Tuchi lai tanavi ixtamalakachan ju Cristo
9
Ju quitꞌin ixtamalakachan ju Cristo icjunita.
Chai lai icnavikꞌojui tachi chun ju lai tanavi ju aliꞌin ixtamalakachan ju Jesús.
Ju quitꞌin vachuꞌ iclaktsꞌilh ju quiꞌucxtinꞌan Jesucristo tachi ju talaktsꞌinta tachi chun ju aliꞌin ixtamalakachan.
Chai mavasalata ju Cristo ni ixtamalakachan icjunita ni laich xalhilacꞌapꞌinatꞌit ju yuchi acsni xaclajunau ju ixchivinti.
2 Mas tanajun ju aliꞌin ni jantu ixtamalakachan Cristo icjunita para ju uxijnan cꞌatsꞌayatꞌit ni vasalh chunch icjunita.
Pus ni xalhilacꞌapꞌinatꞌit ju quiꞌucxtinꞌan Cristo laquinchivinti pus yuchi lhicꞌatsꞌayatꞌit ni ixtamalakachan Cristo icjunita.
3 Chai chunchach ju iclhakꞌalhtayanan va tichi chavaich ju quisacmi ni vasalh ixtamalakachan Cristo icjunita.
4 Acsni quintamavai ju yuꞌunch ju icꞌajuni ixchivinti Dios pus lai icꞌui chai lai ickꞌotꞌa tachi chun ju quintaxtakni.
5 Ni va caꞌixꞌalilh ju quiꞌamachakaꞌ pus lai xactꞌaꞌalh junta icꞌan amasuninin ixchivinti Dios.
Pus ni chunch ju talai ju aliꞌin ixtamalakachan ju Cristo chai ju Pitaluꞌ chai ju ixꞌapꞌisekꞌen ju Jesús pus vachuꞌ lai chunch xaclalh.
6 Ja va aquijnanchꞌas ju jantu lhijun ni acmacaju ju quilhichꞌalhcat quincꞌan chai aquilamavauch ni iclajunauch ixchivinti Dios.
7 Tis taropach ju laich calasa ni jantu caxtaknicalh ju ixtalhaja.
Chai ju tam achꞌananaꞌ ja jantu anch taxtuchokoi ju ixvaiti ju laꞌixlhichꞌalhcat.
Chai ju tam lapanac ni alin ju ixborregojni ja jantu cakꞌotꞌaꞌ ju ixleche ju ixborregojni.
8 Pus acsni iclajunau ju chunch jantu va ixchivinti tam quintꞌalapanac ju icnajun.
Para vachuꞌ chunch najun ju lhamapꞌaksin ju tsꞌoklh ju Moisés.
9 Pus chani najun laꞌixlhamapꞌaksin ju Moisés:
“Ma jantu amakꞌenkꞌatꞌanutꞌi ju tuꞌuꞌ ju mivacax acsni tꞌajun putayanaꞌ ju cebada acsni papꞌakxcan.
Chach sacꞌulh lacatsꞌunin”.
Chunch ju najun laꞌixlhamapꞌaksin ju Moisés.
Pus acsni naulh ju Dios ni chunch ju catsꞌoklh ju Moisés jantu va yuchi ju vacax ju ispastacta.
10 Alai naulh ju chunch ni laich camachakxayau ta yu lhijunch ni calanaviu laquiꞌatsucuntiꞌan.
Pus ju tanavi ixcuxtuꞌan laich catalhilaksich ni anch catasuchokoyaꞌ ju ixvaitiꞌan.
Chai vana va chun ju ixlakneknin cebada.
Ju yuꞌunch talhilaksich ni anch ju catasuchokoyach ju ixvaitiꞌan vachuꞌ.
11 Pus ju quijnan acsni iclajunau ju ixchivinti Dios pus tachi ju va icchꞌanauch ju anuꞌ chivinti lamiꞌalhunutꞌan.
Chai ja jantu lhijun ni aquilaꞌaktaijuch lacatsꞌunin ju laquimaktasqꞌuinit quincꞌan.
12 Ju aliꞌin amamakaꞌunin ni lai aktꞌaiꞌuyatꞌit laꞌixmaktasqꞌuinitꞌan ja va a ti quijnanch ju jantu lai aquintilaꞌaktaiju ju laquimaktasqꞌuinit quincꞌan.
Pus mas lhijunch ni chunch aquilaꞌulhtu para jantu tavanan tuꞌuꞌ iclasqꞌuinitauch ju uxijnan.
Alai va iclhilakꞌaꞌitauch ju quimakꞌalhkꞌajnat quincꞌan acsni ixꞌalin ju quimaktasqꞌuinit quincꞌan.
Ju chunch jantu tuꞌuꞌ lai catiꞌasastucnilh ju lapanacni acsni acnonau ju chivinti ixlacata ju Cristo.
13 Ju uxijnan cꞌatsꞌayatꞌit ni anch ju tasuchokoi ixvaitiꞌan tachi chun ju tachꞌalhcatnan laquimpujitatꞌan ju israelitanin juntau.
Chai vana va chun ju tamakchꞌalhcatnanch junta maknican ju atapacxat ju lhikꞌailaktsꞌincan ju Dios.
Vachuch anch ju tasuchokoi ju ixvaitiꞌan.
14 Pus vana va chun ju lhamapꞌaksinilh ju quiꞌucxtinꞌan Jesús.
Ju yuchi najun ni anch ju catasuchokoyach ju ixvaitiꞌan tachi chun ju tanajun ju chivinti ixlacata ju Cristo.
15 Para ju quitꞌin jantu tavanan icnavita ju chunch mas chunchach ju naulh ju Jesús.
Chai jantiyuꞌ ju iclalhiꞌatsꞌoknuniyau ju chavai ni chunchach ju aquilanaviniu ju quitꞌin.
Lana jantu kꞌox iclhiulai ni xamatiꞌ aquintaiꞌinilh ju quinkꞌachat ni laich iclajunau ju ixchivinti Dios chai jantu tuꞌuꞌ iclasqꞌuiniyau.
Pus ni va aclasqꞌuiniu ju tuꞌuꞌ pus palai kꞌox iclhiulai ni lanach alai va acnilh.
16 Pus acsni icnajun ju chivinti ixlacata ju Jesús jantu lai iclhitakꞌayai ni iccꞌatsai ni tasqꞌuini ni chunch ju aclalh.
Pus ni jantu acmuctaxtu ju ismasuca ju anuꞌ chivinti ca na aquimamakꞌalhkꞌajni ju Dios ni yuchach ju xaquixtakni ju ani lhichꞌalhcat.
17 Pus ni va quiꞌakstu cava ju icsacxtuta ju ani lhichꞌalhcat pus ca laich caꞌixꞌalilh ju quintalhaja.
Para jantu va quiꞌakstu ju icsacxtuta ju ani quilhichꞌalhcat.
Alai Dios ju quinavita ixlapanac chai quixtaknita ju lhichꞌalhcat ni acꞌajunilh ju lapanacni ixlacata ju istsꞌalh.
Yuchi ju Jesús.
Chai tasqꞌuini ni acmuctaxtuyaꞌ.
18 Pus mas quixtaknita ju ani lhichꞌalhcat ju Dios chai mas naulh ju Jesús ni anchach ju lai acvenchokolh para ju quitꞌin jantu icpulhajaputun ixchivinti Dios acsni icꞌajuni ju lapanacni ixlacata ju Jesús.
Chai ju quintalhaja yuchi ni na alin ju quinkꞌachat ni lai va chunch icꞌajuni ju lapanacni ixchivinti Dios.
19 Pus ju quitꞌin jantu ixlapanac icjunita tam xamatiꞌ ju va quintꞌalapanac junita.
Para icchꞌalhcatnani tachi chun ju lapanacni ni tsꞌa ma lai palai lhu catalhilacaꞌalh ju Jesús.
20 Acsni icꞌalactꞌavi ju quintꞌaꞌisraelitanin pus chunch iclai tachi ju talai ju yuꞌunch.
Ju yuꞌunch talhilaksi ju makꞌaniya ixlhamapꞌaksin ju Dios.
Pus vachuꞌ chunch icnavi tachi ju najun ju anch mas iccꞌatsai ni jantu tasqꞌuini ni vana chun acnavilh.
Para chunch iclai ni tsꞌa ma laich palai aquintakꞌasmatnilh acsni icꞌajuni ixlacata ju Cristo.
21 Chai acsni icꞌalactꞌavi ju yuꞌunch ju jantu tavanan tamispata ju makꞌaniya ixlhamapꞌaksin Dios pus jantu vachuꞌ chunch iclai tachi ju najun ju anch.
Para mas chunch iclai jantu icnajun ni jantu ictalhoni ju ixlhamapꞌaksin Dios.
Aktsꞌiya icnaviputun tachi ju najunta ju Cristo.
Para va chunch iclai ni tsꞌa ma palai lai aquintakꞌasmatnilh ju yuꞌunch acsni icꞌajuni ixlacata ju Jesús.
22 Acsni ictꞌaꞌucxuntꞌajun ju yuꞌunch ju jantucaꞌ kꞌox tamachakxai ixchivinti Dios pus vachuꞌ chunch ju iclai tachi ju talai ju yuꞌunch junta jantu tꞌalasai ixchivinti Dios.
Chunch ju iclai ni tsꞌa ma laich palai aquintakꞌasmatnilh acsni icꞌajuni ixlacata ju Jesús.
Tachi ju junitach ju kꞌantam kꞌantam pus chunchach vachuꞌ icmaktalacasui ju quitꞌin.
Tsꞌa ma laich catalhilacaꞌalh ju Cristo ju aliꞌin lapanacni ju chunch.
23 Chai icpunavi chunch ni palai lhu catalacaꞌiniyaꞌ ju ixchivinti Dios ixlacata ju Cristo.
Chai vachuꞌ laich acꞌaꞌaktaijuyaꞌ ju aliꞌin ixmakpitsica ju ixchivinti Dios.
24 Ju uxijnan cꞌatsꞌayatꞌit ta yu talai ju talalhajai laca tuꞌuꞌ atsꞌalhti.
Cꞌatsꞌayatꞌit ni ixchuxꞌan ju na taꞌatsꞌalai para va pumatam ju lhajai.
Pus chunchach vachuꞌ alatꞌit ju pumatamin ju uxijnan.
Chunch ju atsꞌucꞌutꞌit tachi ju laich alhaꞌayaꞌitꞌit ju anuꞌ ju caxtꞌakꞌaꞌ ju Dios ju lactꞌiyan.
25 Tachi chun ju tanaviputun talakmaskꞌatin laca tuꞌuꞌ atsꞌalhti slivasalh ni na talhistꞌacꞌach ju ixlacatunaꞌan ni na tachapunin catajunaꞌ.
Ju yuꞌunch chunch talaich ni taꞌalhajanamputun ni laich cataꞌamaklhtayanalh lakatam corona mas vatsꞌalhti catakꞌalhiyaꞌ ju anuꞌ corona.
Pus ja va a ti quijnanchꞌan jantu catilhistacvi ju quiꞌatsucuntiꞌan ni calhajayau ju quijnanꞌan lakatam corona ju jantu lai tavanan catakꞌalhiyaꞌ.
26 Pus ju tam tsꞌalh ju navi talakmaskꞌatin lacaꞌatsꞌalhti sok an junta lhcanicanta ni laich calhajayaꞌ.
Pus vachuꞌ chunch ju quitꞌin.
Chunch ju ictsucui tachi ju lhcata ju Jesús ni laich aclhajayaꞌ ju kꞌox ju alin ju lactꞌiyan.
Chai ju tam tsꞌalh ju navi talakmaskꞌatin ta yu laich capulhajayaꞌ acsni tꞌalasai tam istꞌatsꞌalh jantu va kꞌaya macꞌan.
Pus vachuꞌ chunch ju iclai laquiꞌatsucunti.
Slivasalh ictꞌalasai ju macxcai ju alin laquiꞌalhunut.
27 Quitꞌin quiꞌakstu ickꞌaichokoi ju macxcai quiꞌatalacpastꞌacꞌat.
Jantu iclakꞌaꞌi ni aquimalactuꞌuni ju macxcai ju alin laquiꞌalhunut.
Ni jantu chun aclalh pus ju Dios jantu aquintixtakniputulh ju quintalhaja ju lactꞌiyan mas xacꞌajunich ju lapanacni ju ixchivinti.