Na lhu taxtaknilh ju quilhpatinin
8
Pus ji quiꞌalakꞌavin iclajumputunau ni va ixlacaꞌatalh ni anavinita lamapainin ju Dios ju yuꞌunch ju talhilacaꞌanta ju Cristo ju tavilanancha ju xalacatꞌun Macedonia yuchi talhinaviputun ju aꞌaktaijunti.
2 Pus ju yuꞌunch mas slivasalh na ixtamakꞌalhkꞌajnan para ju chavai na takꞌachanch.
Chai mas na kꞌox quilhpatinin tajunita para ixlaquilhtu lhu lana ju taxtaklh ju ixtuminꞌan ni taꞌaktaijuputun ju aliꞌin.
3 Pus quitꞌin quiꞌakstu iccꞌatsai ni chunch ju taxtaklich tachi ju laich ixtachaꞌan.
Pus palai lhu taxtaklh va laꞌixꞌalhunutꞌan.
Palai jantu tachi ju xacmachakxai ni laich cataxtaklh.
4 Quintatapaininilh ni laich cataꞌaktaiju ju quilhpatinin amachakꞌan Jerusalén ju vachuꞌ talhilacaꞌanta ju Cristo.
5 Chai jantu va yuchi ni va lacatsꞌunin tumin ju xataxtꞌakꞌa tachi ju xacpastꞌacꞌa ju quitꞌin ni laich catanavi.
Para pꞌulhnan tamakꞌaxtaknikꞌolh ju isꞌatsucuntiꞌan ju quiꞌucxtinꞌan Jesús chai astan quintalhilaksin ju quijnan.
Yuchi ju Dios ju xaꞌamapastꞌacꞌani ni laich chunch catalalh.
6 Pus ju uxijnan cꞌatsꞌayatꞌit ni yuchi ju Tito ju pꞌulhnan tajunan ni casaccanaꞌ ju tumin ju caꞌalhikꞌailaktsꞌincanaꞌ ju quilhpatinin ju amachakꞌan Jerusalén.
Chai yuchi iclhitapaininilh ju yuchi ni catalakꞌanchokoyan ju uxijnan chai camuctaxtulh tuchi xataiꞌulai lamilhiꞌuxijnan.
Ju chunch laich vachuꞌ axtꞌakꞌaꞌitꞌit tachi ju pꞌulhnan ixnonatꞌit.
7 Pus ju uxijnan na kꞌox junita ju miꞌatsucuntiꞌan laꞌixmacni Dios.
Pus ixlhichux ju miꞌalhunutꞌan ju lhilacꞌapꞌinatꞌit ju Jesús.
Chai laich amalanininatꞌit ju ixchivinti Dios.
Chai kꞌox mispꞌayatꞌit ju stavasalanti.
Chai slivasalh navipꞌutꞌunatꞌit tachi ju machꞌakxayatꞌit ni kꞌox calhiula ju Dios.
Chai slivasalh ni quilamapainiu ju quijnan.
Chai ni kꞌox junita ju miꞌatsucuntiꞌan ixlacata tachi chun ju ani taxtokni pus tasqꞌuini ni vachuꞌ kꞌox anaviyaꞌitꞌit ixlacata ju anuꞌ ju alhiꞌaktꞌaiꞌuyaꞌitꞌit ju aliꞌin.
8 Pus ju quitꞌin jantu va tapꞌastu iclajunau ni axtꞌaktꞌit ju anuꞌ lhakꞌailaktsꞌin.
Va iclacasqꞌuin ni acꞌatsꞌayaꞌitꞌit tuchi talalh ju amachakꞌan Macedonia.
Chai ni vachuꞌ axtꞌakꞌaꞌitꞌit ju uxijnan pus caputasuyach ni vasalh amapꞌainininatꞌit.
9 Chai lhijunch ni chunchach ju alatꞌit ni cꞌatsꞌayatꞌit ni slivasalh ni kꞌai ju amapaininti ju quintanavinitan ju quiꞌucxtinꞌan Jesucristo.
Ju yuchi slivasalh makꞌaliꞌ ixjunita ju lactꞌiyan.
Para ju yuchi maconkꞌocha chux ju anuꞌ makꞌalit chai na kꞌox lhiquilhpatiniꞌ quitsucuchilh ju ani lacamunutpaꞌ.
Chai yuchi xalhimaconkꞌoyacha chux ju ixmakꞌalit chai quilhpatiniꞌ va ni laich makꞌalinin aꞌunaꞌitꞌit laꞌixmacni Dios.
10 Pus iclajunau ni aktsꞌiya kꞌox cajunaꞌ ju milacataꞌan ni amuctꞌaxtꞌutꞌit ju xatꞌaiꞌulayatꞌit ju cꞌatach.
Ixnonatꞌit ni isacpꞌutꞌunatꞌit ju tumin ixlacata ju quilhpatinin chai ixlhichux ju miꞌalhunutꞌan ju xatꞌaiꞌulayatꞌit.
11 Pus ju chavai amuctꞌaxtꞌutꞌit.
Ni chunch ju xapꞌastꞌacꞌatꞌit pus axtꞌaktꞌit tachi ju laich chaꞌan.
12 Pus ni vasalh ixlhichux ju quiꞌalhunut ju icxtakputunch ju tuꞌuꞌ mas va lacatsꞌunin ni jantu lhu alin pus ju Dios kꞌox calhiulayaꞌ.
Ju yuchi jantu lhu casqꞌuiniyaꞌ ju jantu lhu alin.
13 Jantu iclajunau ni va alhimakꞌalhkꞌajnantꞌit ju lamimaktasqꞌuinitꞌan ju va ixꞌaꞌaktaijuca ju aliꞌin.
14 Iclacasqꞌuin ni vaklhtam chun aꞌuntꞌit.
Ju chavai ju uxijnan alin ju mintuminꞌan ju lai apꞌuꞌaktꞌaiꞌutꞌit ju alin ixmaktasqꞌuinitꞌan.
Chai astan jantu xcai ni caꞌalilh ju mimaktasqꞌuinitꞌan chai ju acsnich ju yuꞌunch laich cataꞌaktaijuyan ju uxijnan.
Ju chunch vaklhtam chunch aꞌunaꞌitꞌit.
15 Chai ni vaklhtam chun aꞌunaꞌitꞌit pus chunchach vachuꞌ cajunaꞌ ju miꞌatsucuntiꞌan tachi ju isꞌatsucuntiꞌan ju israelitanin acsni tasaclh ju mana.
Pus chani najun laꞌixchivinti Dios junta tsꞌokcanta:
“Ju na lhu saclh ju vaiti jantu tuꞌuꞌ xamaxajniyacha.
Chai ju palai lacatsꞌunin saclh pus jantu tuꞌuꞌ makꞌancꞌacxlh”.
Chunch najun laꞌixchivinti Dios.
Ju Tito chai ju aliꞌin cataꞌanaꞌ maconin ju tumin
16 Pus icjuni lakꞌailaktsꞌiuch ju Dios ni vana va chunch pastꞌacꞌa ju Tito ju milacataꞌan tachi ju quitꞌin.
Pus ju yuchi vachuꞌ lacasqꞌuin ni kꞌox ju atsꞌucꞌuyaꞌitꞌit laꞌixmacni Dios.
17 Chai laꞌisꞌakstu slivasalh na ixꞌamputunacha junta vilhchitꞌit.
Chai acsni icjunilh ni na kꞌox cava ni catalakꞌantachan pus quinquiclacaꞌilh.
18 Chai kꞌaixtam actꞌamalakachayanta apumatam ju quilakꞌauꞌan.
Pus tachi chun ju lapanacni ju talhilacaꞌanta ju Cristo chux tacꞌatsakꞌo ni na lai amalaninin ixchivinti Dios ju yuchi.
19 Chai jantu va yuchi.
Para tachi chun ju talhilacaꞌanta ju Cristo yuꞌunch ju tasacxtulh ju anuꞌ quilakꞌauꞌan ni laich aquintꞌaꞌanaꞌ acsni acꞌanaꞌ axtakniniꞌ ju ani lhakꞌailaktsꞌin ju amachakꞌan Jerusalén.
Chai ni caꞌaktaijuyau ju quilhpatinin pus chux ju lapanacni catanonaꞌ ni vasalh xakꞌai ju quiꞌucxtinꞌan Jesús chai catapucꞌatsayach ni vachuꞌ na aꞌaktaijunumputunau.
20 Pus va iclacasqꞌuin ni camakꞌalh vachuꞌ ju anuꞌ quilakꞌauꞌan acsni acꞌaxtakniyanta ju tumin ju amachakꞌan Jerusalén.
Ju chunch jantu lai xamatiꞌ aquintimucꞌanilh ju quintalakꞌalhin ixlacata ju anuꞌ tumin ni na laklhu.
21 Ju quitꞌin si sok icnaviputun.
Jantu va yuchi ni cacꞌatsayaꞌ ju quiꞌucxtinꞌan Jesús ni sok icnavi para vachuꞌ chunch catacꞌatsa ju quintꞌalapanacni.
22 Vachuꞌ caꞌalactꞌaꞌanaꞌ apumatam ju quilakꞌauꞌan.
Ju quitꞌin na paklhu iclaktsꞌintanuta chai iccꞌatsai ni slivasalh naviniputun ixlhichꞌalhcat ju Dios.
Chai ju chavai ni na talhilaksiyan ni amuctꞌaxtꞌuyaꞌitꞌit pus palai naviputun ju ani lhichꞌalhcat.
23 Ni xamatiꞌ lhasacminin ju Tito laich aꞌunaꞌitꞌit ni yuchi ju quintꞌachꞌalhcatnaꞌ.
Yuchi ju quiꞌaktaijui acsni iclajunau ixchivinti Dios.
Chai ni xamatiꞌ caꞌalhasacmininach ju aliꞌin quilhiꞌalakꞌavinꞌan ju alactꞌaꞌanta ju yuchi pus laich aꞌunaꞌitꞌit ni yuꞌunch ju talhilacaꞌanta Jesús ju taꞌasacxtulh.
Chai ixlacaꞌatalh ni na salaka ju isꞌatsucuntiꞌan ju yuꞌunch pus ju lapanacni talakꞌayai ju Cristo.
24 Pus ju chavai lhuch axtꞌakniyaꞌitꞌit ju tumin.
Ju chunch catapucꞌatsayach ju yuꞌunch chai ju aliꞌin lapanacni ju talhilacaꞌanta ju Cristo ni vasalh amapꞌaininin.
Vachuꞌ catacꞌatsayaꞌ ni slivasalh ju xacꞌajunich acsni xaclalakꞌayayauch.