Chanich cavalh ju quiꞌatsucuntiꞌan
12
Pus ji quiꞌalakꞌavin na lhu xaquintaꞌaktaijuyan ju Dios laꞌixꞌamapaininti.
Yuchi iclalhitapaininiyau ni amakꞌaxtꞌaknitꞌit ju Dios ju miꞌatsucuntiꞌan.
Chai tachi ju talai ju vana tamaknini ju Dios ju tuꞌuꞌ atapacxat ni taxtakni ju na salaka pus vana va chunch ju uxijnan.
Amakꞌaxtꞌaknitꞌit ju Dios ju miꞌatsucuntiꞌan chai salaka aꞌuntꞌit.
Ju chunch kꞌoxich calhiulayaꞌ ju Dios.
Chai tasqꞌuini ni chunch ju alakꞌayayaꞌitꞌit ju Dios ixlhichux ju miꞌalhunutꞌan.
2 Jantuch vana anavitꞌit ju ixkꞌachat ju ani lacamunutpaꞌ tachi ju talai ju jantucaꞌ talhilacaꞌanta ju Cristo.
Tamch aꞌuntꞌit ni talasastꞌinitan ju mintacꞌatsanꞌan ju Spiritu Santu.
Ju chunch laich apꞌumispꞌayaꞌitꞌit ju tucan ixkꞌachat ju Dios ju milacataꞌan.
Acꞌatsꞌayaꞌitꞌit tamalhch ju kꞌox ju anaviyaꞌitꞌit chai tamalhch ju kꞌox calhiulayaꞌ ju Dios.
3 Ju Dios quinavinilh lamapainin ni xaquixtaknich ju ani quilhichꞌalhcat ni ixlapanac acva ju milacataꞌan.
Yuchi iclalhijunau ju ani.
Jantu xamatiꞌ ju milhiꞌuxijnan calhitakꞌaya tuꞌuꞌ tachi ju jantuch lhijun.
Palai kꞌox ni vas anaꞌuntꞌit tuchi lhakꞌailaktsꞌin ju taxtaknitan ju Dios ju pumatamin ju uxijnan acsni lhilacꞌapꞌitꞌit ju Jesucristo.
4 Pus ju quilacatunaꞌan va lakatamch junita.
Para na lakalhu ju ixtaxtokni ju quilacatunaꞌan.
Chai jantu va tijtam lhichꞌalhcat ju tanavi.
5 Pus vana va chun ju quijnanꞌan.
Mas na lhu juntau para tachi ju va lakatam lacatuna juntau tachi chun ju lhilacaꞌanau ju Cristo.
Chai lamaktasqꞌuiniyau ju pumatamin quijnanꞌan.
6 Ju Dios xtaknita ju pumatamin ta yu laich capunavi ju tuꞌuꞌ lhichꞌalhcat.
Chai chunch ju xtaknita pumatamin tachi ju kꞌoxich lhiulai isꞌakstu ju Dios.
Pus ni xamatiꞌ xtaknicanta ju lhichꞌalhcat ni canonaꞌ ju ixchivinti Dios pus chach cꞌatsa ni yuchi ju Dios ju xaxtakni ju chun atalacpastꞌacꞌat.
Jantu va isꞌakstu lai xanajun ju chunch.
7 U ni xamatiꞌ xtaknicanta ju lhichꞌalhcat ni caꞌaktaijulh ju aliꞌin pus chach aktaiju ixlhichux ixꞌalhunut.
Chai ju amalaniniꞌ chach amalaninilh ixlhichux ixꞌalhunut.
8 Ni xamatiꞌ xtaknicanta ixlhichꞌalhcat ni caꞌamapꞌaksinilh pus chach amapꞌaksinilh ixlhichux ixꞌalhunut.
Chai ju Dios ni xtaknita tam xamatiꞌ ju ixtumin ni laich caꞌaxtaknilh ju tamaktasqꞌuini pus lhikꞌach caxtaklh.
Chai ju xtaknicanta ixlhichꞌalhcat ni calhinonaꞌ lacatalhavat ju talhilacaꞌanta ju Cristo pus chach muctaxtu lacakꞌox ixtacꞌatsan.
Chai ju Dios ni xtaknita apumatam ixtacꞌatsan ni cꞌatsai ta yu laich cachꞌalhcatnanilh ju tatꞌajun makꞌalhkꞌajnin pus chach navi lacalhikꞌach.
Tasqꞌuini ni chanich catatsuculh ju talhilacaꞌanta ju Cristo
9 Amapꞌainitꞌit ju mintꞌalapanacniꞌan ixlhichux ju miꞌalhunutꞌan.
Atsꞌisitꞌitch ju amacxcai.
Va yuchi ju anavitꞌit cuenta ixnavica ju kꞌox.
10 Alamapꞌainitꞌit sia milhiꞌuxijnan tachi ju vasalh lhiꞌalakꞌavin untꞌatꞌit.
Alakꞌayatꞌit apumatam ni tuꞌuꞌ ju navita ju kꞌox.
Jantu va uxijnan ju alacꞌasqꞌuintꞌit ni xalackꞌajin aꞌuncꞌantꞌit.
11 Jantu alhimalheknintꞌit ju ixlhichꞌalhcat ju Dios.
Ixlhichux miꞌalhunutꞌan anavitꞌit ju ixlhichꞌalhcat.
Acꞌatsꞌatꞌit ni yuchi ju Dios ju chꞌalhcꞌatnaniyatꞌit.
12 Akꞌachꞌantꞌit ni cꞌatsꞌayatꞌit ni aktsꞌiya apꞌinaꞌitꞌit ju lactꞌiyan.
Jantu jeks aꞌutꞌit acsni makꞌalhkꞌajnanatꞌit.
Jantu tavanan acꞌaptꞌit ju ixtꞌachivininca ju Dios.
13 Aꞌaktꞌaiꞌutꞌit ju laꞌixmaktasqꞌuinitꞌan ju vachuꞌ talhilacaꞌanta ju Cristo.
Amalakꞌavitꞌitch ju tatolhputun pantsꞌiquis laminchakaꞌan.
14 Asqꞌuinitꞌit ju Dios ju kꞌox ixlacataꞌan ju tatꞌalaxcayan.
Asqꞌuinitꞌit ju kꞌox.
Jantu tuꞌuꞌ asqꞌuinitꞌit ju macxcai ju ixlacataꞌan.
15 Alactꞌakꞌachꞌantꞌit ju takꞌachan.
Atꞌakꞌalhuntꞌit ju na talackꞌalhunch.
16 Va lakatamch aꞌuntꞌit ju milhiꞌuxijnan.
Jantu alhitꞌakꞌayatꞌit tuꞌuꞌ.
Va lakatamch atꞌatꞌalacꞌasutꞌit ju quilhpatinin.
Jantu anaꞌuntꞌit lamiꞌalhunutꞌan ni va uxijnan ju palai acꞌatsꞌanantꞌatꞌit.
17 Ni xamatiꞌ cataꞌulhtuniyan ju macxcai jantu alhimapꞌuspꞌitnitꞌit ju macxcai.
Anavitꞌit ju kꞌox ju laꞌixꞌucxlacapuꞌan ju lapanacni.
18 Ixlhichux miꞌalhunutꞌan anavitꞌit talacmaskꞌatꞌin ni jantu atꞌalasatꞌit xamatiꞌ.
19 Ji quiꞌalakꞌavin jantu amamakꞌalhkꞌajnitꞌit ju tanaviniyan macxcai.
Alai chach amamakꞌalhkꞌajni isꞌakstu ju Dios.
Chunch ju alatꞌit ni ma najun ju quiꞌucxtinꞌan Dios laꞌixchivinti ju tsꞌokcanta ni ma yuchi ju amamakꞌalhkꞌajniniꞌ.
Ma yuchi ju camamapalaniyaꞌ ju alactuꞌunin.
Chunch ma najun ju Dios.
20 Jantu amamakꞌalhkꞌajnitꞌit ju tanaviniyan macxcai.
Alai chani aꞌulhtꞌutꞌit.
Ju mintꞌalaxcaiꞌan acsni chavani axtꞌaknitꞌit ju ixvaiti.
Ni quicxixa axtꞌaknitꞌitch ju xcan.
Ni chunch ju anaviniyaꞌitꞌit pus astan caxcaniyaꞌ ju ixꞌalhunut ni xanaviniyatꞌit ju kꞌox.
21 Jantu alakꞌaꞌitꞌit ni catamanavinin ju macxcai ju tanaviniyan macxcai.
Alai kꞌox ju anaviniyaꞌitꞌit.
Ju chunch atꞌalalhaꞌayaꞌitꞌit.