13
Tachi chun ju quijnanꞌan ju lapanacni juntau tasqꞌuini ni caꞌaquiclacaꞌiu ju ucxtinin.
Pus Dios ju ulata tachi chun ju puꞌucxtin chai Dios ju asacxtuta tachi chun ju ucxtinin.
2 Pus ju lapanac ju jantu quiclacaꞌiputun ju ucxtin pus va jantu tuꞌuꞌ lhiulai ju lhcaꞌulata ju Dios.
Pus ju jantu quiclacaꞌi ju ucxtin talakꞌalhin ju navi chai camamakꞌalhkꞌajnicanaꞌ.
3 Jantiyuꞌ alhiꞌulacanta ju ucxtinin ni va caꞌamakꞌesva ju tanavi ju kꞌox.
Para alhiꞌulacanta ju ucxtinin ni caꞌamakꞌesva ju va taꞌalactuꞌunun.
Ju uxintꞌi ja cꞌatsꞌapꞌutꞌun ta yu alatꞌi ni jantu va atꞌalhoniyaꞌ ju ucxtinin.
Pus anavitꞌich ju kꞌox chai ju yuꞌunch catanonaꞌ ni na kꞌox ju tuchꞌi navitꞌi.
4 Ju ucxtinin ixlapanacni Dios tajunita ni cataꞌaktaijuyan.
Para ni anaviyaꞌ ju macxcai pus yuchi alhitꞌalhoniyaꞌ ju ucxtin.
Yuchi alhixtaknicanta ixpuxakꞌaiꞌan ni catamamakꞌalhkꞌajniyach ju tanavi ju macxcai.
Chai ju Dios yuchi alhixtakni ju ixpuxakꞌai ni sok caꞌamamapalanilh ju tanavich ju alactuꞌunti.
5 Para jantu va yuꞌ ju alhitꞌalhonitꞌit ju ucxtinin va ixlacaꞌatalh ni Dios ju alhcaꞌulata ni laich catamamakꞌalhkꞌajniyan ni anaviyaꞌitꞌit tuꞌuꞌ talakꞌalhin.
Alai yuchi alhitꞌalhonitꞌit ni cꞌatsꞌayatꞌit lamiꞌalhunutꞌan ni lhijun ni atꞌalhonitꞌit ju tam xakꞌai.
6 Vachuꞌ yuchi alhiꞌamapꞌalanantꞌit ju lacaꞌamapalanti.
Ju achꞌinin Dios ju aꞌulata chai va tanavich ju ixlhichꞌalhcatꞌan.
7 Ju tam xakꞌai anavinitꞌitch tachi ju lhijunch ni canavinicalh.
Ni alinch ju miꞌamapalantiꞌan laꞌixmacni tam xakꞌai pus amapꞌalanantꞌitch.
Ni alhipꞌitꞌit tuꞌuꞌ alakatam lakꞌachakꞌan chai ni achꞌicꞌantꞌit pus amapꞌalanantꞌit.
Pus ni lhijunch ni atꞌalhonitꞌit tam xakꞌai pus atꞌalhonitꞌit.
Pus ni lhijunch ni alakꞌayatꞌit tam xakꞌai pus alakꞌayatꞌitch.
8 Jantu xamatiꞌ alhipꞌinitꞌit tuꞌuꞌ.
Jantu catacꞌacxnin ju miꞌamapainintiꞌan.
Va tachi alamapꞌainitꞌit.
Ju camapainiyaꞌ ju ixtꞌalapanac muctaxtui tachi ju najun laꞌixlhamapꞌaksin Dios.
9 Ju makꞌaniya ixlhamapꞌaksin Dios ju tsꞌokꞌula ju Moisés chani najun:
“Ma jantu va kꞌaya atꞌatsꞌucꞌutꞌit ju jantu miꞌamachakaꞌan u jantu mimpapaꞌan.
Ma jantu amakninintꞌit.
Ma jantu akꞌalhaunantꞌit.
Ma jantu anaꞌuntꞌit taꞌaklhtamat chivinti ixlacata akꞌantam.
Ma jantu alhacchꞌipꞌitꞌit tuꞌuꞌ”.
Chunch najun lacalhamapꞌaksin.
Pus ju ani chivinti chai va tuchi aliꞌ lhamapꞌaksin ju caꞌalilh vaklhtam chun ju tanajun.
Va tanajun ni atꞌalamapꞌainitꞌit ju mintꞌalapanacniꞌan tachi ju va jun uxijnan ju mapꞌainichꞌokꞌocꞌanatꞌit.
10 Ju lai tꞌalamapaini ju ixtꞌalapanac jantu catinavinilh tuꞌuꞌ macxcai ju ixtꞌalapanac.
Pus ju tꞌalamapaini ju ixtꞌalapanac muctaxtukꞌojui chux tachi ju najun laꞌixlhamapꞌaksin Dios.
11 Chunch ju alatꞌit ni cꞌatsꞌayatꞌit ni ca vaninch minta ju avilhchan acsni caminchokoyaꞌ ju Cristo.
Pus tasqꞌuini ni calhilacpucujvich ju ixnavica ju soknicꞌa ni tachi ju va lhtatayauch ju laquiꞌatsucuntiꞌan.
Calhilacpucujvich ixnavica ju soknicꞌa ni palaich vanin minta ju avilhchan acsni aquintalaktsaniyan ju sastꞌi quiꞌatsucuntiꞌan ju Cristo chai aquintalhiꞌanan ju lactꞌiyan.
Palai jantucaꞌ chun ixjunita acsni pꞌulhnan lacaꞌichauch ju ixchivinti Dios.
12 Ju ani lacamunutpaꞌ junta tꞌonau tachi ju va tsꞌistach junita ni na alin ju alactuꞌunti.
Para ju chavai tachi ju va tꞌajun talakpitsiniꞌ ju atatsꞌisni ni mintach ju Cristo chai ju yuchi camakꞌosuyaꞌ ju alactuꞌunti chai tachi ju va catuncunach.
Pus ixlhiyuchach camacajuch ju ixnavica ju taxtokni ju tanavi ju taꞌalhtanantacaꞌ lacaꞌatatsꞌisni ni jantucaꞌ tamispai ju Cristo.
Pꞌas calhilaksiyau ju ixtachaput ju Dios ni lai casastꞌucꞌau ju macxcai.
Lacaꞌatuncunuꞌ ju caꞌalhtananau.
13 Catsucuyauch tachi ju tatsucui ju tatꞌajun lacaꞌatuncunuꞌ junta cꞌatsakꞌocanta tuchi navican.
Jantu calactꞌakꞌapꞌau.
Jantu vanach camakꞌanau junta va kꞌaya talai lacatuꞌuꞌ cꞌatan.
Jantu va lacati catsucu.
Jantu va lakachapunin cajumvi.
Jantu calaclasau.
Jantu calhacchaꞌau tuꞌuꞌ.
14 Chunch ju atsꞌucꞌutꞌit tachi ju istsucui ju quiꞌucxtinꞌan Jesucristo acsni ixvi ju ani lacamunutpaꞌ.
Jantu vana yuꞌ ju anavitꞌit cuenta ju ixkꞌachat ju miꞌatalacpastꞌacꞌatꞌan tachi ju ixlayatꞌit acsni tucaꞌ ixlhilacꞌapꞌinatꞌit ju Cristo.