22
―Quiꞌalakꞌavin chai ju uxijnan ju lhinonatꞌit sia quijnanꞌan ju israelitanin juntau.
Aquilakꞌasmatniuch.
Va iclajumputunau tuchi icnavita.
2 Chai acsni takꞌasmatlh ni ixꞌaxakꞌalacan laꞌixchivintiꞌan lacalhihebreo pus palai sek tatava ju lapanacni.
Chai ju Pablo chani alacjuni:
3 ―Ju quitꞌin vachuꞌ icꞌisraelita.
Iclokꞌontacha lakꞌachakꞌan Tarso laxatꞌun Cilicia.
Para icquitakꞌayachilh ju ani Jerusalén.
Ju Gamaliel yuchi ju quiꞌamamakaꞌunuꞌ ixjunita.
Chai ju yuchi kꞌox quimalani chux ju ixlhamapꞌaksinꞌan ju makꞌaniya quilacpaꞌitniꞌan.
Chai ju quitꞌin ixlhichux quiꞌalhunut xacnavi tachi ju xacmachakxani ju ixkꞌachat ju Dios.
Chunch ju xaclai tachi ju uxijnan navipꞌutꞌunatꞌit ju chavai.
4 Ju quitꞌin vachuꞌ na xacꞌalhixcaji ju talhilacaꞌanta Jesús.
Chai xacꞌachꞌapai chai xacꞌatꞌalhnui ju jokꞌatni chai ju chakolun chai xaclhinajun ixmaknicaꞌan.
5 Ju xakꞌai pali chai chux ju yuꞌunch ju talhinajun laquilhiquijnanꞌan ju israelitanin juntau laich catajunin ni yuꞌunch ju quintaxtaknilh ju alhiqui ju xacꞌalhiꞌani ju quintꞌaꞌisraelitanin amachakꞌan Damasco.
Va xacꞌamputun puxconaꞌ ju talhilacaꞌanta Jesús ni laich tachꞌin acꞌalhimilh ju ani Jerusalén ni laich caꞌamamakꞌalhkꞌajnicalh.
Ju Pablo ajuni ju lapanacni ta yu lhilacaꞌalh ju Jesús
6 Pus ju quitꞌin icꞌalh.
Chai acsni xacꞌanta ju lacati chai xacchaꞌamputun vanin ju lakꞌachakꞌan Damasco pus kꞌatuncu ixjumputun.
Chai acsni iclhicꞌatsanalh lactꞌiyan ju xatapulhcuyacha.
Tapulhculh junta xacꞌantau.
Chai na pꞌas ju xamapulhcui.
7 Chai lana tin ictama lacatꞌun chai ickꞌasmatlh lakatam chivinti junta chani quijuni:
“Saulo.
Saulo.
Jantu alhimakchꞌapꞌu ju quilapanacni.
Acsni chꞌun u lai tachi ju va jun quitꞌin ju qꞌuilhimakchꞌapꞌui”.
8 Pus ju quitꞌin ickꞌalhtailh.
Icjuni:
“Tis chavaichꞌat ji ucxtin”.
Chai quijuni:
“Ju quitꞌin icJesús amachakaꞌ Nazaret.
Quitꞌinch ju qꞌuilhimakchꞌapꞌui”.
9 Pus ju xaquintatꞌaꞌanta ju lacati talaktsꞌilh ju maclhcu chai na kꞌox tatalhanalh.
Para jantu xatamachakxai ju ixchivinti tichi chavaich ju xaquintꞌachivinin.
10 Chai icjuni:
“Pus tijuch ju acnaviyaꞌ ji quiꞌucxtin”.
Chai ju yuchi quijuni:
“Akꞌostꞌaꞌulh.
Aꞌinchich ju lakꞌachakꞌan Damasco.
Anch ju aꞌuncꞌantꞌachich chux tuchi ju iclacasqꞌuin ni anaviyaꞌ”.
11 Pus ju quitꞌin jantu lai xacꞌalacꞌavanan ni va quilakpuchꞌapalh ju anuꞌ maclhcu.
Pus ju xaquintatꞌaꞌanta va quintamakchꞌapalhiꞌalh.
Quintalhiꞌalh ju lakꞌachakꞌan Damasco.
12 Ju anch ixtꞌajun pumatam lapanac ju Ananías ixjuncan.
Ju yuchi ixnavikꞌojui chux tachi ju najun laꞌixlhamapꞌaksin Moisés.
Chai chux ju istꞌaꞌisraelitanin amachakꞌan anch na kꞌox lapanac ixtalhiulai.
13 Pus ju yuchi quilakmilh.
Chai acsni taya vanin junta xacvi pus chani quijuni:
“Quilakꞌau Saulo alacꞌavanch”.
Pus ju anuch pantsꞌiquis lana laich icꞌalacꞌavanalh chai iclaktsꞌilh ju yuchi.
14 Chai ju yuchi quijunich ni ma Dios ju quisacxtulh.
Ma yuchach ju Dios ju ixtalakꞌayai ju makꞌaniya quilacpaꞌitniꞌan.
Chai ju yuchi ma quisacxtulh ni laich acmispanilh tuchi lacasqꞌuin ni acnaviyaꞌ.
Chai ma quisacxtulh ni aclaktsꞌinaꞌ ju istsꞌalh ju na salaka ixꞌalhunut.
Chai ma ackꞌasmatniyaꞌ ju ixchivinti.
Pus iclaktsꞌilh chai ickꞌasmatnilh.
15 Chunch ju xaquinavi ni ma lacasqꞌuin ju yuchi ni acꞌalacjunaꞌ chux ju lapanacni tuchi ju xaclaktsꞌin chai tuchi xackꞌasmatꞌa.
16 Chai astan va quisacmilh tijuch ju icpacxan.
Quijuni ni ackꞌostavi chai acꞌakpaxlh.
Chai aclhilacaꞌalh ju quiꞌucxtin Jesús.
Pus ju chunch ju yuchi aquixacaniyaꞌ ju quiꞌalactuꞌunti.
Chunch ju quijuni ju Ananías chai chunch ju icnavilh.
Dios ju xamalakachai ni caꞌajunilh ixchivinti ju jantu israelitanin tajunita
Ju Pablo tailhiꞌalh ju ixchivinti chai chani ajuni ju lapanacni:
17 ―Pus acsni icminchokolh ju ani Jerusalén pus icꞌalh tꞌachiviniꞌ ju Dios lacakꞌai pujitat.
Pus ju anch iclaktsꞌilh tuꞌuꞌ tachi ju va laquiꞌaklakꞌavanti.
18 Iclaktsꞌilh ju Jesús chai ju yuchi quijuni ni va tsꞌalhti actaxtulh ju ani Jerusalén.
Jantu aquintitalacaꞌiniyach ju quinchivinti ju amachakꞌan ani.
19 Para icjuni:
“Quiꞌucxtin ju yuꞌunch tacꞌatsai ni xacꞌan lakatamin lakatamin pujitat chai tachꞌin xacꞌalhiꞌan ju lapanacni ju ixtalhilacaꞌantan ju uxintꞌi chai xacꞌalakanekmai.
20 Chai acsni tamaknilh ju Stipan ju milapanac ixjunita pus vachuꞌ quitꞌin anch xacmakya chai na kꞌoxich xaclhiulai ni tamaknilh.
Chai quitꞌin ju iclakmakꞌa ju ixpumpuꞌan ju taꞌamakninilh”.
Chunch icjuni ju Jesús.
21 Para ju yuchi quijuni ni acꞌalh.
Aquimalakachayach na makat ni laich acꞌalacjunaꞌ ju ixchivinti ju yuꞌunch ju jantu israelitanin tajunita.
Chunch ju quijuni ju Jesús.
Ju comandante lhiꞌalh ju Pablo
22 Pus ju ixtalhavat lapanacni tus acsnich na kꞌox takꞌasmatnilh ixchivinti ju Pablo.
Para acsni naulh ju chunch pus ju yuꞌunch na pꞌas ixtalactꞌasai.
Ixtanajun:
―Amaknitꞌich ju ani ya jokꞌat.
Jantuch lhijun ni vanach catsuculh.
23 Pus va tachi tsꞌau ixtalactꞌasai.
Tamaxtulh ju ixcujuꞌan tachi ju va catamakniyach lana chai kꞌom tatantamacstꞌalh ju tꞌun.
24 Pus ju comandante acsni laktsꞌilh ni chunch ixtalai ju lapanacni pus lana ajuni ju ixtaropajni ni catalhiꞌalh ju Pablo pulacni lacacuartel chai cataꞌulanilh.
Ju chunch tsꞌa ma cachivinilh.
Canaulh tuchi ixtalhixcajich ju lapanacni.
25 Pus talhiꞌalh.
Tamakchꞌilh lacaꞌaxtꞌakꞌan ni ixtanajun ni cataꞌulaniyaꞌ.
Pus ju acsnich ju Pablo juni ju xacapitán ju vanin ixya:
―Ca jantu lhijun ju lhamapꞌaksin ni lai quilalakanekmau ni vachuꞌ iclatꞌaputekꞌecantauch ju uxijnan ju romanonin untꞌatꞌit chai jantucaꞌ quilaktsꞌinicanta ju quilhamakꞌan u alin ju quintalakꞌalhin u jantu.
26 Pus acsni kꞌasmatlh ju ani ju xacapitán pus ju yuchi alh juniniꞌ ju comandante.
Junich:
―Kꞌox apꞌastꞌactꞌi ju tuchꞌi aꞌulhtꞌuyaꞌ ju anuꞌ lapanac.
Ju yuchi vachuꞌ quintatꞌaputekꞌecantan ju quijnanꞌan ju romanonin juntau.
27 Pus ju acsnich ju comandante lakꞌalh ju Pablo chai junich:
―Aqꞌuiꞌunch.
Ja quilatꞌaputekꞌecantau ju quijnan ju romanonin icjuntau.
Chai ju Pablo naulh:
―A.
28 Pus ju comandante kꞌalhtailh.
Junich:
―Ju quitꞌin na laklhu icmapalalh ni laich actꞌaputekꞌecalh ju romanonin.
Para ju Pablo juni:
―Ju quitꞌin tus acsni tavanan ictsuculh ictꞌaputekꞌecanta ju romanonin ni vachuꞌ chunch ixjunita ju quimpai.
29 Pus ju acsnich lana tamacoꞌulalh ju yuꞌunch ju ixtaꞌulaniputun.
Vachuꞌ ju comandante na talhanalh ni machakxalh ni vachuꞌ ixtꞌaputekꞌecanta ju romanonin ju Pablo chai ju yuchi ixlhinajunta ixmakchꞌica ni laich caꞌulanicalh.
Ju Pablo lhiꞌancalh junta ixtatakꞌaixtokta ju ixꞌucxtinin ju israelitanin
30 Pus ju comandante va iscꞌatsaputun istavasalanti tuchi talakꞌalhin ju ixtalhichivimakꞌan ju israelitanin.
Pus ni tuncunchokolh ju yuchi alactꞌasanilh ju xalackꞌajin palijni chai ixchuxꞌan ju ixꞌucxtinin ju israelitanin.
Chai lhinaulh ixmakxkꞌotca ju Pablo chai astan takꞌailhimilh junta ixtatakꞌaixtokta ju yuꞌunch.