Chivinin lacatumpa chivinti
14
Ju tucan anavitꞌit cuenta yuchi ni alamapꞌainitꞌit ju milhiꞌuxijnan.
Para vachuꞌ asqꞌuinitꞌit ju Dios ju lhakꞌailaktsꞌin ju xtꞌakꞌa ju Spiritu Santu.
Chai ju palai kꞌox lhakꞌailaktsꞌin ju laich asqꞌuinitꞌit yuchi ni laich anaꞌuntꞌit ixchivinti Dios.
2 Pus ju tam lapanac ju xtaknicanta ju lhakꞌailaktsꞌin ni laich chivinin ju chivinti ju jantu aktam ixchivininta pus jantiyuꞌ ju xakꞌalai ju ixtꞌalapanacni.
Alai Dios ju tꞌachivinin ni jantu xamatiꞌ machakxai tuchi najun.
Ju yuchi vasalh chivinin laꞌixlhichux ixꞌalhunut para va yuchi ju Dios ju machakxai.
3 Para palai kꞌox navi ju anuꞌ lapanac ju xtaknicanta ju lhakꞌailaktsꞌin ni lai najun ixchivinti Dios.
Pus ju yuchi alactꞌachivinin ju ixtꞌalapanacni.
Chai laꞌixchivinti alacꞌaktaijui ni laich palai catalhilacaꞌalh ju Cristo chai alacmapꞌaksi chai amatankꞌoxaxkꞌayai.
4 Para ju chivinin ju chivinti ju jantu aktam ixchivininta pus va isꞌakstu ju aktaijuchokocan.
Para ju anuꞌ lapanac ju najun ixchivinti Dios aꞌaktaijui ju ixtalhavat ju talhilacaꞌanta ju Cristo.
5 Na kꞌox iclhiulai ni laich caꞌixnaꞌuntꞌit minchuxꞌan ju chivinti ju jantu aktam ixchꞌivinatꞌit.
Para palai kꞌox iclhiulai ni laich anaꞌuntꞌit ixchivinti Dios.
Pus yuchach ju palai xakꞌai ju canaulh ixchivinti Dios.
Palai jantu ju va chivinin ju chivinti ju jantu aktam ixchivininta.
Para ni camalakpusucalh ju anuꞌ chivinti pus ju chunch vaklhtam chun catava ixtꞌiyunꞌan ni vachuꞌ caꞌaꞌaktaiju ju talhilacaꞌanta ju Cristo laꞌixchivinti.
6 Pus ji quiꞌalakꞌavin mas acꞌanchalh chai aclalhixakꞌalau ju chivinti ju jantu lai machꞌakxayatꞌit pus tis kꞌoxich ju lai aclanaviniu.
Jantu lai actilaꞌaktaiju ni jantu vas aclamasuniyau tuchi quimasunitach ju Dios.
Chai jantu lai actilaꞌaktaiju ni jantu aclajuniu ju tuꞌuꞌ laꞌixchivinti Dios ju tasqꞌuini ni amachꞌakxatꞌit.
Jantu lai actilaꞌaktaiju ni jantu vas aclamalaniyau ta yu kꞌox atsꞌucꞌuyaꞌitꞌit laꞌixmacni Dios.
7 Alaktsꞌintꞌitch.
Mas va tuꞌuꞌ skꞌolh u tuꞌuꞌ lhisan ni jantu vas catꞌasayaꞌ pus jantu lai cꞌatsacan tuchi ju skꞌolhcanch u tuchi ju sacanch.
8 Chai tachi ju tam taropa acsni skꞌoli acsni va alin ju lasat.
Ni jantu sok camakꞌantꞌasayaꞌ ju iskꞌolh pus jantu xamatiꞌ lai calakasitsucuyaꞌ ixꞌanca lacalasat.
9 Pus vana va chun ju uxijnan.
Ni jantu nonatꞌit ju chivinti ju lai tamachakxai ju aliꞌin tas laich catapucꞌatsayaꞌ ju tuchꞌi alacꞌunatꞌit.
Tachi ju va jantu xamatiꞌ xakꞌalayatꞌit.
10 Na tijlhu chivinti alin ju ani lacamunutpaꞌ para ju lapanacni ju tachivinin lakatamin lakatamin si tamachakxai tuchi tanajun.
11 Pus ju quitꞌin acsni jantu lai icmachakxani ju ixchivinti ju apumatam pus tachi ju va makat amachakach aquilaktsꞌinaꞌ.
Chai ju tꞌajun chiviniꞌ va amachakach makat iclhiulai vachuꞌ.
12 Para ni slivasalh lacꞌasqꞌuinatꞌit ju lhakꞌailaktsꞌin ju xtꞌakꞌa ju Spiritu Santu pus yuchi ju asqꞌuinitꞌit ta yu laich apꞌuꞌaktꞌaiꞌuyaꞌitꞌit ju yuꞌunch ju talhilacaꞌanta ju Cristo ni palai catalhilaksi ju yuchi.
13 Pus ju chivinin ju chivinti ju jantu aktam ixchivininta pus chach sqꞌuinilh ju Dios ni laich vachuꞌ camavasala.
14 Pus ju quitꞌin ni actꞌachivinilh ju Dios laca tuꞌuꞌ chivinti ju jantu aktam icchivininta pus ju quiꞌalhunut tꞌajun nonaꞌ para jantu iccꞌatsai tuchi ictꞌajun nonaꞌ.
15 Pus tasqꞌuini ni chani aclalh.
Actꞌachivinaꞌ ju Dios laꞌixlhichux ju quiꞌalhunut.
Para laquinchivinti.
Acmilhpayaꞌ laꞌixlhichux ju quiꞌalhunut.
Para laquinchivinti.
16 Pus ni va lakꞌayayatꞌit ju Dios laꞌixlhichux ju miꞌalhunutꞌan laca tuꞌuꞌ chivinti ju jantu aktam ixchꞌivinatꞌit pus ju mintꞌalapanac ju jantu machakxai ju anuꞌ chivinti tas laich caxtaknilh vachuꞌ lakꞌailaktsꞌiuch ju Dios.
Jantu lai ni jantu machakxai tuchꞌi naꞌun.
17 Pus ju uxintꞌi vasalh tꞌaꞌun xtakniniꞌ lakꞌailaktsꞌiuch ju Dios para ju tatꞌajun kꞌasmatnin tulai apuꞌaktaijucan ni jantu lai tamachakxai tuchꞌi naꞌun.
18 Pus ju quitꞌin icxtakni lakꞌailaktsꞌiuch ju Dios ni palai lhu icchivinin ju chivinti ju jantu aktam icchivininta.
Palai jantu ju uxijnan.
19 Para laꞌixtalhavat ju talhilacaꞌanta ju Jesús palai kꞌox iclhiulai ni acchivinilh mas va lakaquis chivinti ju lai machakxacan ni laich acꞌamalaninilh ju aliꞌin.
Palai jantu kꞌox iclhiulai mas lakacau milh cava ju acchivinilh lacatuꞌuꞌ chivinti ju jantu aktam icchivininta chai ju jantu tamachakxai ju aliꞌin.
20 Jantu chun alacpꞌastꞌacnantꞌit ji quiꞌalakꞌavin tachi ju tam askꞌatꞌa ju jantucaꞌ kꞌox alacpastacnan.
Alai alacpꞌastꞌacnantꞌit tachi ju tam kꞌaya lapanac ju acꞌatsanantach.
Va ixlacata ju miꞌalactuꞌuntiꞌan chunch atsꞌucꞌutꞌit tachi ju tam askꞌatꞌa ju va tsꞌiquicaꞌ ju jantucaꞌ pastꞌacꞌa ju tuꞌuꞌ macxcai.
21 Pus ju laꞌixlhamapꞌaksin Dios ju makꞌanch istsꞌokcanta najunta ni ma chanich ixnajun ju Dios:
“Ma caꞌalacxakꞌalayaꞌ ju ani lapanacni laꞌixchivintiꞌan ju amachakꞌan alacatam.
Chai ju yuꞌunch ma jantu lai catamachakxayaꞌ ixchivintiꞌan.
Para nin chunch ma jantu catakꞌasmatniputunaꞌ ju Dios”.
Chunch ju naulh ju Dios laꞌixꞌalhiqui.
22 Pus ju chunch lai acmachakxa ni jantu axakꞌalai ju Dios ju talhilacaꞌanta yuchi lacatuꞌuꞌ chivinti ju jantu tamachakxai.
Alai yuꞌunch ju axakꞌalacan lacatuꞌuꞌ atumpa chivinti ju lana jantu lai taꞌalacaꞌinin.
Tsꞌa ma catatalhanalh chai cataꞌalacpastacnalh.
Para acsni noncan ixchivinti Dios laꞌixchivintiꞌan ju anch tavilanalh pus aꞌaktaijucan ju talhilacaꞌanta ju Jesús.
Jantiyuꞌ ni va caꞌapumapastꞌacꞌanicalh ju lana jantu lai talacaꞌi.
23 Pus acsni tꞌakꞌaixtꞌokꞌatꞌit minchuxꞌan ju lhilacꞌapꞌinatꞌit ju Cristo chai tsꞌucꞌuyatꞌit chivinin ju chivinti ju jantu tamachakxai ju aliꞌin chai ni catatanucha ju jantucaꞌ talhilacaꞌanta ju Cristo u ju jantucaꞌ tamachakxai ixchivinti Dios ja jantu lai catanaulh ni ca va lakachapunin untꞌatꞌit.
24 Para ni minchuxꞌan tꞌonatꞌit nonin ixchivinti Dios chai catanucha pumatam ju jantucaꞌ lhilacaꞌanta ju Jesús u tam xamatiꞌ ju jantu machakxai ixchivinti Dios pus laminchivintiꞌan capumachakxayaꞌ ni alactuꞌunuꞌ junita chai caꞌalacpastacnanaꞌ.
25 Chai capucꞌatsakꞌoyaꞌ tachi chun ju alactuꞌunti ju makꞌata laꞌixꞌalhunut.
Chai catakꞌentayaꞌ ni calakꞌayayaꞌ vachuꞌ ju Dios chai cajunach ni yuchi ju Dios ju xakꞌaich.
Chai canonach ni slivasalh tꞌajun ju Dios lamilhiꞌuxijnan.
Tachi chun ju taxtokni kꞌoxich anavitꞌit
26 Pus chanich iclajumputunau.
Acsni tavanan atꞌakꞌaixtꞌokꞌaꞌitꞌit pus ju pumatamin lamilhiꞌuxijnan caꞌatꞌamilhpaputunach ju aliꞌin.
Ju apumatam alin tuchi amalaniputun ju aliꞌin.
Ju apumatam ajumputun ixchivinti Dios.
Apumatam chivimputun ju chivinti ju jantu aktam ixchivininta.
Chai ju apumatam va malakpusuputun ju anuꞌ chivinti.
Para tachi chun ju naviyatꞌit chunchach ju alayaꞌitꞌit ta yu laich apꞌuꞌaktꞌaiꞌuyaꞌitꞌit ju aliꞌin ni palai catalhilacaꞌalh ju Jesús.
27 Acsni alin ju lapanacni ju tachivimputun ju chivinti ju jantu aktam tachivininta pus tasqꞌuini ni va pumatꞌui u pumatꞌutu catachivinilh.
Para va pumatamin pumatamin.
Chai vachuꞌ tasqꞌuini ni caꞌalilh pumatam ju camalakpusuyach ju anuꞌ chivinti.
28 Para lacatalhavat ni matiꞌ tichi chavaich ju laich camalakpusu ju anuꞌ chivinti pus chach alai va sek tavi ju anuꞌ ju chivimputun.
Chach tꞌachivinilh ju Dios va isꞌakstu laꞌixꞌalhunut.
29 Chai vana va chun ju tanajun ixchivinti Dios.
Tasqꞌuini ni va pumatꞌui u pumatꞌutu ju catachivinilh.
Para va pumatamin pumatamin.
Chai ju aliꞌinch catalaktsꞌintanu ju ixchivintiꞌan u sok u jantu.
30 Chai ni alin apumatam ju tuꞌuꞌ masunita ju Dios pus chach mamacta ixchivinti ju tꞌajun chiviniꞌ ni laich cachivinilh ju va acsnicaꞌ mapastꞌacꞌanicanta ju tuchi canonaꞌ.
31 Pus tachi chun ju uxijnan ju xtꞌaknicꞌantꞌatꞌit ixlhakꞌailaktsꞌin ju Spiritu Santu ni laich nonatꞌit ixchivinti Dios laich achꞌivinkꞌoyaꞌitꞌit.
Para va pumatamin pumatamin.
Chai ju chunch minchuxꞌan alaniyaꞌitꞌit aliꞌ ixchivinti Dios chai minchuxꞌan palai alhilacꞌapꞌinaꞌitꞌit ju Cristo.
32 Pus ju xtaknicanta ixlhakꞌailaktsꞌin ju Spiritu Santu ni laich najun ixchivinti Dios laich pacxan pantsꞌiquis.
Jantu tasqꞌuini ni lanach cachivinilh acsni mapastꞌacꞌanican tuꞌuꞌ.
33 Ju Dios jantu chunch manavini tam xamatiꞌ ni jantu kꞌachani ju yuchi ni na pumalhu catachivinilh ju vaktam.
Ju yuchi kꞌachani acsni va pumatamin catachivinilh.
Chani talai tachi quilhmacchux ju talhilacaꞌanta ju Jesús.
34 Tachi chun ju chakolun lamilhiꞌuxijnan va sekch catatavi lacatalhavat.
Jantu axtaknicanta lhamapꞌaksin ni laich catachivinilh.
Ju yuꞌunch va calhijuncanaꞌ ni chunch ju najun laꞌixchivinti Dios ju tsꞌokcanta makꞌanch.
35 Chai ni tuꞌuꞌ ju machakxaputun xamatiꞌ pus chach sacmicha ju istꞌatsucunuꞌ laꞌixchakaꞌ.
Na lhimaxan cava ni va cachivinilh ju tam chakoꞌulh junta kꞌaixtokcan.
36 Tachi ju layatꞌit tachi ju va nonatꞌit ni uxijnan ju pꞌulhnan xanonatꞌit ixchivinti Dios.
Mas jantu.
Chai tachi ju va nonatꞌit ni matiꞌ aliꞌitni ju talhilacaꞌanta ju yuchi.
Pus ni chunch ju malacꞌasuyatꞌit tachi ju va nonatꞌit ni va uxijnan ju lai nonatꞌit ta yu lhijun ni canavicalh lacatalhavat.
37 Pus ju lamilhiꞌuxijnan ni taꞌalin ju tanajun ni axtaknicanta ju ixlhakꞌailaktsꞌin ju Spiritu Santu ni laich najun ixchivinti Dios u ni taꞌalin ju tanajun ni axtaknicanta ju aliꞌ ixlhakꞌailaktsꞌin ju Spiritu Santu pus chach tacꞌatsa ni yuchach ju ani ju stavasalanti ixlhamapꞌaksin ju Jesús ju iclaꞌatsꞌoknuniyau ju ani lacaꞌalhiqui.
Chai tasqꞌuini ni chunch ju catanavi tachi ju iclajunau.
38 Para ni alin xamatiꞌ ju jantu lacaꞌiputun ni ixlhamapꞌaksin Jesús cava ju ani ju iclajuntau pus jantu aqꞌuiclacꞌaꞌitꞌit ju yuchi.
39 Pus chunchach ji quiꞌalakꞌavin.
Asqꞌuinitꞌitch ju Dios ni laich anonaꞌitꞌit ixchivinti.
Chai jantu akꞌalhtsꞌaꞌutꞌit ni xamatiꞌ cachivimputulh ju chivinti ju jantu aktam ixchivininta.
40 Para tachi chun ju anaviyaꞌitꞌit lacatalhavat tasqꞌuini ni chunch ju anavitꞌit tachi ju lhijunch.
Chai va pumatamin pumatamin ju cachivinilh.