6
Ju quijnan kꞌaixtam ictꞌachꞌalhcatnanau ju Dios.
Chai iclatapaininiyau ni jantu asamakꞌantꞌit ju lamapainin ju tanaviniputunan ju Dios.
2 Pus chani najun laꞌixchivinti Dios junta tsꞌokcanta:
Ickꞌasmatnin acsni xacnaviputun lamapainin.
Icꞌaktaijun acsni xacꞌamakꞌalhtaxtunumputunch.
Chunch ju najun laꞌixchivinti Dios junta tsꞌokcanta.
Chai iclajunau ni chavaich ju avilhchan acsni anaviniputun lamapainin ju Dios.
Chavaich ju avilhchan acsni amakꞌalhtaxtunumputun.
3 Pus ju quijnan ixlapanacni Dios icjuntau.
Chai jantu tuꞌuꞌ icnaviyau ju lai capukꞌalhkꞌoslh apumatam chai ixlhiyuchi jantu calacaꞌiputulh ju ixchivinti Dios.
Chai ju chunch jantu lai va kꞌaya calhichivincanaꞌ ju quilhichꞌalhcat quincꞌan.
4 Alai tachi chun ju icnaviyau ju quijnan chunch icnaviyau ta yu laich catapucꞌatsayaꞌ ju lapanacni ni vasalh ixlapanacni Dios icjuntau.
Lana jantu jeks xacꞌuyau acsni na xacmakꞌalhkꞌajnanau.
Nin acsni matiꞌ ixjunita ju quintuꞌuꞌ quincꞌan.
Nin acsni lana jantu xaccꞌatsayau ta yu aclayau.
5 Nin acsni xaclakanekmacanauch.
Nin acsni xactꞌalhnucantauch.
Nin acsni xaquintamakniputunan ixtalhavat lapanacni.
Jantu jeks xacꞌuyau acsni na lhu ixꞌalin ju quilhichꞌalhcat quincꞌan.
Nin acsni jantu lai xaclhilhtatakꞌoyau ju quilhichꞌalhcat quincꞌan.
Nin acsni jantu lai xaclhivenkꞌoyau ju quilhichꞌalhcat quincꞌan.
6 Vachuꞌ icpumalacasuputunau ni ixlapanacni Dios icjuntau acsni na salaka ju quiꞌatsucunti quincꞌan chai na icmispayau ju stavasalanti.
Chai caputasuyaꞌ ni ixlapanacni Dios icjuntau acsni icchꞌixau mas va tuchi quintanaviyan ju lapanacni.
Chai acsni icmalacasuyau ju quilhikꞌox lapanac.
Chai acsni tasui laquiꞌatsucunti quincꞌan ni tꞌajun ju Spiritu Santu laquiꞌalhunut quincꞌan.
Chai acsni tasui ni vasalh icmapainiyau ju quintꞌalapanacni.
7 Vachuꞌ tasui ni vasalh ixlapanacni Dios icjuntau acsni iclajuntau ju ixchivinti Dios chai ju yuchi stavasalanti.
Vachuꞌ putasui ni ixlapanacni Dios icjuntau acsni tasui ixtachaput ju Dios laquiꞌatsucunti quincꞌan.
Chai va ixlacaꞌatalh ni salaka junita ju quiꞌatsucunti quincꞌan pus yuchi ju icpusastꞌucꞌau tachi chun ju macxcai ju min laquiꞌatsucunti quincꞌan.
8 Vachuꞌ ictalacasuyau ni ixlapanacni Dios icjuntau acsni iclakꞌayacanau chai acsni jantu tuꞌuꞌ iclhiulacanau.
Acsni macxcai quintalhichivinan ju lapanacni chai acsni tanajun ni kꞌox lapanacni icjuntau.
Ictalacasuyau ni vasalh ixlapanacni Dios icjuntau acsni tanajun ju lapanacni ni va icꞌaꞌokxchokꞌonunau mas jantu.
Mas vasalh ixlapanacni Dios icjuntau.
9 Ictalacasuyau ni ixlapanacni Dios icjuntau acsni tanajun ju lapanacni ni jantu tuꞌuꞌ ju quintapalhni quincꞌan mas na lhu quintachꞌakꞌokꞌayan.
Vachuꞌ acsni va tachi quintamaknipututꞌonan ju lapanacni para jantu lai quintamakniyan.
Ictalacasuyau ni ixlapanacni Dios icjuntau acsni icmamakꞌalhkꞌajnicanauch para jantu quintamakniyan.
10 Mas icꞌamakꞌanininau para va tachi ickꞌachanauch.
Mas na kꞌox icquilhpatiyau para na pumalhu ju icꞌaxtaknita ju stavasalanti makꞌalit ju alin laꞌixmacni Dios.
Mas lana matiꞌ ju quintuꞌuꞌ ju ani para laꞌixmacni Dios alinkꞌojui chux.
11 Ji quiꞌalakꞌavin amachakꞌan Corinto iclajunkꞌotauch ta yu iccꞌatsanau.
Slivasalh iclamapainiyau.
12 Ju quijnan slivasalh tuꞌuꞌ iclalhiulayau ju uxijnan.
Para ju uxijnan jantu tuꞌuꞌ quilalhiulayau ju quijnan.
13 Pus ju quitꞌin iclaxakꞌalayau tachi ju va quiꞌaskꞌatꞌan untꞌatꞌit.
Pus tachi ju iclamapainiyau ju uxijnan pus vana va chun aquilamapainiuch ju quijnan.
Tꞌajun ju Dios laquiꞌalhunutꞌan
14 Tun tꞌiꞌamaꞌamigoxlatꞌit tam xamatiꞌ ju jantu lhilacaꞌanta ju Cristo.
Jantu lai chun atꞌilatꞌit ni jantu lai va lakatam catitꞌava ixꞌatalacpastꞌacꞌat ju naviputun ju soknicꞌa chai ju naviputun ju jantu kꞌox.
Jantu lai va lakatam catitꞌava ju ixꞌatalacpastꞌacꞌat ju alhtanantacaꞌ tachi ju va lacaꞌatatsꞌisni ni jantucaꞌ mispai ju Cristo chai ju alhtananta lacaꞌatuncunuꞌ ni mispaich ju yuchi.
15 Jantu lai va lakatam catitꞌava ju ixꞌatalacpastꞌacꞌat ju Cristo ju va ixꞌatalacpastꞌacꞌat ju lhacaticuru.
Jantu lai va lakatam catitꞌava ju ixꞌatalacpastꞌacꞌat ju lhilacaꞌanta ju Cristo ju va jantu lhilacaꞌanta.
16 Jantu lai actitꞌamanu ju tuꞌuꞌ santo ju lacpujitat junta lakꞌayacan ju Dios.
Pus ju quijnanꞌan chunch juntau tachi ju tuꞌuꞌ pujitat junta lakꞌayacan ju Dios.
Chunch juntau tachi ju naulh isꞌakstu ju Dios laꞌixchivinti junta tsꞌokcanta.
Ju anch ma chani naulh:
Ju yuchi ma catsucuyaꞌ laꞌixꞌalhunutꞌan chai ma caꞌalactꞌaꞌalhtananaꞌ.
Chai ma isDiosꞌan cajunaꞌ.
Chai ju yuꞌunch ma ixlapanacni catajunaꞌ.
Chunch ma najun ju Dios.
17 Chai yuchi vachuꞌ lhinajun ju Dios ju chavai lacaꞌalacatam atsꞌoknut.
Ma chani najun:
Ma tamch atsꞌucꞌutꞌit.
Ma jantu vana va chun anavitꞌit tachi ju tanavi ju jantucaꞌ talhilacaꞌanta ju yuchi.
Ma lana jantu tuꞌuꞌ anavitꞌit ju jantu kꞌox.
Ju chunch ma cataꞌamaklhtayananan.
18 Chai ma mimpaiꞌan cajunaꞌ.
Chai ju uxijnan ma isꞌaskꞌatꞌan aꞌunaꞌitꞌit.
Ma chunch ju najun ju Dios ju lai navikꞌojui tachi chun ju taxtokni.