Takꞌalhtaxtucan va ixlacata ixꞌamapaininti Dios
2
Acsni ixmucꞌanicꞌantꞌatꞌit ju miꞌanintiꞌan ixlacata ju miꞌalactuꞌuntiꞌan chai mintalakꞌalhinꞌan acsnich ju taxtaknitan ju Dios ju sastꞌi miꞌatsucuntiꞌan.
2 Acsni tucaꞌ ismispꞌayatꞌit ju Cristo pus vachuꞌ chunch ixlayatꞌit tachi ju talai ju jantucaꞌ talhilacaꞌanta ju yuchi.
Ixnaviniyatꞌit ixkꞌachat ju xaꞌucxtin lhacaticurulhni.
Chai yuchach ju vachuꞌ chꞌalhcatnan laꞌixꞌalhunutꞌan ju jantu taquiclacaꞌiputun ju Dios.
3 Pus ju makꞌanchich vachuꞌ chunch ixlayau ju quijnanꞌan.
Ixnaviyauch tachi chun ju macxcai ju ixkꞌachaniyau.
Chai ixnaviyau ju macxcai ixkꞌachat ju quilacatunaꞌan chai ju quiꞌatalacpastꞌacꞌatꞌan.
Pus tus acsni istsucutachauch ixlhijunch ni calhitalhkꞌamalh ju Dios tachi ju ixlayauch.
Chai si lana chun ixjunkꞌotauch.
4 Para ju Dios slivasalh na lai aꞌaktaijunun lacaꞌamapaininti chai slivasalh na quintamapainin.
5 Pus mas ixmucꞌanicantauch ju quiꞌanintiꞌan va ixlacata ju quiꞌalactuꞌuntiꞌan para ju Dios quintaxtaknitan ju sastꞌi quiꞌatsucuntiꞌan ni lhilacaꞌantauch ju Cristo.
Pus va yuchi ni quintanavinitan lamapainin ju Dios yuchi lai xalhitakꞌalhtaxtuyau junta jonkꞌalhita makꞌalhkꞌajnat.
6 Tachi ju Cristo ni xtaknichokocalh isꞌatsucunti acsni ixnita pus vana va chun ju quijnanꞌan.
Quintaxtaknitan ju sastꞌi quiꞌatsucuntiꞌan chai ju chavai ju Dios quintalaktsꞌinan tachi ju va anch tꞌavilhchau ju Cristo Jesús ju lactꞌiyan.
7 Chunch ju quintanavinin ju Dios ni caputalacasukꞌalhiyach ni slivasalh quintaꞌaktaijutan lacakꞌai ixꞌamapaininti acsni quintanavinin ju kꞌox va ixlacaꞌatalh ni lhilacaꞌantauch ju Cristo Jesús.
8 Takꞌalhtaxtutauch lacamakꞌalhkꞌajnat junta jonkꞌalhita va ixlacaꞌatalh ni quintaꞌaktaijutanch ju Dios lacaꞌamapaininti acsni lhilacaꞌantauch ju Cristo.
Para jantiyuꞌ quintalhinavinitan chunch va ixlacaꞌatalh ni navitau tuꞌuꞌ.
Alai va quintalhikꞌailaktsꞌintan ju Dios ju ixꞌamapaininti.
9 Jantu lai putakꞌalhtaxtuyau va ixlacaꞌatalh ni canaviuch ju kꞌox.
Ni lai chunch cava ixputakꞌalhtaxtu pus ca laich ixtalhitakꞌaya ju aliꞌin ni ixtacꞌatsa ni laich ixtatakꞌalhtaxtulh va laꞌisꞌakstuꞌan.
10 Para isꞌakstu ju Dios ju quintamakꞌalhtaxtuyan.
Chai acsni lhilacaꞌanau ju Cristo pus quintaxtakniyan sastꞌi quiꞌatsucuntiꞌan ni lai naviyau ju kꞌox tachi ju ixlhilhcaꞌulata ju Dios ni canaviu.
Matiꞌ ju lakꞌaiti laꞌixmacni ju Cristo
11 Apꞌastꞌactꞌit ni jantu israelitanin untꞌatꞌit.
Chai ju quintꞌaꞌisraelitanin ju achꞌucꞌucanta jantu ixtatꞌalaxakꞌalaputunan ni jantu chꞌucꞌucꞌantꞌatꞌit.
12 Apꞌastꞌactꞌit ni jantucaꞌ ismispꞌayatꞌit ju Cristo ju acsnich.
Chai ni jantu quintꞌaꞌisraelitanin untꞌatꞌit pus jantu ixmaktꞌanuyatꞌit ju ixlacata tuchi xaquintalhitꞌatakꞌoxitan ju Dios ju quijnan ju israelitanin icjuntau.
Jantucaꞌ iscꞌatsꞌayatꞌit ni laich caꞌalilh ju miꞌatsucuntiꞌan ju lactꞌiyan.
Chai mas ixvilatꞌit ju ani lacamunutpaꞌ para jantucaꞌ ismispꞌayatꞌit ju tucan Dios.
13 Pus ju makꞌanchich ixtꞌalaxcai ixꞌuntꞌatꞌit ju Dios.
Para ju chavai ni quinichilh ju Cristo pus maꞌamigoxlacꞌantꞌatꞌit va ixlacaꞌatalh ni lhilacꞌapꞌintꞌatꞌit ju Jesús.
14 Pus yuchi ju Cristo ju xtꞌakꞌa ju atsucunti ju lhikꞌach junta matiꞌ ju lakꞌaiti.
Yuchi ju va lakatam quintanavin ju quijnan ju israelitanin icjuntau chai ju uxijnan ju jantu israelitanin untꞌatꞌit.
Chai yuchi ju makꞌosulh ju anuꞌ ju quilhmaktꞌui xaquintanavitan.
15 Acsni quinichilh ju ani ju Cristo pus mamixilh ju laxcaiti ju ixꞌalin sia lhiquijnanꞌan va ixlacata ju lhamapꞌaksin junta ixnajun tuchich ju lai navican chai ta yu canavicalh.
Chai ju chunch va lakatam quintanavin ju quijnan ju israelitanin icjuntau chai ju uxijnan ju jantu israelitanin untꞌatꞌit.
Va lakatam juntau ni quintaxtaknikꞌojun ju sastꞌi quiꞌatsucuntiꞌan laꞌixmacni ju yuchi.
Ju chunch matiꞌ ju laxcaiti.
16 Chai ni quinichilh ju Cristo pus ju chunch apunavichokolh ixꞌamigojni ju Dios ju quintꞌaꞌisraelitanin chai ju jantu israelitanin.
Chai vachuꞌ pumamixikꞌo ju laxcaiti ju ixꞌalin sia quijnanꞌan.
Chai ju chavai laktsꞌincantauch tachi ju va lakatam lacatuna ju quintꞌiyunꞌan.
17 Pus ju Cristo quilachilh chai quintajunin ni matanꞌula ixꞌalhunut ju Dios.
Quintajunin ju israelitanin icjuntau ju vanin xacvilau laꞌixmacni Dios.
Vachuꞌ tajunin ju uxijnan ju jantu israelitanin untꞌatꞌit ju na makat ixtꞌonatꞌit laꞌixmacni Dios.
18 Pus laꞌixmacni Cristo ju uxijnan ju jantu israelitanin untꞌatꞌit chai ju quijnan ju israelitanin icjuntau laich xakꞌalayau ju Dios tachi ju quimpaiꞌan.
Chai vana yuꞌ ju Spiritu Santu ju taꞌaktaijuyan ju uxijnan tachi ju quintaꞌaktaijuyan ju quijnan.
19 Ju makꞌanch jantu makyuꞌunch ixꞌuntꞌatꞌit ju isꞌaskꞌatꞌan Dios.
Para ju chavai lhilakꞌamispꞌacꞌanatꞌit ni isꞌaskꞌatꞌan untꞌatꞌit.
20 Chai tachi ju va ixchakaꞌ Dios juntau.
Ju uxijnan chunch untꞌatꞌit tachi ju xatantuꞌ chakaꞌ.
Chai ju ixtamalakachan Dios chai ju lapanacni ju tanajun ixchivinti Dios chunch tajunita tachi ju xatantun ni yuꞌunch ju tajunin ixchivinti Dios.
Chai ju Cristo Jesús chunch junita tachi ju tuꞌuꞌ chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta.
21 Chai va ixlacata ni lhilacꞌapꞌinatꞌit ju Cristo pus chunch untꞌatꞌit tachi ju tuꞌuꞌ chakaꞌ ju sok yocanta.
Chai ni palai amispꞌayaꞌitꞌit ju Dios pus chunch ju aꞌunaꞌitꞌit tachi ju kꞌai ixpujitat Dios ni vasalh tꞌajun ju yuchi lamiꞌalhunutꞌan.
22 Chai ixlacata ni lhilacꞌapꞌinatꞌit ju Cristo vachuꞌ ju uxijnan pus ju Dios quintanavitan tachi lakatam chakaꞌ junta tꞌajun ju yuchi.
Pus ixchakaꞌ Dios juntau ni tꞌajun laquiꞌalhunutꞌan ju Spiritu Santu.