Chani tanavi ixtamalakachan ju Jesús
4
Tachi chun ju uxijnan acꞌatsꞌatꞌit ni va ixlapanacni Cristo icjuntau.
Va icmavasalayau ju ixchivinti Dios ju jantu lai ixmachakxacan ju makꞌanchich.
2 Chai tachi chun ju mavasalai ju ixchivinti Dios tasqꞌuini ni lai calhilaksicalh.
3 Para ju quitꞌin jantu icnavi cuenta tuchꞌi nonatꞌit ju quilacata u tuchi tanajun ju aliꞌin.
Nin quiꞌakstu quitꞌin jantu lai actinaulh ni icnavita ju kꞌox u jantu.
4 Mas tachi ju va sok icꞌanta iclhiulai para jantu lai vas actinaulh ni chunch ju najun ju Dios u jantu.
Va yuchi isꞌakstu ju Cristo ju lai canaulh ni icnavi ju kꞌox u jantu.
5 Pus ni va yuchi ju Cristo ju lai najun ni kꞌox ju navicanta tuꞌuꞌ u jantu pus jantucaꞌ lai xamatiꞌ catinaulh ni kꞌox u jantu ju tuchi navi ju akꞌantam.
Jantucaꞌ lai chun catinaulh ni jantucaꞌ chin ju anuꞌ avilhchan acsni caminaꞌ ju quiꞌucxtinꞌan Jesús.
Ju acsnich ju yuchi camalacasukꞌoyach ta yu cꞌatsancan laquiꞌalhunutꞌan chai tijuch ju xapastꞌacꞌau laquiꞌalhunutꞌan.
Chai ju acsnich ni cꞌatsai ju Dios tuchi xanavi ju kꞌantam kꞌantam pus calakꞌayayaꞌ ju pumatamin tachi ju lhijunch.
6 Pus ji quiꞌalakꞌavin iclhichivininta ju quiꞌatsucunti chai isꞌatsucunti ju Apolos ni lai apꞌumachꞌakxatꞌit ju tuchi xaclajumputunau.
Ju chunch lai atsꞌucꞌuyaꞌitꞌit tachi ju najun laꞌixchivinti Dios ju tsꞌokcanta.
Vachuꞌ jantu alhitꞌakꞌayatꞌit ni chꞌakꞌokꞌayatꞌit ju pumatam chai jantu alhixcꞌaꞌitꞌit ju va akꞌantam tachꞌakꞌokꞌai.
7 Pus tajuch ni va nonatꞌit ni palai lackꞌoxin lapanacni untꞌatꞌit.
Palai jantu ju aliꞌin.
Pus lana jantuꞌ tuꞌuꞌ alin ju lamiꞌatsucuntiꞌan ju jantu va axtꞌaknicꞌantꞌatꞌit.
Chai ni va xtꞌaknicꞌantꞌatꞌit tꞌas ni va lhitꞌakꞌayapꞌalatꞌit.
Ju chunch tachi ju va jantu va xtꞌaknicꞌantꞌatꞌit.
8 Ju uxijnan nonatꞌit ni makꞌalinin untꞌatꞌit ju chavai chai jantu tuꞌuꞌ tacꞌacxniyan.
Mas ca jantu vasalh.
Chai nonatꞌit ni kꞌai ucxtinin untꞌatꞌit.
Mas ca jantu vasalh.
Chai nonatꞌit ni quilapuꞌinitauch.
Pus vak tachi kꞌox ixva ni vasalh kꞌai ucxtinin ixꞌuntꞌit.
Ju chunch laich vachuꞌ aclatꞌataꞌucxtiniyauch ju quijnan.
9 Pus ju quitꞌin iclhiulai ni quintamalacasutan ju Dios tachi ju va jantu tuꞌuꞌ quintapalhni quincꞌan ju ixtamalakachan icjuntau.
Icꞌulhtucantauch tachi ju lapanacni ju amucꞌanicanta ixꞌanintiꞌan va ixlacata ni taꞌalactuꞌununta.
Ju lapanacni ju ani lacamunutpaꞌ chai ju anquilhnin va quintalhalakastꞌananan.
10 Ju lapanacni quintalaktsꞌinan tachi ju va tontojni icjuntau va ixlacata ni icnonau ixchivinti ju Cristo.
Para ju uxijnan nonatꞌit ni palai na machꞌakxayatꞌit ixchivinti Cristo.
Nonatꞌit ni palai lhilaksiyatꞌit ju Cristo ju uxijnan.
Ma palai jantu ju quijnan.
Nonatꞌit ni tachi ju va xalackꞌajin untꞌatꞌit para ju quijnan ma tachi ju va amacxtalh iclaktsꞌincanauch.
11 Tus chavai na iclacchavanau.
Chai na icquicxixau.
Chai matich ju quimpumpuꞌ quincꞌan.
Chai iclakanekmacanauch ju quijnan.
Chai matich junta lai acnaulh ni quinchakaꞌ quincꞌan junita.
12 Chai ju quijnan na icxkꞌopꞌauch acsni icchꞌalhcatnanchokoyau ju laquimaktasqꞌuinit quincꞌan.
Chai acsni icjuncanau macxcai chivinti pus icsqꞌuiniyau ju Dios ju kꞌox ju ixlacataꞌan.
Chai acsni iclhichꞌakꞌokꞌaxmacanau va ixlacata ni iclhilacaꞌantauch ju Cristo pus va icchꞌixauch.
13 Chai acsni na macxcai chivinti ju iclhichivincanauch pus va si kꞌoxi chivinti ju iclhakꞌalhtayananauch.
Tus chavai iclaktsꞌinkꞌalhicanauch tachi ju va xaꞌamacxtalh ju ani lacamunutpaꞌ.
Tachi ju tuꞌuꞌ ju va tamackꞌanch ju lapanacni.
14 Jantiyuꞌ ju iclalhiꞌatsꞌoknuniyau ju ani chivinti ni va aclapumamaxaniputu.
Alai va iclamapꞌaksiputunau ni na iclamapainiyau chai tachi ju va quiꞌaskꞌatꞌan iclalaktsꞌinau.
15 Pus mas lakacau milh cava ju tamalaniyan ixchivinti Cristo para va quitꞌin ju pꞌulhnan iclajuntau ju anuꞌ chivinti.
Chai ni quitꞌin ju pꞌulhnan iclajuniu ju ixchivinti Dios chai lhilacꞌapꞌintꞌatꞌit ju Cristo pus tachi ju va quiꞌaskꞌatꞌan iclalaktsꞌinau.
16 Pus yuchi iclalhitapaininiyau ni chunch ju alatꞌit tachi ju iclai ju quitꞌin.
17 Chai ni vasalh iclacasqꞌuin ni chunch ju alatꞌit pus yuchi iclhimalakachacha ju Timoteo.
Ju yuchi iclaktsꞌin tachi ju va quintsꞌalh ni quitꞌin ju icjunilh ju ixchivinti Dios chai yuchi lhilhilacaꞌalh ju Jesús.
Chai ju yuchi vasalh muctaxtui laꞌixlhamapꞌaksin ju Cristo.
Pus yuchi ju catamapastꞌacꞌanichokoyan ta yu junita ju quiꞌatsucunti ni iclhilacaꞌanta ju Cristo.
Chai catamapastꞌacꞌaniyan ni jantu icmapaxai ju tuchi icꞌamasuni ju lapanacni ju talhilacaꞌanta ju Cristo mas vanta anchach catatavi.
18 Pus ju aliꞌin lamilhiꞌuxijnan na talhitakꞌayatach ni tanajun ni na quintamakꞌesvata chai ixlhiyuchi jantu lai tavanan actiꞌanchokochau lalaktsꞌinin.
19 Para aktsꞌiyach vatsꞌalhti acꞌantachau lalaktsꞌinin ni calacasqꞌuinaꞌ ju quiꞌucxtinꞌan Dios.
Chai ju acsnich jantu va ixchivintiꞌan ju acꞌakꞌasmatniyaꞌ ju anuch ju na talhitakꞌayata ju ixꞌatalanintiꞌan.
Para vachuꞌ accꞌatsayaꞌ tuchi laich tanavi.
20 Pus ni vasalh lhinajun ju Dios laꞌixꞌalhunut ju tam lapanac pus lana tasui laꞌisꞌatsucunti.
Jantu va yuꞌ ni najun ni lhinajun ju Jesús laꞌisꞌatsucunti.
21 Pus tꞌas nonatꞌit.
Ni atꞌailhipꞌinaꞌitꞌit tachi ju aktsꞌiya layatꞌit pus aclalakakꞌaimayau acsni aclalakchaꞌanchokoyau.
Para ni kꞌoxich atsꞌucꞌuyaꞌitꞌit pus aclamasuniyau ni vasalh iclamapainiyau chai ni na kꞌox ju quiꞌalhunut acsni aclalakchaꞌanchokoyau.
Pus tasmalhch ju lacꞌasqꞌuinatꞌit ju kꞌoxich alhiulayaꞌitꞌit.