2 Ju quitꞌin icPablo chai aquilakꞌasmatniu tuchi iclajunau.

Acsni va alakꞌaꞌiyaꞌitꞌit ni achꞌucꞌucꞌanaꞌitꞌit tachi ju najun lacalhamapꞌaksin pus jantu lhitapalai ni xani ju Cristo ju milacataꞌan.

3 Pus aktam iclajunchokopalau.

Tachi chun ju lapanacni ju talakꞌaꞌi ni caꞌachꞌucꞌucalh pus tasqꞌuini ni stunin catanavikꞌo tachi chun ju najun lacalhamapꞌaksin ju tsꞌoklh ju Moisés.

Jantu va yuchi ni caꞌachꞌucꞌucalh.

4 Pus ju uxijnan ni va lacꞌasqꞌuinatꞌit ni salaka catalaktsꞌinan ju Dios va ixlacaꞌatalh ni naviyatꞌit tachi ju najun lacalhamapꞌaksin pus ju chunch ju Cristo jantu lai tuꞌuꞌ catitalhaꞌaktaijun.

Nin yuchi ju Dios jantu lai catitanavinin lamapainin.

5 Pus ju quijnan ni iclhilacaꞌanau ju Cristo pus iccꞌatsayau ni yuchi ju Spiritu Santu ju aquintalasoknicꞌayan laꞌixmacni Dios.

6 Pus ni lhilacaꞌantauch ju Cristo Jesús pus jantuch lhitapalai ni acchꞌucꞌucalh u jantu.

Va yuchi ju lhitapalai ni aclhilacaꞌalh ju Jesucristo chai caputasulh laquiꞌatsucunti ni vasalh iclhilacaꞌanta ju yuchi ni na icꞌamapaininin.

Va yuchi ju lhitapalai laꞌixmacni Dios.

7 Pus ju uxijnan kꞌox ixtꞌonatꞌit.

Para va alin ju lapanacni ju xataꞌokxchokꞌoyan ni jantuch vana lacꞌaꞌipꞌutꞌunatꞌit ju stavasalanti ixlacata ju Cristo.

8 Ju anuꞌ chivinti ju tapuꞌokxchokꞌoputunan jantu ixꞌanuꞌ ju Dios ju tasacxtutan.

9 Tun tꞌicꞌaptꞌit ju ani chivinti ju chani noncan:

“Ma mas va lacatsꞌunin aclakmuju ju saskꞌajni pus laktanukꞌojui chux ju sasquitit”.

10 Para ju quitꞌin iclhilaksi ju quiꞌucxtinꞌan Jesús ni yuchi ju cataꞌaktaijuyan ni jantu tavanan amapꞌaxaniyaꞌitꞌit ju miꞌatalacpastꞌacꞌatꞌan.

Para ju anuꞌ ju talakꞌalhiniputunan ju miꞌatalacpastꞌacꞌatꞌan camamakꞌalhkꞌajnicanaꞌ mas va tichi chavaich cava.

11 Pus ju quitꞌin ji quiꞌalakꞌavin ni vanach acnaulh ni tasqꞌuini ni cachꞌucꞌucalh tam xamatiꞌ pus jantuch aquintalhimakchapulh ju quintꞌaꞌisraelitanin.

Jantu tuꞌuꞌ cataxcanilh ju quintꞌaꞌisraelitanin ni acnaulh ju chunch mas vachuꞌ acꞌajunilh ju lapanacni ni tasqꞌuini ni catalhilaksilh ju Cristo ni yuchi ju nilh ixlacataꞌan.

12 Ca vak tachi kꞌox cava ni lana catalakꞌalhinikꞌo ju ixlacatunaꞌan ju anuꞌ lapanacni ju talakꞌalhiniputunan ju miꞌatalacpastꞌacꞌatꞌan ni tajunan ni tasqꞌuini ni achꞌucꞌucꞌanatꞌit.

13 Pus ju uxijnan ji quiꞌalakꞌavin ju Dios talhisacxtutan ni isꞌaskꞌatꞌan aꞌunaꞌitꞌit.

Jantu vana tasqꞌuini ni anaviyaꞌitꞌit tachi ju najun lacalhamapꞌaksin.

Para ju chunch jantu va nomputun ni laich anavitꞌit ju macxcai miꞌatalacpastꞌacꞌatꞌan va ixlacaꞌatalh ni jantu lhilaksiyatꞌit ju lhamapꞌaksin.

Alai tasqꞌuini ni lacaꞌamapaininti alaꞌaktꞌaiꞌutꞌit ju milhiꞌuxijnan.

14 Pus laich apꞌumuctꞌaxtꞌuyaꞌitꞌit tachi chun ju najun lacalhamapꞌaksin va yuchi ni anaviyaꞌitꞌit va lakatam chivinti ju tsꞌokcanta ju anch.

Yuchi ni amapꞌainitꞌit ju mintꞌalapanac tachi ju va jun miꞌakstuchꞌan ju mapꞌainichꞌokꞌocꞌantꞌit.

15 Para acsni laclakꞌayatꞌit chai va laclasayatꞌit ju pumatamin pus alaktsꞌintꞌitch.

Jantu xcai ni va alamacoyokꞌotꞌit ju pumatamin milhiꞌuxijnan.

16 Pus iclajunau ni chunch ju atsꞌucꞌutꞌit tachi ju tamapastꞌacꞌaniyan ju Spiritu Santu chai ju chunch jantu anaviyaꞌitꞌit ju macxcai ju alin lamiꞌalhunutꞌan.

17 Pus ju macxcai ju alin laquiꞌalhunutꞌan va tꞌalasai ju ixkꞌachat ju Spiritu Santu.

Chai ju ixkꞌachat ju Spiritu Santu va tꞌalasai ju macxcai ju alin laquiꞌalhunutꞌan.

Chai ni va talaclasai pus yuchi jantu lai lhinaviyatꞌit ju kꞌox ju navipꞌutꞌunatꞌit.

18 Para ni anaviyaꞌitꞌit tuchi lacasqꞌuin ju Spiritu Santu pus jantuch vana tasqꞌuini ni alhilaksitꞌit ju lhamapꞌaksin ju tsꞌoklh ju Moisés.

19 Pus lana tasui tamalh ju macxcai ju alin laquiꞌalhunutꞌan.

Yuchach acsni xamatiꞌ jantu lhilacaꞌan tam ixꞌamachakaꞌ u ni jantu lhilacaꞌan tam ixpapa.

Chai lhu alactuꞌunti ju ixtꞌachun ju tanavi.

20 U va talhilacaꞌan ju tuꞌuꞌ santo.

U ni alhicujnun.

U taꞌaxcayanan.

U talaclakꞌaji.

U taꞌalhacchaꞌanan.

U talhilakachapui tuꞌuꞌ.

U va ixkꞌachat isꞌakstuꞌan ju tanavi.

U na taꞌamaktalhkꞌamanan ni va talhacchaꞌan.

21 U talhacchaꞌani ixtaxtokni ju akꞌantam.

U amakninin.

U tatꞌakꞌapꞌai.

U aliꞌ macxcai ju va ixtꞌachunch tachi ju ani.

Pus aktam iclajunchokopalau tachi ju xaclajunauch pꞌulhnan.

Ju yuꞌunch ju tanavi ju chunch taxtokni jantu lai catitaꞌalh ju lactꞌiyan junta lhinajun ju Dios.

22 Para vachuꞌ tasui ni tꞌajun ju Spiritu Santu laquiꞌalhunutꞌan acsni amapainininau.

Chai acsni kꞌachanau.

Chai acsni jantu lacꞌan ju quiꞌalhunutꞌan.

Chai acsni chꞌixkꞌoyau ju macxcai.

Chai acsni va tachi kꞌox lapanacni talacasuyau.

Chai acsni naviyau lamapainin.

Chai acsni muctaxtuyau ju quinchivintiꞌan.

23 Chai acsni palai talacatꞌicstꞌiyau.

Chai acsni lai kꞌaichokocanau quiꞌakstuꞌan.

Pus acsni naviyau tachi chun ju ani taxtokni pus matiꞌ ju lhamapꞌaksin ju lai aquintaꞌulanin ju quintalakꞌalhinꞌan va ixlacaꞌatalh ni naviyau ju chunch.

24 Pus ju quijnanꞌan ju lhilaksiyauch ju Cristo jantuch vana naviyau ju macxcai quiꞌatalacpastꞌacꞌatꞌan.

Alai laktsꞌinau ju makꞌaniya quiꞌatsucuntiꞌan tachi ju va nita ni nita ju Jesús quiꞌokxtapalhꞌan.

Chai ju chavai jantu tasqꞌuini ni vana canaviyau ju ixkꞌachaniyau ju pꞌulhnan.

25 Chai ni quintaxtaknitan ju sastꞌi quiꞌatsucuntiꞌan ju Spiritu Santu pus tasqꞌuini ni yuchach ju calhinonkꞌo chux laquiꞌatsucuntiꞌan.

26 Chai jantu va kꞌaya calhitakꞌayau tuꞌuꞌ.

Acsni xamatiꞌ chunch lai pus ju aliꞌin va talhitalhkꞌaman ni va si xakꞌai tajumputun.