Ju Pablo amalani ju jantu israelitanin
3
Ju quitꞌin icPablo.
Ixlapanac ju Jesucristo.
Chai tachꞌin icjunita ju chavai va ixlacaꞌatalh ni iclajuniu ni laich lhilacꞌapꞌinatꞌit ju Cristo ju uxijnan ju jantu israelitanin untꞌatꞌit.
2 Ca aktsꞌiya kꞌasmatꞌatꞌit ni quinavinita lamapainin ju Dios chai quixtaknilh ju lhichꞌalhcat ni laich aclajunau ni laich atꞌakꞌalhtꞌaxtꞌuyaꞌitꞌit ni alhilacꞌapꞌinaꞌitꞌit ju Jesús.
3 Chai cꞌatsꞌayatꞌit ni quintalacasunilh ju Cristo chai quimamachakxanilh ju anuꞌ chivinti ixlacata ju yuchi ju jantu lai ixmachakxacanta ju makꞌanchich.
Pus iclaꞌatsꞌoknunitau lacatsꞌunin ixlacata ju yuchi.
4 Chai acsni alaktsꞌinaꞌitꞌit ju tuchi iclaꞌatsꞌoknunitau pus amachꞌakxayaꞌitꞌit tuchi iccꞌatsai ixlacata ju Cristo ju jantu iscꞌatsacanta ju makꞌanchich.
5 Pus jantu ixꞌamamachakxanicanta ju lapanacni ju ixtatꞌajun makꞌanchich.
Para ju chavai yuchi ju Spiritu Santu ju amavasalani ju ixtamalakachan ju Cristo chai ju lapanacni ju tanajun ixchivinti.
6 Pus ju anuꞌ ju jantu lai ixmachakxacan ju makꞌanchich yuchach ju ani.
Ju uxijnan ju jantu israelitanin untꞌatꞌit chai ju quijnan ju israelitanin icjuntau va kꞌaixtam caꞌamaklhtayananau chux ju makꞌalit ju xtꞌakꞌa ju Dios.
Chai tachi chun ju quijnanꞌan si ixlacatuna Cristo juntau.
Chai tachi chun ju chivinti ju quintatꞌatakꞌoxitan ju Dios ju quijnan ju israelitanin icjuntau vachuꞌ milacataꞌan ju uxijnan ju jantu israelitanin untꞌatꞌit acsni kꞌasmatꞌatꞌit ju ixchivinti Dios chai lhilacꞌapꞌinatꞌit ju Cristo.
7 Dios ju quisacxtulh ni ixlapanac acva ni laich acꞌajunilh ju lapanacni ju ani chivinti.
Chai quinavinilh lamapainin chai quixtaknilh ixtachaput ni laich acnavi.
8 Pus ju Dios quinavinilh lamapainin ni laich iclajunau ju uxijnan ju jantu israelitanin untꞌatꞌit ju ixchivinti junta najun ni slivasalh na kꞌai ju makꞌalit ju alin laꞌixmacni ju Cristo.
Chai quinavinilh ju ani lamapainin mas jantu tuꞌuꞌ quintapalhni iclaktsꞌinchokocan quiꞌakstu ni na xacnavi ju alactuꞌunti ju pꞌulhnan.
Palai jantu tuꞌuꞌ quintapalhni ju quitꞌin.
Palai xalackꞌajin tajunita tachi chun ju aliꞌin ju talhilacaꞌanta ju Cristo.
9 Para quinavinilh ju Dios lamapainin ni laich acꞌamavasalanilh va tichi cavalhch tuchi ju nomputun ju chivinti ixlacata ju Cristo ju jantu ixmachakxacanta ju makꞌanchich.
Pus ju makꞌanchich ju Dios jantu xamatiꞌ ixmavasalanita ju anuꞌ chivinti.
Yuchi ju Dios ju navikꞌota tachi chun ju taxtokni.
10 Jantu ixmavasalata ju makꞌanchich ni laich catacꞌatsayach ju chavai ju anquilhnin chai ju alin ixtachaputꞌan ju lactꞌiyan ni na tijlhu ju pastꞌacꞌa ju Dios ni canavi.
Catapucꞌatsayaꞌ ni catalaktsꞌinaꞌ tachi chun ju anavinita ju lapanacni ju talhilacaꞌanta ju Cristo.
11 Pus ju Dios aktsꞌiya ispastacta ni chunch cajunaꞌ chai ixnajunta ni laꞌixmacni quiꞌucxtinꞌan Cristo Jesús ju caꞌuctaxtuyaꞌ.
12 Pus va ixlacaꞌatalh ni lhilacaꞌantauch ju Cristo jantu talhananau acsni tꞌachivinau ju Dios chai lai junau va tuchi ixtalakxtuch ju jumputunau.
13 Chai ni vasalh chunch juntau laꞌixmacni Cristo pus iclatapaininiyau ni jantu tam anaꞌuntꞌit va ixlacaꞌatalh ni na icmakꞌalhkꞌajnan va ixlacata ni iclajunau ixchivinti Dios.
Alai acꞌatsꞌatꞌit ni lakꞌayacꞌantꞌatꞌit ni na tuꞌuꞌ talhiulayan ju Dios ni xalacasqꞌuin ni acmamakꞌalhkꞌajnicalh ju milacataꞌan.
Ixꞌamapaininti ju Cristo
14 Acsni icpastꞌacꞌa tuchi navita ju Dios pus ictaꞌaktsokotani ju yuchi ju ixpai ju quiꞌucxtinꞌan Jesucristo junita.
15 Pus ju Dios quimpaiꞌan junita tachi chun ju vilau ju ani lacamunutpaꞌ chai tachi chun ju tavilanancha lactꞌiyan.
16 Pus ju Dios slivasalh ni yuchi ju xakꞌai.
Chai yuchi iclhitapainini ni tachapun catanaviniyan ju miꞌalhunutꞌan.
Chai yuchi ju Spiritu Santu ju cataꞌaktaijuyan ni chunch aꞌunaꞌitꞌit.
17 Iclhitapainini ni catsucuyach ju Cristo lamiꞌalhunutꞌan ni lhilacꞌapꞌintꞌatꞌit ju yuchi.
Chai icsqꞌuini ni caꞌalilh ju miꞌamapainintiꞌan ju jantu tuꞌuꞌ lai catamacꞌapꞌanin.
18 Ju chunch ju uxijnan chai tachi chun ju aliꞌin ju talhilacaꞌanta ju Cristo laich amachꞌakxayaꞌitꞌit ta anchach ju ti chaꞌankꞌota ju ixꞌamapaininti Dios.
19 Iclacasqꞌuin ni amachꞌakxatꞌit ni slivasalh na tamapainiyan ju Cristo mas jantu lai tavanan amachꞌakxayaꞌitꞌit tas va ti chaꞌankꞌotach ju ixꞌamapaininti.
Ju chunch ju Dios cataxtaknikꞌoyan tachi chun ju kꞌox ju axtaknican ju talhilacaꞌanta ju Jesús.
20 Ju Dios na tachapun.
Chai pucꞌatsayau ni na alin ju ixtachaput acsni pastꞌacꞌau tachi chun ju quintaꞌulhtutan laꞌixmacni Cristo.
Chai yuchi lhicꞌatsayau ni Dios palai lai kꞌox quintanaviyan.
Jantu va chun ju quintaxtakniyan tachi ju sqꞌuiniyau u tachi ju pastꞌacꞌau.
21 Chach talakꞌaya ju Dios tachi chun ju talhilacaꞌanta ju Jesús.
Chach lakꞌayacalh tus va tavananch cava.
Vasalh iclacasqꞌuin ni chunch ju canavicalh.