Chani catatsucuyaꞌ ju isꞌaskꞌatꞌan Dios
5
Alaktsꞌintꞌaꞌitꞌit ju Dios ni isꞌaskꞌatꞌan untꞌatꞌit chai ju yuchi na tamapainiyan.
2 Alamapꞌainitꞌit tachi ju Cristo ni quintamapaininch chai tamakꞌaxtakchokolh isꞌakstu ju quilacataꞌan.
Ju yuchi valhch tachi ju tuꞌuꞌ atapacxat ju ixtamaknini ju Dios ju makꞌanch chai tachi ju tuꞌuꞌ lhakꞌailaktsꞌin ju na cꞌus acamin ju na kꞌachani ju Dios.
3 Ju chavai ni isꞌaskꞌatꞌan Dios untꞌatꞌit pus chunchach ju atsꞌucꞌutꞌit.
Pus nin lacatsꞌunin jantu catasu lamiꞌatsucuntiꞌan ju ixpuxcajuca ju minavinꞌan.
Nin tuꞌuꞌ atumpa alactuꞌunti ju ixtꞌachunch cava.
Nin yuchi ni alhacchꞌiꞌitꞌit tuꞌuꞌ.
Nin yuchi ni lai alhilhichꞌivincꞌantꞌit ju chunch atsucunti.
4 Vachuꞌ jantu lhijun ni anaꞌuntꞌit ju macxcai chivinti.
Nin yuchi ni lai achꞌivinintꞌit tachi tam xamatiꞌ ju jantu acꞌatsananta.
Nin yuchi ni lai akꞌalhkꞌamanachꞌivin ju tuꞌuꞌ macxcai.
Ju chunch jantu kꞌox.
Alai aꞌunitꞌit lakꞌailaktsꞌiuch ju Dios.
5 Pus ju uxijnan cꞌatsꞌayatꞌit ni laꞌixpuꞌucxtinꞌan Cristo chai Dios jantu tuꞌuꞌ caꞌaxtaknicanaꞌ ju lapanacni ju tatꞌatsucui ju jantu ixꞌamachakaꞌan u ju chakolun ju tatꞌatsucui ju jantu ixpapaꞌan.
Nin yuꞌunch ju tanavi ju tuꞌuꞌ atumpa alactuꞌunti ju ixtꞌachunch cava.
Nin yuꞌunch ju talhacchaꞌan tuꞌuꞌ.
Ju chunch talai pus tachi ju va isdiosꞌan tanavita ju chun alactuꞌunti.
6 Alaccꞌatsꞌanantꞌit.
Jantu xamatiꞌ cataꞌokxchokꞌon lacatuꞌuꞌ chivinti ju jantu slivasalh.
Pus ju Dios amamakꞌalhkꞌajni ju va jantu lai talacaꞌi chai ju tanavi ju alactuꞌunti tachi ju iclajuntau.
7 Pus jantu amaꞌamigoxlatꞌit ju chunch talai.
8 Ju makꞌanch acsni tucaꞌ ixlhilacꞌapꞌintꞌatꞌit ju Cristo pus chunch vachuꞌ ixꞌuntꞌatꞌit tachi ju yuꞌunch ni vachuꞌ tachi ju va istsꞌistacaꞌ ju lamintacꞌatsanꞌan.
Para ju chavai ni lhilacꞌapꞌintꞌatꞌit ju Cristo pus ju yuchi tamalacpucujunitan ju mintacꞌatsanꞌan.
Pus chunch ju atsꞌucꞌutꞌit tachi ju lhijun ni tamalacpucujunitan ju mintacꞌatsanꞌan.
9 Chai ni tamalacpucujutan ju Cristo pus tasqꞌuini ni caꞌalilhch lamiꞌatsucuntiꞌan tachi chun ju kꞌox chai ju soknicꞌa chai ju stavasalanti.
10 Apꞌuxcꞌaꞌutꞌit ta yu laich atsꞌucꞌutꞌit tachi ju kꞌachanich ju quiꞌucxtinꞌan Jesús.
11 Jantu atꞌanavitꞌit tuꞌuꞌ alactuꞌunti ju jantucaꞌ alacmalacpucujunicanta ju ixtacꞌatsanꞌan.
Ju alactuꞌunti jantu tavanan xtꞌakꞌa tuꞌuꞌ ju kꞌox.
Alai aꞌunitꞌit ni jantu kꞌox tachi ju talai.
12 Na lhimaxan ni va aclajuniu tuchi sek tanavi ju yuꞌunch.
13 Pus lacaꞌatuncunuꞌ tasukꞌojui ta yu junita ju tuꞌuꞌ.
Pus ju ixchivinti Dios chunch junita tachi ju atuncunuꞌ ni quintamapulhcuniyan ju laquintacꞌatsanꞌan.
14 Pus yuchi lhinoncan chani:
Alacpꞌucꞌujtꞌitch ju uxijnan ju tachi ju va lhtꞌatꞌayatꞌit lamiꞌatsucuntiꞌan.
Jantu vana chun alatꞌit tachi ju talai ju jantucaꞌ tamispai ju Jesús.
Chai ni chunch ju alatꞌit pus ju Cristo catamalacpucujuniyan ju mintacꞌatsanꞌan.
Chunch ju lhinoncan.
15 Pus ixlhichux miꞌalhunutꞌan anavitꞌit cuenta ta yu atsꞌucꞌuyaꞌitꞌit.
Jantu atsꞌucꞌutꞌit tachi ju va tam tonto.
Alai atsꞌucꞌutꞌit tachi tam xamatiꞌ ju na acꞌatsananta.
16 Chux avilhchan anavitꞌit cuenta ta yu laich apꞌunaviyaꞌitꞌit ju kꞌox.
Chun ju alatꞌit ni na alin ju alactuꞌunti ju chavai.
17 Pus ixlhiyuchach jantu va lhitonto alatꞌit para amachꞌakxatꞌit tuchi ju lacasqꞌuin ju miꞌucxtinꞌan Jesús ni anavitꞌit.
18 Jantu alactꞌakꞌapꞌatꞌit.
Ju chunch laich caꞌalilh lhu ju mintalakꞌalhinꞌan.
Alai chach lhinonkꞌo ju Spiritu Santu lamiꞌatsucuntiꞌan.
19 Chai ni yuchi ju lhinonkꞌojui lamiꞌatsucuntiꞌan pus alaꞌunitꞌit ju milhiꞌuxijnanꞌan ju salmos.
Chai alakꞌayatꞌit ju Dios lacamilhpat.
Chai amilhpꞌanitꞌit ju quiꞌucxtinꞌan Jesús ixlhichux miꞌalhunutꞌan.
20 Chai aktsꞌiya aꞌunitꞌit lakꞌailaktsꞌiuch ju quimpaiꞌan Dios mas va tuchi catamacaminiyan.
Aꞌunitꞌit lakꞌailaktsꞌiuch laꞌixtapakaꞌut ju quiꞌucxtinꞌan Jesucristo.
Ta yu catatsuculh ju papanin chai ju chakolun
21 Ni tꞌalhoniyatꞌit ju Dios pus alaqꞌuiclacꞌaꞌitꞌit ju pumatamin.
22 Ju uxijnan ju icꞌantꞌatꞌit ni qꞌuiclacꞌaꞌiyatꞌit ju quiꞌucxtinꞌan Jesús pus vana va chun aqꞌuiclacꞌaꞌitꞌit ju mimpapaꞌan.
23 Tachi ju tuꞌuꞌ quiꞌaktsulhꞌan ni lhinonkꞌojui laquilacatunaꞌan pus vana va chun ju tam jokꞌat.
Yuchi ju lhinajun laꞌisꞌatsucunti ju ixꞌamachakaꞌ.
Chai vachuꞌ chunch ju Cristo.
Ju yuchi lhinajun laquiꞌatsucuntiꞌan tachi chun ju lhilacaꞌantauch ju yuchi ni tachi ixlacatuna juntau.
Chai yuchi ju quintamakꞌalhtaxtutan ni jantu catiꞌau junta jonkꞌalhita makꞌalhkꞌajnat.
24 Pus ju quijnanꞌan ju lhilacaꞌantau ju Cristo ni quiclacaꞌiyau ju yuchi pus chunchach vachuꞌ catalalh ju aꞌicantach.
Cataquiclacaꞌilh ju ixpapaꞌan tachi chun ju canonaꞌ.
25 Chai ju uxijnan ju xapapanin untꞌatꞌit amapꞌainitꞌit ju miꞌamachakaꞌan tachi ju Cristo ni quintamapainiyan tachi chun ju lhilacaꞌantauch ju yuchi.
Chai tamakꞌaxtakchokolh isꞌakstu ju quilacataꞌan.
26 Chai yuchi lhitamakꞌaxtaklh ni laich ixꞌanuꞌ cajumvi ju quijnanꞌan ju lhilacaꞌantauch ju yuchi.
Chai ju yuchi quintachakꞌanitan ju quiꞌalhunutꞌan acsni lacaꞌinitau ju ixchivinti.
Chai acsni akpaxau pus va pumalacasuputunau ni chunch ju quintaꞌulhtutan ju Cristo.
27 Ju chunch ju quijnanꞌan ju lhilacaꞌantauch ju yuchi pus slivasalh kꞌox aquintalhiulayan.
Chai aquintalaktsꞌinan ni jantu tuꞌuꞌ ju va lhquiliqui cava ju laquiꞌatsucuntiꞌan.
Chai jantu jintaꞌ ju va catakꞌalhi u tuꞌuꞌ atumpa ju ixtꞌachunch cava.
Alai salaka aquintalaktsꞌinan chai matich ju quintalakꞌalhinꞌan laꞌixmacni ju yuchi.
28 Pus ju xapapanin catamapaini ju ixꞌamachakaꞌan tachi ju va jun ixlacatunaꞌan isꞌakstuꞌan.
Pus ju mapaini ixꞌamachakaꞌ isꞌakstu ju mapainichokocan.
29 Jantu xamatiꞌ ju va jantu kꞌox calhiulachokolh ixlacatuna.
Alai kꞌoxich mavai chai kꞌoxich lhistꞌacꞌa.
Pus ju Cristo vana va chun ju quintanaviyan ju quijnanꞌan ju lhilacaꞌantauch ju yuchi.
30 Chunch quintaꞌulhtuyan ni tachi ixpuchꞌalhcatna ixlacatuna juntau.
31 Pus tsꞌokcanta laꞌixchivinti Dios junta najun ni calhimaconaꞌ ju ixpai chai ixnati tam tsꞌalh chai catꞌatalakxtꞌokꞌach ju ixꞌamachakach chai ju ixtꞌiyunꞌan va lakatam acanit catajunaꞌ.
32 Iclajunau chunch ni tsꞌa ma palai lai amachꞌakxayaꞌitꞌit ta yu junita ju quiꞌatsucuntiꞌan laꞌixmacni Cristo tachi chun ju quijnanꞌan ju lhilacaꞌantauch ju yuchi.
Ju ani chivinti aktsꞌiya na xcai machakxacan.
33 Para vachuꞌ chani iclajumputunau.
Ju pumatamin ju uxijnan amapꞌainitꞌit ju miꞌamachakaꞌan tachi ju va jun miꞌakstuꞌan ju mapꞌainichꞌokꞌocꞌanatꞌit.
Chai ju chakolun cataquiclacaꞌi ju ixpapaꞌan.