Ju Dios asacxtuta ju israelitanin
9
Ju quitꞌin iclhilacaꞌanta ju Cristo chai iclajumputunau ju stavasalanti.
Jantu ictaꞌaklhtamai.
Vachuꞌ ju Spiritu Santu ju tꞌajun laquiꞌalhunut cꞌatsai ni stavasalanti ju iclajumputunau.
2 Slivasalh na lhu ju quiꞌamakꞌanit chai va tachi quixcanich ju quiꞌalhunut.
3 Ni accꞌatsa ni laich cava cataputakꞌalhtaxtulh ju chunch ju quiꞌalakꞌavin quintꞌaꞌamachivinti pus aclacasqꞌuilhch ni chach quimacaulh ju Cristo.
Chach quimacaꞌalh ju lacajipi junta jonkꞌalhita makꞌalhkꞌajnat.
4 Ju quintꞌaꞌamachivinti makꞌaniya ixꞌapapanatnich Israel tajunita.
Ju yuꞌunch Dios asacxtulh ni isꞌaskꞌatꞌan catava.
Ju yuꞌunch talaktsꞌinta ixtachaput ju Dios.
Chai ju yuꞌunch tatachꞌanulh ni taꞌamaklhtayanalh ju makꞌaniya ixlhamapꞌaksin ju tsꞌoklh ju Moisés.
Ju yuꞌunch amasunicanta ta yu laich catapulakꞌaya ju Dios.
Chai ju Dios ajunich ni pumatam israelita cajunaꞌ ixnati ju amakꞌalhtaxtunuꞌ acsni tavanan catsucuyaꞌ ju ani lacamunutpaꞌ.
5 Ju quintꞌaꞌisraelitanin ixꞌapapanatnich tajunita ju makꞌaniya quilacpaiꞌan Abraham chai ju Isaac chai ju Jacob.
Chai ju Malia israelita ixjunita chai yuchach ju ixnatich va acsni tavanan quitsucuchilh ju Cristo tachi lapanac ju ani lacamunutpaꞌ.
Pus ju Cristo yuchi ju Dios junita ju lhinonkꞌojui tachi chun ju taxtokni.
Va tachi kꞌoxich calhichivinincalh ju yuchi mas va tavananch.
Iclacasqꞌuin ni vasalh chunch ju canavicalh.
6 Pus ju Dios asacxtulh ju quintꞌaꞌisraelitanin ni isꞌaskꞌatꞌan catava.
Para jantu lai actinaulh ni jantu muctaxtuta ju ixchivinti ju Dios va ixlacaꞌatalh ni jantu talhilacaꞌalh ju yuchi ju aliꞌin quintꞌaꞌisraelitanin.
Pus tachi chun ju isꞌaskꞌatꞌan ju makꞌaniya lapanac ju Israel ixjuncan jantu si quintꞌaꞌisraelitanin istavasalanti tajunita.
Ju chunch nomputun ni jantu si isꞌaskꞌatꞌan Dios tajunita.
7 Chai ju ixꞌapapanatnich ju Abraham jantu si alhimispakꞌocan ni vasalh ixꞌapapanatnich catava.
Para chani ma juni ju Dios ju Abraham:
“Va yuꞌunch ju ixꞌamaskꞌatꞌanti ju mintsꞌalh Isaac ju caꞌalhimispacanach ni miꞌapapanatnich vasalh”.
Ma chunch ju junicalh ju Abraham.
8 Pus ju chunch chani ju nomputun.
Ju aliꞌ isꞌaskꞌatꞌan ju Abraham ju va laꞌixkꞌachat isꞌakstu ju tasu jantu yuꞌunch ju alhimispacan ni isꞌaskꞌatꞌan Dios catava.
Para ju istsꞌalh ju Abraham ju Isaac ixjuncan acsnich ju tsuculh acsni uctaxtulh ju ixchivinti Dios ju ixjunita ju Abraham.
Chai va ixꞌamaskꞌatꞌanti yuchi ju alhimispacanch ni isꞌaskꞌatꞌanch Dios tajunita.
9 Pus acsni tucaꞌ istsucuta ju Isaac pus ju Dios kꞌalhtasunilh ju Abraham ju istsꞌalh.
Ma chani ju juni:
“Ju acꞌata tachi ju chavai acsni actaspꞌitchokoyanta alinch ju istsꞌalh ju Sara.
Yuchi ju Isaac”.
Ma chunch ju junicalh ju Abraham.
10 Chai jantu va yuchi.
Para acsni kꞌaich va ju Isaac chai tꞌatamakꞌaxtoklh ju Rebeca pus vachuꞌ xakꞌalacalh ju Rebeca acsni ixpacxantacaꞌ ju ixtꞌiyunꞌan isꞌaskꞌatꞌan.
11 Ju Dios xakꞌalalh ju Rebeca acsni tucaꞌ istatsucui ixtꞌiyunꞌan isꞌaskꞌatꞌan chai jantucaꞌ ixtanavita nin macxcai nin kꞌox.
Ju Dios ixlacasqꞌuin ni vana va chunch catailhiꞌalh tachi ju aktsꞌiya ispastacta ju yuchi.
Ixlacasqꞌuin ni va laꞌixkꞌachat isꞌakstu caꞌasacxtucanach ju isꞌaskꞌatꞌan catajunaꞌ.
Jantu va ixlacata ni va tuꞌuꞌ kꞌox ju catanavi.
12 Pus ma yuchi chani lhijunicalh ju Rebeca:
“Ju salacatꞌicstꞌi mintsꞌalh yuchi ju calhinonaꞌ.
Va calhijuncanaꞌ ju xakꞌai mintsꞌalh”.
Ma chunch ju junilh ju Dios.
13 Chai vasalh chunch ju uctaxtulh tachi ju tsꞌokcanta junta ma chani najun ju Dios ixlacataꞌan ju ixtꞌiyunꞌan istsꞌalan ju Rebeca:
“Ju Jacob na icmapaini.
Para ju Esaú jantu tuꞌuꞌ iclhiulai”.
Ma chunch ju naulh ju Dios.
14 Pus tas anonaꞌitꞌit.
Ja lai acnaulh ni jantu kꞌox tachi ju asacxtunun ju Dios.
Jantu tavanan lai actinaulh ju chunch.
15 Pus ju Dios ma chani junilh ju makꞌaniya ixlapanac ju Moisés ixjuncan:
“Ju quitꞌin acꞌaktaijuyach lacaꞌamapaininti va tichi chavaich ju icmapainiputunch”.
Ma chunch ju naulh ju Dios.
16 Pus yuchi lhicꞌatsacanch ni jantu va laꞌixkꞌachat ju tam lapanac ju amaklhtayanancan ju ixꞌamapaininti Dios.
Nin ixlacaꞌatalh ju tuchi kꞌox ju canavi.
Para va ixlacaꞌatalh ni Dios anaviniputun ju lamapainin.
17 Pus chanich lhitsꞌokcanta ixlacata ju makꞌaniya kꞌai ucxtin ju Faraón ixjuncan.
Ju Dios ma chani juni:
“Yuchi iclhixtakninch ju mimpuꞌucxtin ni laich caputasuyaꞌ ju quintachaput ju lamiꞌatsucunti ju uxintꞌi.
Chai ju chunch vachuꞌ camispakꞌocanach ju quintapakaꞌut ixlhilacaputsꞌun ju lacamunutpaꞌ”.
Ma chunch ju juni ju Dios.
18 Pus yuchi lhimachakxacan ju chavai ni aktaijui ju Dios lacaꞌamapaininti va tichi chavaich ju aktaijuputunch.
Chai pꞌas navini ixꞌalhunut va tichi chavaich ju pꞌas naviniputunch.
19 Pus jantu xcai ni xamatiꞌ aquisacmilh.
Laich chani aquijunilh:
“Pus ni chunch navi ju Dios tajuch ni vana quintamucꞌaniyan ju quintalakꞌalhinꞌan ju Dios.
Tis chavaich ju jantu canavi tachi ju lhilhcata ju Dios”.
20 Pus ni chunch aquijunilh tam xamatiꞌ pus acjunilh:
“Jantu ji lapanac chunch anau.
Tis chavaichꞌat ju uxintꞌi ni laich kꞌalhtꞌaꞌi ju Dios.
Ju tuꞌuꞌ tꞌuni xalu ni laich cava cachivinilh ja lhijun ni casacmi ju tam xanaviniꞌ tajuch ni va chunch ju xanavi”.
21 Ju lai lhichꞌalhcatnan tꞌun lai navi tachi ju lacasqꞌuin.
Laich navi lakatam xalu ju laklhu ixtapalh junita.
Chai laich navi alakatam ju jantu laklhu.
Tijtꞌui ixtapalh ju lai lhcani mas va lakatamch ju xatꞌun junita.
22 Pus ju Dios ja jantu vana lai navi tachi ju kꞌoxich lhiulai.
Ju yuchi mas amalacasuniputun ju lapanacni ni camamakꞌalhkꞌajni ju taꞌalactuꞌunun chai mas ixꞌamalacasuniputun ju ixtachaput para jantu jeks alacꞌuni acsni ixtaꞌalactuꞌunun.
Alai va achꞌixnilh mas ixlhijun ni ixꞌamucꞌanicalh ixtalakꞌalhinꞌan chai ixꞌamamakꞌalhkꞌajnikꞌalhicalh.
23 Pus chunchach ju lalh ju Dios ni laich capumalacasuyaꞌ ni slivasalh kꞌox lapanac ju quilacataꞌan ju quijnanꞌan ju quintaꞌaktaijutan laꞌixꞌamapaininti.
Chai ju quijnanꞌan aktsꞌiya quintalhcaꞌulatan ni calakꞌayacanau.
24 Pus chunchach ju lalh ju Dios ju quilacataꞌan.
Vachuꞌ quintatꞌasanitan.
Ju aliꞌin israelitanin juntau chai ju aliꞌin jantu israelitanin tajunita.
Para Dios ju quintatꞌasanikꞌotan.
25 Tachi ju najun junta atsꞌoknunta ju Oseas ju makꞌaniya ixlapanac Dios ixjunita.
Ju anch ma chani naulh ju Dios:
Acꞌalhimispayach ni quilapanacni tajunita ju jantu quilapanacni ixtajunita.
Chai acꞌamapainiyach ju jantu ixꞌamapainicanta.
26 Chai ma vana chani najun ju Dios:
“Ju uxijnan jantu quilapanacni untꞌatꞌit”.
Para mas chunch ju ixnajun ju Dios para astan ju amachakꞌan anch caꞌalhimispacanaꞌ ni istsꞌalan tajunita ju Dios ju lakꞌajunta.
27 Chai vachuꞌ ju makꞌaniya ixlapanac Dios ju Isaías ixjuncan chani naulh ju quilacataꞌan ju israelitanin juntau:
“Ju ixꞌapapanatnich ju Israel mas tantsꞌunin tajunita tachi ju xacucu alama para ma va lacatsꞌunin ju catatakꞌalhtaxtuyaꞌ.
28 Pus ju quiꞌucxtinꞌan Dios ma va tam pantsꞌiquis camuctaxtuyaꞌ tuchi ju najunta ju quilacataꞌan ju israelitanin juntau.
Chai ma jantu tam canonaꞌ.
Chai ju tuchi canaviyaꞌ ma soknicꞌa canaviyaꞌ”.
Chunch ju naulh ju Isaías.
29 Chai ju alacatam vana yuꞌ ju Isaías ju ma chani naulh:
Ju quiꞌucxtinꞌan Dios ma xaꞌucxtin junita ixtalhavat taropajni ju si anquilhnin tajunita.
Pus ju yuchi ni jantu xaquintamacontilanin ju aliꞌin ju xalackꞌajin ju quilacpaꞌitniꞌan ixtajunita tus makꞌanchich
pus ca xaquintamaclakꞌojun tachi ju aꞌulhtucalh ju amachakꞌan Sodoma chai ju amachakꞌan Gomorra ni alacxavakꞌo.
Chunch ju naulh ju Isaías.
Ju israelitanin jantu talacaꞌiputun ju chivinti ixlacata ju Cristo
30 Pus tas anonaꞌitꞌit.
Pus cacꞌatsayauch ni yuꞌunch ju jantu israelitanin tajunita ju talhitajulh ju soknicꞌa atsucunti laꞌixmacni Dios mas jantu ixtapuxcajui.
Talhitajulh ju soknicꞌa atsucunti ni talhilacaꞌalh ju Cristo.
31 Para ju aliꞌin quintꞌaꞌisraelitanin tanajun ni laich salaka catava ju ixꞌalhunutꞌan ni catamuctaxtulh tuchi najun lacamakꞌaniya ixlhamapꞌaksin Dios.
Para jantu tavanan lai talhitajui ju salaka ixꞌalhunutꞌan ni va jantu lai tanavi tachi ju najun lacalhamapꞌaksin.
32 Chai jantu lai talhitajui ju salaka ixꞌalhunutꞌan ni va jantu talhilacaꞌamputun ju Cristo ju ixnoncan camalakachatachilh astan ju Dios.
Va yuchi ju talhilaksich ju tuchi tanavi isꞌakstuꞌan.
Ju chunch tachi ju va taputsꞌantilai ju Cristo ni jantu talhilacaꞌamputun ju yuchi ni jantu talacaꞌi ni yuchi cava ju ixnoncan camalakachatachilh ju Dios.
Pus ju Cristo valhch tachi ju tuꞌuꞌ lhkajanichiux ju pukꞌalhkꞌoscan.
33 Tachi ju najun laꞌixchivinti Dios junta lhitsꞌokcanta ju Cristo.
Chani najun:
Ju lakꞌachakꞌan Sion ju Dios ma caꞌulayaꞌ ju ixlapanac.
Ju yuchi ma chunch junita tachi ju tuꞌuꞌ chiux ju putsꞌantilacan.
Chai ju yuchi ma acsnich ju putsꞌantilacan ni jantu lhilacaꞌamputuncan.
Chai acsni putsꞌantilacan pus ma lana tsꞌankꞌakꞌalhican.
Tachi ju ma va cataꞌakkꞌaju junta vacꞌanta.
Para ma va tichi chavaich ju lhilacaꞌan ju Cristo ma jantu tavanan camaxananaꞌ ni laich canaulh astan ni jantu lai xamuctaxtuni ju ixchivinti ju Dios.