7
Pus ji quiꞌalakꞌavin ju na iclamapainiyau ni quintakꞌalhtasunitan ju Dios ni chunch aquintaꞌulhtuyan pus camacaju tachi chun ju aquintamalhquiliquin ju quiꞌatsucuntiꞌan chai tachi chun ju macxcai atalacpastꞌacꞌat.
Pus ni talhoniyau ju Dios pus lana salaka catsucu.
Tamch junita ju chavai isꞌatsucuntiꞌan ju amachakꞌan Corinto
2 Aquilalaktsꞌiuch ni miꞌamigojniꞌan icjuntau.
Jantu xamatiꞌ tuꞌuꞌ icnavinitau macxcai.
Jantu xamatiꞌ icmakꞌalhkꞌosutau laꞌisꞌatsucunti.
Jantu xamatiꞌ icꞌokxchokꞌomaxtunitau ju ixtumin.
3 Para jantu iclajunau ju ani chivinti ni va aclajumputu ni tachi ju va nontꞌatꞌit ni chunchach ju iclatau.
Jantu lai actilamucꞌaniu ju mintalakꞌalhinꞌan ni iclajuntau ni slivasalh tuꞌuꞌ iclalhiulayau ju uxijnan.
Va lai anch actsucukꞌalhi junta vilhchitꞌit chai anch acnicha.
4 Ju quitꞌin lana iclajunkꞌotauch ta yu iccꞌatsanau.
Icꞌajuni ju aliꞌin lapanacni ni na kꞌox tachi ju layatꞌit.
Nin lacatsꞌunin jantu iclalhamakꞌanininau ju chavai.
Alai slivasalh na ickꞌachanch mas ictꞌajun makꞌalhkꞌajnaꞌ ju ani.
5 Pus acsni icmiu ju ani ju xalacatꞌun Macedonia pus lana jantu lai lhikꞌach xactsucuyau.
Pus ju lapanacni na xaquintatꞌalakꞌayan chai ju quijnan na xactalhananau.
6 Para Dios ju matankꞌoxaxkꞌayai ju va taꞌamakꞌaninin.
Chai yuchach ju quintamatankꞌoxaxkꞌayan ni xalakꞌaꞌi ni xaquintalakminan ju Tito.
7 Chai jantu va yuꞌ ju xaclhikꞌachanau ni iclaktsꞌinchokoch ju Tito.
Para iclhikꞌachanauch ni xaquintajunan ju yuchi ni na kꞌoxich lhiulai ta yu xalayatꞌit.
Quijuni ni ma slivasalh quilalaktsꞌimputunau.
Chai ma slivasalh na xamakꞌanininatꞌit ixlacata ju tuchi xatapasai.
Chai ma navipꞌutꞌunatꞌit tachi ju xaclajunau.
Pus ni quijuni ju chunch pus palai ickꞌachanch.
8 Mas iclamaꞌamakꞌaniniuch lacaꞌalhiqui ju xaclamacaꞌaniyachau para ju chavai jantu icnajun ni palai kꞌox ixva ni jantu xaclamacaꞌanichau ju anuꞌ chivinti.
Ju pꞌulhnan vasalh chunch xacnajunta acsni iclaktsꞌilh ni na xalhiꞌamakꞌanininatꞌit ju anuꞌ alhiqui.
Para va pantsꞌiquis ju xaꞌamakꞌanininatꞌit.
9 Pus ju chavai na ickꞌachanch.
Para jantiyuꞌ ju iclhikꞌachan ni va iclamaꞌamakꞌaniniuch.
Alai va iclhikꞌachan ni xamakꞌanininatꞌit ixlacata ju miꞌalactuꞌuntiꞌan chai macꞌontꞌatꞌit ju macxcai ju ixnaviyatꞌit.
Ju uxijnan ixꞌamakꞌanininatꞌit tachi ju kꞌoxich lhiulai ju Dios.
Pus ju chunch jantu tuꞌuꞌ macxcai xaclanaviniyau ju quitꞌin ni xaclamaꞌamakꞌaniniuch.
10 Pus tam xamatiꞌ ju navi tuꞌuꞌ alactuꞌunti para astan caꞌamakꞌanininaꞌ tachi ju kꞌachani ju Dios pus camaconach ju macxcai chai calhilacaꞌanach ju Jesús ni camakꞌalhtaxtuyach.
Chai ju macajunta ju macxcai va ixlacaꞌatalh ni ixꞌamamakꞌaninicanta pus takꞌalhtaxtuta chai jantu lai catinaulh astan ni jantu alai chun ixtapasalh laꞌisꞌatsucunti.
Para ju lhamakꞌaninin tuchi tapasata laꞌisꞌatsucunti para ni jantu tam capastꞌacꞌaꞌ ixlacata ju ixꞌalactuꞌunti pus ju yuchi catsꞌankꞌakꞌalhiyach.
11 Pus ju uxijnan ni xaꞌamakꞌanininatꞌit ixlacata miꞌalactuꞌuntiꞌan tachi ju kꞌoxich lhiulai ju Dios pus alaktsꞌintꞌit ta yu xajun ju miꞌatsucuntiꞌan ju chavai.
Pus ixlhichux miꞌalhunutꞌan ixlakꞌoxipꞌutꞌunatꞌit ju anuꞌ alactuꞌunti.
Lana ixnonatꞌit ni jantu kꞌox xalhiulayatꞌit tachi ju xalai ju anuꞌ lapanac ju makvi lamilhiꞌuxijnan.
Chai na ixlhitꞌalhkꞌamtꞌatꞌit ni lai chunch xalai ju anuꞌ lapanac.
Chai na kꞌox xatꞌalhanantꞌit.
Slivasalh ixlakꞌoxipꞌutꞌunatꞌit ju anuꞌ lhamakꞌan.
Ixlacꞌasqꞌuinatꞌit ni camapalaꞌ ju ixtapalh ixꞌalactuꞌunti ju anuꞌ lapanac chai lana mamakꞌalhkꞌajnitꞌit.
Pus ni chunch ju ixlayatꞌit pus putasui ni salaka untꞌatꞌit ju chavai ixlacata ju anuꞌ lhamakꞌan.
12 Pus acsni tavanan iclaꞌatsꞌoknunitau ju anuꞌ alhiqui jantu va yuꞌ ju iclalhiꞌatsꞌoknunitau ni amamakꞌalhkꞌajnitꞌit ju anuꞌ ju xanavi ju alactuꞌunti.
Nin va yuchi ni alakꞌoxiyaꞌitꞌit ju ixlhamakꞌan ju navinicalh alactuꞌunti.
Ju tucan iclalhiꞌatsꞌoknunitauch yuchi ni apꞌucꞌatsꞌayaꞌitꞌit ni vasalh tuꞌuꞌ quilalhiulayau.
Chai cꞌatsai ju Dios ni vasalh chunch ju quilalhiulayau.
13 Pus ni xaquilaquiclacaꞌiyau ju quinchivinti pus slivasalh na ickꞌachan.
Para jantu va yuꞌ ju iclhikꞌachan ju tuchꞌi xanaviyatꞌit.
Para vachuꞌ iclhikꞌachan ni na kꞌachanch ju chavai ju Tito ju milacataꞌan ni slivasalh na kꞌox xaꞌamaklhtꞌayananatꞌit ju yuchi.
14 Pus ju quitꞌin xacjunita ju Tito ni na lackꞌoxin lapanacni untꞌatꞌit chai jantu xaquilamamaxaniyau.
Pus tachi chun ju xaclajunau si stavasalanti.
Pus chunchach vachuꞌ ju tuchi xacjuni ju Tito ju milacataꞌan stavasalanti lhixajcha.
15 Chai ju chavai ju yuchi palai tuꞌuꞌ talhiulayan ni pastꞌacꞌa ni xalacꞌaꞌiniyatꞌitch chux tuchi xatajunan chai ni kꞌox xaꞌamaklhtꞌayananatꞌit chai xatꞌalhoniyatꞌit chai stunin ixnavikꞌopꞌutꞌunatꞌit tachi ju kꞌoxich calhiulayaꞌ ju yuchi.
16 Pus na iclhikꞌachanch ni aktsꞌiya lai iclalhilaksiyauch ju uxijnan.