Junima yuchi ju amasunicalh ju Pablo
12
Jantu tuꞌuꞌ icpulhajai ni iclakꞌayachokocan quiꞌakstu.
Para ixlaquilhtu aclalhijunau ju chavai ju tuchi iclaktsꞌintach tachi ju va laquilhtatat chai ju tuchi quimacꞌatsanitach ju quiꞌucxtin Jesús.
2 Laꞌixtachaput ju Cristo tapasalh ju ani ju aclajunau.
Pus ju chavai tapasata lakacautꞌatꞌi cꞌata ju xaclhiꞌancanta ju lactꞌiyan.
Ju quitꞌin jantu iccꞌatsai u va yuchi ju quintacuvin ju quilalh ju lactꞌiyan u chux ju quilacatuna ju quilalh.
Va yuchi ju Dios ju cꞌatsai.
3 Para ju quitꞌin iccꞌatsai ni xaclhiꞌancanta ju lactꞌiyan.
Chai acsni iclhiꞌancalh ju anch jantu iccꞌatsai u va yuchi ju quintacuvin ju quilalh ju lactꞌiyan u chux ju quilacatuna ju quilalh.
Va yuchi ju Dios ju cꞌatsai.
4 Chai acsni iclhiꞌancalh ju talaclhman junta paraíso juncan pus anch ickꞌasmatcha ju chivinti ju jantu xalacasqꞌuin ju Dios ni xamatiꞌ acjunilh.
5 Ju quitꞌin aclakꞌayachokocanaꞌ quiꞌakstu ixlacata ju tuchi xaquinavi ju Dios.
Para ju va tuꞌuch ju icnavita quiꞌakstu jantu actilhitakꞌaya.
Va yuchi aclhitakꞌayayaꞌ ju putasui ni matich ju quintachaput.
6 Mas aclakꞌayachokocalh quiꞌakstu jantu lai va tonto activa va ixlacaꞌatalh ni yuchi ju stavasalanti ju acnaulh.
Para jantu chun actilalh ni jantu iclacasqꞌuin ni xamatiꞌ palai aquilakꞌaya va ixlacata ju ani quinchivinti ju iclajunau.
Va iclacasqꞌuin ni catacꞌatsa ni chunch icjunita tachi ju quintalaktsꞌin chai tachi ju quintakꞌasmatni.
7 Chai ni slivasalh na cꞌus ixjunita ju xaquimalacasuni ju Dios ju lactꞌiyan pus vachuꞌ lakꞌaꞌi ni acxtaknicalh lakatam makꞌalhkꞌajnat ju na quixcani tachi acsni tanun tuꞌuꞌ alhtucunuꞌ laquiꞌacanitꞌan.
Ju chunch jantu lai actilhitakꞌaya tachi ju jantu lhijun ju tuchi xaquimasuni ju Dios.
Chai vachuꞌ ju yuchi va tachi aquimapastꞌacꞌani ni va lapanac icjunita.
Lakꞌaꞌinicalh ju lhacaticuru ni yuchi ju aquixtaknilh ju ani makꞌalhkꞌajnat.
8 Pus paktꞌutu ictapaininilh ju quiꞌucxtin Jesús ni aquimakꞌosunilh ju ani makꞌalhkꞌajnat.
9 Para ju yuchi chani quijuni:
“Ju quitꞌin va tachi acꞌaktaijuyan laquiꞌamapaininti.
Acsni va matich ju mintachaput pus acsnich ju tasui ni na ictachapun ju quitꞌin ni icꞌaktaijuyan”.
Chunch ju xaquijuni.
Chai ni chunch pus lhikꞌach acmakꞌalhkꞌajnanaꞌ ni laich caputasuyach laquiꞌatsucunti ixtachaput ju Dios.
10 Yuchi iclhikꞌachan acsni lana matich ju quintachaput ni lai acnavilh ju tuꞌuꞌ chai acsni macxcai quintalhichivinin ju lapanacni va ixlacaꞌatalh ni icchꞌakꞌokꞌai ju Cristo.
Vachuꞌ iclhikꞌachan acsni lana matiꞌ ju quintuꞌuꞌ chai acsni na quintalhixcajich ju lapanacni chai acsni na icmakꞌalhkꞌajnan va ixlacaꞌatalh ni icchꞌakꞌokꞌai ju Cristo.
Pus acsni lana matich ju quintachaput pus acsnich ju quixtakni ju ixtachaput ju Dios chai yuchi iclhikꞌachan acsni icmakꞌalhkꞌajnan.
Ju Pablo alhamakꞌaninin ju amachakꞌan Corinto ju talhilacaꞌanta ju Jesús
11 Tachi ju va tonto icchivinin ni iclakꞌayachokocan quiꞌakstu.
Para istasqꞌuini ni chunch aclalh ni lana tachi ju va jantu tuꞌuꞌ quilalhiulayau.
Palai kꞌox ixva ni vas ixnaꞌuntꞌit ni vachuꞌ ixlapanac ju Cristo icjunita.
Pus ju quitꞌin mas lana jantu tuꞌuꞌ ju quintapalhni ju va laquiꞌakstu para jantu tuꞌuꞌ quincꞌacxni ni lai xamatiꞌ canaulh ni jantu vachuꞌ ixtamalakachan Cristo icjunita tachi ju yuꞌunch ju tatalacasuniyan tachi ju va xalackꞌajin ixtamalakachan ju Cristo tajunita.
12 Acsni xaclatꞌavilhchau lana istasui ni vasalh ixtamalakachan ju Cristo icjunta.
Ju uxijnan laktsꞌintꞌit ni xacchꞌixkꞌojui tachi chun ju macxai ju ixꞌalin laquiꞌatsucunti.
Chai xacnavi ju tuꞌuꞌ ju laich catapucꞌatsa ju lapanacni ni vasalh Dios ju xaquimalakachayachilh chai xacnavi ju tuꞌuꞌ lhamakꞌan chai ju tuꞌuꞌ ju istasui ni laꞌixtachaput Dios ju xacchꞌalhcatnan.
13 Jantu tuꞌuꞌ icnavita ju alacatam ju jantu icnavita lamilhiꞌuxijnanꞌan vachuꞌ.
Va yuchi ni jantu xaclamaklhtaitauch tuꞌuꞌ ju uxijnan tachi ju xacꞌamaklhtajita ju aliꞌin.
Lamapainin aquilamacꞌacxaniuch junima talakꞌalhin.
14 Ju chavai iclakasivi ni icnajun ni ixlaktꞌutuch aclalakꞌantachauch ju uxijnan.
Chai lana icnajun ni jantu tuꞌuꞌ aclasqꞌuiniyau ju uxijnan.
Chunch icnaviputun ni jantiyuꞌ ju mintuminꞌan ju icpuxcajui.
Alai va iclacasqꞌuin ni atꞌakꞌalhtꞌaxtꞌuyaꞌitꞌit ju uxijnan.
Pus tachi ju lacan ju ani lacamunutpaꞌ jantiyuꞌ ju tam askꞌatꞌa ju xtakni ju tuchi maktasqꞌuini ju tam ixpai.
Alai yuchi ju xapai ju xtakni ju tuchi maktasqꞌuini ju tam isꞌaskꞌatꞌa.
Pus vana va chun ju quitꞌin.
Iclaꞌaktaijuputunau ni tachi ju va quiꞌaskꞌatꞌan iclalhiulayau laꞌixmacni Cristo.
15 Ju quitꞌin lacalhikꞌach acmacaꞌanaꞌ ju quintumin chai mas chux quiꞌatsucunti aclhitapꞌuxputunach va ixlacaꞌatalh ni iclacasqꞌuin ni alhilacꞌapꞌitꞌit ju Cristo.
Chunch aclayaꞌ mas tasui tachi ju va palai jantu tuꞌuꞌ quilalhiulayau ju quitꞌin acsni slivasalh na tuꞌuꞌ iclalhiulayau ju uxijnan.
16 Para mas jantu tuꞌuꞌ xaclasqꞌuiniyau ju uxijnan para ju aliꞌin lamilhiꞌuxijnan tanajun ni va iclaꞌokxchokꞌomaxtuniu ju mintuminꞌan acsni iclamalakachanichau ju aliꞌin quiꞌalakꞌavinꞌan.
17 Tachi chun ju iclamalakachanichau jantu xamatiꞌ xataꞌokxchokꞌomaxtuniyan ju mintuminꞌan.
18 Ictapaininilh ju Tito ni catalakꞌanchan.
Chai ictꞌamalakachacha apumatam quilhilakꞌauꞌan.
Chai ju uxijnan cꞌatsꞌayatꞌit ni jantu xataꞌokxchokꞌomaxtuniyan ju mintuminꞌan.
Cꞌatsꞌayatꞌit ni va ixtꞌachunch ju ixꞌalhunut ju Tito tachi ju quiꞌalhunut.
Chai va ixtꞌachunch ju chꞌalhcatnan ju yuchi tachi ju quitꞌin.
19 Ca va nonchꞌokꞌopꞌalatꞌit ni va iclacasqꞌuin ni anonaꞌitꞌit ju uxijnan ni matiꞌ ju quintalakꞌalhin.
Para jantu.
Ju quitꞌin ni iclhilaksita ju Cristo pus va yuchi ju Dios ju iclacasqꞌuin ni canaulh ni matiꞌ ju quintalakꞌalhin.
Pus tachi chun ju icnavi ji quiꞌalakꞌavin si icnavi ni palai lai alhilacꞌapꞌitꞌit ju Jesús.
20 Pus ju quitꞌin na iclalhamakꞌanininau.
Pus acsni tavanan acchaꞌananta jantu xcai ni aclalhitaju ju uxijnan tachi ju jantu iclacasqꞌuin.
Chai ju chun tasqꞌuini ni aclalh tachi ju jantu kꞌox alhiulayaꞌitꞌit.
Jantu xcai ni vana alaclakꞌaꞌitꞌit chai alaclalhacchipꞌinitꞌit tuꞌuꞌ chai alaclamaktꞌalhkꞌamantꞌit.
Jantu xcai ni alaclasatꞌit chai macxcai chivinti alaclaꞌunitꞌit chai alapꞌuxcꞌonitꞌit ju talakꞌalhin.
Jantu xcai ni kꞌai acꞌatsꞌatꞌit chai lana jantu alalacꞌaꞌiniyatꞌit.
21 Acsni aclalakꞌanchokopalhtachau chai aclalhitajuyau ni chunch ju layatꞌit pus na aquimamaxanilh ju Dios ni vanach alactuꞌununatꞌit ju uxijnan.
Slivasalh acꞌamakꞌanininaꞌ ni va caꞌalilh ju aliꞌin ju taꞌalactuꞌununta para jantu tavanan tamacajunta ju ixꞌalactuꞌuntiꞌan.
Ju aliꞌin tatꞌatsucui ju jantu ixꞌamachakaꞌan u jantu ixpapaꞌan.
Chai ju aliꞌin tatailhiꞌanta tachi ju aktsꞌiyach ixlantichꞌan.