Chanich junita ju quiꞌatsucuntiꞌan laꞌixmacni Cristo
7
Iclaxakꞌalayau ju uxijnan ju mispꞌayatꞌit ju lhamapꞌaksin.
Ja va jantu machꞌakxayatꞌit ji quiꞌalakꞌavin.
Ju tam lapanac va acsnich ju lai mucꞌanican ixtalakꞌalhin acsni titꞌajuncaꞌ.
2 Tachi ju tam chakoꞌulh ju alin ju ixpapa.
Ju lacalhamapꞌaksin najun ni catꞌatsuculh ju ixpapa acsni titꞌajuncaꞌ.
Para acsni caniyach ju ixpapa pus ju lhamapꞌaksin jantu lai catiꞌulanilh ixtalakꞌalhin ju anuꞌ chakoꞌulh mas catamakꞌaxtokchokolh.
3 Para acsni tꞌajuncaꞌ ju ixpapa ni va catꞌatsuculh apumatam pus calhimispacanach ni alactuꞌunuꞌ.
Para ni nitach ju ixpapa pus ju lhamapꞌaksin jantu lai catiꞌulanilh ixtalakꞌalhin mas catamakꞌaxtokchokolh.
4 Pus vana va chun ju quijnanꞌan ji quiꞌalakꞌavin.
Ju makꞌanchich ju quijnanꞌan ixlhilaksiyau ju lhamapꞌaksin ni ixnonau ni anchach ju caꞌixlhitajuyau ju salaka quiꞌatsucuntiꞌan.
Para acsni tavanan nilh ju Cristo pus ju Dios lhilhcata ni tachi ju va nilh ju makꞌaniya quiꞌatsucuntiꞌan ju na ixkꞌachani ju alactuꞌunti acsni tucaꞌ ismispayau ju Cristo.
Pus ju chavai jantuch vana yuꞌ ju lhamapꞌaksin ju lhilaksiyau.
Chai ni lhilhcata ju Dios ni tachi ju va nilh ju makꞌaniya quiꞌatsucuntiꞌan pus laich cajunau ixꞌanuꞌ ju Cristo ju taꞌacxtuchokolh acsni ixmacnucanta.
Pus chunch ju ulhtucantauch ni laich canaviyau ju soknicꞌa tachi ju kꞌachani ju Dios.
5 Acsni tucaꞌ ixlhilacaꞌanau ju Cristo pus na lhu ixnaviyau ju alactuꞌunti.
Chai ni ismispayauch ta yu najunch lacalhamapꞌaksin pus va apalai ixnaviputunau ju jantu kꞌox.
Pus ju chunch va puꞌalin ju makꞌalhkꞌajnat junta jonkꞌalhita.
6 Para ju chavai jantu lai vana quintamapastꞌacꞌaniyan ixnavica macxcai ju lhamapꞌaksin.
Icpunajun chunch ni lhilhcata ju Dios ni tachi ju va nitach ju makꞌaniya quiꞌatsucuntiꞌan.
Chai ju chavai lai naviniyau ixkꞌachat ju Dios laꞌixtachaput ju Spiritu Santu.
Jantu va yuchi ni anicꞌa acnavi tachi ju tsꞌokcanta lakatuꞌuꞌ lhamapꞌaksin.
Na alin ju alactuꞌunti ju laquiꞌalhunutꞌan
7 Tꞌas anonaꞌitꞌit ju chavai.
Ja va anonaꞌitꞌit ni jantu kꞌox ju lhamapꞌaksin.
Ca jantu lai actinaulh ju chunch.
Pus ni va matiꞌ caꞌixva ju lhamapꞌaksin pus ju quitꞌin jantu xacticꞌatsa ni va icꞌalactuꞌunuꞌ.
Jantu xaccꞌatsa ni xacꞌalactuꞌunun acsni xaclhacchaꞌan tuꞌuꞌ ni jantu cava xaquijunilh ju lhamapꞌaksin ni jantu aclhacchaꞌanilh tuꞌuꞌ.
8 Acsni icmispalh ju lhamapꞌaksin pus tachi ju va quimapastꞌacꞌani ju alactuꞌunti.
Tachi ju va quijuni ju makꞌaniya quiꞌatalacpastꞌacꞌat ni acnavi ju jantu kꞌox acsni quimapastꞌacꞌanilh ni acꞌalhacchaꞌanalh.
Pus acsni matiꞌ ju lhamapꞌaksin pus jantuch na chun aquijunilh ju makꞌaniya quiꞌatalacpastꞌacꞌat ni acꞌalactuꞌunulh.
9 Ju makꞌanchich acsni tucaꞌ xacmispata ju kꞌox lhamapꞌaksin pus va lhikꞌach xactꞌajun.
Para acsni icmispalhch ju kꞌox lhamapꞌaksin va apalai xacꞌalactuꞌunumputun.
Chai ju Dios quimucꞌanilh ju quiꞌaninti ni va iclakꞌalhilh ju ixlhamapꞌaksin.
10 Pus xacnajun ni xacxtaknicalh ju quiꞌatsucunti jonkꞌalhita ni xacmuctaxtulh tachi ju najun lacamakꞌaniya ixlhamapꞌaksin Dios.
Para alai anch icpulhitajulh ju quiꞌaninti ni iclakꞌalhi.
11 Pus ju makꞌaniya quiꞌatalacpastꞌacꞌat va icputaꞌokxchokꞌolh ju laꞌixlhamapꞌaksin Dios.
Pus acsni icmispalh ju ixlhamapꞌaksin Dios pus tachi ju va quimapastꞌacꞌani ju alactuꞌunti chai icmucꞌanicalh ju quiꞌaninti acsni iclakꞌalhilh.
12 Pus ju makꞌaniya lhamapꞌaksin slivasalh ni ixꞌanuꞌ Dios.
Chai tachi chun ju najun lacalhamapꞌaksin si ixchivinti Dios chai soknicꞌa chai si na kꞌox.
13 Para ju anich kꞌoxi lhamapꞌaksin jantu lai actinaulh ni yuchi ju puꞌalinch ju quiꞌaninti.
Alai icmucꞌanicalh ju quiꞌaninti ni icꞌalactuꞌunulh.
Chai lacakꞌoxi lhamapꞌaksin tasui ni vasalh alactuꞌunti ju xacnavi.
Pus ju ixlhamapꞌaksin Dios slivasalh na kꞌox.
Chai ni iclakꞌalhilh pus tasui ni slivasalh na macxcai ju xacnavi.
14 Cꞌatsayauch ni isꞌakstu ju Spiritu Santu ju xtaklh ju makꞌaniya ixlhamapꞌaksin Dios.
Para ju quitꞌin va iclapanac chai slivasalh na tachapun ju alactuꞌunti ju alin laquiꞌalhunut.
15 Jantu icmachakxai ta yu junita ju quiꞌatsucunti.
Ju kꞌox icnaviputun jantiyuꞌ ju icnavi.
Alai yuchi icnavi ju jantu kꞌox iclhiulai.
16 Chai quitꞌin quiꞌakstu jantu ickꞌachani ju tuchi icnavi.
Pus yuchi iclhimachakxai ni aktsꞌiya kꞌox ju najun laꞌixlhamapꞌaksin Dios.
17 Para jantiyuꞌ ju sastꞌi quiꞌatsucunti ju navi ju jantu kꞌox iclhiulai.
Yuchach ju makꞌaniya quiꞌatalacpastꞌacꞌat ju tꞌajuncaꞌ laquiꞌalhunut ju navi ju chunch.
18 Iccꞌatsai ni jantu lai navi tuꞌuꞌ ju kꞌox ju makꞌaniya quiꞌatsucunti.
Ju chunch va nomputun ni jantu lai icnavi tuꞌuꞌ ju kꞌox ju va laquiꞌakstu.
Mas icnaviputun ju kꞌox para matiꞌ ju quintachaput ni lai acnavi.
19 Jantu lai va tsa icnavi ju kꞌox mas icnaviputun.
Va yuchi icnavi ju amacxcai ju jantu icnaviputun.
20 Para acsni icnavi ju jantu ickꞌachani pus jantiyuꞌ ju sastꞌi quiꞌatsucunti ju navi ju chunch.
Para yuchi ju navich ju vanach makꞌaniya quiꞌatsucunti ju ictipastꞌacꞌa ju laquiꞌalhunut.
21 Va tsa chani tapasai ju laquiꞌatsucunti.
Acsni icnaviputun ju kꞌox pus lana quisastꞌucꞌa ju amacxcai.
22 Ju lacasastꞌi quiꞌatsucunti ickꞌachani ju ixlhamapꞌaksin Dios.
23 Para iccꞌatsai ni alin atumpa ju quisastꞌucꞌa ju laquiꞌatsucunti.
Pus ju tuchi icnaviputun ju chavai ni quilasastꞌinilh ju quiꞌatalacpastꞌacꞌat ju Dios pus jantu lai icnavi.
Pus na tachapun ju alactuꞌunti ju alin laquiꞌalhunut.
24 Painich ju quitꞌin.
Tis chavaich ju lai aquiꞌaktaiju ni jantu acnavi ju alactuꞌunti ju alin laquiꞌalhunut ju puꞌalin ju quiꞌaninti junta jonkꞌalhita quimakꞌalhkꞌajnat.
25 Icxtaknich lakꞌailaktsꞌiuch ju Dios ni laich aquiꞌaktaijuyaꞌ ju yuchi ni iclhilaksi ju quiꞌucxtinꞌan Jesucristo.
Para ni jantu cava aquiꞌaktaijulh ju Dios pus ju va laquiꞌakstu chani ju catapasalh ju laquiꞌatsucunti.
Ju sastꞌi quiꞌatsucunti vasalh canaviputulh ju ixlhamapꞌaksin ju Dios.
Para ju makꞌaniya quiꞌatalacpastꞌacꞌat catinaviputulh ju macxcai.
Para jantu catitapasalh ju chunch ni Dios ju quiꞌaktaijui.