Amapꞌaksinti ixlacata ju tamakꞌaxtꞌokꞌat
7
Pus ju chavai aclajunau ixlacata ju anuꞌ taxtokni ju xaquilasacmiyau acsni quilaꞌatsꞌoknuniu.
Pus tachi ju tꞌajun tapasanaꞌ ju chavai lamiꞌatsucuntiꞌan pus na kꞌox cava ni jantu catamakꞌaxtoklh ju tam tsꞌalh.
2 Para va ixlacaꞌatalh ni na lhu catalhava ju alactuꞌunti ni jantu catamakꞌaxtokcalh pus palai kꞌox cava ni pumatamin jokꞌat capacxalh ixꞌamachakaꞌ.
Chai ju pumatamin chakoꞌulh caꞌalilh ju istꞌatsucunuꞌ.
3 Ju jokꞌat catꞌatsuculh ju ixꞌamachakaꞌ tachi ju lhilhcata ju Dios.
Chai vana va chun ju tam chakoꞌulh.
Ju yuchi vachuꞌ catꞌatsuculh ju ixpapa tachi ju lhilhcata ju Dios.
4 Ju tam chakoꞌulh jantu lai catilhikꞌalhtsꞌaulh ju ixlacatuna ni alin ju ixpapa.
Chai vana va chun ju tam jokꞌat.
Jantu lai catilhikꞌalhtsꞌaulh ju ixlacatuna ni alin ju ixꞌamachakaꞌ.
5 Ju tam lapanac ju alin ixꞌamachakaꞌ jantu lhijun ni alacatam canavi ju ixputaman.
Para ju mintꞌiyunꞌan ni va tꞌascꞌaꞌapꞌutꞌunatꞌit lakatꞌutu lakatꞌatꞌi avilhchan ni laich palai atꞌachꞌivinintꞌit ju Dios pus laich.
Para acsni atꞌachꞌivinkꞌoyaꞌitꞌit ju Dios pus va lakatamch anavichꞌokꞌotꞌit ju mimputamanꞌan.
Ju va makꞌan alakꞌacꞌujtsꞌucꞌutꞌit ju va miꞌakstuꞌan jantu xcai ni cataꞌokxchokꞌon ju lhacaticuru chai alactꞌuꞌununaꞌitꞌit.
6 Pus jantu iclajunau ni lana atꞌamakꞌaxtꞌoktꞌit.
Va iclajumputunau ni laich atꞌamakꞌaxtꞌokꞌaꞌitꞌit ni chunch ju lapꞌutꞌunatꞌit.
7 Para ca vak tachi kꞌox cava ni chunchach ju catatsuculh ju chavai tachi chun ju jokꞌatni tachi ju quitꞌin ni va quiꞌakstu ictꞌajun.
Para jantu si axtakninicanta ju chunch atsucunti.
Ju pumatamin tam ju axtaknicanta ju isꞌatsucuntiꞌan.
8 Pus chani icꞌajumputun ju va isꞌakstucaꞌan tatꞌajun chai ju chakolun ju va animacontilacantach.
Vak tachi kꞌox cava ni va isꞌakstuꞌan catatsucukꞌalhi ju chavai tachi ju ictꞌajun ju quitꞌin ni va quiꞌakstu ictꞌajun.
9 Para ni jantu lai akꞌaichokocan isꞌakstuꞌan pus palai kꞌox ni caꞌaꞌicalh.
Palai jantu kꞌox ni na va catamakꞌalhkꞌajnalh ni lana jantu lai tatsucui ju va isꞌakstuꞌan.
10 Pus ju tuchi icꞌajuni ju tamakꞌaxtoknunch jantu va quiꞌakstu ju icnajun.
Para vana va chun ju naulh ju Cristo.
Pus icꞌajuni ju chakolun ju aꞌicanta ni jantu catamacaulh ju ixpapaꞌan.
11 Para ju tam chakoꞌulh acsni vaclhun taxtuich laꞌixchakaꞌ pus tasqꞌuini ni vasalh va isꞌakstu catsuculh.
U ni jantu va isꞌakstu ju tsucuputun pus chach lakꞌanchokolh ju ixpapa.
Chai tam jokꞌat jantu lai catixcoxtulh ju ixꞌamachakaꞌ.
12 Ju chavai aclajunau tuchi kꞌox iclhiulai ni anaviyaꞌitꞌit.
Para ju yuchi va quinchivinti quiꞌakstu junita.
Jantiyuꞌ ju Jesús ju naulh ni chunchach ju alatꞌit.
Pus ju tam quilakꞌauꞌan ju alin ixꞌamachakaꞌ ju jantucaꞌ lhilacaꞌanta ju Jesús chai ni tꞌalakꞌachanich pus jantuch catꞌalamacaulh.
13 Chai ju tam chakoꞌulh ni alinch ju ixpapa ju jantucaꞌ lhilacaꞌanta ju Jesús chai ni tꞌalakꞌachanich pus jantuch camacaulh.
14 Ju tam lapanac mas jantu lhilacaꞌanta ju Cristo para ni lhilacaꞌanta ju Cristo ju ixꞌamachakaꞌ pus ju Dios xtakni ju kꞌox isꞌatsucunti ju lapanac ni isꞌaskꞌatꞌa Dios junita ju ixꞌamachakaꞌ.
Chai vana va chun ju tam chakoꞌulh.
Mas jantu lhilacaꞌanta ju Cristo ju yuchi para ni lhilacaꞌanta ju Cristo ju ixpapa pus xtakni ju Dios ju kꞌox isꞌatsucunti ni isꞌaskꞌatꞌa Dios junita ju ixpapa.
Pus ni jantu chun cava pus jantu kꞌox cava ju isꞌatsucuntiꞌan ju isꞌaskꞌatꞌaꞌan.
15 Para ju tam chakoꞌulh ju jantu lhilacaꞌanta ju Cristo ni amaconananch pus chach ancha.
Jantu tapꞌastu ni catꞌatsuculh ju ixpapa ju lhilacaꞌanta ju Cristo.
Chai vana va chun ju tam quilakꞌauꞌan atsiꞌ ju lhilacaꞌanta ju Cristo.
Ni xcoxtucanta laꞌixchakaꞌ va ixlacaꞌatalh ni jantu lhilacaꞌanta ju Cristo ju ixpapa pus chach macaulh.
Ju Dios lacasqꞌuin ni lhikꞌach catsucu.
Jantu va lacalakꞌaiti.
16 Pus ju uxintꞌi ji chakoꞌulh ni tapꞌastu tꞌatsꞌucꞌupꞌutꞌun ju mimpapa ni lhilacꞌapꞌinch ju Jesús ja cꞌatsꞌaich ni aktsꞌiya camakꞌalhtaxtuyaꞌ ju Dios ju mimpapa ju va milacata.
Chai ju uxintꞌi ji lapanac ni tapꞌastu tꞌatsꞌucꞌupꞌutꞌun ju miꞌamachakaꞌ va ixlacaꞌatalh ni lhilacꞌapꞌinch ju Jesús ja cꞌatsꞌaich ni aktsꞌiya camakꞌalhtaxtuyaꞌ ju miꞌamachakaꞌ ju va milacata.
17 Ju uxijnan acsni tavanan xalhilacꞌapꞌinatꞌit ju Jesús va tuchi lhichꞌalhcat ju ixnaviyatꞌit ju pumatamin ju milhiꞌuxijnan pus chunchach ju atꞌailhipꞌitꞌit.
Va tuchi lhichꞌalhcat ju ixnavi ju pumatamin pumatamin ju uxijnan.
Chai chunch ju iclhamapꞌaksinin tachi chun ju talhilacaꞌanta ju Cristo.
18 Ni alin xamatiꞌ ju ixchꞌucꞌunicanta ju ixꞌaxtꞌakꞌa acsni tavanan lhilacaꞌalh ju Jesús pus chach chunch jonkꞌalhi.
U ni alin xamatiꞌ ju jantu ixchꞌucꞌunicanta ju ixꞌaxtꞌakꞌa acsni tavanan lhilacaꞌalh ju Cristo pus jantu calhinaulh ixchꞌucꞌuca.
19 Jantu lhitapalai ni chꞌucꞌucanta u jantu.
Va yuchi ju lhitapalai ni canaviu tachi ju najun ju Dios.
20 Ni jantu lhikꞌalhtsajui ju Dios ju anuꞌ lhichꞌalhcat ju ixtꞌajun naviniꞌ xamatiꞌ acsni lhilacaꞌalh ju Cristo pus jantu tasqꞌuini ni camapaxalh ixlhichꞌalhcat va ixlacaꞌatalh ni lhilacaꞌalh ju yuchi.
21 Ja va ixtꞌamocꞌantꞌa chai va xalapanac ixꞌunitꞌa acsni tavanan lhilacꞌapꞌi ju Cristo.
Pus jantu alhamakꞌanin.
Para ni cajunin ju miꞌucxtin ni lai atꞌaxtꞌuyaꞌ u laich amapꞌuspꞌitnin ju ixlhitamotan pus atꞌaxtꞌu.
22 Pus ju yuchi ju xalapanac ixjunita acsni tavanan lhilacaꞌalh ju Cristo pus ju chavai ju Dios laktsꞌin ni ixlapanac junita.
Jantu va ixlapanac akꞌantam ixtꞌalapanac.
Chai vana va chun ju jantu xalapanac ixjunita acsni tavanan lhilacaꞌalh ju Cristo.
Pus ju chavai ixlapanac Cristo junita.
23 Ju Dios na laklhu ju talhitamotan.
Pus yuchi alhicꞌatsꞌatꞌit ni yuchi ju miꞌucxtinꞌan junita.
Jantu va mintꞌalapanacniꞌan.
24 Ji quiꞌalakꞌavin ni jantu lhikꞌalhtsajui ju Dios ju lhichꞌalhcat ju ixtꞌonatꞌit navinin acsni tavanan lhilacꞌapꞌitꞌit ju Cristo pus atꞌailhipꞌitꞌit pumatamin ju uxijnan ju milhichꞌalhcatꞌan.
Chai acꞌatsꞌatꞌit ni Dios ju tatꞌavilan.
25 Pus ju chavai aclajunau ixlacata ju va isꞌakstuꞌancaꞌ tatꞌajun.
Pus ju Jesús jantu tuꞌuꞌ ju quijuni ixlacata ju yuꞌunch.
Para ju Jesús quiꞌaktaijulh laꞌixꞌamapaininti chai lai lhilaksiyatꞌit ju quinchivinti.
Pus ju quitꞌin aclajunau tuchi kꞌox iclhiulai ni catanavi.
26 Pus va ixlacaꞌatalh ni na quintamamakꞌalhkꞌajniyan ju chavai ju lapanacni yuchi iclhinajun ni ca kꞌoxich cava ni va isꞌakstuꞌan catatsuculh ju va isꞌakstuꞌancaꞌ tatꞌajun.
27 Para ju alinch ju ixꞌamachakaꞌ pus jantu capastaclh ni laich camacaulh.
Chai ju matich ju ixꞌamachakaꞌ pus tucaꞌ capuxcaulh ju ixꞌamachakaꞌ.
28 Para ni catamakꞌaxtoklh tam xamatiꞌ pus jantu alactuꞌunti ju navi.
Nin yuchi ju tam atsiꞌ jantu alactuꞌunti ju navi ni xaꞌican.
Para ni na va alin ju chavai ju quimakꞌalhkꞌajnatꞌan pus palai catamakꞌalhkꞌajnanaꞌ ni ixtꞌiyunꞌan tajunita.
Chai ju quitꞌin ni jantu iclacasqꞌuin ni na lhuch amakꞌalhkꞌajnantꞌit pus yuchi iclalhijunau ni palai kꞌox ni jantucaꞌ atꞌamakꞌaxtꞌoktꞌit.
29 Pus ji quiꞌalakꞌavin iclajunau ni jantu lhu avilhchan ju quintaxtaknitan ju Dios ju lai capunaviniyau ju ixlhichꞌalhcat.
Pus yuchi iclalhijunau ju ani.
Pus ju alin ixꞌamachakaꞌan jantu va yuchi ju catapastaclh.
Para vachuꞌ catanavilh cuenta ixtaxtokni Dios.
30 Chai ju na talackꞌalhun jantu va ixꞌamakꞌanit ju catapastackꞌalhi.
Chai ju na talackꞌachan jantu va ixkꞌachatꞌan ju catapastackꞌalhi.
Chai ju na taꞌalactamonan jantu va yuchi ju catapastackꞌalhi.
Jantu chun alatꞌit ni va xanavin lacamunutpaꞌ junita tachi chun ju ani taxtokni.
31 Chai jantu na lhuch achꞌalhcꞌatnantꞌit va ixlacaꞌatalh ni anaꞌuntꞌit ni na kꞌox atsꞌucꞌuyaꞌitꞌit ju ani lacamunutpaꞌ.
Jantu chunch alatꞌit ni jantu tuꞌuꞌ ju lai cajonkꞌalhi ju ani lacamunutpaꞌ.
32 Pus ju quitꞌin jantu iclacasqꞌuin ni tuꞌuꞌ caꞌalilh lamiꞌatsucuntiꞌan ju alhamakꞌaninintꞌit.
Pus ju tam tsꞌalh ju va isꞌakstucaꞌ tꞌajun na navi cuenta ju ixlhichꞌalhcat ju Dios.
Va puxcajui ta yu laich canavinilh ixkꞌachat ju Dios.
33 Para ju alin ixꞌamachakaꞌ vachuꞌ navi cuenta ju xataxtokni ju ani lacamunutpaꞌ.
Va puxcajui ta yu laich kꞌox caputꞌalalhiꞌalh ju ixꞌamachakaꞌ.
34 Vachuꞌ na tam ju isꞌatsucunti ju tam chakoꞌulh ju alin ixpapa chai tam atsiꞌ ju va isꞌakstucaꞌ tꞌajun.
Pus ju va isꞌakstucaꞌ tꞌajun na navi cuenta ju ixtaxtokni ju ixꞌucxtin Dios.
Va puxcajui ta yu laich salaka capujunlh ju ixlacatuna chai chux ixꞌacꞌatsanti laꞌixmacni Dios.
Para ju alin ixpapa vachuꞌ navi cuenta ju ixtaxtokni ju ani lacamunutpaꞌ ta yu laich kꞌox caputꞌalalhiꞌalh ju ixpapa.
35 Pus iclapujunau chunch ni va iclaꞌaktaijuputunauch.
Jantiyuꞌ ni va aclapumakꞌantalhanaputu laquilhamapꞌaksin.
Va iclajunau ta yu lai kꞌox atsꞌucꞌuyaꞌitꞌit tachi ju kꞌachani ju Dios chai jantu tuꞌuꞌ catasastꞌucꞌan.
36 Para ni alin pumatam xapai ju alin ju istsiꞌ ju tꞌajun takꞌayanaꞌ chai na tamakꞌaxtokputun chai ju xapai cꞌatsai ni palai kꞌox cava ni catamakꞌaxtoklh pus jantu talakꞌalhin canavi ni caxtaklh ju istsiꞌ.
Chach tamakꞌaxtoklh.
37 Para na kꞌox navi ju tam xapai ju va lakatam navita ju ixꞌalhunut chai ixlhichux ixꞌalhunut najunta ni jantu catixtaklh ju istsiꞌ ju va chavai.
Chai ju istsiꞌ ni tucaꞌ tamakꞌaxtokputun pus yuchi jantu lhixtaknicanta ju tam tsꞌalh.
38 Pus kꞌox navi ju tam xapai ju caxtꞌakꞌaꞌ mas chavai ju istsiꞌ.
Para palai kꞌox navi ju jantu caxtꞌakꞌaꞌ ju va chavai lana ju istsiꞌ ni va tꞌoncan makꞌalhkꞌajnanca.
39 Ju lhamapꞌaksin najun ni jantu lai catimacaulh ju ixpapa ju tam chakoꞌulh acsni tꞌajuncaꞌ ju istꞌatsucunuꞌ.
Para acsni va caniyach ju istꞌatsucunuꞌ pus ju acsnich ju anuꞌ chakoꞌulh lai catꞌatamakꞌaxtokchokolh va tichi chavaich ju cakꞌachanilh.
Va yuchi ni vachuꞌ calhilacaꞌalh ju Jesús ju anuꞌ lapanac.
40 Para icnajunch ni palai lhikꞌach cajunlh ju isꞌatsucunti ni va isꞌakstu ju catsuculh ju chavai.
Chai iclhiulai ni vachuꞌ chun ju najun ju Spiritu Santu.