4
Pus chanich iclajumputunau.
Acsni va lacatꞌicstꞌicaꞌ junita ju anuꞌ tsꞌalh ju caꞌamaklhtayananaꞌ ju ixmakꞌalit ju lijunto ixpai pus laktsꞌincantacaꞌ tachi ju va xalapanac junita ni jantucaꞌ lai lhinajun.
Chunch ju laktsꞌincantacaꞌ mas yuchi ju amanavinch chux.
2 Alin ju talhistꞌacꞌa ju anuꞌ tsꞌalh.
Chai alin ju talhistacni ju ixꞌalinta tus acsni cachinach ju avilhchan ju lhcata ju lijunto ixpai.
3 Chai vana va chun ju quijnan ju israelitanin icjuntau.
Acsni tucaꞌ ixmin ju Cristo pus chunch ixjuntau tachi ju anuꞌ tsꞌalh.
Va ixnaviyau tachi ju xaquintamalanitan ju makꞌaniya quilacpai quincꞌan.
4 Para acsni chaꞌalh ju avilhchan ju ilhcata ju Dios pus malakachachilh ju istsꞌalh.
Chai ju yuchi pumaktasu pumatam chakoꞌulh.
Chai ni israelita ixjunita vachuꞌ pus ixnavi tachi ju najun lacalhamapꞌaksin.
5 Chai chunch ju tsuculh ju yuchi ni lai aquintamakꞌalhtaxtun ju quijnan ju xaclhilaksiyauch ju lhamapꞌaksin.
Chai ju yuchi lakꞌoxilh ta yu laich cajumvi isꞌaskꞌatꞌan Dios vachuꞌ tachi chun ju quijnan ju israelitanin icjuntau.
6 Chai ni isꞌaskꞌatꞌanch Dios juntau pus yuchi quintalhimalakachanichinch ju iSpiritu Santu ju istsꞌalh laquiꞌalhunutꞌan.
Chai ni tꞌajun ju yuchi laquiꞌalhunutꞌan pus yuchi lai quimpai lhixakꞌalayau ju Dios.
7 Pus ju chavai jantuch quintalaktsꞌinan tachi ju va tam xalapanac.
Alai quintalhimispayan ni isꞌaskꞌatꞌan juntau.
Chai ni isꞌaskꞌatꞌan juntau pus amaklhtayanantauch tuchi quintakꞌalhtasunitan tachi chun ju quijnanꞌan ju lhilacaꞌantauch ju Cristo.
Ju Pablo alhamakꞌaninin yuꞌunch ju talhilacaꞌanta ju Cristo
8 Ju makꞌanch acsni jantucaꞌ ismispꞌayatꞌit ju Dios va kꞌaya ixlhilacꞌapꞌinatꞌit ju tuꞌuꞌ ju jantu vasalh diosnin tajunita.
9 Para ju chavai mispꞌayatꞌitch ju tucan Dios.
U ca palai kꞌox ni aclajunau ni tamispayan ju Dios.
Chai ni tamispayan ju Dios tas tucan untꞌatꞌit ni laich lhilacꞌapꞌinchꞌokꞌopꞌutꞌunatꞌit ju anuꞌ lhamapꞌaksin ju matich ixtachaput ni laich catamakꞌalhtaxtun.
Yuchi ju va jantu lai taꞌaktaijuyan.
Aktam va lacꞌasqꞌuinatꞌit ni yuchi ju catajunan tuchi laich anaviyaꞌitꞌit.
10 Ju uxijnan vanach tꞌalhoniyatꞌit ju aliꞌ cꞌatan chai ju aliꞌ avilhchan chai ju aliꞌ malhquiyuꞌ chai ju aliꞌ cꞌata tachi ju najun laꞌixlhamapꞌaksin ju Moisés.
Chunchach ju layatꞌit ni nonatꞌit ni na kꞌoxich lhiulai ju Dios ju chunch.
11 Pus ju quitꞌin icnajun ni ca jantu tuꞌuꞌ ixtapalhni cajunaꞌ ju milacataꞌan ju tuchi xcayama iclamalacaꞌiniu ixlacata ju Cristo ni vanach atꞌalhoniyaꞌitꞌit ju makꞌaniya lhamapꞌaksin.
12 Quiꞌalakꞌavin ju chavai chunch iclai tachi ju uxijnan ixlayatꞌit ju pꞌulhnan.
Jantu iclhilaksi ju ixlhamapꞌaksin ju Moisés.
Pus na iclatapaininiyau ni chunch ju alachꞌokꞌotꞌit.
Jantuch alhilaksitꞌit ju anuꞌ lhamapꞌaksin.
Pus acsni xaclatꞌavilhchau pꞌulhnan jantu tuꞌuꞌ macxcai xaquilanaviyau.
13 Pus ju uxijnan cꞌatsꞌayatꞌit ni na xactakꞌankꞌai acsni pꞌulhnan icchaꞌalh lamilakꞌachakꞌanꞌan.
Chai yuchi iclhitolhcha ju anch chai yuchi lai xaclalhijunau ixchivinti Dios.
14 Chai jantu quilalhilacmackꞌau nin yuchi ni aquilalhitsꞌisiu ju quintakꞌankꞌat ju xacpacxanta ju acsnich.
Alai quilaꞌamaklhtayanau tachi ju va jun ixꞌanquilh Dios xacjunita.
Chai tachi ju va jun isꞌakstu ju Jesucristo.
15 Para ju chavai tijuch ju xatꞌapꞌasayatꞌit ni jantuch vanach kꞌox quilalaktsꞌinau.
Ju pꞌulhnan xaccꞌatsai ni na xaquilamapainiyau.
Yuchi iclhicꞌatsalh ni na xaquilamapainiyau ni va laich ixmaxtꞌutꞌit ju milakchulhꞌan chai xaquilaxtakniputunauch ni na xaclacpuxcaich.
16 Pus ju chavai ja va mintꞌalaxcaiꞌan xacjun ni xaclajunauch ju stavasalanti.
17 Pus ju anuꞌ israelitanin va talhacchaꞌaniyan.
Para jantu kꞌox tachi ju tapastꞌacꞌa ju yuꞌunch.
Pus ju yuꞌunch va talacasqꞌuin ni aquilamacoyajuch.
Chai achꞌakꞌokꞌatꞌit ju yuꞌunch.
18 Aktsꞌiya kꞌox ni talakxcavatayan ixlacata ju kꞌox mas va tavananch cava.
Para jantu kꞌox ni va acsnich ju talakxcavatayan acsni iclatꞌavilau.
19 Quiꞌaskꞌatꞌan aktam ictꞌompalai makꞌalhkꞌajnaꞌ ju milacataꞌan ju uxijnan tus acsni catasuyaꞌ lamiꞌatsucuntiꞌan ni ixlhichux miꞌalhunutꞌan ju alhilacꞌapꞌinaꞌitꞌit ju Cristo.
20 Va laich aclatꞌatolhchau ju chavai.
Chai acpuxcaulh ta yu laich aclalhixakꞌalau ju laich apꞌumachꞌakxatꞌit.
Pus jantu icmachakxai tuchꞌi ju pꞌastꞌacꞌatꞌit.
Tachi ju talalh ju Agar chai ju Sara
21 Aquilajuniuch ju uxijnan ju na lhilaksipꞌutꞌunatꞌit ju ixlhamapꞌaksin ju Moisés.
Ja va jantu kꞌasmatꞌatꞌit tachi ju najun ju anuꞌ lhamapꞌaksin.
22 Pus chanich ju xatsꞌokꞌulai ju Moisés.
Ju Abraham ma ixꞌalin pumatꞌui istsꞌalan.
Ju ixnati ju kꞌantam istsꞌalh ma va isquitiꞌ ixjunita chai ju Abraham va ixtamajuta ju yuchi.
Para ju ixnati ju pumatam istsꞌalh ma ixꞌamachakaꞌ Abraham ixjunita.
Chai ju yuchi jantu va ixtamajuta.
23 Pus ju istsꞌalh ju ismaksquitiꞌ ixjunita ma chunch ju putasu tachi ju putasucan ju va lhilapanac.
Para ju isꞌaskꞌatꞌa ju ixꞌamachakaꞌ Abraham ma tasu acsni va uctaxtulh ixchivinti ju ixkꞌalhtasunita ju Dios ju Abraham.
24 Pus ju ani chivinti ju xatsꞌokꞌulai ju Moisés quintamasuniputunan ju tuꞌuꞌ.
Chanich ju nomputun.
Pus ixtꞌiyunꞌan chakolun chunch tajunita tachi ju lakatꞌui chivinti ju alactꞌatakꞌoxilh ju Dios ju makꞌaniya lapanacni.
Ju lakatam xtakcancha xalactalhpa Sinaí acsni axtaknilh ju lapanacni ju ixlhamapꞌaksin.
Chai ju yuchi chunch junita tachi ju Agar ni xajonkꞌalhi va xalapanac.
Chai ju yuꞌunch ju talhilaksich ju anuꞌ lhamapꞌaksin vachuꞌ tachi xalapanacni tajunita ni tanavi tachi ju najun ju anch para jantu tavanan lai cataputakꞌalhtaxtuyaꞌ.
25 Pus ju Agar chunch junita tachi ju anuꞌ xalactalhpa Sinaí laxalacatꞌun Arabia tachi ju iclajuntau.
Chai ju anuꞌ xalactalhpa chunch junita tachi ju israelitanin ju talakꞌayai ju Dios ju lakꞌachakꞌan Jerusalén ju chavai.
Pus ju yuꞌunch vachuꞌ tachi xalapanacni tajunita ni tanavi tachi ju najun lacalhamapꞌaksin para jantu tavanan lai cataputakꞌalhtaxtuyaꞌ.
26 Chai ju ixlhilakatꞌui chivinti ju alactꞌatakꞌoxilh ju Dios ju makꞌaniya lapanacni yuchi ju tꞌatakꞌoxilh ju Abraham.
Pus ju yuchi chunch junita tachi ju Sara ju jantu xalapanac ixjunita.
Jantu va ixtamajuta ju Abraham.
Chai ju yuchi chunch junita tachi ju quijnanꞌan ju calakꞌayatachau ju Dios laxalakꞌachakꞌan Jerusalén ju vilhcha lactꞌiyan ni makꞌalhtaxtucantauch.
27 Pus chani ju tsꞌokcanta laꞌixchivinti Dios:
Akꞌachꞌach ju uxintꞌi ju va miꞌakstu.
Ju jantu amaskꞌatꞌanan.
Pꞌas atꞌas laminkꞌachat ju uxintꞌi ju jantu amaklakꞌavanan.
Pus palai lhu ju isꞌaskꞌatꞌan ju va macoꞌulacanta.
Palai jantu ju alin ixpapa.
Chunch ju tsꞌokcanta laꞌixchivinti Dios.
28 Pus ji quiꞌalakꞌavin ju Dios muctaxtulh ixchivinti acsni tavanan tsuculh ju isꞌaskꞌatꞌa ju Sara mas jantu lai ixꞌalin ju isꞌaskꞌatꞌa.
Chai vana va chun aquintamuctaxtuniyan ixchivinti ni najunta ni isꞌaskꞌatꞌan aquintanaviyan.
29 Pus acsni tatsuculh ixtꞌiyunꞌan istsꞌalan ju Abraham pus pumatam ixmaktasutach tachi ju maktasucan ju va lhilapanac.
Chai ju yuchi acsni kꞌaich tsꞌalh va pus lhimakchapulh ju anuch ju puꞌamaklakꞌavanalh tachi ju kꞌalhtasunilh ju Dios ju Abraham.
Pus vana va chun ju chavai.
Alin lapanacni ju talhilaksi ju lhamapꞌaksin chai ju yuꞌunch quintatꞌalaxcayan ju quijnanꞌan ju lhilaksiyau ixchivinti Dios junta najun ni va laꞌixmacni Cristo isꞌaskꞌatꞌan Dios juntau.
30 Para ju uxijnan ja va jantu pꞌastꞌacꞌatꞌit tachi ju najun laꞌixchivinti Dios ju tsꞌokcanta.
Ja va jantu pꞌastꞌacꞌatꞌit ni chani najun:
“Atꞌixcꞌauxtꞌuch ju xalapanac ju va ixtamocanta.
Atꞌaxcꞌauxtꞌuch ju istsꞌalh.
Ju istsꞌalh ju va xalapanac jantu lai tuꞌuꞌ catixtaknicalh.
Para ju istsꞌalh ju tucan miꞌamachakaꞌ ju jantu va ixtꞌamaꞌutꞌa yuchach ju laich caxtaknicanaꞌ ju miꞌalinta”.
Chunch ju najun laꞌixchivinti Dios.
31 Pus ji quiꞌalakꞌavin ju ani chivinti ixlacata ju istsꞌalan Abraham chanich ju quintamamachakxaniputunan.
Pus ju quijnanꞌan jantu chun juntau tachi ju istsꞌalh ju va xalapanac ixjunita ni laich canaju ni tasqꞌuini ni canaviu tachi ju quintajunan ju makꞌaniya lhamapꞌaksin.
Alai chunch juntau tachi istsꞌalh ju tucan ixꞌamachakach Abraham ixjunita.
Chai lhilaksiyau ixchivinti Dios junta najun ni laꞌixmacni Cristo isꞌaskꞌatꞌan Dios juntau.