Ju Pablo amacꞌami ju ixꞌamigojni
16
Iclacasqꞌuin ni amispꞌatꞌit ju Febe ni vachuch quilakꞌauꞌan junita.
Ju yuchi chꞌalhcatnan sia yuꞌunch ju talhilacaꞌanta ju Cristo ju amachakꞌan Cencrea.
2 Kꞌoxich amaklhtꞌaꞌitꞌit ju yuchi tachi ju lhijun ni vachuꞌ lhilacaꞌanta ju quiꞌucxtinꞌan Cristo tachi ju vachuꞌ layatꞌit ju uxijnan.
Chai alhiꞌaktꞌaiꞌutꞌitch va tuchi taxtoknich ju camaktasqꞌuinilh.
Chunch ju alatꞌit ni na lhu lapanacni ju aꞌaktaijutach vachuꞌ ju yuchi chai quiꞌaktaijutach vachuꞌ ju quitꞌin.
3 Amacꞌamitꞌitch ju Priscila chai ju Aquila.
Ju yuꞌunch sich quintꞌachꞌalhcatnin tajunita laꞌixlhichꞌalhcat ju Cristo Jesús.
4 Ju yuꞌunch va lacatsꞌuninch ixꞌamakniputuncan va ixlacaꞌatalh ni xaquintaꞌaktaijui.
Chai lakꞌailaktsꞌiuch icꞌajuni.
Chai jantu va quitꞌin ju xacꞌajuni lakꞌailaktsꞌiuch.
Para vachuꞌ chux ju talhilacaꞌantach ju Cristo ju jantu israelitanin tajunita.
5 Vachuꞌ amacꞌamitꞌit ju talhilacaꞌanta ju Cristo ju tatakꞌaixtꞌokꞌa ju laꞌixchakaꞌan ju Priscila chai ju Aquila.
Amacꞌamitꞌitch ju quiꞌamigo Epeneto.
Yuchi ju pꞌulhnan lhilacaꞌalh ju Cristo tachi chun ju amachakꞌan Acaya.
6 Amacꞌamitꞌitch ju Malia ju na lhu tachꞌalhcatnanitan.
7 Amacꞌamitꞌitch ju Andrónico chai ju Junias.
Ju yuꞌunch quintꞌaꞌamachakꞌan tajunita.
Chai xacꞌalactꞌatꞌalhnucanta ju yuꞌunch.
Pus ju aliꞌin lapanacni ju amalakachata Dios laꞌixlhichꞌalhcat vachuꞌ tanajun ni na lackꞌoxin lapanacni tajunita ju Andrónico chai ju Junias.
Pus ju yuꞌunch pꞌulhnan talhilacaꞌalh ju Cristo.
Astan ju quitꞌin.
8 Amacꞌamitꞌit ju Amplias ju na icmapaini ni vachuꞌ lhilacaꞌanta ju quiꞌucxtinꞌan Jesús.
9 Amacꞌamitꞌitch ju Urbano.
Yuchi ju quintꞌachꞌalhcatnaꞌan laꞌixlhichꞌalhcat ju Jesús.
Vachuꞌ amacꞌamitꞌitch ju Estaquis ju na icmapaini.
10 Amacꞌamitꞌitch ju Apeles.
Ju yuchi vasalh talacasuta ni ixlhichux ixꞌalhunut ju lhilacaꞌanta ju Cristo.
Amacꞌamitꞌitch ju tatanumanalh laꞌixchakaꞌ ju Aristóbulo.
11 Amacꞌamitꞌitch ju Herodión.
Ju yuchi quintꞌaꞌamachivinti junita.
Amacꞌamitꞌitch ju tatanumanalh laꞌixchakaꞌ ju Narciso ju vachuꞌ talhilacaꞌanta ju quiꞌucxtinꞌan Jesús.
12 Amacꞌamitꞌit ju Trifena chai ju Trifosa ju tachꞌalhcatnan laꞌixlhichꞌalhcat ju quiꞌucxtinꞌan Jesús.
Amacꞌamitꞌitch ju quilhilakꞌauꞌan Pérsida ju na mapainiyau.
Ju yuchi na lhu chꞌalhcatnanta ixlacata ju quiꞌucxtinꞌan Jesús.
13 Amacꞌamitꞌitch ju Rufo.
Slivasalh cꞌatsacan ni lhilacaꞌanta ju quiꞌucxtinꞌan Jesús ju yuchi.
Vachuꞌ amacꞌamitꞌitch ju ixnati.
Ju yuchi tachi ju va quinati junita vachuꞌ.
14 Amacꞌamitꞌitch ju Asíncrito chai ju Flegonte chai ju Hermas chai ju Patrobas chai ju Hermes chai tachi chun ju aliꞌinch ju quiꞌalakꞌavinꞌan laꞌixmacni Cristo ju alactꞌavi ju yuꞌunch.
15 Amacꞌamitꞌit ju Filólogo chai ju Julia chai ju Nereo chaich ju ixlakꞌauch atsiꞌ chaich ju Olimpas chai tachi chun ju aliꞌin ju talhilacaꞌanta ju Cristo ju alactꞌavi ju yuꞌunch.
16 Alamacꞌamitꞌit ju pumatamin milhiꞌuxijnan lacaꞌamapaininti.
Tamacꞌamiyanch tachi chun ju talhilacaꞌanta ju Cristo ju lacatam lacatam tavilanancha.
17 Chai iclatapaininiyau ji quiꞌalakꞌavin.
Alaccꞌatsꞌanantꞌit ju ixlacata ju va taꞌamaktalhkꞌamanan chai va ixlacata ni jantu kꞌox ju isꞌatsucuntiꞌan va tasastucputun ju ixlhichꞌalhcat ju Dios.
Ju yuꞌunch jantu chun talai tachi ju najun lacaꞌatalaninti ju lanitꞌatꞌit ju uxijnan.
Pus amacꞌaꞌuntꞌit ju yuꞌunch.
18 Ju yuꞌunch jantu slivasalh ni catanaviniputulh ju ixkꞌachat ju quiꞌucxtinꞌan Jesucristo.
Va ixkꞌachat isꞌakstuꞌan ju tanavi.
Chai ju ixchivintiꞌan tachi ju na va kꞌoxich ju tanajun chai tachi ju va vasalh ju tanajun.
Para va tapuꞌokxchokꞌoi ju jantucaꞌ kꞌox tamispai ju stavasalanti.
19 Para tachi chun ju lapanacni tacꞌatsai ni qꞌuiclacꞌaꞌiyatꞌitch ju ixchivinti Dios ju uxijnan.
Pus na iclhikꞌachanch ni chun ju tacꞌatsai ju lapanacni.
Chai iclacasqꞌuinch ni yuchi ju alhalaccꞌatsꞌanantꞌit ju kꞌox chai atꞌalhonitꞌit ju macxcai atsucunti.
20 Pus Dios ju lai xtꞌakꞌa ju kꞌox atsucunti.
Chai ju yuchi vatsꞌalhti catꞌalalhajayaꞌ ju Satanás ju milacataꞌan.
Chai ictapainini ju Dios ni catanaviniyan lamapainin ju quiꞌucxtinꞌan Jesucristo.
21 Tamacꞌamiyan ju Timoteo ju quintꞌachꞌalhcatnaꞌ.
Vachuꞌ tamacꞌamiyan ju Lucio chai ju Jasón chai ju Sosípater.
Ju yuꞌunch quintꞌaꞌamachivinti tajunita.
22 Pus ju quitꞌin icTercio.
Quitꞌin ju icꞌatsꞌoknunilh ju Pablo ju ani alhiqui.
Vachuꞌ iclamacꞌamiyau laꞌixtapakaꞌut ju quiꞌucxtinꞌan Jesús.
23 Tamacꞌamiyan ju Gayo.
Laꞌixchakaꞌ ictꞌajun ju chavai chai anich ju tatakꞌaixtꞌokꞌa ju talhilacaꞌanta ju Cristo.
Vachuꞌ tamacꞌamiyan ju Erasto ju ixlhistacnaꞌ tumin ju lakꞌachakꞌan Corinto.
Vachuꞌ tamacꞌamiyan ju Cuarto ju quilhilakꞌauꞌan.
24 Ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan.
Vasalh chunch iclacasqꞌuin ni catanaviniyan.
Lakꞌayacan ju Dios
25 Chach lakꞌayacalh ju Dios.
Yuchach ju lai taꞌaktaijuyan ni ixlhichux miꞌalhunutꞌan ju alhilacꞌapꞌitꞌitch ju Jesucristo tachi ju najun lacachivinti junta najun ixlacata yuchi.
Yuchach ju iclajuntauch ju uxijnan.
Chai ju ani chivinti ixlacata ju Jesucristo malacasucantach ju chavai mas jantu lai ixtamachakxai ju lapanacni ju ixtatꞌajun makꞌanch.
26 Pus ju Dios jonkꞌalhitach.
Chai yuchach ju lacasqꞌuilh ni camasucalh ju chavai ju chivinti ixlacata ju Cristo.
Chai yuchach ju ixtalhaꞌatsꞌoknunta ju makꞌaniya ixlapanacni Dios.
Chai ju chavai ju chivinti ixlacata Cristo ajunkꞌota tachi chun ju lapanacni.
Ju chunch va tichi chavaich laich cataquiclacaꞌinilh ixchivinti Dios chai catalhilacaꞌalh ju Jesucristo.
27 Va yuchi ju Dios ju mispakꞌojui tachi chun ju taxtokni.
Chach lakꞌayacalh ju yuchi tus va tavananch va ixlacata ju quiꞌucxtinꞌan Jesucristo.
Vasalh chunch iclacasqꞌuin ni canavicalh.