Tasqꞌuini ni aktsꞌiya calhikꞌachanau ju quiꞌucxtinꞌan Jesús
4
Pus ni chunch cajunaꞌ ju quiꞌatsucuntiꞌan astan yuchi iclalhijunau ni va tachi alhilacꞌapꞌitꞌit ju Jesucristo.
Pus ju uxijnan slivasalh tuꞌuꞌ iclalhiulayau chai na iclalaktsꞌimputunauch.
Na iclalhikꞌachanau chai tachi ju va lhakꞌailaktsꞌin ju xaqꞌuixtakni ju Dios ni laich xalhilacꞌapꞌinatꞌit ju Cristo ju uxijnan.
2 Ictapainini ju Evodia chai ju Síntique ni va lakatamch catanavilh ixꞌatalacpastꞌacꞌatꞌan tachi ju lhijunch ni ixtꞌiyunꞌan talhilacaꞌanta ju Jesucristo.
3 Chai ictapaininiyan ju uxintꞌi ju vasalh quintꞌachꞌalhcatnaꞌ unitꞌa.
Ictapaininiyan ni aꞌaktꞌaiꞌutꞌich ju anuch chakolun ni laich va lakatam catava.
Pus ju yuꞌunch quintatꞌachꞌalhcatnanta kꞌaixtam ixnajunca ju chivinti ixlacata ju Cristo.
Vachuꞌ tatꞌachꞌalhcatnanta ju Clemente chai ju aliꞌinch ju quintatꞌachꞌalhcatnanta vachuꞌ ju quitꞌin.
Chai ixtapakaꞌutꞌan ju yuꞌunch si taꞌokslanankꞌojui junta taꞌokslanan ju ixtapakaꞌutꞌan tachi chun ju alin isꞌatsucuntiꞌan ju conkꞌalhiyanta ju lactꞌiyan.
4 Va tachi alhikꞌachꞌantꞌit ju Jesús.
Aktam iclajunchokopalau ni akꞌachꞌantꞌitch.
5 Chach tacꞌatsa tachi chun ju lapanacni ni lackꞌoxin lapanacni untꞌatꞌit.
Apꞌastꞌactꞌit ni va tsꞌalhti caminaꞌ ju quiꞌucxtinꞌan Cristo.
6 Jantu tavanan tuꞌuꞌ alhamakꞌaninintꞌit ju tuchi tapasai lamiꞌatsucuntiꞌan.
Alai aꞌunitꞌit ju Dios mas va tuchi ixtalakxtuch cava.
Atꞌapꞌaininitꞌit chai vachuꞌ aꞌunitꞌit lakꞌailaktsꞌiuch.
7 Chai ju chunch ju Dios catalhistacniyan ju miꞌalhunutꞌan ni jantu calacꞌanaꞌ.
Chai ju chunch slivasalh na kꞌox acꞌatsꞌananaꞌitꞌit.
Pus jantu lai machakxacan tas tucan va ti jonkꞌota ju ixꞌaꞌaktaijunti ju Dios ni lai quintaꞌaktaijuyan ni jantu tavanan calacꞌanaꞌ ju quiꞌalhunutꞌan.
Pus ju Dios ni talhistacniyan ju miꞌalhunutꞌan tachi chun ju uxijnan ju lhilacꞌapꞌintꞌatꞌit ju Cristo Jesús pus jantu na va lhu caꞌalinaꞌ ju miꞌatalacpastꞌacꞌatꞌan.
Va yuchi ju kꞌox ju capastacvi
8 Pus va yuchi ju ani ju iclajumputunau ji quiꞌalakꞌavin.
Pus apꞌastꞌactꞌit tachi chun ju stavasalanti chai tachi chun ju kꞌox chai tachi chun ju soknicꞌa chai tachi chun ju jantu macxcai atalacpastꞌacꞌat chai tachi chun ju cꞌus alhiulacan chai tachi chun ju kꞌox ixlacata ju aliꞌin.
Apꞌastꞌactꞌit tachi chun ju kꞌox alhiulacan chai tachi chun ju lai pulakꞌayacan ju Dios.
9 Pus anavitꞌit ju tuchi iclamasunitauch chai tuchꞌi lanitꞌatꞌit chai tuchi iclajuntau chai tuchꞌi laktsꞌintꞌatꞌit ni icnavich.
Chai ju chunch ju Dios catatꞌatolanch.
Yuchi ju quintalhistacniyan ju quiꞌalhunutꞌan ni jantu calacꞌanaꞌ.
Ju amachakꞌan Filipos taxtaknilh ixlhakꞌailaktsꞌinꞌan ju Pablo
10 Slivasalh na ickꞌachan laꞌixmacni ju quiꞌucxtin Jesús ni quilapastacchokoyauch ju quitꞌin.
Ca aktsꞌiya xaquilapastꞌacꞌauch para tus chavai ju lai xaquilaꞌaktaijuyau.
11 Jantu icpunajun chunch ni va ixꞌalin ju quimaktasqꞌuinit.
Pus ju quitꞌin iclanitach ni laich ackꞌachanach acsni alinch ju quintumin chai acsni matich tuꞌuꞌ.
12 Icmispai ju lhiquilhpatiniꞌ chai icmispai ju lhimakꞌaliꞌ.
Icmispakꞌota mas va ta cava ju quiꞌatsucuntiꞌan.
Icmispata ju avilhchan acsni xaclhilatach.
Chai icmispata ju avilhchan acsni na xacchavanita.
Chai icmispata ju avilhchan acsni ixꞌalin ju quintuꞌuꞌ.
Chai icmispata ju avilhchan acsni na xacmakꞌalhkꞌajnan laquimaktasqꞌuinit.
13 Pus ju quitꞌin sich kꞌox iclhiulai mas va tuchi min laquiꞌatsucunti va ixlacaꞌatalh ni yuchi ju Cristo ju quiꞌaktaijui ni chunch accꞌatsa.
14 Pus mas icmispata chux para na kꞌoxich ju navitꞌatꞌit ni xaquilaꞌaktaijuyau laquimakꞌalhkꞌajnat ju ixꞌalin ju chavai.
15 Chai ju uxijnan ji amachakꞌan Filipos cꞌatsꞌayatꞌit ni jantu xamatiꞌ sia yuꞌunch ju talhilacaꞌanta ju Cristo ju quintaꞌaktaiju lacatumin acsni ictaxtucha lamintꞌunꞌan junta Macedonia juncan chai ictaiꞌulalh ixnajunca ju chivinti ixlacata ju Jesús.
Va uxijnan ju xaquilaꞌaktaijuyau.
16 Chai acsni xacvilhchalhcaꞌ ju lakꞌachakꞌan Tesalónica jantu va paktam ju xaquilalhikꞌailaktsꞌinau tuꞌuꞌ ixlacata ju quimaktasqꞌuinit.
17 Para jantu va yuchi ju iclalhipuxcoyau ni aquilaxtakniyau tuꞌuꞌ.
Alai iclacasqꞌuin ni cataxtakniyan ju Dios palai kꞌox miꞌatsucuntiꞌan ni xtꞌakꞌatꞌit ju milhakꞌailaktsꞌinꞌan.
18 Pus ju chavai alinkꞌojui chux tuchi icmaktasqꞌuini.
Na kꞌox ictꞌajun ju chavai.
Pus va ixlacaꞌatalh ni icꞌamaklhtayanantach ju tuchꞌi malhipꞌinitꞌit ju Epafrodito acsni malakꞌachꞌatꞌit pus lana jantu tuꞌuꞌ icmaktasqꞌuini aliꞌ.
Ju milhakꞌailaktsꞌinꞌan ju xaquilaxtakniyau ju quitꞌin tachi ju va jun Dios ju xalhikꞌailaktsꞌinatꞌit.
Chai ju yuchi slivasalh na kꞌoxich lhiulai.
19 Chai yuchi ju quiDios ju cataxtakniyan tachi chun ju makꞌancꞌacxatꞌit.
Slivasalh na kꞌox ju cataxtakniyan ni na lhu alin ju kꞌox laꞌixmacni ju Cristo Jesús.
20 Chach lakꞌayacalh ju quimpaiꞌan Dios tus va tavananch cava.
Vasalh chunch caꞌulhtucalh.
Ju Pablo amacꞌaminin
21 Amacꞌamitꞌit tachi chun ju yuꞌunch ju talhilacaꞌanta ju Jesucristo ju tavilanancha ju anch.
Chai tachi chun ju quiꞌalakꞌavinꞌan ju quintatꞌavilanch ani tamacꞌamiyan ju uxijnan.
22 Tachi chun ju lapanacni ju amachakꞌan ani ju talhilacaꞌanta ju Cristo tamacꞌamiyan.
Chai ju palai taꞌapastacnan yuꞌunch ju tachꞌalhcatnan laꞌixchakaꞌ ju kꞌai ucxtin César.
23 Ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan.