Saccan ju tumin
9
Jantu tasqꞌuini ni aclajunchokoyau tuꞌuꞌ ixlacata ju tumin ju capuꞌaktaijucanaꞌ ju quilhpatinin ju talhilacaꞌanta ju Cristo ju amachakꞌan Jerusalén.
2 Pus ju quitꞌin iccꞌatsai ni ixlhichux ju miꞌalhunutꞌan ju xtꞌakpꞌutꞌunatꞌit ju tumin.
Chai icꞌalacjunita ju amachakꞌan Macedonia ni cꞌatach ju ixtꞌakpꞌutꞌunatꞌit ju uxijnan ju amachakꞌan xalacatꞌun Acaya untꞌatꞌit.
Chai ni ixlhichux ju miꞌalhunutꞌan ju ixtꞌakpꞌutꞌunatꞌit pus na lhu ju talaktsꞌintan chai vachuꞌ tanaulh ni cataxtꞌakꞌaꞌ.
3 Para ixlaquilhtu icꞌamalakachanitachan ju quiꞌalakꞌavin ni laich alakꞌasiꞌulayaꞌitꞌit ju tumin.
Ju chunch caꞌuctaxtuyaꞌ tuchi icꞌajuni ju aliꞌin ni icꞌajuni ni lakꞌasiꞌulatꞌatꞌit ju tumin.
4 Pus jantu xcai ni aquintatꞌaꞌancha ju amachakꞌan Macedonia.
Chai jantu xcai ni catalhitajun ni jantu lakꞌasiꞌulatꞌatꞌit ju milhakꞌailaktsꞌinꞌan.
Pus ju chunch na aquilamamaxaniu ni icꞌajunita ju lapanacni ni chunchach ju aꞌulhtꞌuyaꞌitꞌit.
Va icnajun ni aquilamamaxaniu ni va jantu icnomputun ni vachuꞌ ju uxijnan amaxananaꞌitꞌit.
5 Pus ni jantu iclacasqꞌuin ni xamatiꞌ camamaxanicalh yuchi iclhiꞌatapaininilh ju quiꞌalakꞌavinꞌan ni pꞌulhnan catalakchaꞌantachan ju uxijnan.
Astanch aclalakꞌanchau ju quitꞌin.
Ju chunch ju yuꞌunch cataꞌaktaijuyan ni laich alakꞌasiꞌulayaꞌitꞌit ju milhakꞌailaktsꞌinꞌan ju nontꞌatꞌit ni xtꞌakpꞌutꞌunatꞌit.
Chai ju chunch catasuyach ni jantu va lacatapꞌastu ju xtꞌakꞌatꞌit.
Para laꞌixlhichux ju miꞌalhunutꞌan ju xtꞌakꞌatꞌit.
6 Para iclajumputunau ju ani.
Ju tam lapanac ju va lacatsꞌunin chꞌan ju xatꞌin pus va lacatsꞌunin ju makꞌaixtꞌokꞌa ju xatocꞌat ju ixꞌachꞌananti.
Chai tam lapanac ju na lhu achꞌananan pus na lhu makꞌaixtꞌokꞌa ju xatocꞌat ju ixꞌachꞌananti.
Pus vana va chun laquiꞌatsucuntiꞌan.
Ju tam lapanac ni va lacatsꞌunin xtꞌakꞌa ju ixtumin pus ju Dios va lacatsꞌunin caxtakniyaꞌ ju ixkꞌachat.
Para ju lapanac ju na lhu xtꞌakꞌa ju ixtumin pus ju Dios na lhu caxtakniyaꞌ ju ixkꞌachat.
7 Pus ju pumatamin ju uxijnan chach xtaklh tachi ju kꞌoxich lhiulai laꞌixꞌalhunut.
Jantu va lacaꞌamakꞌanit.
Nin yuchi ni tachi ju va lacatapꞌastu ju caxtaklh.
Ju Dios mapaini ju lapanac ju laꞌixꞌalhunut xtꞌakꞌa ju tuꞌuꞌ.
8 Ju Dios na tachapun.
Chai ju yuchi lai catanaviniyan lhu lamapainin.
Ju chunch aktsꞌiya apꞌacxanaꞌitꞌit tachi chun ju taxtokni ju maktasqꞌuiniyatꞌit.
Chai vachuꞌ lhu caꞌalinaꞌ ju lai apꞌunaviyaꞌitꞌit tachi chun ju kꞌox tachi acsni apꞌunaviniyaꞌitꞌit lamapainin ju alin ixmaktasqꞌuinitꞌan.
9 Pus ju miꞌatsucuntiꞌan chunch cajunaꞌ tachi isꞌatsucunti ju lapanac ju lhichivincanta laꞌixchivinti Dios junta tsꞌokcanta junta chani najun:
Ju yuchi ma na lhu xaꞌaꞌaktaijui ju quilhpatinin.
Chai ju tuchi kꞌox ju xanavi ma pastackꞌalhican.
Chunch najun laꞌixchivinti Dios junta tsꞌokcanta.
10 Pus Dios ju xtakni ju xatꞌin ju achꞌananaꞌ.
Chai quintaxtakniyan ju xkapavati ju uyau.
Chai yuchach ju cataxtakniyan chux tachi ju maktasqꞌuiniyatꞌit chai cataxtakniyan aliꞌ ni laich aꞌaktꞌaiꞌuyaꞌitꞌit ju aliꞌin ju alin ixmaktasqꞌuinitꞌan.
Ju chunch na lhu laich anaviyaꞌitꞌit ju kꞌox.
11 Chai ju Dios yuchi catalhixtakniyan ju mimakꞌalitꞌan ni laich apꞌuꞌaktꞌaiꞌuyaꞌitꞌit ju aliꞌin.
Chai ni lhu ju aquilaxtakniyau ju mintuminꞌan ixlacata ju quilhpatinin pus na pumalhu catajunaꞌ ju Dios lakꞌailaktsꞌiuch.
12 Chai acsni axtꞌakꞌaꞌitꞌit ju milhakꞌailaktsꞌinꞌan jantu va yuchi ni lai amakꞌosuniyaꞌitꞌit ju ixmaktasqꞌuinitꞌan ju vachuꞌ talhilacaꞌanta ju Cristo para vachuꞌ ixlacata yuchi na lhu catajunaꞌ lakꞌailaktsꞌiuch ju Dios.
13 Chai ni axtꞌakniyaꞌitꞌit ju quilhpatinin amachakꞌan Jerusalén ju milhakꞌailaktsꞌinꞌan pus ju yuꞌunch catalakꞌayayaꞌ ju Dios ni putasui ni vasalh lacꞌaꞌiniyatꞌit ju ixchivinti Cristo tachi ju nonatꞌit.
Vachuꞌ catalakꞌayayaꞌ ju Dios ni lhu xaꞌaktꞌaiꞌuyatꞌit ju yuꞌunch chai tachi chun ju aliꞌin ju vachuꞌ talhilacaꞌanta ju Jesús.
14 Chai ju yuꞌunch catatapaininiyaꞌ ju Dios ju milacataꞌan.
Chai vachuꞌ na catamapainiyan ju uxijnan ni na kꞌai amapaininti ju tamanaviniyan ju Dios.
15 Pus vasalh chunch.
Para jantu tuꞌuꞌ ixtꞌachunch cava tachi ju anuꞌ lamapainin ju quintanavinitan ju Dios acsni makꞌaxtaklh ju Jesús ju quilacataꞌan.
Cajuniu lakꞌailaktsꞌiuch ju yuchi.