainin.
Chai lhilackꞌachanauch ni cꞌatsayauch ni cachaꞌanau ju anch junta vilhcha ju Dios junta slivasalh cꞌus junita.
3 Chai jantu va yuꞌ ju anuꞌ ju lhikꞌachanau.
Para vachuꞌ kꞌachanau mas makꞌalhkꞌajnanauch ju ani.
Cꞌatsayauch ni anchach puꞌalin ju quintachaputꞌan ni lai chꞌixau va tuchi camilh ju laquiꞌatsucuntiꞌan.
4 Chai acsni palai lai chꞌixau mas va tuchi tapasai laquiꞌatsucuntiꞌan pus tasui ni vasalh ixlhichux quiꞌalhunutꞌan ju lhilacaꞌanau ju Dios.
Chai ni tasui laquiꞌatsucuntiꞌan ni vasalh lhilacaꞌanau ju Dios pus palai pꞌas lhilacaꞌanau ju Dios ni vasalh cachaꞌanau ju lactꞌiyan.
5 Chai ni lhilaksiyau ju Dios ni aktsꞌiya aquintamuctaxtuniyan ju ixchivinti acsni quintajunan ni cachaꞌanau ju lactꞌiyan pus cꞌatsayau ni jantu aquintamamaxaniyan astan.
Chai ni quintamapainiyan ju Dios pus pucꞌatsayau ni aktsꞌiya aquintamuctaxtuniyan ju ixchivinti.
Chai ju Dios quintamalakachanitachan ju Spiritu Santu ju tꞌajun laquiꞌalhunutꞌan chai yuchi ju quintajunan ni na quintamapainiyan ju Dios.
6 Acsni jantu lai ixꞌaktaijucanau ju va quiꞌakstuꞌan chai jantucaꞌ ixtalhoniyau ju Dios pus nilh ju Cristo ju quilacataꞌan.
Nilh acsni chilh ju ixꞌavilhchan ju ilhcanitach ju Dios.
7 Mas matiꞌ cava ixtalakꞌalhin ju tam lapanac ju yocanta junta camaknicanach na lhixcai ni caꞌalilh tam xamatiꞌ ju caniputulh ixlacata yuchi.
Ca laich cava ni caꞌalilh pumatam ju laich caniputulh ixlacata apumatam va ixlacata ni na kꞌoxich lapanac laktsꞌin ju tam ixꞌamigo.
8 Para ju Dios quintamasuninch ni na quintamapainiyan ni malakachachilh ju Jesús ju quinichilh ju quilacataꞌan mas alactuꞌunin ixjuntaucaꞌ.
9 Para ju chavai laktsꞌincantauch ni salaka junita ju quiꞌalhunutꞌan va ixlacaꞌatalh ni quinichilh ju Cristo.
Chai cꞌatsayau ni jantuch aquintamamakꞌalhkꞌajniyan ju Dios ixlacata ju quiꞌalactuꞌuntiꞌan.
10 Acsni tavanan ixtꞌalaxcayau ju Dios pus yuchi ju quintapunavichokon ixꞌamigojni acsni nilh ju istsꞌalh ju lacacurus.
Chai ni quintamalakꞌavichokon ju Dios laꞌixꞌaninti ju istsꞌalh pus istavasalanti lai cꞌatsayau ni catakꞌalhtaxtuyauch va ixlacaꞌatalh ni taꞌacxtuchokolh ju Cristo junta ixmacnucanta chai tꞌajunch ju chavai.
11 Chai jantu va yuchi ni aquintamakꞌalhtaxtuyan.
Para vachuꞌ lhikꞌachanauch ju Dios ixlacata ju quiꞌucxtinꞌan Jesucristo ni laꞌixlacata yuchi ju xaquintanavichokoyan lhiꞌamigo ju Dios.
Va ixlacata ju Adán alactuꞌunin ju xajchau
12 Pus ixlacata va pumatam lapanac ju putasuta ju alactuꞌunti ju ani lacamunutpaꞌ.
Yuchi ju ixjuncan Adán.
Chai ixlacata ni alactuꞌunulh ju yuchi chai ni ixꞌapapanatnich juntau pus yuchi lhiniyau ju chavai.
Niyau ni vachuꞌ alactuꞌunin lhixajchau ju quijnanꞌan.
13 Pus mas tucaꞌ ixmatsꞌokꞌulanican ju lhamapꞌaksin ju Moisés para aktsꞌiya ixtaꞌalactuꞌununch ju lapanacni ju ani lacamunutpaꞌ.
Para jantucaꞌ ixꞌalaktsꞌin ju lapanacni ni alactuꞌunin ixtajunita ni va jantucaꞌ ixmatsꞌokꞌulanican ju Moisés ju lhamapꞌaksin junta naulh tuchi ixtalakxtuch ju alactuꞌunti.
14 Para mas jantucaꞌ istsꞌokꞌulacanta ju ixlhamapꞌaksin Dios para aktsꞌiya tani tachi chun ju lapanacni ju ixtatꞌajun tus acsni ixtꞌajun ju Adán tus acsni ixtꞌajun ju Moisés.
Yuchi talhini ni va taꞌalactuꞌunulh mas jantu tucan chun talalh tachi ju lalhch ju Adán.
Pus va ixlacata ni alactuꞌunulh ju Adán si alactuꞌunin juntau ju chavai.
Para va ixlacata ni quinichilh ju Cristo yuchi lai quintalhilaktsꞌinan ju Dios ni salaka junita ju quiꞌalhunutꞌan.
15 Na kꞌai ju lhakꞌailaktsꞌin ju quintaxtaknitan ju Dios.
Jantu chun tachi ju alactuꞌunti ju quintamacontilanitan ju Adán.
Pus va ixlacata ni alactuꞌunulh pumatam jokꞌat ju Adán ixjuncan yuchi na lhu talhini ju chavai.
Para palai na lhu ju ixꞌamapaininti ju Dios ju navilh lhichux.
Pus quintalhikꞌailaktsꞌin ju sastꞌi quiꞌatsucuntiꞌan ju Dios va ixlacata ju lamapainin ju quintanavinitan pumatam jokꞌat.
Yuchi ju Jesucristo.
16 Ju lhakꞌailaktsꞌin ju quintaxtaknitan ju Dios jantu ixtꞌachunch lai cativa tachi ju alactuꞌunti ju quintamacontilanitanch ju pumatam lapanac ju Adán ixjuncan.
Ju Adán navilh lakatam alactuꞌunti chai yuchi alhimucꞌanikꞌocantau ju quintalakꞌalhinꞌan tachi chun ju quijnanꞌan.
Para ju Dios quintanavinin lamapainin chai quintalaktsꞌin ni salaka ju quiꞌalhunutꞌan mas lhu alactuꞌunti ju xanaviyau.
Chai chunch quintalaktsꞌinan va yuchi ni lhilaksiyauch ju Jesucristo.
17 Pus va ixlacata ni alactuꞌunulh pumatam ju Adán ixjuncan yuchi lhinican ju chavai.
Para va ixlacata apumatam ju Jesucristo juncan yuchi lai quintalhinaviniyan kꞌai lamapainin ju Dios acsni quintalaktsꞌinanch ni salaka ju quiꞌalhunutꞌan va ixlacaꞌatalh ni lhilaksiyauch ju Jesucristo.
Chai tachi chun ju quijnanꞌan ju amaklhtayanantauch ju anuꞌ lamapainin ju quintanavinitan ju Dios pus catsucutachau ju lactꞌiyan chai catꞌataꞌucxtinitachau ju Cristo.
18 Pus ju Adán alactuꞌunulh.
Chai ixlhiyuchi mucꞌanikꞌocantauch quintalakꞌalhinꞌan tachi chun ju quijnanꞌan.
Pus vana va chun ju ani.
Ju Cristo navi ju stavasalanti.
Chai yuchi lai quintalhilaktsꞌinan ni salaka ju quiꞌalhunutꞌan tachi chun ju quijnanꞌan.
Chai yuchi lhiꞌalinch ju quiꞌatsucuntiꞌan ju conkꞌalhiyanta ju lactꞌiyan.
19 Ju Adán jantu lai lacaꞌi.
Chai ixlacata ni va jantuch lai lacaꞌi ju yuchi pus si alactuꞌunin juntau ni ixꞌapapanatnich juntau.
Chai ju Cristo lacaꞌi.
Chai ixlhiyuchach na lhu caꞌalhilaktsꞌincanaꞌ ni salaka junita ju ixꞌalhunutꞌan laꞌixmacni Dios.
20 Pus ju Dios lhinaulh istsꞌokꞌulaca ju lhamapꞌaksin chai ju acsnich palai lhu tasu ju alactuꞌunti ni ixtalakꞌalhi ju lhamapꞌaksin ju lapanacni.
Para acsni tavanan na lhu tasu ju alactuꞌunti pus acsnich ju palai lhu quintanavinin lamapainin ju Dios ni laich quintamacꞌacxanin va ixlacata ni quinichilh ju Cristo.
21 Pus jantu lai tsucukꞌalhican va ixlacaꞌatalh ni alactuꞌunulh ju Adán.
Para vachuꞌ va ixlacata ju kꞌai lamapainin ju quintanavinitan ju Dios quintapulaktsꞌinan ju Dios ni salaka ju quiꞌalhunutꞌan.
Chai ju chunch puꞌalinch ju quiꞌatsucuntiꞌan ju conkꞌalhiyanta ju lactꞌiyan ni lhilacaꞌanauch ju quiꞌucxtinꞌan Jesucristo.