Jantu anau ni jantu kꞌox tachi ju lai ju apumatam
14
Amalakꞌavitꞌit ju jantucaꞌ kꞌox tamachakxai ju ixchivinti Dios.
Para jantu alhimalakꞌavitꞌit ni va alhitꞌalasapꞌutꞌutꞌit ju tuchi lacaꞌitach ju yuchi.
2 Ju aliꞌin lapanacni talacaꞌich ni laich taꞌokꞌojui tachi chun ju taxtokni.
Ju aliꞌin ju jantucaꞌ kꞌox tamachakxai ju ixchivinti Dios jantu taꞌui ju lhivai.
3 Pus ju okꞌojui chux jantu calacmackꞌalh ju tam ixlakꞌau ju jantuch okꞌojui chux.
Chai ju jantu okꞌojui chux jantu lai catijunilh ju anuꞌ ixlakꞌau ju okꞌojui chux ni jantu kꞌox tachi ju lai.
Jantu lai actijunilh ju chunch ni salaka laktsꞌin ju Dios ju ixꞌalhunut ju anuꞌ lapanac.
4 Chai ju uxijnan tis chavaꞌitnich untꞌatꞌit ni laich aꞌunitꞌit ju jantuch milapanacꞌan ni jantu kꞌox tachi ju lai.
Va ixꞌucxtin ju lai canaulh u kꞌox ju navi ju ixlapanac u jantu.
Chai ni Dios ju ixꞌucxtin junita pus aktsꞌiya sok canaviyaꞌ ni na tachapun ju yuchi.
Yuchach ju caꞌaktaijuyaꞌ ni lai sok canaviyaꞌ.
5 Ju pumatam alin avilhchan ju lai talhoni.
Ju apumatam jantu tuꞌuꞌ talhoni.
Va sich kꞌox lhiulai chux avilhchan.
Pus ju pumatamin chach sacxtulh laꞌixlhichux ixꞌalhunut ju avilhchan ju machakxai ni kꞌox calhiula ju Dios ni catalhonilh.
6 Ju lapanac ju sacxtui ju avilhchan ju talhoni pus lhisacxtui ni lai pulakꞌayai ju quiꞌucxtinꞌan Dios.
Chai ju lapanac ju jantu tuꞌuꞌ talhoni chai va najunch ni sich kꞌox chux avilhchan pus vachuꞌ va lakꞌayaputun ju quiꞌucxtinꞌan Dios.
Yuchi ju punavi chunch.
Chai ju lai okꞌojui tachi chun ju taxtokni pus vachuꞌ va pulakꞌayaputun ju quiꞌucxtinꞌan Dios acsni vajin ni xtakni lakꞌailaktsꞌiuch ju Dios ixlacata tachi chun ju uich.
Chai ju jantu lai okꞌojui tachi chun ju taxtokni pus vachuꞌ pulakꞌayaputun ju quiꞌucxtinꞌan Dios ni jantu okꞌojui chux.
Chai vachuꞌ xtakni lakꞌailaktsꞌiuch ju Dios ixlacata tuchi laich ui.
7 Ju quiꞌatsucuntiꞌan tachi chun ju quijnanꞌan ju lhilacaꞌantauch ju Cristo jantu quiꞌanuꞌan quiꞌakstuꞌan.
Nin acsni tꞌonaucaꞌ ju ani lacamunutpaꞌ nin acsni caniyau.
8 Acsni tꞌonaucaꞌ pus ixlapanacni juntau ju quiꞌucxtinꞌan Dios.
Chai acsni caniyau pus vana ixlapanacni juntau ju quiꞌucxtinꞌan Dios.
Pus mas laquiꞌatsucuntiꞌan u mas laquiꞌanintiꞌan va tachi ixlapanacni quiꞌucxtinꞌan Dios juntau.
9 Pus ju Cristo yuchi lhinilh chai yuchi lhitaꞌacxtuchokolh junta ixmacnucanta ni ixꞌucxtinꞌan cajunaꞌ tachi chun ju tanitach ju ixtalhilacaꞌanta ju Cristo chai tachi chun ju titatꞌajuncaꞌ ju talhilacaꞌanta yuchi.
10 Pus ju uxijnan tas ni va mucꞌaniyatꞌit ju ixtalakꞌalhin ju tam milakꞌauꞌan.
Chai ju uxijnan tajuch ni jantu tuꞌuꞌ lhiulayatꞌit ju tam milakꞌauꞌan.
Jantu chun alatꞌit ni sich cachaꞌankꞌoyau junta vilhcha ju Dios ni laich aquintajunan u kꞌox navitau u jantu.
11 Chunchach vachuꞌ najun laꞌixchivinti Dios ju tsꞌokcanta junta ma chani najun ju Dios:
Ma yuchi ju Dios.
Chai ju yuchi ma lakꞌajunta.
Chai ma slivasalh caꞌuctaxtuyaꞌ tachi ju najunta.
Chai ju yuchi najun ni ma yuchi ju catatalhonikꞌoyach tachi chun ju lapanacni.
Chai tachi chun ju lapanacni ma catajunaꞌ ni yuchi ju xakꞌaich.
Ma chunch ju najun ju Dios.
12 Pus ju pumatamin ju quijnanꞌan aktsꞌiya cajunau ju Dios tuchi navitauch ju ani lacamunutpaꞌ.
Jantu tuꞌuꞌ anavitꞌit ju capukꞌalhkꞌosaꞌ tam milakꞌauꞌan laꞌixmacni Cristo
13 Chai ni aktsꞌiya cajunkꞌoyau ju Dios tuchi navitauch pus yuchi jantuch calhimucꞌaniu ixtalakꞌalhin ju tam quilakꞌauꞌan.
Alai va yuchi ju canaviyau cuenta ta yu laich kꞌox caputꞌalalhiꞌanau ju quiꞌalakꞌavinꞌan.
Jantu tuꞌuꞌ canaviu ju capumakꞌalhkꞌosu ju tam quilakꞌauꞌan u tuꞌuꞌ ju capulakꞌalhiniu ju isꞌatsucunti.
14 Ju quitꞌin iclhilacaꞌan ju quiꞌucxtinꞌan Jesús.
Chai ju yuchi quimamachakxanilh ni laich acꞌulh tachi chun ju taxtokni.
Para ju tam xamatiꞌ ni najun laꞌixꞌalhunut ni jantu lai catiꞌokꞌo tachi chun ju taxtokni pus talakꞌalhin cava ni caꞌulh.
15 Para ju uxijnan ni lhamamakꞌaniniyatꞌit ju tam milakꞌauꞌan ju tuchꞌi uyatꞌit pus ju chunch nomputun ni jantuch vasalh tꞌalamapꞌainiyatꞌit ju tam milakꞌauꞌan.
Pus ju tuchꞌi uyatꞌit ju uxijnan ni capuꞌalh lacajipi ju tam milakꞌauꞌan pus jantu aꞌutꞌit.
Ju Cristo vachuꞌ nilh ixlacata ju anuꞌ milakꞌauꞌan.
16 Pus ni alin tuꞌuꞌ ju jantu alactuꞌunti lhiulayatꞌit ju uxijnan para ni na macxcai catalhichivininan apumatam ni anaviyaꞌitꞌit pus jantu anavitꞌit.
17 Pus ju quijnanꞌan Dios ju navitau quiꞌucxtinꞌan.
Chai ni yuchi ju lhinajun laquiꞌatsucuntiꞌan pus cꞌatsayau ni jantiyuꞌ ju palai tuꞌuꞌ lhiulai ju Dios ni jantu acꞌulh tuꞌuꞌ u jantu ackꞌotlh tuꞌuꞌ.
Pus ju palai tuꞌuꞌ lhiulai ju Dios yuchi ni salaka cava ju quiꞌalhunutꞌan laꞌixmacni yuchi chai jantu va actꞌalakꞌailh tam quilakꞌau chai caꞌalilh ju kꞌachat laquiꞌatsucuntiꞌan.
Pus yuchi ju Spiritu Santu ju tꞌajun laquiꞌalhunutꞌan chai yuchach ju aquintamakꞌankꞌachayan.
18 Chai ju chunchach tsucui pus tasui ni vasalh ixlapanac Cristo junita.
Chai ju Dios kꞌoxich lhiulai.
Chai ju chunch vachuꞌ ju ixtꞌalapanacni catanonaꞌ ni kꞌox lapanac junita.
19 Pus yuchi calhinaviu cuenta ta yu kꞌox caputꞌalalhiꞌanau ju quilhiꞌalakꞌavinꞌan chai ta yu laich calapuꞌaktaijuyau ni palai lai calhilacaꞌanau ju Cristo ju quijnanꞌan ju lhiꞌalakꞌavin juntau laꞌixmacni yuchi.
20 Jantu alhilakꞌalhitꞌit ju ixlhichꞌalhcat Dios ju tuchꞌi upꞌutꞌunatꞌit ju uxijnan.
Pus lai ucan tachi chun ju taxtokni.
Para ju tam lapanac ni caꞌuyaꞌ tuꞌuꞌ ju va capumakꞌalhkꞌosu ju tam ixlakꞌau pus talakꞌalhin ju navi.
21 Palai kꞌox cava ni jantu aꞌutꞌit ju tuꞌuꞌ lhivai nin akꞌotꞌit ju tuꞌuꞌ vino nin anavitꞌit tuꞌuꞌ ju laich capukꞌalhkꞌoslh u calhamakꞌaninilh ju tam milakꞌau u capucapputulh ju Dios.
22 Ni vasalh ixlhichux miꞌalhunutꞌan ju lacꞌaꞌitꞌatꞌit ni jantu talakꞌalhin ju tuchi laich naviyatꞌit ju uxijnan pus anavitꞌit.
Va yuchi ni jantu anavitꞌit laꞌixꞌucxlacapuꞌan ju lapanacni ju jantu chun talacaꞌi.
Chunch ju alatꞌit ni cꞌatsꞌayatꞌit ni Dios mispai ta yu junitach ju miꞌalhunutꞌan.
Lhikꞌach tꞌajun ju lapanac ju jantu lhixcani ixꞌalhunut ju tuchi navita.
23 Para ju jantucaꞌ machakxai u kꞌox cava u jantu ju tuchi uputun para ni ixlaquilhtu caꞌulh pus talakꞌalhin cava ixlacata yuchi ni jantucaꞌ cꞌatsai u kꞌox ni caꞌulh u jantu.
Pus talakꞌalhin ni acnavi tuꞌuꞌ acsni jantucaꞌ icmachakxai ni talakꞌalhin cava u jantu.