Va lakatam juntau ni si pacxankꞌotau ju Spiritu Santu
4
Ju quitꞌin tachꞌin icjunita ni iclhilacaꞌanta ju quiꞌucxtinꞌan Jesús.
Pus iclatapaininiyau ni chunch ju atsꞌucꞌutꞌit tachi ju lhijunch ni catatsuculh ju asacxtuta ju Dios.
Pus vachuꞌ tasacxtutan ju Dios ju uxijnan.
2 Jantu alhitꞌakꞌayatꞌit tuꞌuꞌ.
Alamalacꞌasunitꞌit ju milhikꞌox lapanacꞌan.
Alachꞌixnitꞌit ju macxcai va ixlacaꞌatalh ni lamapꞌainiyatꞌit.
3 Slivasalh ixlhichux miꞌalhunutꞌan anavitꞌit talacmaskꞌatꞌin ta yu laich va chꞌanxtamch apꞌulalhipꞌitꞌit chai jantu alaclasatꞌit.
Ju chunch vasalh va lakatamch aꞌunaꞌitꞌit laꞌixtachaput ju Spiritu Santu.
4 Ju quijnanꞌan ju lhilacaꞌantauch ju Cristo tachi ju va lakatam lacatuna juntau.
Chai va lakatam ju Spiritu Santu.
Chai ni quintasacxtutan ju Dios pus va lakatam taxtokni ju pacxanau ni aquintaxtakniyan.
Chai cꞌatsayau ni vasalh caꞌamaklhtayananau ju anuꞌ ju quintakꞌalhtasunitan ju Dios.
5 Va pumatam ju quiꞌucxtinꞌan.
Va pumatam ju lhilacaꞌantauch.
Chai va lakatam amakpaxanti ju alin.
6 Va pumatam ju Dios.
Yuchi ju quimpaiꞌan quilhichuxꞌan.
Yuchi ju lhinonkꞌojui tachi chun ju taxtokni.
Chai yuchi ju chꞌalhcatnan quilacataꞌan ju lhilacaꞌantauch ju yuchi.
Chai yuchi ju tꞌajun laquiꞌalhunutꞌan.
7 Ju pumatamin quijnanꞌan quintaxtaknitan tuchi lhichꞌalhcat ju kꞌoxich lhiulai ju yuchi.
8 Pus yuchi lhichivincanta ju Cristo laꞌixchivinti Dios ju tsꞌokcanta junta chani najun:
Acsni anchokolh ju lactꞌiyan alhiꞌalh ju tachi va tachꞌinin ixtajunita.
Chai axtaknilh lhakꞌailaktsꞌin ju lapanacni ju ani lacamunutpaꞌ.
Chunch ju najun laꞌixchivinti Dios ju tsꞌokcanta.
9 Pus junta najun ni anchokolh ju lactꞌiyan ca aktsꞌiya nomputun ni pꞌulhnan quilachilh ju ani lacatꞌun.
Chai quinavichilh ju lhichꞌalhcat ju ilhcanicanta.
10 Chai ju anuꞌ ju quilachilh ju ani lacatꞌun vana yuchi ju anchokolh ju lactꞌiyan.
Chai ju chavai yuchi ju vi mas vanta anchach cava.
11 Chai isꞌakstu ju Cristo ju quintaxtaknitan ju ixlhichꞌalhcat ju pumatamin pumatamin.
Ju aliꞌin axtaknican ju lhichꞌalhcat ni ixtamalakachan catajunaꞌ.
Ju aliꞌin axtaknican ni catanonaꞌ ixchivinti Dios.
Ju aliꞌin axtaknican ni catamavasalayaꞌ ixchivinti Dios ju tsꞌokcanta.
Chai ju aliꞌin axtaknican ni catalhinaulh lacatalhavat ju talhilacaꞌanta ju Cristo.
Chai ju aliꞌin axtaknican ni cataꞌamalaninilh ixchivinti Dios.
12 Chai quintaxtaknin ju ani ju pumatamin ni lai palai canaviyau ju ixlhichꞌalhcat ju Dios.
Ju chunch ju aliꞌin ju talhilacaꞌanta ju Cristo palai pꞌas catalhilacaꞌanaꞌ.
13 Chai ni laich va lakatam cajumvi tachi chun ju quijnanꞌan ju lhilacaꞌanauch ju Jesús chai ni vasalh laich catsucuyau tachi ju kꞌachani ju istsꞌalh Dios yuchi xaquintalhixtakniyan ju ani.
Chai ni chunch catsucuyau pus cachaꞌanaꞌ ju quiꞌatalacpastꞌacꞌatꞌan tachi ixꞌatalacpastꞌacꞌat tam lapanac ju vasalh tsucui tachi ju kꞌachani ju Cristo.
Chai astan cachinaꞌ ju avilhchan ni chunch cajunau tachi ju junita ju Cristo.
14 Pus jantu chun calau tachi ju tam askꞌatꞌa.
Pantsꞌiquis kꞌachaniyau ju ani atalaninti.
Chai apantsꞌiquis atumpa ju kꞌachanipalau.
Chai lacaꞌiniyau ju ixꞌaꞌokxchokꞌonti ju lapanacni ju na lai tapuꞌokxchokꞌonun ju jantu stavasalanti.
15 Alai va tachi canonau ju stavasalanti ni lamapainiyau.
Ju chunch palai chunch cajunau tachi ju Cristo ju saꞌaktsulh junita tachi chun ju talhilacaꞌanta ju yuchi.
16 Tachi ju quilacatunaꞌan mas na tijlhu alin ju ixtaxtokni para ni alin ju quiꞌasivicꞌan pus va lakatam junita.
Chai ju lakatamin taxtokni aktaijui ixtꞌataxtokni tachi ju xtakni ju ixtachaput ju quiꞌaktsulhꞌan.
Pus vana va chun ju quijnanꞌan ju ixlacatuna Cristo juntau.
Acsni calhilaksiyau ju Cristo ju saꞌaktsulh junita pus va lakatam cajunau chai calaꞌaktaijuyau lacatachaput ju quintaxtakniyan pumatamin ju Cristo.
Chai calamapainiyau chai palai pꞌas calhilacaꞌanau ju yuchi.
Ju sastꞌi atsucunti laꞌixmacni Cristo
17 Pus ju ani iclajunau laꞌixtapakaꞌut ju quiꞌucxtinꞌan Jesús.
Jantu vana atsꞌucꞌutꞌit tachi ju aliꞌin ju vachuꞌ jantu israelitanin tajunita ju jantucaꞌ talhilacaꞌanta ju Cristo.
Jantu lhitapalai tachi ju taꞌalacpastacnan ju yuꞌunch.
18 Ju yuꞌunch jantu lai tamachakxai ixtaxtokni Dios.
Jantu tapacxanta ju atsucunti jonkꞌalhita ju xtꞌakꞌa ju Dios ni lana jantu lai tamachakxai va ixlacaꞌatalh ni na va pꞌas ju ixꞌalhunutꞌan.
19 Ju yuꞌunch ni jantu lana lai tamaxanan pus yuchi va lakachapu talhilhitapꞌuxtach isꞌatsucuntiꞌan.
Lana lacalhikꞌach tanavi ju va tuchi alactuꞌunti ju kꞌachani ju ixlacatunaꞌan.
20 Para jantu chun xatamasuniyan ju Cristo ju uxijnan.
21 Pus ju uxijnan aktsꞌiya kꞌasmatꞌatꞌit ixlacata ju Jesús.
Chai malanicꞌantꞌatꞌit ixlacata yuchi.
Chai ju tuchi naulh ju yuchi stavasalanti.
22 Pus amacꞌonkꞌotꞌit ju macxcai tachi ju ixtꞌailhipꞌintꞌatꞌit ju makꞌanch.
Tachi ju ixlayatꞌit acsni tucaꞌ ixlhilacꞌapꞌintꞌatꞌit ju Jesucristo.
Pus ixꞌalilh ju mimakꞌalhkꞌajnatꞌan jonkꞌalhita ni ixtꞌailhipꞌitꞌit ju chunch.
Pus ju alactuꞌunti ju ixnavipꞌutꞌunatꞌit ju acsni va ixtaꞌokxchokꞌoyan.
23 Pus chach lasastꞌikꞌocalh ju miꞌatalacpastꞌacꞌatꞌan.
24 Chai amalacꞌasutꞌit ni vasalh sastꞌi ju miꞌatsucuntiꞌan.
Slivasalh soknicꞌa chai salaka atsꞌucꞌutꞌit tachi ju kꞌachani ju Dios.
25 Chai ni chunch cajunaꞌ ju miꞌatsucuntiꞌan pus tasqꞌuini ni amacꞌaꞌuntꞌit ju taꞌaklhtamat.
Alai va yuchi ju stavasalanti ju alaꞌunitꞌitch ju pumatamin mintꞌalapanacni ni tachi ju va lakatam lacatuna juntau.
26 Acsni tꞌalhkꞌamnatꞌit pus alhistꞌacchꞌokꞌocꞌantꞌit miꞌakstuꞌan ni jantu alactꞌuꞌununtꞌit.
Chai vatsꞌalhti acꞌaptꞌit ni alin ju mintalhkꞌamtiꞌan.
27 Jantu alacꞌasqꞌuinitꞌit ju lhacaticuru ni catamanavinin alactuꞌunti.
28 Ju akꞌalhonaꞌ jantuch vana caꞌakꞌalhaunalh.
Alai va kꞌox lhichꞌalhcat ju canavilh laꞌixmacaꞌ.
Ju chunch laich capacxanaꞌ ju tuchi caxtakniyaꞌ ju tꞌajun makꞌalhkꞌajnaꞌ laꞌixmaktasqꞌuinit.
29 Jantu tuꞌuꞌ macxcai chivinti anaꞌuntꞌit.
Alai va yuchi ju kꞌox chivinti ju anaꞌuntꞌit tachi ju laich apꞌuꞌaktꞌaiꞌuyaꞌitꞌit ju aliꞌin ni laich palai catatsuculh tachi ju kꞌachani ju Dios.
Ju chunch ju Dios caꞌaxtakniyaꞌ ju kꞌox isꞌatsucuntiꞌan ju catakꞌasmatniyanch.
30 Jantu amamakꞌaninitꞌit ju iSpiritu Santu Dios.
Ju uxijnan xtꞌaknicꞌantꞌatꞌit ju yuchi ni alhacꞌatsꞌanantꞌit ni vasalh amalakxtꞌucꞌanaꞌitꞌit acsni cachinaꞌ ju anuꞌ avilhchan.
31 Jantu kꞌai aꞌuntꞌit.
Jantu atꞌalhkꞌamantꞌit.
Jantu alakꞌaꞌitꞌit nin pꞌas alaxakꞌalatꞌit lacatalhkꞌamti.
Jantu alaclaꞌunitꞌit macxcai chivinti.
Amacꞌaꞌuntꞌit tachi chun ju macxcai.
32 Alai alaꞌaktꞌaiꞌutꞌitch.
Pakꞌeunicꞌa aꞌuntꞌit.
Alamacꞌacxanitꞌit ju pumatamin milhiꞌuxijnan tachi ju Dios ni tamacꞌacxanitan ni lhilacꞌapꞌintꞌatꞌit ju Cristo.