Tachi ju va nitauch quintalhilhcatan ju Dios
6
Pus tas anonaꞌitꞌit ju chavai.
Ja lai catailhiꞌanau ju alactuꞌunti ni chach palai paklhu quintanaviniyan lamapainin ju Dios ni aquintamacꞌacxaniyanch ju quintalakꞌalhinꞌan ju va tachi naviyau.
2 Ca jantu tavanan.
Ju quijnanꞌan ni lhilacaꞌantauch ju Cristo pus tachi ju va nitauch quintalhilhcatan ju Dios.
Pus jantu lai vana va quiꞌalactuꞌuntiꞌan canaviyau cuenta.
3 Ja va jantu cꞌatsꞌayatꞌit ni chani ju nomputun ju akpaxat.
Pus acsni akpaxtauch va nomputun ni va lakatam tꞌajuntauch ju Cristo.
Chai nomputun ni cꞌatsayau ni tachi ju va nitauch quintalhilhcatan ju Dios acsni tavanan nilh ju Cristo.
4 Pus acsni akpaxtauch va nomputun ni macontauch ju makꞌaniya quiꞌatsucuntiꞌan tachi ju ixlayau acsni tucaꞌ ixlhilacaꞌanauch ju Cristo.
Chunch tachi ju Cristo ni macaulh ju ixlacatuna ju va lhilapanac acsni nilh chai macnucalh.
Pus ju yuchi macxtuchokocalh lacakꞌai ixtachaput ju Dios junta ixmacnucanta.
Pus vana va chun ju quijnanꞌan.
Acsni akpaxtauch va nomputun ni sastꞌi catasuyaꞌ ju quiꞌatsucuntiꞌan.
5 Chai ni va lakatam tꞌajuntauch ju Cristo pus tachi ju va nitauch quintalhilhcatan ju Dios acsni tavanan nilh ju yuchi.
Pus vachuꞌ alin ju sastꞌi quiꞌatsucuntiꞌan tachi ju yuchi ni alilh ju sastꞌi ixlacatuna acsni tavanan taꞌacxtuchokolh laꞌixꞌaninti.
6 Cꞌatsayauch ju ani.
Acsni tavanan xtujcalh ju Cristo ju lacacurus pus tachi ju va nitauch ju quijnanꞌan quintalhilhcatan ju Dios.
Pus ju chunch jantu vana na tachapun jun ju makꞌaniya quiꞌatsucuntiꞌan ni laich va tachi caꞌalactuꞌununau.
Jantuch lai vana quintamanaviniyan ju macxcai ju makꞌaniya quiꞌatsucuntiꞌan.
7 Tachi ju tam lapanac ni nitach pus jantuch vana alactuꞌunun.
Pus vana va chun ju quijnanꞌan.
Jantuch lai catitailhiꞌau ju quiꞌalactuꞌuntiꞌan.
8 Pus ni tachi ju va nitauch quintalhilhcatan ju Dios acsni tavanan xtujcalh ju Cristo ju lacacurus pus lacaꞌiyauch ni vachuꞌ alin ju sastꞌi quiꞌatsucuntiꞌan tachi ju yuchi ni alilh ju sastꞌi ixlacatuna acsni taꞌacxtuchokolh laꞌixꞌaninti.
9 Ju Cristo taꞌacxtuchokolh acsni ixmacnucanta chai cꞌatsayau ni jantuch catinichokolh ju yuchi.
10 Pus ju Cristo ni quinichilh ixlacata ju quiꞌalactuꞌuntiꞌan quinchuxꞌan pus jantu aktam catinichokolh.
Chai ju chavai tꞌajun ju Cristo chai navinitꞌajun ju ixkꞌachat ju Dios tachi ju aktsꞌiya ixlaich.
11 Pus chunchach vachuꞌ ju chavai ju quijnanꞌan.
Acꞌatsꞌatꞌit ni tachi ju va nimakꞌantau ixlacata ju alactuꞌunti.
Chai ju chavai catsucuyau tachi ju kꞌachani ju Dios ni va lakatam tꞌajuntau ju quiꞌucxtinꞌan Cristo Jesús.
12 Chai ni chunch untꞌatꞌit pus jantu anavinitꞌit ju macxcai ixkꞌachat ju milacatunaꞌan ju caniyaꞌ.
Jantu alacꞌasqꞌuinitꞌit ni catamanaviniyan macxcai ju miꞌatalacpastꞌacꞌatꞌan.
13 Jantu alacꞌasqꞌuinitꞌit ni canavilh tuꞌuꞌ alactuꞌunti ju milacatunaꞌan.
Alai amakꞌaxtꞌaknitꞌit ju Dios ju miꞌatsucuntiꞌan.
Chunch ju alatꞌit ni tamapaxanitan ju makꞌaniya miꞌatsucuntiꞌan chai xtꞌaknichꞌokꞌocꞌantꞌatꞌit ju sastꞌi miꞌatsucuntiꞌan.
Pus amakꞌaxtꞌaknitꞌit ju Dios ju miꞌatsucuntiꞌan ni laich amalacꞌasutꞌit ju tuꞌuꞌ kꞌox.
14 Acsni ixlhilacꞌapꞌinatꞌit ju lhamapꞌaksin pus na lhu alactuꞌunti ju ixnaviyatꞌit ni jantu lai ixmuctꞌaxtꞌuyatꞌit.
Para ju chavai ju Dios tanavinitan lamapainin acsni taxtaknitan ju sastꞌi miꞌatsucuntiꞌan.
Chai ju chavai jantu lai catamanaviniyan macxcai ju alactuꞌunti ju alin lamiꞌalhunutꞌan.
Ixlapanac juntau va tichi chavaich ju sacxtutau ni quiꞌucxtinꞌan cajunaꞌ
15 Pus tas alayaꞌitꞌit.
Ja vanach alactꞌuꞌununtsꞌucꞌuyaꞌitꞌit va ixlacata ni tamacꞌacxanitan ju Dios va laꞌixꞌamapaininti chai jantuch vana lhilacꞌapꞌinatꞌit ju lhamapꞌaksin.
Jantu tavanan.
16 Ju uxijnan cꞌatsꞌayatꞌit ni ixlapanacni untꞌatꞌit va tichi chavaich ju sacxtꞌutꞌatꞌit ni miꞌucxtinꞌan cajunaꞌ.
Pus vana va chun ju ani.
Ni va yuchi ju icnavi cuenta ju alactuꞌunti pus tachi ju va quiꞌucxtin icnavita ju alactuꞌunti chai acxtaknicanaꞌ ju quimakꞌalhkꞌajnat junta conkꞌalhiyanta.
Para ni va yuchach ju canaviyau cuenta ju ixnavica ju ixkꞌachat ju Dios pus quiꞌucxtinꞌan navitauch ju Dios chai salaka cajunaꞌ ju quiꞌalhunutꞌan.
17 Pus ju pꞌulhnan aktsꞌiya va yuchi ju ixnaviyatꞌit cuenta ju miꞌalactuꞌuntiꞌan.
Para icxtakni lakꞌailaktsꞌiuch ju Dios ni qꞌuiclacꞌaꞌiyatꞌit ju chavai ixlhichux miꞌalhunutꞌan ju ixchivinti Dios ju masunicꞌantꞌatꞌit.
18 Chai ju chavai jantu va yuꞌ ju naviyatꞌit cuenta ju alactuꞌunti.
Para ju chavai yuchach ju naviyatꞌit cuenta ju soknicꞌa.
19 Pus chani aclajunau.
Tsꞌa ma palai lai amachꞌakxayaꞌitꞌit ju tuchi iclajumputunau.
Pus ju chavai taꞌalin ju lapanacni ju talhinajun.
Chai taꞌalin ju lapanacni ju va alhijuncan.
Pus ju pꞌulhnan ju uxijnan miꞌakstuꞌan ixlhinonatꞌit lamiꞌatsucuntiꞌan chai ixnaviyatꞌit tachi chun ju macxcai ju ixnavipꞌutꞌunatꞌit.
Chai palai palai lhu alactuꞌunti ju ixnaviyatꞌit.
Pus ju chavai alakꞌaꞌitꞌit ni Dios ju calhinaulh lamiꞌatsucuntiꞌan ni laich anaviyaꞌitꞌit ju soknicꞌa.
Chai ju chunch slivasalh ni ixlapanacni Dios aꞌunaꞌitꞌit.
20 Ju uxijnan acsni miꞌakstuꞌan ixlhinonatꞌitcaꞌ lamiꞌatsucuntiꞌan chai ixnaviyatꞌit ju macxcai pus jantu ixnaviyatꞌit ju soknicꞌa.
21 Para jantu lai xapꞌulhaꞌayatꞌit ju kꞌox atsucunti acsni ixnaviyatꞌit ju anuꞌ taxtokni ju tuchꞌi tꞌamaxananatꞌit ju chavai.
Pus ju tanavich ju chunch va catamakꞌalhkꞌajnankꞌalhiyaꞌ.
22 Para ju uxijnan taꞌaktaijutan ju Dios ni jantu vana va chun ju alactꞌuꞌununatꞌit.
Chai ju chavai Dios ju navitꞌatꞌit miꞌucxtinꞌan.
Chai ni Dios ju navitꞌatꞌit miꞌucxtinꞌan pus yuchach ju lhinonkꞌojui lamiꞌatsucuntiꞌan.
Chai ju laꞌixꞌaclantich atꞌanuyaꞌitꞌitch junta conkꞌalhiyanta ju miꞌatsucuntiꞌan ju lactꞌiyan.
23 Ju ixlhimapalhcan ju alactuꞌunti yuchi ni ancan junta jonkꞌalhita makꞌalhkꞌajnat.
Para ju ixlhakꞌailaktsꞌinch ju Dios yuchi ni alinch ju quiꞌatsucuntiꞌan ju conkꞌalhiyanta ju lactꞌiyan va ixlacata ni va lakatam tꞌajuntau ju quiꞌucxtinꞌan Jesucristo.