Ju lhamapꞌaksin ixlacata ju lhivai ju lhikꞌailaktsꞌincanta ju santo
8
Pus ju chavai aclajunau ixlacata tuchi xaquilalhisacmiyau ixlacata ju lhivai ju lhikꞌailaktsꞌincanta ju santo.
Vasalh ni cꞌatsayau ni jantu tuꞌuꞌ ixtapalhni ju va santo.
Para ju lapanac ju najun ni na acꞌatsananta pus na lhitakꞌayai tuchi cꞌatsai.
Para ju na amapaininin aktaijui ju ixtꞌalapanac ni lai palai catsuculh tachi ju kꞌachani ju Dios.
2 Ju tam lapanac ju najun ni na lai amachakxanan jantu slivasalh ni caꞌamachakxanalh tachi ju lhijunch ni camachakxa.
3 Para va tichi chavaich ju mapaini ju Dios pus ju Dios mispaich ni isꞌaskꞌatꞌa junita.
4 Pus ju chavai aclamavasalaniyau ixlacata ju lhivai ju lhikꞌailaktsꞌincanta ju santo.
Cꞌatsayau ni jantu tuꞌuꞌ ixtapalhni ju va santo.
Chai jantu pumalhu ju Dios.
Va pumatam.
5 Para ju lactꞌiyan chai ju ani lacamunutpaꞌ na tijlhu alin ju talhilaksi ju lapanacni tachi isdiosꞌan chai na tijlhu ju tatalhoni.
6 Para ju quijnanꞌan va lakatam ju quiDiosꞌan.
Yuchi ju xapai ju lhinaulh ixnavica tachi chun ju taxtokni.
Chai quintanavitan ju quijnanꞌan ni laich calakꞌayayauch ju yuchi.
Chai vachuꞌ va pumatam ju quiꞌucxtinꞌan.
Yuchi ju Jesucristo.
Chai yuchach ju navikꞌolh tachi chun ju taxtokni.
Chai yuchach ju quintaxtaknitan ju sastꞌi quiꞌatsucuntiꞌan.
7 Para jantu si tamachakxai ni va pumatam ju Dios.
Ju aliꞌin ju talhilacaꞌanta ju Cristo na tatalhonicaꞌ ju santo chai titanajuncaꞌ ni ca tachi ju va alin ixtachaput ju anuꞌ santo.
Pus acsni taꞌui ju yuꞌunch ju lhivai ju ixlhikꞌailaktsꞌincanta ju santo pus tachi ju va alactuꞌunti talhiulai.
8 Para jantu va ixlacata tuꞌuꞌ vaiti ju uyau ju kꞌox aquintapulhiulayan ju Dios.
Jantu lai palai kꞌox catipujumvi ni cavajiu u ni jantu.
Nin yuchi ni lai palai alactuꞌunin catipujumvi.
9 Para alaktsꞌintꞌitch.
Ju uxijnan lai uyatꞌit ju anuꞌ lhivai ju lhikꞌailaktsꞌincanta ju santo chai jantu talakꞌalhin lhiulayatꞌit.
Para jantu xcai ni capukꞌalhkꞌoslh apumatam ju jantucaꞌ kꞌox machakxai u talakꞌalhin cava u jantu ni caꞌulh.
10 Ju uxijnan machꞌakxayatꞌit ni jantu tuꞌuꞌ ju santo.
Para ju apumatam ju titalhonicaꞌ ju santo ni catalaktsꞌinan acsni makvilatꞌit lacamixa laꞌixpujitatꞌan ju talhilacaꞌanta ju santo ja jantu lai caꞌokxchokꞌomakꞌulh ju anuꞌ lhivai ju titalhonicaꞌ.
11 Pus ju uxijnan machꞌakxayatꞌit ni jantu tuꞌuꞌ ju santo chai jantu talakꞌalhin ni uyatꞌit ju lhivai ju ixlhikꞌailaktsꞌincanta ju santo.
Para jantu xcai ni va milacataꞌan caꞌalactuꞌunulh tam milhiꞌalakꞌavinꞌan.
Chai ju Cristo nilh ju ixlacata vachuꞌ.
Jantu va milacataꞌan miꞌakstuꞌan.
12 Pus ju uxijnan tachi ju va lactꞌuꞌuyatꞌit xajacha ju miꞌalakꞌavinꞌan va ixlacata ni naviyatꞌit ju tuꞌuꞌ ju talakꞌalhin talhiulai.
Chai ni talaktsꞌintayanch pus tanavich vachuꞌ.
Chai acsni lactꞌuꞌuyatꞌit ju yuꞌunch pus yuchi ju Cristo ju tucan lactꞌuꞌuyatꞌit.
13 Pus ni capukꞌalhkꞌosaꞌ tam quilakꞌau va ixlacaꞌatalh ni acꞌulh ju tuꞌuꞌ lhivai ju ixlhikꞌailaktsꞌincanta ju santo pus jantu tavanan actiꞌulh ju anuꞌ lhivai.
Ju chunch jantu lai acmalactuꞌuni tam quilakꞌau.