Ju tumin ju caꞌalhikꞌailaktsꞌincanaꞌ ju quilhpatinin
16
Iclajumputunau ixlacata ju anuꞌ tumin ju caxtaknicanach ju quilhiꞌalakꞌavin laꞌixmacni ju Cristo ju amachakꞌan Jerusalén ju quilhpatinin tajunita.
Chunch anavitꞌit vachuꞌ tachi ju icꞌalacjunita ju talhilacaꞌanta ju Jesús ju amachakꞌan xalacatꞌun Galacia.
2 Chux lhitumincu pumatamin ju uxijnan alhitꞌanaꞌitꞌit junta tꞌakꞌaixtꞌokꞌatꞌit ju tumin tachi ju laich axtꞌakꞌaꞌitꞌit.
Pus tichi chavaich ju laklhu lhajai ju tamin semana pus palai laklhu caxtꞌakꞌaꞌ.
Chai ju palai lacatsꞌunin lhajai pus palai lacatsꞌunin caxtꞌakꞌaꞌ.
Chai ni chunch ju anaviyaꞌitꞌit pus jantu va acsnich ju apꞌusacꞌaꞌitꞌit ju tumin acsni acchaꞌananta.
3 Pus ju uxijnan asacxtꞌuyaꞌitꞌit ju lapanacni ju amalhipꞌiniyaꞌitꞌit ju tumin ju alhikꞌailaktsꞌinaꞌitꞌit ju amachakꞌan Jerusalén.
Chai ju quitꞌin acsni acchaꞌananta laich acꞌamachꞌapayoyaꞌ ju quiꞌalhiqui junta acꞌajunach ju amachakꞌan Jerusalén tichi chavaich ju anuꞌ lapanacni ju talhiꞌanta ju tumin.
4 Chai ni kꞌox cava ni acꞌalactꞌaꞌalh pus laich acꞌalactꞌaꞌanaꞌ.
Ju Pablo ajuni tavananch ju laich cachaꞌalh ju anch
5 Ju quitꞌin acꞌanaꞌ ju xalacatꞌun Macedonia.
Chai acsni aclacaputocꞌakꞌoyaꞌ ju anch pus astan aclalaktsꞌintachauch ju uxijnan.
6 Chai ju acsnich ca laich cava ni aclatꞌatolhchau lakatꞌui lakatꞌutu malhquiyuꞌ.
U ni jantu pus ca laich cava ni aclatꞌatolhchau chux ju lacalhicꞌasnin.
Ju chunch pus ju uxijnan laich aquilaꞌaktaijuyau ixlacata ju lacati mas vanta anchach ju acꞌamputunach.
7 Pus jantu iclacasqꞌuin ni va actapasatilacha ju chavai ju lamilakꞌachakꞌanꞌan.
Iclatꞌatolhputunachau lakatꞌui lakatꞌutu malhquiyuꞌ ni chunch ju calacꞌasqꞌuilh ju quiꞌucxtin Jesús.
8 Para ju chavai actolacaꞌ ju ani lakꞌachakꞌan Efeso tus acsni cachinaꞌ ju xacꞌatan Pentecostés.
Acsnich ju actaxtuyach.
9 Tucaꞌ ictaxtuputun ju ani ni na lhu alin ju takꞌasmatputun ixchivinti Dios chai vachuꞌ na lhu ju talhaxcayanan ixchivinti Dios.
10 Chai ni cachaꞌananta ju Timoteo pus amalakꞌavitꞌit.
Chunch alatꞌit ni vachuꞌ navi ju yuchi ixlhichꞌalhcat ju Jesús tachi ju quitꞌin.
11 Tun xamatiꞌ ju va jantu tuꞌuꞌ calhiula.
Alai aꞌaktꞌaiꞌutꞌitch ni lai lhikꞌach aquilaktsꞌinchokolh.
Pus ju quitꞌin icpacxantajich ju yuchi ni icnajun ni caꞌalactꞌaminach ju aliꞌin quilhiꞌalakꞌavinꞌan.
12 Pus na ictapaininilh ju quilakꞌauꞌan Apolos ni caꞌalactꞌaꞌalh ju aliꞌin quiꞌalakꞌavinꞌan acsni xataꞌanacha.
Para jantu xaꞌamputunacha ju chavai.
Najun ni caꞌananta acsni va caꞌalinach ju ispantsꞌiquis.
Ju Pablo amapꞌaksi ju ixꞌamigojni
13 Alhistꞌaccꞌantꞌit ni jantu xamatiꞌ cataꞌokxchokꞌon.
Va tachi alhilacꞌapꞌinaꞌitꞌit ju Jesús.
Aꞌuntꞌit tachi ju jokꞌatni ju jantu tuꞌuꞌ tatalhoni.
Achꞌixkꞌotꞌit mas va tuchi camilh lamiꞌatsucuntiꞌan.
14 Tachi chun ju naviyatꞌit chunch ju anaviyaꞌitꞌit tachi ju caputasuyach ni vasalh lamapꞌainiyatꞌit.
15 Chai iclatapaininiyau ji quiꞌalakꞌavin.
Ju uxijnan mispꞌayatꞌit ju tatanumanalh laꞌixchakaꞌ ju Estéfanas.
Yuꞌunchach ju pꞌulhnan talhilacaꞌalh ju Cristo tachi chun ju amachakꞌan laxatꞌun Acaya.
Chai ju yuꞌunch lana tamakꞌaxtaknikꞌota ju Jesús ju isꞌatsucuntiꞌan va ixꞌaꞌaktaijuca ju quilhiꞌalakꞌavinꞌan laꞌixmacni Jesús.
16 Pus lamapainin iclasqꞌuiniyau.
Aqꞌuiclacꞌaꞌitꞌit ju anuch lapanacni chai tachi chun ju aliꞌin ju taꞌaꞌaktaijunun chai ju tanavini ixlhichꞌalhcat ju Jesús.
17 Na iclhikꞌachanch ni tamilh ju Estéfanas chai ju Fortunato chai ju Acaico.
Pus ju yuꞌunch quintamakꞌankꞌachalh tachi ju ixlatꞌit ni laich cava ixtꞌatꞌit vachuꞌ.
18 Ju yuꞌunch quintaꞌaktaiju ni lai palai aclhilacaꞌalh ju Cristo.
Chai vana va chun taꞌaktaijuyan ju uxijnan.
Pus aktsꞌiya tasqꞌuini ni alakꞌamispꞌatꞌit ju yuꞌunch.
19 Tachi chun ju amachakꞌan xalacatꞌun Asia ju talhilacaꞌanta Jesús tamacꞌamiyan.
Vachuꞌ ju Aquila chai ju Priscila ju ixꞌamachakach junita.
Ju yuꞌunch tamacꞌamiyan laꞌixtapakaꞌut ju Jesús.
Chai chux taꞌamacꞌaminin ju talhilacaꞌanta ju Jesús ju tatakꞌaixtꞌokꞌa laꞌixchakaꞌ ju Aquila.
20 Taꞌamacꞌaminin chux ju quiꞌalakꞌavinꞌan ju anich tavilanalh.
Kꞌox alamacꞌamitꞌit pumatamin pumatamin ju uxijnan tachi ju lhijunch ni lhiꞌalakꞌavin untꞌatꞌit.
21 Ju quitꞌin icPablo.
Pus tus ani icmaꞌatsꞌokni apumatam.
Para ju chavai quiꞌakstu aclaꞌatsꞌoknuniyau lakatam lakatꞌui chivinti junta aclamacꞌamiyau.
22 Ju jantu mapaini ju quiꞌucxtinꞌan Jesús chach mamakꞌalhkꞌajnikꞌalhicalh.
Chach minchokolh ju Jesús.