Taꞌalincaꞌ ju va tachi askꞌatꞌancaꞌ tajunita laꞌixmacni Dios
3
Pus ji quiꞌalakꞌavin acsni xaclatꞌavilau jantu lai xaclalhixakꞌalayau tachi ju xakꞌalacan ju makꞌanch talhitamakaꞌuta ixchivinti Dios.
Va chunch xaclalhixakꞌalayau tachi ju yuꞌunch ju va ancaꞌ talhilacaꞌanta ju Cristo.
2 Xaclanaviyau tachi ju tam askꞌatꞌa ju jantucaꞌ lai ui ju lhivai.
Va lechecaꞌ ju kꞌotꞌa.
Pus vana va chun ju uxijnan.
Va xaclajunau ixtaxtokni Dios ju jantu na xcai machakxacan ni jantucaꞌ lai ixmachꞌakxayatꞌit ju palai lhixcai.
Chai mas tus chavai jantucaꞌ lai machꞌakxayatꞌit.
3 Tucaꞌ lai machꞌakxayatꞌit ju palai lhixcai ni jantucaꞌ kꞌox macꞌontꞌatꞌit tachi ju talai ju jantucaꞌ talhilacaꞌanta ju Jesús.
Pus alincaꞌ ju lamilhiꞌuxijnan ju taꞌalhacchaꞌanan chai ju talaclakꞌaji chai ju jantu va lakatam tanavita ju ixꞌatalacpastꞌacꞌatꞌan.
Pus ni chunch ju layatꞌit pus lana tasui ni vanach tꞌonatꞌitcaꞌ tachi ju tatsucui ju jantucaꞌ talhilacaꞌanta ju Jesús.
4 Pus ju pumatam lamilhiꞌuxijnan najun ni ma quitꞌin ju quinchꞌakꞌokꞌai.
Chai ju apumatam najun ni ma yuchi ju Apolos ju chꞌakꞌokꞌai.
Pus ni chunch ju layatꞌit pus va naviyatꞌit tachi ju talai ju jantucaꞌ talhilacaꞌanta ju Jesús.
Alin ju tatꞌanavi ixlhichꞌalhcat ju Dios ju Pablo
5 Pus tis quintalakxtuch.
Tis ixtalakxtuch ju Apolos.
Ju quijnan va ixlapanacni Dios icjuntau.
Chai va xaclajunau ixchivinti Dios ni lai xalhilacꞌapꞌinatꞌit ju Cristo.
Pus icnaviyau ju lhichꞌalhcat ju xaquintaxtakniyan ju Dios ju pumatamin ju quijnan.
6 Quitꞌin ju pꞌulhnan iclajuniu ju ixchivinti Dios chai ju Apolos taꞌaktaijun ni laich palai xamachꞌakxayatꞌit ju ixchivinti Dios.
Pus tachi ju va jun icchꞌantach ju chivinti chai tachi ju va jun tikꞌavalh ju achꞌananti ju Apolos.
Para isꞌakstu ju Dios ju taꞌaktaijutan ni laich xalhilacꞌapꞌinatꞌit ju Cristo chai lai palai palai lhilaksiyatꞌit.
7 Pus ju chunch va nomputun ni jantu tuꞌuꞌ ixtalakxtu ju najun ixchivinti Dios.
Nin yuchi ju mavasalai ju ixchivinti.
Va yuchi ju Dios ju lai lhilaksican ni yuchi ju quintaꞌaktaijuyan ni lai lhilacaꞌanau ju Cristo chai lai palai palai lhilaksiyau ju yuchi.
8 Pus ju najun ixchivinti Dios chai ju mavasalai ju ixchivinti vaklhtam chun tajunita.
Chai sia sia caꞌaxtaknicanaꞌ ju ixtalhajaꞌan tachi ju tachꞌalhcatnanta.
9 Ju quijnan va kꞌaixtam icchꞌalhcatnanau laꞌixlhichꞌalhcat Dios.
Chai ju uxijnan ju lhilacꞌapꞌintꞌatꞌit ju Cristo tachi ju tuꞌuꞌ puꞌachꞌananti untꞌatꞌit junta icchꞌalhcatnanau.
U vachuꞌ lai acnaulh ni chunch untꞌatꞌit tachi ju tuꞌuꞌ kꞌai chakaꞌ ju tꞌajun yonaꞌ ju Dios.
10 Pus ju quitꞌin chunch icjunita tachi ju xaꞌucxtin ju na mispai ixyajuca chakaꞌ.
Pus quitꞌin acsni tavanan iclajuniu ixchivinti Dios pus tachi ju va icpokꞌajta ju lacatꞌun chai icyaulh ju xatantun ni yuchi ju lhichꞌalhcat ju xaquixtakni ju Dios.
Chai ju astan ni tamilh ju aliꞌin ju tamavasalanin ju chivinti pus tachi ju va tatailhiꞌan lacatsꞌunin junta xacmamactata ixyajuca ju chakaꞌ.
Para pumatamin pumatamin calaktsꞌilh tuchi ju capulaputankꞌayayaꞌ ju ani chakaꞌ.
11 Junta yocan ju tuꞌuꞌ chakaꞌ jantu lai lacatꞌui machꞌantacan.
Pus vana va chun ju quimaklacaꞌanitꞌan.
Jantu lai lakatꞌui cativa.
Va pumatamch ju lai lhilacaꞌanau.
Va yuchi ju Jesucristo.
12 Pus yuchi ju Jesucristo ju puchꞌantayau ni yuchi ju maklacaꞌaniyau.
Chai ju aliꞌin ju tamavasalai ixchivinti Dios tachi ju va talaputankꞌayaputun ixchakaꞌ Dios.
Para tachi chun ju yuꞌunch tasqꞌuini ni kꞌox catanavi cuenta tuchi catalhilaputankꞌayayach.
Ju aliꞌin ni sok tamavasalai pus tachi ju va talhilaputankꞌayai laca tuꞌuꞌ oro chai laca tuꞌuꞌ plata chai laca tuꞌuꞌ chiux ju na laklhu ixtapalh.
Para ju aliꞌin ju jantu sok tamavasalai pus tachi ju va talhilaputankꞌayaputun ju ixchakaꞌ Dios laca tuꞌuꞌ qꞌuiu u laca tuꞌuꞌ achꞌitin u laca tuꞌuꞌ xaxixni atsꞌin.
13 Para acsni cachinaꞌ ju avilhchan acsni camakꞌosaspitcanach ju lapanacni pus acsnich ju catasuyaꞌ ju tuchi lhilaputankꞌayalhch ju ixchakaꞌ Dios ju pumatamin ju mavasalalh ixchivinti Dios.
Pus ju ixlhichꞌalhcat ju pumatamin calaktsꞌintanucanach laca tuꞌuꞌ jipi.
Chai caputasuyach ju ixlhichꞌalhcat ju kꞌantam kꞌantam u kꞌox ju navita u jantu.
14 Chai acsni tavanan calaktsꞌintanucanaꞌ laca tuꞌuꞌ jipi ixlhichꞌalhcat ju kꞌantam kꞌantam pus ni xamatiꞌ kꞌox caxajanta pus camaklhtayananaꞌ ju ixtalhaja.
15 Para ni va calhcukꞌoyach ju tuchi xalhilaputankꞌayai ju ixchakaꞌ Dios pus matich cajunaꞌ ju ixtalhaja.
Va yuchi ni catakꞌalhtaxtuyach ju yuchi.
Para chunch cajunaꞌ tachi tam xamatiꞌ ju xcayama takꞌalhtaxtui acsni tꞌajun lhcunuꞌ ju ixchakaꞌ.
16 Ja va jantu cꞌatsꞌayatꞌit ni tachi ixpujitat Dios untꞌatꞌit minchuxꞌan ju uxijnan.
Ja jantu cꞌatsꞌayatꞌit ni tꞌajun ju Spiritu Santu lamiꞌalhunutꞌan ju pumatamin ju uxijnan.
17 Tachi ju iclajuntau.
Ju uxijnan tachi ixpujitat Dios untꞌatꞌit minchuxꞌan ju uxijnan.
Chai ju ixpujitat Dios na salaka.
Pus ni xamatiꞌ catalakꞌalhiniputunan ju miꞌatalacpastꞌacꞌatꞌan ni tajunan ju chivinti ju jantu sok pus Dios ju camamakꞌalhkꞌajnikꞌalhiyaꞌ.
18 Tun xamatiꞌ ju milhiꞌuxijnan cataꞌokxchokꞌolh isꞌakstu.
Ni alin ju milhiꞌuxijnan ju na atalaniniꞌ calhitalacasuputulh ju ani lacamunutpaꞌ pus tasqꞌuini ni cacꞌatsa ni jantu tuꞌuꞌ lhitapalai ju xaꞌatalaninti ju ani lacamunutpaꞌ.
Ju chunch laich camispayaꞌ ju atalaninti ju istavasalanti ju xtꞌakꞌa ju Dios.
19 Pus ju xaꞌatalaninti ju va lhilapanac jantu tuꞌuꞌ lhiulai ju Dios.
Tasui ni chunchach ju lhiulai ju Dios ni chanich ju tsꞌokcanta laꞌixchivinti junta chani najun:
“Ju Dios ma calacasqꞌuinach ni catapukꞌalhkꞌosaꞌ ixchivintiꞌan isꞌakstuꞌan ju atalaninin”.
Chunch ma najun ju Dios.
20 Chai ju alacatam junta tsꞌokcanta ma chani najun ju Dios:
“Ju yuchi ma amispanikꞌojui ju ixꞌatalacpastꞌacꞌatꞌan ju tanajun ni atalaninin tajunita.
Chai ma cꞌatsai ni jantu lhitapalai ju ixꞌatalanintiꞌan ju yuꞌunch”.
Chunch ma najun ju Dios.
21 Tun va alakꞌayatꞌit ju tam mintꞌalapanacꞌan ni laich anaꞌuntꞌit ni yuchach ju achꞌakꞌokꞌatꞌit.
Jantu chun alatꞌit ni taxtaknikꞌotan ju Dios tachi chun ju taxtokni.
22 Ju quitꞌin chai ju Apolos chai ju Pitaluꞌ va milapanacni icjuntau.
Chai ju Dios taxtaknitan tachi chun ju taxtokni ju alin ju ani lacamunutpaꞌ ni laich cataꞌaktaijuyan.
Pus ni lakꞌaꞌi ju Dios ni tꞌonatꞌitcaꞌ u ni aniyaꞌitꞌit pus ju Dios chunch navi ni va pastꞌacꞌa ju kꞌox ju milacataꞌan.
Chai vana va chun pastꞌacꞌa ixlacata ju tuchi tꞌajun tapasanaꞌ ju chavai lamiꞌatsucuntiꞌan chai ju tuchi catapasayaꞌ astan.
23 Chai ju uxijnan ixꞌanuꞌ Cristo untꞌatꞌit.
Chai ju Cristo ixꞌanuch Dios junita.