Alaꞌaktꞌaiꞌutꞌit
6
Ji quiꞌalakꞌavin ni cꞌatsacan ni vasalh caꞌalactuꞌunulh pumatam ju vachuꞌ lhilacaꞌanta ju Cristo pus ju uxijnan ju lhinonkꞌojui ju Spiritu Santu lamiꞌalhunutꞌan asayaꞌutꞌit tachi ju lhikꞌox lapanac canavi ni jantu caxcanilh ixꞌalhunut laminchivintiꞌan.
Para vachuꞌ alhistꞌacchꞌokꞌocꞌantꞌit miꞌakstuꞌan.
Jantu xcai ni vachuꞌ anaviyaꞌitꞌit ju tuꞌuꞌ macxcai.
2 Alaꞌaktꞌaiꞌutꞌit ni alin ixlhamakꞌan tam xamatiꞌ.
Chai ni chunch ju alatꞌit pus amuctꞌaxtꞌuyaꞌitꞌit tachi ju najun laꞌixlhamapꞌaksin ju Cristo.
3 Pus ni alin tam xamatiꞌ ju na kꞌai cꞌatsai mas jantu tuꞌuꞌ ixtapalhni pus va isꞌakstu okxchokꞌochokocan.
4 Pus ju pumatamin tasqꞌuini ni calaktsꞌintanucalh laꞌisꞌakstu tuchi laich navi.
Jantu va calaktsꞌintailh laꞌisꞌatsucunti akꞌantam.
Ju chunch alinch ju ixkꞌachat ixlacata tuchi navich isꞌakstu.
Chai jantu va ixlacata ni palaich kꞌox calhiulachokocalh isꞌakstu.
Palaich jantu ju tam ixtꞌalapanac.
5 Pus tasqꞌuini ni pumatamin canaviyaꞌ ixlhichꞌalhcat isꞌakstu.
6 Ju amalanicanta ju ixchivinti Dios chach taꞌaktaiju ju amamakaꞌunuꞌ.
Chach aktaijucalh ju amamakaꞌunuꞌ.
Chach taxtaknilh tachi chun ju kꞌox.
7 Jantu aꞌokxchꞌokꞌocꞌantꞌit.
Jantu xamatiꞌ lai catilhitsꞌiꞌilh ju Dios.
Tachi ju tuꞌuꞌ tꞌin ju acchꞌanaꞌ pus yuchach ju acxkꞌaꞌiyaꞌ.
8 Pus chunchach vachuꞌ ju laquiꞌatsucuntiꞌan.
Ju va tachi navitꞌajun ju macxcai ju mapastꞌacꞌani ixꞌalhunut pus yuchach ju capuꞌamaklhtayananaꞌ ju ixꞌaninti junta jonkꞌalhita makꞌalhkꞌajnat.
Para va tichi chavaich ju navitꞌajun ju kꞌachani ju Spiritu Santu pus isꞌakstu ju Spiritu Santu ju caxtakniyaꞌ ju isꞌatsucunti ju conkꞌalhiyanta lactꞌiyan.
9 Pus jantu jeks caꞌuniu ixnavica ju kꞌox.
Pus ni catailhiꞌanau ixnavica ju kꞌox pus cachinaꞌ ju avilhchan ju lhcata ju Dios acsni aquintaxtakniyan ju quintalhajaꞌan.
10 Pus yuchi caꞌalhinaviniuch ju kꞌox tachi chun ju lapanacni va tapakchux ju lai canaviu.
Para palai na lhu ju kꞌox canaviniuch ju quilhiꞌalakꞌavinꞌan laꞌixmacni Jesús.
Amacꞌaminin ju Pablo
11 Tus ani akꞌantam xaquiꞌatsꞌoknuni.
Para ju chavai quitꞌin ju aclaꞌatsꞌoknuniyau laquimacaꞌ.
Chai alaktsꞌintꞌit ni slivasalh na lackꞌai ju quiletra.
Pus yuchi alhicꞌatsꞌayaꞌitꞌit ni vasalh quitꞌin ju iclaꞌatsꞌoknuniyau.
12 Ju yuꞌunch ju va tapꞌastu tajunan ni achꞌucꞌucꞌantꞌit va tapujunan chunch ni kꞌox catalhiula ju ixtꞌalapanacni chai jantu caꞌamamakꞌalhkꞌajnicanaꞌ.
Vachuꞌ jantu talhimakꞌalhkꞌajnamputun ni catanaulh ni tasqꞌuini ni calhilacaꞌancalh ju Cristo ni yuchi ju nilh lacacurus ju quilacataꞌan.
13 Para nin yuꞌunch ju chunch tajunan jantu tamuctaxtukꞌojui chux tachi ju najun lacalhamapꞌaksin mas achꞌucꞌucanta ju yuꞌunch.
Alai va talacasqꞌuin ni achꞌucꞌucꞌantꞌit vachuꞌ ju uxijnan chai ju chunch laich catalhitakꞌayayaꞌ ni navitꞌatꞌit tachi ju xatajunan.
14 Pus ju quitꞌin lana jantu tuꞌuꞌ iclhitakꞌayaputun.
Va yuchi ju tuꞌuꞌ iclhiulai ni quinichilh ju quiꞌucxtinꞌan Cristo ju quilacataꞌan.
Chai ni iclhilaksich ju Cristo ni nilh ju lacacurus ju quilacata pus jantu tuꞌuꞌ iclhiulai ju taxtokni ju ani lacamunutpaꞌ ju talhitakꞌayai ju quintꞌalapanacni.
Pus ju yuchi jantu lai aquixtakniyaꞌ tuꞌuꞌ kꞌox.
15 Pus ni lhilacaꞌantauch ju Cristo pus jantu tuꞌuꞌ quintalhiꞌaktaijuyan mas ixchꞌucꞌucau u jantu.
Va yuchi ju lhitapalai ni quixtaknita ju sastꞌi quiꞌatsucunti ju Jesús.
16 Ictapainini ju Dios ni cataꞌaktaijuyan lacaꞌamapaininti chai ni jantu calacꞌalh ju miꞌalhunutꞌan tachi chun ju uxijnan ju chunch tsꞌucꞌuyatꞌit tachi ju iclajuntauch ju ani.
Vachuꞌ chunch ictapaini ixlacata ju aliꞌin ju vasalh isꞌaskꞌatꞌan Dios tajunita.
17 Pus ju atipuꞌanta jantu iclacasqꞌuin ni xamatiꞌ casamakꞌalh ju quinchivinti.
Pus laquilacatuna tasuicaꞌ junta xaquintalakanekmai ju aliꞌin lapanacni va ixlacata ni icꞌajuni ju lapanacni ixchivinti Jesús.
18 Ji quiꞌalakꞌavin ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan.
Slivasalh chunch ju iclacasqꞌuin.