Ju aliꞌin israelitanin tatakꞌalhtaxtulh
11
Pus mas chun xanajun ju Dios jantu lai actinaulh ni va quintalacmackꞌantan ju Dios ju quijnanꞌan ju israelitanin juntau.
Ju quijnanꞌan ni va ixlapanacni jumpalhtau.
Pus ju quitꞌin vachuꞌ israelita icjunita.
Ju quitꞌin makꞌaniya ixpapanti quimpaiꞌan Benjamín icjunita.
Chai ju Benjamín makꞌaniya ixpapanti ixjunita ju quimpaiꞌan ju Abraham ixjuncan.
Pus ju chunch ju quitꞌin xapapanti icjunita ju Abraham vachuꞌ.
2 Ju Dios tus makꞌanchich quintasacxtutan ju quijnanꞌan ju israelitanin juntau ni ixlapanacni cajumvi.
Chai mas chavai jantu quintalacmackꞌantan.
Ja jantu pꞌastꞌacꞌatꞌit tuchi ju najun laꞌixchivinti Dios junta lhaꞌatsꞌoknuncanta ju isꞌatsucunti ju makꞌaniya ixlapanac Dios ju Elías ixjuncan.
Ju anch ni nompalai ni tꞌachivinilh ju Dios ju Elías chai alacchivimakꞌalh ju istꞌaꞌisraelitanin.
Ju Elías ma chani junilh ju Dios:
3 “Quiꞌucxtin Dios ju lapanacni tamaknilh ju milapanacni ju amalakꞌachꞌatꞌi ni catanonaꞌ ju minchivinti.
Chai talactꞌilhiꞌulakꞌolh junta ixtalakꞌayayan ju lapanacni.
Va quitꞌin ju ictilakꞌayayan chai vachuꞌ quintamakniputun”.
Ma chunch ju junilh ju Dios ju Elías.
4 Para ja jantu pꞌastꞌacꞌatꞌit ta yu alhikꞌalhtayanalh ju Dios.
Ja jantu chani alhikꞌalhtayanalh.
“Ju quitꞌin iclhilhcata ni tiꞌalin lakatujun milh quilapanacni ju jantu tataꞌaktsokotanilh ju Baal.
Ju anuꞌ ju ixtanajunch ni Dios mas jantu”.
Ma chunch ju junilh ju Dios ju Elías.
5 Pus vana va chun ju chavai.
Aktsꞌiya alin lacatsꞌunin ju quintꞌaꞌisraelitanin ju talhilacaꞌanta ju Cristo ni Dios asacxtulh ni ixꞌanaviniputun lamapainin.
6 Ju Dios asacxtulh ju lapanacni ni va ixꞌanaviniputun lamapainin.
Jantu ixlacata ni va catanavilh ju tuꞌuꞌ ju kꞌox.
Pus ni ixlacata cava ni tanavilh tuꞌuꞌ ju kꞌox ju apusacxtulh ju Dios pus jantu lai actinaulh ni va lamapainin caꞌixtiva ju anavinilh ju Dios.
7 Pus acsni iclajunau ju chunch va iclamavasalaniputunau ixlacata ju quintꞌaꞌisraelitanin.
Ju yuꞌunch jantu talhitajuta ju salaka ixꞌalhunutꞌan ju ixtapuxcajui.
Va lacatsꞌunin ju quintꞌaꞌisraelitanin ju talhitajuta.
Va yuꞌunch ju asacxtutach ju Dios.
Chai ju aliꞌin alapꞌasninicalh ju ixꞌalhunutꞌan.
8 Chai ni chunch ju aꞌulhtucalh pus va uctaxtulh tachi ju tsꞌokcanta junta chani najun:
“Ma Dios ju amatontolanilh ju ixꞌalhunutꞌan.
Ju chunch mas na talaktsꞌin ju ixchivinti Dios ma jantu tamachakxai.
Chai mas na takꞌasmatꞌa ju stavasalanti chivinti ma jantu lai talacaꞌi.
Chai ma chunch ju jonkꞌalhita tus chavai”.
Ma chunch ju najun.
9 Vachuꞌ ma chani naulh ju makꞌaniya kꞌai ucxtin ju David ixjuncan:
Ju anuꞌ ju na kꞌox talhiulai ma cataputaꞌokxchokꞌoyaꞌ.
Ma chun cajunaꞌ tachi ju tuꞌuꞌ ju lakꞌalhi ju atsucunti.
Ma va catapukꞌalhkꞌosaꞌ chai ju yuchi caꞌalacmamakꞌalhkꞌajni ixlacata ju macxcai ju tanavita.
10 Ma jantu catamachakxayaꞌ ju ixchivinti Dios.
Ma catamakꞌalhkꞌajnankꞌalhiyaꞌ tachi ju talai ju yuꞌunch ju tatꞌatakꞌentaꞌalhtananch ju ixtacꞌucꞌatꞌan ju na tsꞌinqꞌui.
Ma chunch ju naulh ju David.
Laich tatakꞌalhtaxtui vachuꞌ ju jantu israelitanin
11 Para jantu lai actinaulh ni jantu tavanan catalacaꞌiyaꞌ ju quintꞌaꞌisraelitanin mas tasui ju chavai tachi ju va takꞌalhkꞌostach ju aliꞌin ni jantu talhilacaꞌanta ju Jesucristo.
Pus ju astan aktsꞌiya caꞌamapainichokocanaꞌ.
Para ni takꞌalhkꞌoslh ju yuꞌunch ni jantu lai xatalacaꞌi pus ju chavai ju uxijnan ju jantu israelitanin untꞌatꞌit lai tꞌakꞌalhtꞌaxtꞌuyatꞌit chai jantu atꞌipꞌitꞌit ju lacajipi.
Chai ju chunch ju quintꞌaꞌisraelitanin catalacasqꞌuinaꞌ ni vachuch chunch ju caꞌalacnavi ju Dios tachi ju tanavitan ju uxijnan.
12 Pus ju quintꞌaꞌisraelitanin taꞌalactuꞌunulh ni tasastuclh ju ixꞌamapaininti ju Dios.
Pus yuchi kꞌox lhiva ju chavai ixlacataꞌan tachi chun ju aliꞌin lapanacni ju ani lacamunutpaꞌ.
Pus va ixlacaꞌatalh ni jantu lai ixtalhitajui ta yu laich catatakꞌalhtaxtulh ju quintꞌaꞌisraelitanin pus yuchi lai lhitꞌakꞌalhtꞌaxtꞌuyatꞌit ju chavai ju uxijnan ju jantu quintꞌaꞌisraelitanin untꞌatꞌit.
Pus ni chunch ju tapasalh acsni taꞌalactuꞌunulh ju quintꞌaꞌisraelitanin pus palai kꞌox cajunaꞌ ju miꞌatsucuntiꞌan ju uxijnan ju jantu israelitanin untꞌatꞌit acsni tavanan catalhilacaꞌanach ju Cristo ju quintꞌaꞌisraelitanin astan.
13 Uxijnan ju iclaxakꞌalayau ju jantu israelitanin untꞌatꞌit.
Pus ju quitꞌin ixtamalakachan Cristo icjunita ju milacataꞌan.
Pus na kꞌox lhichꞌalhcat iclhiulai ju quixtaknita ju Dios.
14 Chai ni icmalacasui ni na kꞌox lhichꞌalhcat iclhiulai ju quixtaknita ju Dios ja jantu nuꞌ catalacasqꞌuinaꞌ ju quintꞌaꞌisraelitanin ni chunch caꞌaꞌulhtucanach tachi ju taꞌulhtutan ju Dios ju uxijnan ju jantu israelitanin untꞌatꞌit.
Ju chunch tsꞌa ma laich catatakꞌalhtaxtulh ju aliꞌin sia yuꞌunch chai jantu cataꞌalh ju lacajipi.
15 Ju Dios yuchi alhimacaꞌula pantsꞌiquis ju quintꞌaꞌisraelitanin ni laich ixꞌamigojni aꞌunaꞌitꞌit ju Dios ju uxijnan ju jantu israelitanin untꞌatꞌit.
Pus ni chunch ju anavicalh ju quintꞌaꞌisraelitanin ju chavai pus ca aktsꞌiya na lhikꞌach cajunaꞌ astan acsni catalhilacaꞌanaꞌ ju Cristo ju aliꞌin quintꞌaꞌisraelitanin.
Pus ju chavai ju yuꞌunch tachi ju va tanitach laꞌixꞌalactuꞌuntiꞌan ni jantucaꞌ talhilacaꞌanta ju Jesús.
Para acsni tavanan catalhilacaꞌanach ju Cristo pus tachi ju va caꞌaxtaknichokocanaꞌ ju isꞌatsucuntiꞌan.
Va yuchi ni sastꞌi cajunaꞌ ju acsnich ju isꞌatsucuntiꞌan.
16 Ju makꞌanch ju Dios ixꞌajuni ju quintꞌaꞌisraelitanin ni va tapakchux ju ixꞌalin ju sastꞌi cebada chai acsni ixtapunaviputun ju xkapavati pus catakꞌextayaꞌ lacatsꞌunin ju sasquitit chai catamacchaniyaꞌ lakatam xkapavati ju yuchi.
Chai ni ixꞌanuꞌ Dios junita ju pꞌulhnan macchacan pus ju aliꞌ sasquitit si ixꞌanuꞌ vachuꞌ.
Pus chunchach vachuꞌ lhixajcha ixlacata ju makꞌaniya ixlapanac Dios ju Abraham ixjuncan.
Ju yuchi ni ixlapanac Dios ixjunita pus tachi chun ju quijnan ju ixꞌapapanatnich icjuntau si ixlapanacni Dios icjuntau vachuꞌ.
Chai ju tuꞌuꞌ makꞌakꞌai qꞌuiu ni ixꞌanuꞌ Dios cava pus sich ixꞌanuꞌ cava vachuꞌ ju ixacatan.
Pus vana va chun ju Abraham.
Ju yuchi ni ixlapanac Dios ixjunita pus tachi chun ju quijnan ju ixꞌapapanatnich icjuntau si ixlapanacni Dios icjuntau vachuꞌ.
17 Pus ju quintꞌaꞌisraelitanin chunch tajunita tachi ju tuꞌuꞌ ixmakpꞌu qꞌuiu ju olivo juncan.
Pus ju aliꞌin sia yuꞌunch tachi ju va chakxmakꞌancanta ni jantu ixtalacaꞌi.
Chai ju uxijnan ju jantu israelitanin untꞌatꞌit chunch untꞌatꞌit tachi ju tuꞌuꞌ xaꞌolivo lacaqꞌuivin.
Pus ju chavai ni lhilacꞌapꞌintꞌatꞌitch ju Cristo pus tachi ju va anchach laxaqꞌuiu ju kꞌoxiya olivo ju lokꞌonꞌucꞌatꞌit junta ixtapꞌuntach ju yuꞌunch ju achakxmakꞌancantach.
Chai ni anch ju lokꞌonꞌucꞌatꞌit pus tachi ju va mak alin vachuꞌ ju kꞌox miꞌatsucuntiꞌan laxaqꞌuiu olivo ni vachuꞌ amaklhtꞌayananaꞌitꞌit ju kꞌox ju ixꞌaxtakniputun ju quintꞌaꞌisraelitanin ni ixtalacaꞌilhch cava.
18 Para mas chunch ju untꞌatꞌit jantu alhitꞌakꞌayatꞌit.
Jantu anaꞌuntꞌit ni palai kꞌox ju uxijnan.
Palai jantu ju israelitanin ju tachi istavasalanti ixmakpꞌu qꞌuiu tajunita.
Ni va lhitꞌakꞌayapꞌutꞌunatꞌit apꞌastꞌactꞌitch ni jantu milacataꞌan ju lai catitapulhitaju ju kꞌox isꞌatsucuntiꞌan ju lapanacni.
Alai ixlacata ju Abraham ju lhitꞌaꞌutꞌatꞌit ju kꞌox miꞌatsucuntiꞌan laꞌixmacni Dios.
19 Para ca lai chani anaꞌuntꞌit ju uxijnan ju jantu israelitanin untꞌatꞌit:
“Ju israelitanin chunch tajunita tachi ju istavasalanti ixmakpꞌu ju xaqꞌuiu olivo.
Para ca aktsꞌiya tuꞌuꞌ ju quintapalhni quincꞌan vachuꞌ ni yuchi lhilakachakxtucalh ju yuꞌunch ni laich anch acmaklokꞌontocꞌayau ju quijnan”.
Ca laich chunch anaꞌuntꞌit.
20 Pus kꞌoxich.
Para ju yuꞌunch tachi ju va achakxmakꞌancalh va ixlacata ni jantu ixtalhilacaꞌamputun ju Jesús.
Chai ju uxijnan tachi ju va laich xalokꞌontꞌocꞌayatꞌit ju anch va ixlacaꞌatalh ni lhilacꞌapꞌintꞌatꞌitch ju Jesús.
Para jantu alhitꞌakꞌayatꞌit.
Alaich atꞌalhonitꞌit ju Dios.
21 Ju Dios ni tachi ju va achakxmakꞌalh ju aliꞌ lapanacni ju tachi istavasalanti ixmakpꞌu qꞌuiu tajunita pus vana ju uxijnan catachakxmakꞌananch ni vana va chun ju alapꞌalaꞌitꞌit.
22 Alaktsꞌintꞌitch ni na kꞌai ju ixꞌamapaininti ju Dios.
Para vachuꞌ acꞌatsꞌatꞌit ni na lai amamakꞌalhkꞌajninin.
Pus ju anuch quintꞌaꞌisraelitanin ju takꞌalhkꞌoslh amamakꞌalhkꞌajni ju Dios.
Para ju uxijnan tamalacasuniyan ni na kꞌai ju ixꞌamapaininti ju yuchi.
Chai va tachi chunchach ju catamalacasuniyanch ni va tachi alhilacꞌapꞌitꞌit ju Cristo.
Para ni jantu va tachi alhilacꞌapꞌinaꞌitꞌit ju Cristo pus vachuꞌ ju uxijnan tachi ju va achꞌakxmakꞌancꞌanaꞌitꞌit.
23 Chai vachuꞌ ju anuch quintꞌaꞌisraelitanin ju tachi ju va achakxmakꞌancantach ni va tamch catapastacchokoyaꞌ chai catalhilacaꞌanaꞌ ju Cristo pus tachi ju va catalokꞌontocꞌachokoyaꞌ junta ixꞌachakxmakꞌancanta.
Chai va lakatamch catatꞌajunaꞌ ju aliꞌin ju talhilacaꞌanta ju Cristo.
Alin ixtachaput ju Dios.
Yuchach ju canavichokoyaꞌ ni laich catajunchokolh tachi ju va catalokꞌontocꞌachokoyaꞌ junta ixꞌachakxmakꞌancantach.
24 Pus ju uxijnan ni jantu israelitanin untꞌatꞌit pus tachi ju va qꞌuichꞌakxꞌicꞌantꞌatꞌit ju laxaqꞌuiu xaꞌolivo lacaqꞌuivin.
Chai ju chavai tachi ju va anch ju xalokꞌontꞌocꞌayatꞌit junta jantu ixmakpꞌu ixꞌuntꞌatꞌit ju kꞌoxiya olivo ni jantu ixꞌapapanatnich Abraham untꞌatꞌit.
Pus ni chunch ju xaꞌulhtꞌucꞌanatꞌit ju uxijnan ja va a ti yuchach jantu lai pꞌas catitꞌalachꞌapachokolh ju quintꞌaꞌisraelitanin ju aktsꞌiya ixmakpꞌu tajunita ni ixꞌapapanatnich Abraham tajunita.
Ju astan chux ju israelitanin catatakꞌalhtaxtuyaꞌ
25 Pus iclacasqꞌuin ji quiꞌalakꞌavin ni amachꞌakxatꞌit ju ani ju jantu lai ixmachakxacan ju pꞌulhnan.
Ju chunch jantu lai alhitꞌakꞌayayaꞌitꞌit ni lai xalokꞌontꞌocꞌayatꞌit junta jantu xamakpꞌu ixꞌuntꞌatꞌit.
Pus ju chavai tapꞌasnilh ju ixꞌalhunutꞌan ju aliꞌin quintꞌaꞌisraelitanin tus acsni calaktsayach tachi chun ju jantu israelitanin ju alhilhcata ju Dios ni catalhilacaꞌanach ju Cristo.
26 Chai ju acsnich chux ju quintꞌaꞌisraelitanin catatakꞌalhtaxtuyaꞌ chai jantu cataꞌanaꞌ ju lacajipi.
Tachi ju tsꞌokcanta laꞌixchivinti Dios junta najun ni ma lakꞌachakꞌan Sion cataxtuyanta ju amakꞌalhtaxtunuꞌ.
Chai ju yuchi ma caxacaniyaꞌ ju macxcai ixꞌatalacpastꞌacꞌatꞌan ju alin laꞌixꞌalhunutꞌan ju ixꞌapapanatnich ju makꞌaniya xapai Jacob.
Chai ju acsnich ma catatalhoniyach ju Dios.
27 Chai acsni caꞌamacꞌacxaniyaꞌ ju ixꞌalactuꞌuntiꞌan pus ma acsnich ju caꞌamuctaxtuniyaꞌ ju chivinti ju ixꞌalactꞌatakꞌoxita ju Dios ju makꞌaniya ixlapanacni.
Chunch ju tsꞌokcanta laꞌixchivinti Dios.
28 Pus ju aliꞌin quintꞌaꞌisraelitanin ixtꞌalaxcai Dios tajunita ju chavai ni jantu talhilacaꞌanta ju chivinti ixlacata ju Cristo.
Para ixlhiyuchach lai lhilacꞌapꞌinatꞌit ju Cristo ju uxijnan ju jantu israelitanin untꞌatꞌit.
Para aktsꞌiya yuꞌunch ju quintꞌaꞌisraelitanin ju pꞌulhnan asacxtulh ju Dios.
Chai aktsꞌiya alacmapaini va ixlacata ju chivinti ju atꞌatakꞌoxita ju makꞌaniya quilacpai quincꞌan Abraham chai Isaac chai ju Jacob.
29 Ju Dios ni xtakni tuꞌuꞌ lhakꞌailaktsꞌin ju tam xamatiꞌ pus jantu lai tam catinonchokopa astan.
Chai ni tam xamatiꞌ ju sacxtutach ju Dios pus jantu lai tam catinonchokopa astan.
30 Ju uxijnan vachuꞌ ixꞌalin avilhchan acsni jantucaꞌ ixlacꞌaꞌiniyatꞌit ju Dios.
Para ju chavai ju Dios taꞌaktaijutan lacaꞌamapaininti va ixlacaꞌatalh ni jantuch talacaꞌita ju quintꞌaꞌisraelitanin.
31 Pus chunchach vachuꞌ ju quintꞌaꞌisraelitanin.
Ju chavai ju yuꞌunch jantu talhilacaꞌanta ju Cristo.
Para tachi ju uxijnan ni taꞌaktaijutan ju Dios lacaꞌamapaininti pus vachuꞌ ju quintꞌaꞌisraelitanin caꞌalacꞌaktaijucanaꞌ lacaꞌamapaininti astan.
32 Ju Dios aꞌulanikꞌota ixꞌalactuꞌuntiꞌan tachi chun ju lapanacni.
Ju chunch lai caꞌaktaijuyaꞌ ixchuxꞌan va lacaꞌamapaininti.
33 Slivasalh na kꞌox ju ixꞌatalaninti chai ixꞌatalacpastꞌacꞌat ju Dios.
Jantu lai machakxayau tajuch ni va chunch ju navi ju tuꞌuꞌ.
Nin yuchi ni lai camachakxau tuchi ju naviputun ju yuchi.
34 Tis chavaich ju lai camachakxanilh ju ixꞌatalacpastꞌacꞌat ju Dios.
Tis chavaich ju lai camapꞌaksi ju yuchi.
35 Pus jantu xamatiꞌ caxtaknilh tuꞌuꞌ ju Dios va ixlacaꞌatalh ni canaulh ni tuꞌuch capuxtaknicalh.
36 Pus Dios ju navikꞌota tachi chun ju taxtokni.
Chai yuchi ju lhinonkꞌojui chux.
Chai va ixlacata ni capulakꞌayacalh ju yuchi pus yuchi lhiꞌalinkꞌojui tachi chun ju taxtokni.
Chach tanaulh ju lapanacni ni yuchi ju xakꞌai ju Dios tus va tavananch.
Vasalh iclacasqꞌuin ni chunch catanavi ju lapanacni.