3 Pus iclajuntau ju palai tasqꞌuini ni amispꞌatꞌit.

Yuchi ju icmasunicanta vachuꞌ.

Iclajuntau ni nilh ju Cristo laquintalakꞌalhinꞌan.

Chunch ju muctaxtulh tachi ju istsꞌokcanta makꞌanchich laꞌixchivinti Dios.

4 Vachuꞌ iclajuntauch ni macnucalh ju Jesús.

Para acsni ixtapasata lakatꞌutu avilhchan pus ju yuchi taꞌacxtuchokolh junta ixmacnucanta.

Chai vana chunch ju muctaxtulh tachi ju istsꞌokcanta laꞌixchivinti Dios ju makꞌanchich.

5 Chai iclajuntau ni acsni tavanan taꞌacxtuchokolh pus yuchi ju Pitaluꞌ ju talacasunilh.

Chai astan atalacasunilh ju ixtamalakachan.

6 Chai ju astanch acsni talacasuchokolh ju Cristo pus talaktsꞌilh aliꞌin ju quilhiꞌalakꞌavinꞌan laꞌixmacni Cristo ju va kꞌaixtamch ixtavilanalh.

Pus ju yuꞌunch ixtapasatach lakaquis cientos lapanacni.

Sich talaktsꞌinkꞌo ju Cristo.

Pus ju chavai ju aliꞌin sia yuꞌunch titatꞌajuncaꞌ.

Para ju aliꞌinch tanitach ju chavai.

7 Chai ju astan va isꞌakstu ju talacasunilh ju Jacobo.

Chai astan atalacasunikꞌolhch ixchuxꞌan ju ixtamalakachan.

8 Chai ju laꞌixpuꞌaclantich quintalacasunilh ju quitꞌin mas na kꞌox lhitsꞌisit xacjunita laquiꞌalactuꞌunti.

9 Pus quitꞌin ju palai jantu tuꞌuꞌ quintapalhni tachi chun ju aliꞌin ixtamalakachan ju Jesús.

Lana jantu lhijun ni aclhixakꞌalacalh ixtamalakachan Jesús ni va xacꞌalaclhimakchapui ju yuꞌunch ju ixtalhilacaꞌanta ju yuchi.

10 Para ju Dios quinavinilh lamapainin.

Yuchi iclhijunita ixtamalakachan ju Jesús.

Chai na lhitapalalh ju lamapainin ju xaquinavini ju Dios.

Pus palai lhu icchꞌalhcatnanta ju quitꞌin.

Palai jantu ju aliꞌin ixtamalakachan ju Jesús.

Para jantu va laquiꞌakstu ju icnavita.

Alai lai lhu ju icchꞌalhcatnan va ixlacata ni Dios ju quinavinilh lamapainin chai quiꞌaktaiju.

11 Para jantu tuꞌuꞌ nomputun u ni quitꞌin ju palai icchꞌalhcatnanta u yuꞌunchach ju aliꞌin ixtamalakachan ju Jesús.

Yuchach ju lhitapalai ni va lakatam chivinti ju icnonau chai yuchach ju lacꞌaꞌitꞌatꞌit.

12 Pus ju quitꞌin iclajuntau ni taꞌacxtuchokolh ju Cristo junta ixmacnucanta.

Chai tas talhinajunch ju aliꞌin ju milhiꞌuxijnan ni jantu lai xamatiꞌ taꞌacxtuchokoi ju nitach.

13 Pus ni jantu cava lai catataꞌacxtuchokolh ju tanita pus ca jantu vasalh ni taꞌacxtuchokolh ju Cristo.

14 Chai ju Cristo ni jantu caꞌixmacxtuchokolh ju Dios junta ixmacnucanta pus jantu ixlhitapalalh ju tuchi icnonau ni lai takꞌalhtaxtucan.

Chai jantu ixlhitapalalh ni ixlhilacꞌapꞌintꞌit ju Cristo.

15 Chai ni jantu caꞌixtaꞌacxtuchokolh ju Cristo pus ca va xaclhitalacasuch tachi ju lapanacni ju tanajun taꞌaklhtamat chivinti ixlacata ju Dios acsni icnonau ni Dios ju macxtuchokolh ju Cristo.

Para ni sala jantu lai taꞌacxtuchokoi ju tanita pus ca jantaꞌas slivasalh ni macxtuchokolh ju Cristo ju Dios.

16 Pus ni jantu cava caꞌamacxtuchokocanaꞌ ju tanitach pus nin ca yuchi ju Cristo jantu ixtitaꞌacxtuchokolh.

17 Chai ni jantu caꞌixmacxtuchokocalh ju Cristo pus jantu ixlhitapalalh ni lhilacꞌapꞌintꞌatꞌit ju yuchi.

Jantu caꞌixtꞌakꞌalhtꞌaxtꞌutꞌit.

18 Ni jantu caꞌixmacxtuchokocalh ju Cristo pus caꞌixtatsꞌankꞌakꞌalhi tachi chun ju ixtalhilacaꞌanta ju yuchi chai ju tanita ju chavai.

19 Ni lhilacaꞌantauch ju Cristo para ni matiꞌ tuꞌuꞌ caꞌixjunlh ju astan acsni caniyau pus painiꞌitnich caꞌixjumvi.

Lana jantu lhitapalai caꞌixva ni lhilacaꞌantauch ju yuchi.

20 Para ju Cristo vasalh macxtuchokocalh mas ixnita.

Chai yuchi ju pꞌulhnan taꞌacxtuchokolh lacaꞌaninti.

Chai tachi chun ju quijnanꞌan ju lhilacaꞌantauch ju yuchi vachuꞌ camacxtuchokocanau.

21 Pus va ixlacata ju Adán ju niyau ju chavai.

Chai vachuꞌ va ixlacata ju Cristo catalhitaꞌacxtuchokoyaꞌ ju tanita.

22 Pus va ixlacaꞌatalh ni ixꞌapapanatnich Adán juntau yuchi lhiniyau.

Chai vachuꞌ va ixlacaꞌatalh ni lhilacaꞌanau ju Cristo yuchi calhitaꞌacxtuchokoyauch mas caniyauch.

23 Para va quilhmactamin ju camacxtuchokocanaꞌ.

Pꞌulhnan macxtucalh ju Cristo.

Chai astan aquijnanꞌan ju lhilacaꞌantauch ju yuchi aquintamacxtuchokoyan acsni caminchokoyach ju yuchi.

24 Chai ju acsnich ixꞌaclantich cajunaꞌ ju lacamunutpaꞌ.

Chai ju acsnich ju Cristo camakꞌosukꞌoyaꞌ tachi chun ju xalackꞌajin chai tachi chun ju puꞌucxtin chai tachi chun ju tachaput ju alinch ju ani lacamunutpaꞌ.

Chai astanch ju yuchi caxtakniyach ju ixtachaput ju quimpaiꞌan Dios chai yuchach ju calhinonkꞌoyach chux.

25 Pus tasqꞌuini ni yuchi ju Cristo ju calhinonaꞌ tus ni caꞌatꞌalalhajakꞌoyaꞌ chux ju ixtꞌalaxcai.

26 Chai ju va yuchach ixtꞌalaxcai ju catꞌalalhajayaꞌ yuchi ni jantu xamatiꞌ catini tavanan.

27 Pus ju Dios naulh ni yuchi ju Cristo ju calhinonkꞌoyaꞌ tachi chun ju taxtokni.

Para acsni naulh ju Dios ju chunch pus jantu nomputun ni va calhijuncanaꞌ ju Dios ni yuchach ju xaxtakni ju ixpuxakꞌai.

28 Chai ju Cristo acsni catꞌalalhajakꞌoyaꞌ tachi chun ju taxtokni pus ju astan ju yuchi ni istsꞌalh Dios junita pus calacasqꞌuinach ni calhijunicalh.

Calhinonaꞌ ju ixpai Dios ni yuchi ju xamatꞌalalhajai tachi chun ju taxtokni.

Chai ju chunch quimpaiꞌan Dios ju xakꞌai tucan cajunaꞌ.

29 Ni nonatꞌit ni jantu lai tataꞌacxtuchokoi ju tanitach pus tijuch ju talhiꞌakpax ixlacata ju tam xamatiꞌ ju va nitach tachi ju talai ju aliꞌin sia milhiꞌuxijnan.

Tajuch ni chunch talai ni sala jantu lai tataꞌacxtuchokoi ju tanitach.

30 Pus ni vasalh tachi ju nonatꞌit ni jantu lai tataꞌacxtuchokoi ju tanitach ca va lakꞌaich iclhilakꞌaꞌi ni va xcaich ictakꞌalhtaxtui chux avilhchan va ixnajunca ixchivinti Dios.

31 Para aktsꞌiya camacxtuchokocanaꞌ ju tanitach.

Chai slivasalh na iclalhikꞌachanau ni iccꞌatsai ni atꞌakꞌalhtꞌaxtꞌuyaꞌitꞌit ni xalhilacꞌapꞌinatꞌit ju Cristo Jesús.

Chai vana va chun islivasalh ni quintamaknipututꞌajun ju lapanacni chux avilhchan.

32 Pus acsni xacvilhcha ju lakꞌachakꞌan Efeso chai quintamamakꞌalhkꞌajni ju lapanacni ca laich acnaulh ni tachi ju va maktilinch ixtalai.

Para ni sala jantuch lai tataꞌacxtuchokoi ju tanita pus ca jantu tuꞌuꞌ lhajacan ni lhilakꞌaꞌican ju chunch.

Chai ca laich vachuꞌ canaju tachi ju noncan:

“Cavenauch.

Calacꞌakꞌotnuch.

Ju lhi tꞌuxam caniyauch”.

Ca laich chunch canaju ni vasalh caꞌixva ni jantu lai tataꞌacxtuchokoi ju tanita.

33 Tun cataꞌokxchokꞌon xamatiꞌ.

Apꞌastꞌactꞌit ju chivinti ju chani noncan:

“Ni na kꞌox quiꞌamigo acnavi ju kꞌai junita pus vachuꞌ aquimalhquiliquinilh ju quiꞌatalacpastꞌacꞌat”.

Chunch ju noncan.

34 Pus acꞌatsꞌanantꞌit lamiꞌatsucuntiꞌan.

Chai jantu anavitꞌit ju alactuꞌunti.

Pus alin ju lapanacni ju lamilhiꞌuxijnan ju jantucaꞌ tamispai ju Dios.

Chunch ju iclajunau ni va iclamamaxaniputunau ni laich xalakꞌaꞌiyatꞌit ni catanu lamilhiꞌuxijnan ju va kꞌaya tanajun.

35 Pus ju aliꞌin laich chani catanaulh:

“Tas laich catalhitaꞌacxtuchokolh ju tanita.

Tis lacatunach ju laich cataputalacasuchokoyaꞌ”.

36 Pus va tontojni ju chunch tanajun.

Alaktsꞌintꞌitch ju tuꞌuꞌ quincuxiꞌan.

Acsni chꞌanau ju xatꞌin pus yuchi ju ixꞌaxtꞌakꞌa ju puchꞌitaꞌacnui.

Para ju ixꞌalhunut yuchach ju capꞌunaꞌ.

37 Chai ju tuchi chꞌanatꞌit jantiyuꞌ ju pꞌulhuchꞌanchꞌokꞌoyatꞌit ju cꞌatꞌatꞌach.

Alai yuchi ju xatꞌin cebada u tuꞌuꞌ atumpa xatꞌin ju chꞌanatꞌit.

38 Chai ju tijtamin tꞌin Dios ju xtaknita ta yu catalacasuyach.

Chai ju tijtamin tijtamin tamch ju tasui acsni pꞌun.

39 Pus chunchach vachuꞌ tachi chun ju acanit.

Jantu va lakatam acanit ju alin.

Ju aliꞌ acanit ixꞌacanitꞌan ju lapanacni junita.

Ju aliꞌ acanit ixꞌacanitꞌan ju atapacxat.

Ju aliꞌ acanit ixꞌacanitꞌan ju tsꞌokꞌo.

Ju aliꞌ acanit ixꞌacanitꞌan ju pamata.

40 Chai alin ju xataxtokni ju lactꞌiyan.

Chai alin ju xalactaxtokni ju ani lacamunutpaꞌ.

Para tachi ju cꞌusich tasui ju xataxtokni ju lactꞌiyan jantu ixtꞌachun cꞌusi tasui ju xataxtokni ju ani lacatꞌun.

41 Pus ju avilhchan tam ju mapulhcui.

Chai ju malhquiyuꞌ tam ju mapulhcui.

Chai ju stꞌacun tam ju tamapulhcui.

Chai mas sia yuꞌunch ju stꞌacun si tam tamapulhcui.

42 Pus vana va chun ju quilacatunaꞌan.

Tam junita ju chavai chai tam cajunaꞌ ju astan.

Macnucan ju quilacatunaꞌan ju catsꞌankꞌayaꞌ.

Para acsni cataꞌacxtuchokoyach tam cajunaꞌ.

Ju acsnich jantu tavanan lai catini.

43 Ju quilacatunaꞌan acsni macnucanta jantuch tuꞌuꞌ ixtapalhni.

Para acsni camacxtuchokocanaꞌ na cꞌus cajunaꞌ.

Ju quilacatunaꞌan acsni macnucanta matich ju ixtachaput.

Para acsni camacxtuchokocanaꞌ tachapun cajunaꞌ.

44 Ju quilacatunaꞌan ju macnucanta va xalacatuna lacamunutpaꞌ.

Para acsni camacxtuchokocanach pus xalacatuna lactꞌiyan cajunanta.

Alin ju xalacatuna lacamunutpaꞌ.

Chai alin ju xalacatuna ju lactꞌiyan.

45 Ju ixchivinti Dios ju tsꞌokcanta najun ni xtaknicalh ixlacatuna ju pꞌulhnan lapanac.

Yuchi ju Adán.

Chunch ma najun laꞌixchivinti Dios.

Chai astan milh apumatam lapanac tachi ju Adán.

Yuchi ju Cristo.

Para ju yuchi xtꞌakꞌa ju atsucunti ju conkꞌalhiyanta ju lactꞌiyan.

46 Pus jantiyuꞌ ju pꞌulhnan xtaknicantau ju xalacatuna ju lactꞌiyan.

Alai yuchi ju xalacatuna lacamunutpaꞌ ju pꞌulhnan xtaknicantau.

Astan ju xalacatuna lactꞌiyan.

47 Ju pꞌulhnan lapanac tꞌun ju lhinavicalh ju ixlacatuna chai anich lacatꞌun ju ixtꞌajun.

Para ju astan milh ju Cristo.

Chai ju yuchi lactꞌiyan ju mincha.

48 Chai tachi chun ju quijnanꞌan ju ani vilau lacamunutpaꞌ pacxantau ju quilacatunaꞌan tachi ixjunita ju ixlacatuna ju Adán ni va tꞌun lhinavicalh ju ixlacatuna.

Para tachi chun ju catataꞌacxtuchokoyaꞌ chai cataꞌanaꞌ ju lactꞌiyan pus chunch cajunaꞌ ixlacatunaꞌan tachi ixlacatuna ju Cristo.

49 Pus ni chunch junita ju quilacatunaꞌan ju chavai tachi ju xalacatuna ju ani lacamunutpaꞌ pus vana va chun cajunaꞌ ju quilacatunaꞌan tachi ju xalacatuna ju lactꞌiyan astan.

50 Pus chanich iclajumputunau ji quiꞌalakꞌavin.

Ju quilacatunaꞌan tachi ju junita ju chavai jantu lai catitanu ju lactꞌiyan junta lhinajun ju Dios.

Ju quilacatunaꞌan ju lai ni jantu lai catitanu junta jantu nican.

51 Aclajunau lakatam chivinti ju jantu ixmachakxacanta ju makꞌanchich.

Ju aliꞌin sia quijnanꞌan ju lhilacaꞌantauch ju Jesús jantu catitani.

Para quinchuxꞌan si aquintaxtaknikꞌoyan ju Dios ju sastꞌi quilacatunaꞌan.

52 Va tam pantsꞌiquis catapasayaꞌ ju ani lhamakꞌan.

Tachi acsni actsꞌimtalacpuyaulh.

Acsnich ju tamch cajunau acsni va yuchach casuncanaꞌ ju skꞌolh.

Pus ju skꞌolh catꞌasayaꞌ chai ju acsnich caꞌamacxtukꞌocanach ju tanita ju ixtalhilacaꞌanta ju Cristo.

Chai caꞌaxtaknicanaꞌ ju sastꞌi ixlacatunaꞌan ju jantu lai capuchꞌiyaꞌ.

Chai ju quijnanꞌan ju titꞌonaucaꞌ vachuꞌ aquintamapaxaniyan ju quilacatunaꞌan.

53 Pus ju quilacatunaꞌan ju lai puchꞌi tasqꞌuini ni camapaxanicau.

Tasqꞌuini ni caxtaknicau ju lacatuna ju jantu lai puchꞌi.

Chai ju quilacatunaꞌan ju lai ni tasqꞌuini ni camapaxanicau.

Tasqꞌuini ni caxtaknicauch ju jantu lai ni.

54 Pus aktsꞌiya camapaxanikꞌocanau ju ani quilacatunaꞌan ju lai puchꞌi.

Caxtaknicanauch ju quilacatunaꞌan ju jantu lai puchꞌi.

Chai ju quilacatunaꞌan ju lai ni camapaxanicanau.

Caxtaknicanauch ju quilacatunaꞌan ju jantu lai ni.

Pus acsni chunch aquintaꞌulhtuyan ju Dios pus ju acsnich caꞌuctaxtuyach ju chivinti ju tsꞌokcanta laꞌixchivinti Dios junta ma najun ni ma tꞌalalhajacanta ju aninti.

Chunch ju najun ju anch.

55 Pus ju acsnich matich cajunaꞌ ju aninti.

Jantu vana lai aquintatꞌalalhajayan ju aninti.

56 Pus ju chavai niyau ni alactuꞌununau.

Chai alactuꞌununau ni naviyau ju lhikꞌalhtsajui ju ixlhamapꞌaksin Dios.

57 Para icjuni lakꞌailaktsꞌiuch ju Dios ni lai tꞌalalhajayau ju alactuꞌunti ni nilh ju quiꞌucxtinꞌan Jesucristo ju quilacataꞌan.

58 Pus ni chunch ji quiꞌalakꞌavin pus va lakatamch anavitꞌit ju miꞌalhunutꞌan.

Alhilacꞌapꞌinkꞌalhitꞌitch ju Cristo.

Chai va tachi anavinitꞌit ju ixlhichꞌalhcat ju Jesús.

Chunch ju alatꞌit ni cꞌatsꞌayatꞌit ni jantu tavanan catsꞌankꞌayaꞌ ju tuchꞌi naviniyatꞌit ju Jesús.