Jantu anavitꞌit va minkꞌachatꞌan miꞌakstuꞌan
15
Pus ju quijnanꞌan ju palai machakxayau ju ixchivinti Dios tasqꞌuini ni lacsni lacsni caꞌalhiꞌau ju va jantucaꞌ kꞌox tamachakxai.
Jantu va yuchi ju canaviu ju va quinkꞌachatꞌan quiꞌakstuꞌan.
2 Pus ju tam quilakꞌauꞌan ni palai kꞌox catsuculh chai palai capulhilacaꞌalh ju Cristo ni canaviniyau ju ixkꞌachat pus canaviniu.
3 Pus nin yuchi ju Cristo jantu va ixkꞌachat isꞌakstu ju ixnavi.
Alai va uctaxtulh laꞌisꞌatsucunti tachi ju najun lacaꞌatsꞌoknut junta najun ixlacata ju Jesucristo.
Pus ju yuchi ma junilh ju ixpai ni ma yuchach ju macxcai chivinti ju tajunilh ju ixtajumputun ju ixpai.
Ma chunch ju naulh ju Cristo.
4 Pus tachi chun ju ixchivinti Dios ju tsꞌokcanta makꞌanchich lhitsꞌokcalh va quilacataꞌan ni capulaniyauch ju kꞌox.
Chai laꞌixchivinti Dios pumapꞌaksicanau.
Ju chunch lai chꞌixau va tuchi makꞌalhkꞌajnat ju xtaknicanauch laquiꞌatsucuntiꞌan.
Chai pucꞌatsayau ni aktsꞌiya caꞌalinaꞌ ju quiꞌatsucuntiꞌan ju conkꞌalhiyanta lactꞌiyan.
5 Dios ju quintaxtakniyan ju quintachaputꞌan ni laich chꞌixauch va tuchi makꞌalhkꞌajnat ju quintaxtakniyan.
Chai isꞌakstu Dios ju quintamapꞌaksiyan.
Chai ictapainini ju yuchi ni va lakatamch catanaviniyan ju miꞌatalacpastꞌacꞌatꞌan chai ni chun cajunaꞌ tachi ju kꞌoxich lhiulai ju Cristo Jesús.
6 Chai ju chunch va lakatamch cajunaꞌ ju miꞌatalacpastꞌacꞌatꞌan chai minchuxꞌan alacnonaꞌitꞌit ni xakꞌaich ju isDios ju quiꞌucxtinꞌan Jesucristo.
Yuchach ju ixpai.
Ju chivinti ixlacata ju Cristo ajunicalh ju jantu israelitanin tajunita
7 Ju Cristo ni tamalakꞌavitan ju uxijnan pus vachuꞌ ju uxijnan alamalakꞌavitꞌit ju pumatamin milhiꞌuxijnan.
Chai ni chunch ju alatꞌit pus ju lapanacni catanonaꞌ ni xakꞌaich ju Dios.
8 Pus ju Jesucristo yuchi lhiquilachilh ju ani lacamunutpaꞌ ni va ixꞌaꞌaktaijuputun ju quintꞌaꞌisraelitanin.
Ju chunch catapucꞌatsayaꞌ ni vas najun ju Dios chai aktsꞌiya muctaxtui tachi ju ixꞌakꞌalhtasunitach ju makꞌaniya quilacpaꞌitni quincꞌan.
9 Chai vachuꞌ yuchi lhiquilachilh ju Cristo ni cataꞌaktaijuyan ju Dios laꞌixꞌamapaininti ju uxijnan ju jantu israelitanin untꞌatꞌit.
Chai ju chunch vachuꞌ anonaꞌitꞌit ni Dios ju xakꞌai.
Chai ni chun ju anonaꞌitꞌit pus va uctaxtui tachi ju tsꞌokcanta junta ma chani juncan ju Dios:
Ni quilanavinitauch lamapainin ji Dios pus yuchi aclhilakꞌayayan.
Acꞌalactꞌalakꞌayayan ju yuꞌunch ju jantu israelitanin tajunita.
Chai lacamilhpat acꞌalactꞌanonaꞌ ni xakꞌaichꞌat ju uxintꞌi.
10 Chai ju alacatam chanich ju tsꞌokcanta:
Ju uxijnan ju jantu israelitanin untꞌatꞌit ma atꞌakꞌachꞌantꞌit ju aktsꞌiya ixlapanacni Dios tajunita.
11 Chai ju alacatam chanich vachuꞌ nonchokopalai:
Tachi chun ju uxijnan ju jantu israelitanin untꞌatꞌit ma alakꞌayatꞌit ju Dios.
Chai tachi chun ju uxijnan ji lapanacni ma anaꞌuntꞌit ni va yuchi ju palai xakꞌai ju Dios.
12 Vachuꞌ ju makꞌaniya ixlapanac Dios ju Isaías ixjuncan tsꞌoklh ixchivinti Dios.
Chai ju yuchi naulh ni ma caꞌalinaꞌ ju ixpapanti ju makꞌaniya ixlapanac Dios ju Isaí ixjuncan.
Chai ma yuchi calhitalacasuyach ju ani lacamunutpaꞌ ni ma cajunaꞌ ixꞌucxtinꞌan ju yuꞌunch ju jantu israelitanin tajunita.
Chai ju yuꞌunch ma catalhilaksiyach ju yuchi.
Ma chunch ju naulh ju Isaías ixlacata ju Cristo.
13 Pus Dios ju quintaꞌaktaijuyan ni laich lacaꞌikꞌalhiyau ni aktsꞌiya aquintamakꞌalhtaxtuyan.
Pus ictapainini ju yuchi ni lhu cataxtakniyan ju minkꞌachatꞌan chai cataꞌaktaijuyan va ixlacaꞌatalh ni lhilacꞌapꞌinatꞌit ju Cristo.
Cataꞌaktaijuyan ni jantu calacꞌalh ju miꞌalhunutꞌan.
Pus ju Spiritu Santu na tachapun chai yuchi ju laich catamalacaꞌiniyan ixlhichux miꞌalhunutꞌan ni atꞌakꞌalhtꞌaxtꞌuyaꞌitꞌit.
14 Chai slivasalh iclacaꞌi ji quiꞌalakꞌavin ni lackꞌoxin lapanacni untꞌatꞌit.
Chai na lhu mispꞌayatꞌit ju stavasalanti.
Chai yuchi laich lhilamapꞌaksiyatꞌit ju pumatamin ju uxijnan.
15 Pus mas iccꞌatsai ni chunch untꞌatꞌit para iclaꞌatsꞌoknuniu ju ani chivinti.
Chai jantu xacnajun ni jantu lai actilajuniu tuchi iclajumputunau ni va lai lhitꞌalhkꞌamantꞌit.
Pus iclalhiꞌatsꞌoknunitau ju chunch ji quiꞌalakꞌavin ni laich aclapumapastꞌacꞌaniyau ju tuchi iclajuntauch.
Laich iclapujunau chunch ni Dios ju xaquixtakni ju ani lhichꞌalhcat acsni quinavinilh lamapainin.
16 Dios ju xaquixtakni ju ani lhichꞌalhcat ni ixlapanac Jesucristo acva ju milacataꞌan ju jantu israelitanin untꞌatꞌit.
Chai ju lhichꞌalhcat ju icnavi yuchi ni aclamavasalaniyau ju ixchivinti Dios ixlacata ju Cristo.
Pus ju chunch cataꞌalinaꞌ ju lapanacni ju catalhilacaꞌanaꞌ ju Jesús sia uxijnan ju jantu israelitanin untꞌatꞌit.
Chai laich aclamakꞌaxtꞌakꞌauch laꞌixmacaꞌ Dios tachi ju tuꞌuꞌ lhakꞌailaktsꞌin.
Chai ju Dios na kꞌoxich calhiulayaꞌ va ixlacata ni talasastꞌinitan ju miꞌalhunutꞌan laꞌixtachaput ju Spiritu Santu.
17 Pus ju quitꞌin ni ixlapanac Cristo Jesús icjunita pus aktsꞌiya lai iclhitakꞌayai lacatsꞌunin ju tuchi lai xacnavi ni yuchi ju Cristo ju xaquiꞌaktaijui.
18 Jantu lai va kꞌaya actinaulh ju jantu vasalh icnavita.
Va yuchi ju lai acnonaꞌ ju quinavinilh ju Cristo.
Ju yuchi quiꞌaktaijulh ni laich xaclamalacaꞌiniyauch ju uxijnan ju jantu israelitanin untꞌatꞌit.
Pus ju uxijnan lhilacꞌapꞌintꞌatꞌit ju Cristo acsni kꞌasmatꞌatꞌit ju quinchivinti ju xaclajunau chai acsni laktsꞌintꞌatꞌit ju tuchi xacnavi.
19 Chai laꞌixtachaput ju Spiritu Santu lai xacnavi ju kꞌai lhamakꞌan chai tuꞌuꞌ ju laich xapꞌucꞌatsꞌayatꞌit ni stavasalanti ju tuchi xaclajunau.
Pus ixlhilacaputsꞌun ju xalacatꞌun lakꞌachakꞌan Jerusalén tus ixlhilacaputsꞌun ju xalacatꞌun ju lakꞌachakꞌan Ilírico icꞌajunkꞌota ju lapanacni ni laich amakꞌalhtaxtunun ju Cristo ni jantu cataꞌalh ju lacajipi.
20 Aktsꞌiya chani xacnaviputun.
Xacmasuputun ju ixchivinti Dios ixlacata ju Cristo junta tucaꞌ ismispacan ju ixtapakaꞌut.
Jantu xactailhiꞌamputun junta ixtaiꞌulata ju apumatam ixlhichꞌalhcat ju Dios.
21 Xacnaviputun tachi ju tsꞌokcantach laꞌixchivinti Dios junta chani najun:
Ju jantu tavanan ajuncanta ixlacata ju yuchi ma cajuncanach.
Chai ju jantu tavanan takꞌasmatꞌa ju ixchivinti ma catamachakxayach.
Chunch ju tsꞌokcanta laꞌixchivinti Dios.
Ju Pablo amputun ju lakꞌachakꞌan Roma
22 Pus ni na lhucaꞌ alin ju jantucaꞌ tamispai ju ixchivinti Dios pus yuchi jantu lai xaclhiꞌanacha lalaktsꞌinin ju uxijnan mas na paklhu xacꞌamputunacha.
23 Para ju chavai icnavikꞌota ju quilhichꞌalhcat ju ani lacatꞌun.
Chai na lakalhu cꞌata ju xacpastactꞌajun ni xacꞌamputunacha lalaktsꞌinin.
24 Pus ju chavai acsni acꞌanaꞌ ju xalacatꞌun España acsnich ju lai aclalaktsꞌintilayau ju lamilakꞌachakꞌanꞌan.
Va iclhikꞌachamputun lacatsꞌunin ni calalaktsꞌinkꞌoyauch tachi chun ju lhiꞌalakꞌavin ju lamilakꞌachakꞌanꞌan.
Chai iclacasqꞌuin ni aquilaꞌaktaijuyauch lacatsꞌunin acsni acꞌananta ju xalacatꞌun España.
25 Para pꞌulhnan icꞌamputun ju lakꞌachakꞌan Jerusalén.
Va icꞌalhiꞌaniputun lacatsꞌunin tumin ju quilhiꞌalakꞌavinꞌan ju amachakꞌan anch.
26 Pus ju talhilacaꞌanta Cristo ju tatꞌajun ju xalacatꞌun Macedonia chai ju tatꞌajun ju xalacatꞌun Acaya na kꞌoxich talhiula ni catapusacꞌaꞌ ju tumin.
Va tapuꞌaktaijuputun ju sia quilhpatinin ju talhilacaꞌanta ju Cristo ju tavilananchalhch ju lakꞌachakꞌan Jerusalén.
27 Pus ju amachakꞌan Macedonia chai ju amachakꞌan Acaya vachuꞌ jantu israelitanin tajunita.
Para na kꞌoxich talhiula ni caꞌaꞌaktaiju ju israelitanin ju tavilanancha lakꞌachakꞌan Jerusalén ni tanajun ni tachi ju va taꞌalhiꞌani ju israelitanin ni yuꞌunch ju pꞌulhnan tajunilh ixchivinti Dios.
Chai ni yuꞌunchach ju taxtaknilh ixchivinti Dios pus lhijunch ni cataꞌaꞌaktaijunulhch vachuꞌ ju jantu israelitanin.
Caꞌaꞌaktaijucalh ju israelitanin laꞌixmaktasqꞌuinitꞌan ni na quilhpatinin tajunita.
28 Pus acsni acmakꞌaxtꞌakꞌaꞌ ju tumin ju lakꞌachakꞌan Jerusalén pus lanach acꞌanach ju xalacatꞌun España.
Chai acsnich ju actapasatilayanta ju lamilakꞌachakꞌanꞌan.
29 Chai acsni acchaꞌananta ju lamilakꞌachakꞌanꞌan iccꞌatsai ni cataꞌaktaijuyan ju Cristo ni lai palai kꞌox atsꞌucꞌuyaꞌitꞌit va ixlacata ni aclajunchokoyauch aliꞌ ju ixchivinti Dios.
30 Pus ji quiꞌalakꞌavin iclatapaininiyau.
Aquilaꞌaktaijuch.
Ixlhichux miꞌalhunutꞌan asqꞌuinitꞌit ju Dios ju quilacata.
Chunch ju alatꞌit ni lhilacaꞌanau ju Cristo chai ju Spiritu Santu quintaꞌaktaijuyan ni lai lamapainiyau.
31 Pus asqꞌuinitꞌitch ju Dios ni jantu aquintanavinilh tuꞌuꞌ macxcai ju amachakꞌan Judea ju jantucaꞌ talhilacaꞌanta ju Cristo.
Vachuꞌ alhitꞌapꞌaininitꞌit ju Dios ixlacataꞌan ju yuꞌunch ju talhilacaꞌanta ju Cristo ju amachakꞌan Jerusalén ni catalhikꞌachalhch junima tumin ju icꞌalhiꞌaniputunch.
32 Ju chunch ni calacasqꞌuinaꞌ ju Dios pus laich lhikꞌach aclalakꞌantachau.
Chai laich acꞌastacnananta pantsꞌiquis acsni aclalakꞌantachau ju uxijnan.
33 Pus Dios ju xtꞌakꞌa ju kꞌox atsucunti.
Chai ictapainini ju yuchi ni catatꞌatolan ju uxijnan.
Vasalh chunch ju iclacasqꞌuinch.