Alin ixtachaput ju Pablo
10
Ju quitꞌin icPablo chai iclatapaininiyau.
Pus ju Cristo jantu jeks ixꞌui chai kꞌox lapanac ixjunita.
Chai vachuꞌ chunch icjumputun ju quitꞌin.
Para ju aliꞌin lamilhiꞌuxijnan tanajun ni ma na ictalhanan acsni iclatꞌavilau.
Para ju laquiꞌalhiqui ju iclaꞌatsꞌoknunitau ma na icjokꞌat.
2 Iclatapaininiyau ni kꞌox atsꞌucꞌutꞌit ni jantu catasqꞌuiniyaꞌ ni aclatalacasuniyau tachi ju na va icjokꞌat acsni aclalaktsꞌinchokoyau.
Alin ju quintachaput ni laich acꞌatalacasuniyaꞌ ni na icjokꞌat ju yuꞌunch ju tanajun ni va quinkꞌachat quiꞌakstu ju icnavi.
3 Pus vasalh va lapanacni icjuntau para jantu iclasayau tachi ju va lhilapanac.
4 Ju icpulasayau jantiyuꞌ tachi ju tapulasai ju va lapanacni.
Icpulasayau ju tachaput ju quintaxtakniyan ju Dios.
Chai ju chunch lai tꞌalalhajayau tachi chun ju tasastꞌucꞌa ixchivinti Dios.
5 Ju lapanacni ju jantu sok taꞌalacpastacnan pus ju quitꞌin lai icꞌamasuni ni jantu soknicꞌa ju chunch.
Chai ju aliꞌin sia yuꞌunch catalacaꞌiyach ixchivinti Dios.
Chai alin lapanacni ju talhilaksi ju tuꞌuꞌ ju alin laꞌisꞌatsucuntiꞌan chai ju yuchi va taꞌasastucnun ni jantu talhilacaꞌamputun ju Dios.
Pus ju quitꞌin lai icꞌamasuni ni jantu kꞌox ju chunch.
Chai ju aliꞌin sia yuꞌunch catalacaꞌiyaꞌ ixchivinti Dios.
Pus laꞌixtachaput Dios icꞌamakꞌasmatni ju aliꞌin ixchivinti Cristo chai taquiclacaꞌi ju yuchi.
6 Icnajun ni acmamakꞌalhkꞌajniyaꞌ va tichi chavaich ju jantu lai lacaꞌi.
Va yuchi ni cꞌacxach ni kꞌoxich aquilaquiclacaꞌiu ju uxijnan.
7 Alacpꞌastꞌacnantꞌit.
Ja va yuchi ju naviyatꞌit cuenta tachi ju va anicꞌa tatalacasuniyan ju lapanacni.
Pus ni xamatiꞌ najun ni ixꞌanuch ju Cristo junita pus chach pastacchokolh isꞌakstu.
Chach cꞌatsa ni vachuꞌ ixꞌanuꞌ Cristo icjunita tachi ju yuchi ni ixꞌanuꞌ Cristo junita.
8 Ju quitꞌin jantu actimaxanalh mas palai aclajunau ixlacata ju tachaput ju quixtaknita ju quiꞌucxtin Jesús.
Para jantiyuꞌ ju xaquilhixtakni ju quintachaput ni va aclalakꞌalhiniyau ju miꞌatsucuntiꞌan.
Alai yuchi ni aclaꞌaktaijuyau ni laich palai alhilacꞌapꞌinaꞌitꞌit ju yuchi.
9 Aktsꞌiya alin ju quintachaput.
Para jantu va yuchi tachi ju tanajun ni ma va anicꞌa iclamakꞌesvayauch ju laquiꞌalhiqui ju iclaꞌatsꞌoknunitauch.
10 Ju yuꞌunch tanajun ni ma na tsꞌinqꞌui ju quinchivinti ju icꞌatsꞌoknun chai ma na amakꞌesvanan.
Para acsni anch iclatꞌavilau ma tachi ju va jantu tuꞌuꞌ quintapalhni iclamalacasuniyau chai ma tachi ju va matich ju quintachaput.
11 Pus chach tacꞌatsa ju yuꞌunch ju chunch tanajun ni aclamuctaxtunikꞌoyau chux tachi ju iclajuntau laquiꞌatsꞌoknut.
Pus tuchi xaclajunau acsni jantu anch xaclatꞌavilau pus acnaviyaꞌ acsni tavanan aclalakꞌantachauch.
12 Ju quijnan jantu lai actinaju ni na lackꞌoxin icjuntau tachi ju yuꞌunch ni sala tanajun ni na lackꞌoxin lapanacni tajunita.
Para va lhitonto tachi ju talai ni va tanajun ni va yuꞌunch ju lackꞌoxin lapanacni tajunita chai tuchi tanavi ju yuꞌunch ma va yuchi ju soknicꞌa.
Jantu tuꞌuꞌ talhiulai tuchi najun ju Dios.
13 Ju quijnan jantu va kꞌaya iclhitakꞌayayau ju tuꞌuꞌ lhichꞌalhcat ju jantu icnavitau.
Va yuchi ju aclhitakꞌayayau ju icnavitau lacalhichꞌalhcat ju quintaxtaknitan ju Dios.
Chai icquilachau junta vilhchitꞌit ju uxijnan ni chunch ju xalacasqꞌuin ju Dios.
14 Jantu va kꞌaya icquilachau junta vilhchitꞌit tachi ju va jantuch quintajuntan ju Dios ni anch acchꞌalhcatnanchau.
Pus acsni lacatam lacatam xacꞌantꞌonau nonin ixchivinti Dios pus quitꞌin ju pꞌulhnan xaclajunau ju uxijnan ixchivinti Dios junta vilhchitꞌit.
15 Chai jantu iclhitakꞌayayau ju lhichꞌalhcat ju akꞌantam navita ni acnajuch ni quijnan ju icnavitauch.
Para chani ju icpastꞌacꞌau.
Acsni palai alhilacꞌapꞌinaꞌitꞌit ju Cristo pus laich aquilaꞌaktaijuyau ni laich acꞌanau alacatam para vana va anch junta aquintamalakachayan ju Dios.
16 Icꞌamputunau palai lhiꞌavinti junta vilatꞌit ni laich acꞌajuniu ju lapanacni ju amachakꞌan anch ju chivinti ixlacata ju Cristo.
Jantu icꞌamputunau nonin ixchivinti Dios junta tatꞌajun amalaninin ju aliꞌin chai astan acnaju ni quijnanch ju xacꞌamalanikꞌoyau chai na kꞌaich aclhicꞌatsau.
17 Ni xamatiꞌ lhitakꞌayaputun tuꞌuꞌ jantu calhitakꞌayalh tuchi ju navita.
Alai calakꞌaya ju Dios.
Calhilakꞌaya ju tuchi navita ju yuchi.
18 Pus ju va lakꞌayachokocan isꞌakstu jantu nomputun ni vasalh tuꞌuꞌ xanavi.
Para acsni canonaꞌ ju Dios ni kꞌox ju xanavi tam xamatiꞌ pus cꞌatsacan ni vasalh kꞌox.