10
Ji quiꞌalakꞌavin slivasalh ixlhichux quiꞌalhunut ju iclacasqꞌuin ni catatakꞌalhtaxtulh ju quintꞌaꞌisraelitanin chai jantu cataꞌalh junta jonkꞌalhita makꞌalhkꞌajnat.
Chai chunch ju iclhisqꞌuini ju Dios.
2 Ju quitꞌin iccꞌatsai ni slivasalh na tachꞌalhcatnaniputun ju Dios.
Para va jantu tamispai ta yu navican ni laich salaka caꞌalaktsꞌinilh ixꞌalhunutꞌan ju Dios.
3 Va laꞌisꞌakstuꞌan salaka tanaviputun ju ixꞌalhunutꞌan va ixlacata ni tanavich ju kꞌox.
Pus ju Dios salaka caꞌanavinilh ixꞌalhunutꞌan ni va catalhilacaꞌalh cava ju Cristo.
4 Ju Cristo nilh ju quilacataꞌan.
Chai acsni lhilacaꞌanau ju yuchi pus ju Dios quintalaktsꞌinan ni na salaka ju quiꞌalhunutꞌan.
Jantu tasqꞌuini ni vana acnaulh ni va acsnich ju aquilaktsꞌinaꞌ ju Dios ni salaka ju quiꞌalhunut ni lai cava acmuctaxtulh laꞌixlhamapꞌaksin.
5 Ju Moisés makꞌaniya ixlapanac Dios ixjunita.
Chai chanich naulh ju yuchi ixlacata ju lapanacni ju tanaviputun tachi ju najun lacalhamapꞌaksin ni tanajun ni chunchach caꞌapulaktsꞌinaꞌ ju Dios ni salaka ju ixꞌalhunutꞌan.
Ma chani naulh:
“Ni ma xamatiꞌ lai camuctaxtukꞌo chux tachi ju najun lacalhamapꞌaksin pus ju chunch ju Dios ma calaktsꞌinaꞌ ni na salaka ju ixꞌalhunut”.
Ma chunch ju naulh ju Moisés.
6 Para chani najun ixchivinti Dios ju tsꞌokcanta ixlacata ju lapanac ju lhilacaꞌanta ju Cristo chai ixlhiyuchi laktsꞌincanta ni salaka ju ixꞌalhunut laꞌixmacni Dios.
Najun:
“Ma jantu apꞌastꞌactꞌit ju lamiꞌalhunutꞌan ni tasqꞌuini ni apꞌitꞌit ju lactꞌiyan ni lai alhitꞌaꞌutꞌachitꞌit ju cataꞌaktaijuyan.
7 Nin ma laich apꞌastꞌactꞌit ni tasqꞌuini ni apꞌitꞌit junta taꞌan ju alasanin ni laich alhitꞌaꞌutꞌachitꞌit ju cataꞌaktaijuyan.
Ma jantu tasqꞌuini ni chunch ju alatꞌit ni ma taxtucha ju lactꞌiyan ju Cristo chai ma quinichilh ju ani.
Chai ju yuchi ma taꞌacxtuchokolh junta ixmacnucanta”.
Chunch ju najun laꞌixchivinti Dios.
8 Jantu tasqꞌuini ni chunch aclalh ni najun ju Dios laꞌixchivinti ni ma chanich ju lhitajucan ju salaka quiꞌalhunutꞌan laꞌixmacni yuchi.
“Ma jantu xcai lhitajucan ju chivinti junta najun ta yu lai lhitajucan ju salaka quiꞌalhunutꞌan.
Ma va yuchi ni anauch ni lhilaksitꞌi ju ixchivinti Dios.
Chai ma alacꞌaꞌitꞌi ju lamiꞌalhunut”.
Chunch ju najun laꞌixchivinti Dios.
Chai yuchach ju chivinti ju iclajunau acsni iclajunau ni tasqꞌuini ni alhilacꞌapꞌitꞌit ju Cristo.
9 Pus ni anonaꞌ ni yuchi ju miꞌucxtin ju Jesús chai ni alacꞌaꞌiyaꞌ ju lamiꞌalhunut ni Dios ju macxtuchokolh ju Jesús acsni ixmacnucanta pus atꞌakꞌalhtꞌaxtꞌuyaꞌ chai jantu atꞌipꞌitꞌi ju lacajipi.
10 Ni xamatiꞌ lhilacaꞌan ju Cristo laꞌixꞌalhunut pus laktsꞌincan ni salaka ju ixꞌalhunut laꞌixmacni Dios.
Chai ni najun ni lhilacaꞌanch ju Cristo pus takꞌalhtaxtutach chai jantu catiꞌalh ju lacajipi.
11 Ju ixchivinti Dios ju tsꞌokcanta chani najun:
“Ma chux ju talhilacaꞌanta ju Jesucristo laꞌixlhichux ixꞌalhunutꞌan ma jantu xamatiꞌ ju lai astan camamaxanicalh ni laich cajunicalh ni jantu laktsꞌin ju Dios ni salaka ju ixꞌalhunut”.
Chunch ju najun laꞌixchivinti Dios.
12 Pus ju quiꞌucxtinꞌan Dios ixꞌucxtin junita tachi chun ju talhilacaꞌan ju yuchi.
Ju yuchi vaklhtam chun quintalaktsꞌinan ju quijnanꞌan ju israelitanin juntau chai ju yuꞌunch ju jantu israelitanin.
Chai na kꞌai ju ixꞌamapaininti ixlacata va tichi chavaich ju tapainini ni camakꞌalhtaxtulh.
13 Aktsꞌiya chunch tachi ju najun laꞌixchivinti Dios junta tsꞌokcanta.
Chani najun:
“Ma tachi chun ju tatapainini ju quiꞌucxtinꞌan Jesús ma catatakꞌalhtaxtuyach chai jantu catitaꞌalh ju lacajipi”.
Chunch ju najun laꞌixchivinti Dios junta tsꞌokcanta.
14 Para jantu lai talhitapainini tuꞌuꞌ ni jantu talhilaksi ju yuchi.
Chai jantu lai talhilaksi ju Jesús ni jantu tavanan takꞌasmatꞌa ni quinichilh ju ixlacataꞌan.
Chai jantu lai tacꞌatsai ni quinichilh ju Jesús ni matiꞌ xamatiꞌ ju caꞌajunilh.
15 Chai jantu lai catiꞌalh xamatiꞌ nonaꞌ ixchivinti Dios ni jantu malakachata ju Dios.
Tachi ju tsꞌokcanta junta chani najun laꞌixchivinti Dios:
“Ma va lhikꞌach aꞌamaklhtayanancan ju taꞌalhtanatꞌajun ixnajunca ju kꞌoxi chivinti junta najun ni jantu vana talhkꞌaman ju Dios ixlacata ju quiꞌalactuꞌuntiꞌan”.
Chunch ju najun laꞌixchivinti Dios ju tsꞌokcanta.
16 Para tachi chun ju takꞌasmatlh jantu si talacaꞌita ju ixchivinti Dios ixlacata ju Cristo.
Aktsꞌiya chun tachi ju naulh ju makꞌaniya ixlapanac Dios ju Isaías ixjuncan.
Ju yuchi ma chani naulh acsni xakꞌalalh ju Dios:
“Ji quiꞌucxtin na lacatsꞌunin ju talacaꞌita ju tuchi icnonauch”.
Ma chunch ju junilh ju Dios.
17 Pus va acsnich ju lai lhilacaꞌancan ju Cristo acsni kꞌasmatcan ju chivinti ixlacata yuchi.
Chai va acsnich ju lai kꞌasmatcan acsni va xamatiꞌ aquijunilh.
18 Para jantu lai actinaulh ni jantu takꞌasmatꞌach ju chivinti ju quintꞌaꞌisraelitanin chai ixlhiyuchi jantu talhilacaꞌamputun ju Cristo.
Aktsꞌiya takꞌasmatꞌach.
Pus laꞌixchivinti Dios ju tsꞌokcanta najun ni ixlapanacni Dios ma ajunkꞌota ju lapanacni vanta anchach cava.
Chai ju ixchivintiꞌan ma makpitsikꞌocanta tus ixlhilacaputsꞌun ju lacamunutpaꞌ.
19 Chai vana jantu lai actinaulh ni va jantu ixtamachakxai ju anuꞌ chivinti ixlacata ju Cristo.
Aktsꞌiya tamachakxa ni ma chani naulh ju makꞌaniya ixlapanac Dios ju Moisés ixjuncan:
Ma chani najun ju Dios:
Ma yuchach ju Dios.
Chai ju yuchi ma caꞌaꞌaktaijuyaꞌ ju aliꞌin lapanacni ju ma jantu ixꞌanuꞌ ixtajunita.
Chai ju uxijnan ju israelitanin untꞌatꞌit ma alhacchꞌipꞌinaꞌitꞌit.
Chai ju yuchi ma caꞌaꞌaktaijuyaꞌ ju aliꞌin lapanacni ju ma jantu taꞌacꞌatsananta chai ju uxijnan ma alhitꞌalhkꞌamnaꞌitꞌit.
Ju Moisés ma naulh ni ma chunch ju najun ju Dios.
20 Chai ju makꞌaniya ixlapanac Dios ju Isaías ixjuncan lana jantu ixtalhanan.
Ju yuchi ma chani naulh:
Ju Dios ma chani najun:
Ju lapanacni ju jantu catapuxcoyaꞌ ju yuchi ma yuꞌunch ju catalhitajuyaꞌ.
Chai ju yuꞌunch ju jantu catalhasacmininaꞌ ju yuchi pus ma yuꞌunchach ju caꞌatalacasuniyaꞌ.
Pus ju Isaías ma naulh ni ma chunch ixnajun ju Dios.
21 Para ixlacataꞌan ju quintꞌaꞌisraelitanin chani ixnajun ju Isaías:
“Ju Dios ma chani najun:
Ma chux avilhchan ma xaꞌatꞌasani ju lapanacni ju ma jantu takꞌasmatnilh chai ju ma jantu lai talacaꞌi.
Ma va ixtatakꞌalhtaxtulh ixnajun”.
Pus ju Isaías ma ixnajun ni ma chunch ju naulh ju Dios.