Ju atsucunti ju xtꞌakꞌa ju Spiritu Santu
8
Ju chavai jantuch mucꞌanicanta ixtalakꞌalhinꞌan ju va lakatam tatꞌajunita ju Cristo Jesús chai ju jantuch vana ixkꞌachat ju makꞌaniya ixꞌatalacpastꞌacꞌatꞌan tanavi.
Va yuchi ju tanavinich ixkꞌachat ju Spiritu Santu.
2 Ni iclhilacaꞌanta ju Cristo Jesús pus ju Spiritu Santu tꞌajun laquiꞌalhunut.
Chai ju yuchi quixtaknita ju sastꞌi quiꞌatsucunti.
Pus acsni lhinajun ju Spiritu Santu ju laquiꞌalhunut pus jantu va yuchi ju icnavi cuenta ju quiꞌalactuꞌunti.
Pus ni va yuchi ju xactailhiꞌalh ju quiꞌalactuꞌunti pus ixꞌalilh ju quiꞌaninti junta jonkꞌalhita makꞌalhkꞌajnat.
3 Ju makꞌaniya ixlhamapꞌaksin Dios jantu lai xaquintaxtakniyan ju soknicꞌa quiꞌatsucuntiꞌan ni va jantu lai xamuctaxtuyau ni va lapanacni juntau.
Para ju Dios quintaꞌaktaijun.
Ju yuchi malakachachilh ju istsꞌalh.
Quitalacasuchilh ju ani lacamunutpaꞌ tachi ju tam lapanac.
Chai ixpacxanta ixlacatuna tachi ixlacatuna ju alactuꞌuni lapanac mas jantu alactuꞌunulh ju yuchi.
Yuchi ju mapalalh ixtapalh ju quiꞌalactuꞌuntiꞌan.
Chai ni quimapalachilh ju Cristo ixtapalh ju quiꞌalactuꞌuntiꞌan pus jantu vana na tachapun jun ju alactuꞌunti ju laquiꞌatsucuntiꞌan.
4 Chai ni taiꞌinita ju ixtachaput ju alactuꞌunti acsni nilh ju Cristo pus ju chavai lai naviyau ju soknicꞌa tachi ju najun laꞌixlhamapꞌaksin Dios.
Ju chavai jantu vana ixkꞌachat quiꞌalhunutꞌan ju canaviyau.
Para yuchach ju canaviyauch ju ixkꞌachat ju Spiritu Santu.
5 Pus ju tanavi ixkꞌachat isꞌakstuꞌan pus va yuchi ju tapastactꞌajun ju ixkꞌachat ju isꞌatsucuntiꞌan.
Para ju tanavini ixkꞌachat ju Spiritu Santu tapastactꞌajun ju ixtaxtokni Dios.
6 Ni va yuchi ju capastꞌacꞌau ju quinkꞌachat quiꞌakstuꞌan pus capuꞌalinaꞌ ju aninti junta makꞌalhkꞌajnankꞌalhican.
Para ni va yuchi ju capastꞌacꞌau ju ixkꞌachat ju Spiritu Santu pus puꞌalin ju sastꞌi quiꞌatsucuntiꞌan chai jantu lacꞌan ju quiꞌalhunutꞌan.
7 Pus ju tapastactꞌajun ju ixkꞌachat isꞌakstuꞌan pus ixtꞌalaxcai Dios tajunita.
Chai ju chunch talai jantu tamuctaxtuputun tachi ju najun laꞌixlhamapꞌaksin Dios nin caꞌalilh ixtachaputꞌan ni lai catamuctaxtulh.
8 Pus ju va tanavi ixkꞌachat isꞌakstuꞌan pus jantu lai tanavi tuꞌuꞌ ju kꞌox calhiula ju Dios.
9 Para ju uxijnan jantuch vana naviyatꞌit ju va minkꞌachatꞌan miꞌakstuꞌan.
Yuchi ju naviniyatꞌit ju ixkꞌachat ju Spiritu Santu ni vasalh tꞌajun ju Spiritu Santu lamiꞌalhunutꞌan.
Pus ni alin xamatiꞌ ju jantucaꞌ pacxanta ju Spiritu Santu ju malakachachilh ju Cristo pus ju yuchi jantucaꞌ ixlapanac Cristo.
10 Pus mas caniyaꞌ ju milacatunaꞌan va ixlacaꞌatalh ni alactuꞌununau para ni tꞌajun ju Cristo ju lamiꞌalhunutꞌan pus ju mintacuvinꞌan catatsucukꞌalhiyanta ju lactꞌiyan ni talaktsꞌinan ju Dios ni salaka junita ju miꞌalhunutꞌan.
11 Pus ju Dios macxtuchokolh ju Jesús acsni ixmacnucanta.
Chai vana yuꞌ ju catamacxtunichokoyan ju milacatunaꞌan ju lai ni chai cataxtakniyan sastꞌi milacatunaꞌan.
Pus laꞌixtachaput ju Spiritu Santu ju capunaviyaꞌ ju chunch.
Chai chunch ju aꞌulhtꞌucꞌanaꞌitꞌit tachi chun ju uxijnan ju pꞌacxantꞌatꞌit ju Spiritu Santu lamiꞌalhunutꞌan.
12 Chai ni chunch ju aquintaꞌulhtuyan ju Dios pus aktsꞌiya jantu lhijun ni vana canaviyau ju makꞌaniya quiꞌatalacpastꞌacꞌatꞌan.
13 Pus ni vanach atꞌailhipꞌinaꞌitꞌit ju makꞌaniya miꞌatalacpastꞌacꞌatꞌan pus amakꞌalhkꞌajnankꞌalhiyaꞌitꞌit.
Para ni amakꞌosuyaꞌitꞌit ju ixkꞌachat ju makꞌaniya miꞌatsucuntiꞌan laꞌixtachaput ju Spiritu Santu pus ju chunch alinch ju miꞌatsucuntiꞌan ju lactꞌiyan.
14 Chai tachi chun ju tanavitꞌajun tuchi canonach ju Spiritu Santu pus yuꞌunchach ju isꞌaskꞌatꞌan Dios ju stavasalanti.
15 Chai ju Spiritu Santu ni tꞌajun laquiꞌalhunutꞌan pus jantu tasqꞌuini ni vana catalhoniyau ju quimakꞌalhkꞌajnatꞌan ixlacata quiꞌalactuꞌuntiꞌan.
Para ju Spiritu Santu yuchi ju quintanaviyan isꞌaskꞌatꞌan Dios.
Chai ni pacxantau ju Spiritu Santu laquiꞌalhunutꞌan pus yuchi lhijunauch ju Dios ni quimpaiꞌan.
16 Chai isꞌakstu ju Spiritu Santu ju quintamamachakxaniyan laquintacꞌatsanꞌan ni isꞌaskꞌatꞌan Dios juntau.
17 Chai ni isꞌaskꞌatꞌan juntau pus vachuꞌ caꞌamaklhtayananauch ju kꞌox atsucunti ju aquintaxtakniyan ju Dios.
Catꞌaꞌamaklhtayananauch ju Cristo.
Chai ni camakꞌalhkꞌajnanau ju chavai va ixlacaꞌatalh ni lhilacaꞌantauch ju Cristo pus ju Dios aquintalakꞌayayan tachi ju ulhtucalh ju Cristo.
18 Chai mas makꞌalhkꞌajnanauch ju ani lacamunutpaꞌ para jantuch canaviniu cuenta.
Cꞌatsayau ni astan tachi ju va jantu tuꞌuꞌ ixjunita ju quimakꞌalhkꞌajnatꞌan calhiulayau acsni calakꞌayacanau ju lactꞌiyan.
19 Chai tachi chun ju taxtokni ju navita ju Dios na talaktsꞌimputun acsni tavanan calakꞌayacanaꞌ ju isꞌaskꞌatꞌan Dios.
20 Pus tachi chun ju taxtokni ju ani lacamunutpaꞌ jantu chun ju talai tachi ju ixlhilhcata pꞌulhnan ju Dios acsni tavanan navicanchalh ju lacamunutpaꞌ.
Para jantu va laꞌixkꞌachatꞌan isꞌasktuꞌan ju tatakꞌalhita.
Va chunchach ju lacasqꞌuinchokolh ju Dios acsni alactuꞌunulh ju Adán.
Para ju Dios jantu calacasqꞌuinach ni catatakꞌalhikꞌalhi.
Aktsꞌiya calakꞌoxichokocanach.
21 Pus isꞌakstu ju Dios ju calakꞌoxichokoyaꞌ tachi chun ju taxtokni ju ani lacamunutpaꞌ chai jantu catatsꞌankꞌayaꞌ.
Chai acsni tavanan cataiꞌinikꞌocanaꞌ ju ixtachaput ju alactuꞌunti pus va lhikꞌach cajunaꞌ ju quiꞌatsucuntiꞌan tachi chun ju isꞌaskꞌatꞌan Dios juntau.
Chai vana va chun tachi chun ju taxtokni ju ani lacamunutpaꞌ.
Si catasastꞌikꞌoyaꞌ ju acsnich.
22 Chai cꞌatsayau ni tus chavai tatꞌajun makꞌalhkꞌajnin tachi chun ju taxtokni ju ani lacamunutpaꞌ ni tucaꞌ tasastꞌichokoi.
23 Chai jantu va yuꞌunch ju tamakꞌalhkꞌajnan.
Para vachuꞌ chunch ju makꞌalhkꞌajnanau mas cꞌatsayau ni caxtaknicanau ju sastꞌi quilacatunaꞌan tachi ju najunta ju Dios.
Chai ni quintaxtaknitan ju Spiritu Santu ju tꞌajun laquiꞌalhunutꞌan ju chavai pus ixpucꞌatsacan junita ni aquintamuctaxtuniyan ju Dios ju ixchivinti.
Pus ju quijnanꞌan mas makꞌalhkꞌajnanau para pacxanauch tus caxtaknicanau ju sastꞌi quilacatunaꞌan.
Chai chunchach ju capumispacanau ni vasalh isꞌaskꞌatꞌan Dios juntau.
24 Acsni takꞌalhtaxtutauch juncantau ni caxtaknicanau ju sastꞌi quilacatunaꞌan chai yuchi ju tipacxanaucaꞌ.
Pus ni icxtaknicanta ju tuchi xacjuncanta pus ca jantuch vana actipastactsuculh.
Ja lai vana actipastactsuculh ju tuꞌu ni icxtaknicantach.
25 Para ni jantucaꞌ laktsꞌinau ju tuchi aquintaxtakniyan ju Dios pus pacxanaucaꞌ chai jantu jeks uyau.
26 Pus vachuꞌ ju Spiritu Santu quintaꞌaktaijuyan acsni jantu sok cꞌatsayau tuꞌuꞌ.
Ju quijnanꞌan jantu cꞌatsayau ta yu laich caputꞌachiviniu ju Dios ta yu kꞌoxich calhiula ju yuchi.
Para isꞌakstu ju Spiritu Santu sqꞌuin ju quilacataꞌan acsni jantu lai nonau ta yu cꞌatsanau ju laquiꞌalhunutꞌan.
27 Chai ju Dios lai laktsꞌin ju laquiꞌalhunutꞌan.
Chai ju yuchi cꞌatsai tuchi ju nomputun ju Spiritu Santu ju tꞌajun laquiꞌalhunutꞌan.
Chai ju Spiritu Santu acsni sqꞌuin ixlacataꞌan ju ixlapanacni Dios pus va yuchi ju sqꞌuin tachi ju lhijunch laꞌixkꞌachat ju Dios.
Lai tꞌalalhajacan ju macxcai
28 Chai mas va tuchi tapasai ju laquiꞌatsucuntiꞌan cꞌatsayau ni Dios ju calakꞌoxiyaꞌ ni si kꞌox cajunaꞌ ju quilacataꞌan ju mapainiyau ju Dios chai ju sacxtucantau ni isꞌaskꞌatꞌan cajumvi tachi ju ispastacta ju Dios ju makꞌanchich.
29 Pus ju quijnanꞌan quintamispatanch ju Dios tus acsni navicantacha ju lacamunutpaꞌ.
Chai vachuꞌ quintalhilhcaꞌulatan ni laich cajumvi ixtꞌachunch tachi ju istsꞌalh.
Yuchi ju Jesús.
Ju chunch ju istsꞌalh Dios xakꞌai cajunaꞌ lhilhu.
Chai ju quijnanꞌan ju lhilacaꞌantau ju Cristo tachi ju va isꞌapꞌisekꞌen juntau.
30 Chai ju quijnanꞌan ju aktsꞌiya quintalhcaꞌulatachan tus acsni navicantacha ju lacamunutpaꞌ pus quintasacxtutan ni isꞌaskꞌatꞌan cajumvi.
Chai ju quijnanꞌan ju quintasacxtutan ni isꞌaskꞌatꞌan cajumvi pus vachuꞌ quintalaktsꞌinanch ni na salaka ju quiꞌalhunutꞌan.
Chai ju quijnanꞌan ju quintalaktsꞌinanch ni na salaka ju quiꞌalhunutꞌan pus vachuꞌ quintajuntan ni aquintalakꞌayayan.
31 Pus tas anonaꞌitꞌitch ju chavai.
Pus ni Dios ju quintaꞌaktaijuyan jantu catalhananau mas lhu caꞌalilh ju quintꞌalaxcaiꞌan.
32 Ju Dios jantu lacasqꞌuilh ni catakꞌalhtaxtulh laꞌixꞌaninti ju istsꞌalh.
Alai va makꞌaxtaklh ju quilacataꞌan quijnanꞌan.
Chai ni lai makꞌaxtaklh ju istsꞌalh ju laꞌixꞌaninti ju va quilacataꞌan ja va a ti yuchach jantu lai aquintaxtaknikꞌojun tachi chun ju maktasqꞌuiniyau.
33 Tis chavaich ju lai quintamucꞌaniyan ju quintalakꞌalhinꞌan laꞌixmacni Dios ju quijnanꞌan ju quintasacxtutan ju Dios ni isꞌaskꞌatꞌan cajumvi.
Jantu xamatiꞌ ni isꞌakstu ju Dios ju nonchokoi ni salaka ju quiꞌalhunutꞌan ju quijnanꞌan.
34 Tis chavaich ju lai aquintamacaꞌan ju lacajipi ju quijnanꞌan.
Jantu xamatiꞌ ni nilh ju Cristo ju quilacataꞌan.
Ju yuchi vachuꞌ taꞌacxtuchokolh junta ixmacnucanta chai yuchi ju vi ju chavai laꞌixlhicana ju Dios.
Chai yuchi ju tapaininich ju Dios ju quilacataꞌan.
35 Mas va tuchi tapasaich ju laquiꞌatsucuntiꞌan para cꞌatsayauch ni va tachi quintamapainiyanch ju Cristo.
Tachi acsni alin tuꞌuꞌ ju makꞌalhkꞌajnat u tuꞌuꞌ axcayanti u tuꞌuꞌ aclhiꞌakchꞌakꞌokꞌaxmacalh u acchavanilh u acsni matiꞌ ju quimpumpuꞌ u acsni alin tuꞌuꞌ talhanti u acsni va icmaknican.
Acsni alin ju tuꞌuꞌ ju chunch ju laquiꞌatsucuntiꞌan jantu lai actinaulh ni acsnich ju jantu aquintamapainin ju Cristo.
36 Chunch ju tapasai ju laquiꞌatsucunti ju quitꞌin tachi ju tsꞌokcanta junta ma chani juncan ju Dios:
Va ixlacata ni iclalhilacaꞌanau ju uxintꞌi ji Dios va tachi icmaknipututꞌoncanauch.
Iclaktsꞌincanauch tachi ju va tuꞌuꞌ atapacxat.
Tachi ju tuꞌuꞌ borrego ju lhiꞌancan junta camaknicanaꞌ.
Ma chunch ju junicalh ju Dios.
37 Para mas makꞌalhkꞌajnanau jantu tuꞌuꞌ lai aquintamacꞌapꞌaniyan ju ixti Dios.
Aktsꞌiya lhikꞌach cachꞌixkꞌoyau laꞌixtachaput ju Cristo ju quintamapainiyan.
38 Pus ju quitꞌin iccꞌatsai ni matiꞌ tuꞌuꞌ ju lai aquintalhicꞌapꞌan ju Dios ni jantu aquintamapainiyan.
Nin acsni caniyau.
Nin acsni tꞌonaucaꞌ ju ani.
Nin yuꞌunch ju anquilhnin.
Nin yuꞌunch ju xalackꞌajin sia yuꞌunch ju anquilhnin.
Nin yuꞌunch ju alin ixtachaputꞌan sia yuꞌunch ju anquilhnin.
Nin yuchi ju tꞌonau tapasanin ju chavai laquiꞌatsucuntiꞌan.
Nin yuchi ju catapasayaꞌ laquiꞌatsucuntiꞌan astan.
39 Nin yuchi ju camincha ju talaclhman.
Nin yuchi ju camincha ju ixtankꞌajni lacatꞌun.
Nin yuchi ju tuꞌuꞌ atumpa ju navita ju Dios.
Jantu tuꞌuꞌ lai catimacꞌapꞌani ju Dios ni jantu aquintamapainiyan.
Chai ju yuchi quintamasunitan ni vasalh quintamapainiyan ni makꞌaxtaklh ju Cristo Jesús ju quilacataꞌan.
Chai ju chavai ju yuchi quiꞌucxtinꞌan junita.