Ju Pablo alh ju lakꞌachakꞌan Jerusalén
21
Chai acsni icꞌalacmacaju ju quilhiꞌalakꞌavin laꞌixmacni Jesús pus ictaju lacabarco.
Va sok icꞌau tus icchaꞌau ju xalacatꞌun Cos.
Ni alakatam avilhchan jumpa icchaꞌau ju xalacatꞌun Rodas.
Ictaxtu ju Rodas.
Icchaꞌau ju lakꞌachakꞌan Pátara.
2 Ju anch iclhitaju alakatam barco chai ju yuchi ixꞌamputun ju xalacatꞌun Fenicia.
Pus ictaju.
Icꞌauch.
3 Acsni icchaꞌauch vanin laxalacatꞌun Chipre pus iclhitapasau laꞌixlhicana.
Icchaꞌauch ju xalacatꞌun Siria chai anch ju astacnalh ju barco ju lakꞌachakꞌan Tiro ni ixpꞌuxniputuncan ju ixtacꞌucꞌat.
Pus ju quijnan ictacutchauch ju anch.
4 Chai ni icꞌalhitaju ju vachuꞌ ixtalhilacaꞌanta Jesús amachakꞌan anch pus icꞌalactꞌatolhchau lakatujun avilhchan.
Pus ju Spiritu Santu ixꞌalacmavasalanilh tuchi catapasayaꞌ laꞌisꞌatsucunti ju Pablo acsni tavanan acꞌanau ju lakꞌachakꞌan Jerusalén.
Pus yuchi talhitapaininilh ni jantu caꞌalh.
5 Para acsni laktsalh ju lakatujun avilhchan ictaxtuch ju anch.
Chai chux ju amachakꞌan anch ju vachuꞌ ixtalhilacaꞌanta Jesús quintaquilaktsꞌimacajun laꞌixquilhtuꞌ alama.
Chux ju jokꞌatni chai ixꞌamachakaꞌan chai ju isꞌaskꞌatꞌan.
Chai ju anch ictaꞌaktsokotachauch chai ictꞌachiviniuch ju Dios.
6 Iclamacꞌamiuch chai iclalakapujuch chai ictajuch ju lacabarco.
Chai ju yuꞌunch taꞌanchokolh laꞌixlakchakaꞌan.
7 Chai ictaxtuch ju Tiro chai icꞌauch ju lakꞌachakꞌan Tolemaida.
Tus anch xacpuꞌanau ju barco.
Ju anch icꞌamacꞌamichau ju quilhiꞌalakꞌavin laꞌixmacni Jesús chai icꞌatꞌatolhchau ju yuꞌunch tam avilhchan.
8 Ni alakatam avilhchan jumpa ju Pablo chai ju quijnan ju xactꞌaꞌalhtanantauch ictaxtuch chai icmiuch ju lakꞌachakꞌan Cesarea.
Chai icchaꞌauch laꞌixchakaꞌ ju Pilipe ju ixnajun ixchivinti Dios.
Vachuꞌ ixlhipumatujunch ixjunita ju ixtaꞌaꞌaktaijunun laꞌixtalhavat ju ixtalhilacaꞌanta Jesús.
Pus laꞌixchakaꞌ ju yuchi ictolhchauch.
9 Ju yuchi ixꞌalin pumatꞌatꞌi isꞌatsiꞌin.
Va isꞌakstucaꞌan ixtajunita.
Chai ju yuꞌunch ixtanajun va tuchi chivinti ju ixꞌamamachakxani ju Dios.
10 Chai acsni lakalhu avilhchan icꞌatꞌatolhchau pus mincha laxaꞌestado Judea pumatam lapanac ju Agabo ixjuncan.
Ju Dios va tsa ixmamachakxani ju tuchi catapasayaꞌ.
11 Chai acsni quintalakminch ju quijnan pus chꞌapanilh ju iscinturón ju Pablo.
Chꞌanchꞌichokocalh laꞌixchꞌajaꞌ isꞌakstu chai makchꞌichokocalh.
Chai ajunich ju lapanacni:
―Chani ma najun ju Spiritu Santu.
Ju quintꞌaꞌisraelitaninꞌan amachakꞌan Jerusalén ma chunch ju cataꞌulhtuyaꞌ ju amanavin junima cinturón chai ma catamakꞌaxtakniyaꞌ ju yuꞌunch ju jantu israelitanin tajunita.
12 Pus acsni ickꞌasmatvich ju ani chivinti ju quijnan chai ju amachakꞌan anch pus kꞌasi icjuniuch ju Pablo ni jantuch caꞌalh ju lakꞌachakꞌan Jerusalén.
13 Para ju acsnich ju Pablo quintajunan:
―Tajuch ni va lackꞌalhunatꞌitch chai quilamaxcaniniyau ju quiꞌalhunut.
Ju quitꞌin jantu tuꞌuꞌ iclhiulai mas tachꞌin aquintanaviyanta ju lakꞌachakꞌan Jerusalén.
U mas aquintamakniyanta va ixlacata ni iclhilaksita ju quiꞌucxtinꞌan Jesús.
―Chunch ju quintajunan.
14 Chai ni jantu lai icmalacaꞌiniu pus va sek ictayau.
Va xacnonau:
―Chach navi ju quiꞌucxtinꞌan Dios tachi ju lacasqꞌuinch ju yuchi.
15 Chai acsni tapasalh ju anuꞌ avilhchan pus iclacatayauch ixꞌanca ju lakꞌachakꞌan Jerusalén.
Chai icꞌauch.
16 Chai quintatꞌaꞌan vachuꞌ ju aliꞌin ju vachuꞌ ixtalhilacaꞌanta Jesús amachakꞌan Cesarea.
Pus ju yuꞌunch ixtanajun ni anch actolauch laꞌixchakaꞌ pumatam lapanac ju Mnasón ixjuncan acsni acchaꞌanau ju Jerusalén.
Ju yuchi ixmintacha ju xalacatꞌun Chipre.
Chai ju yuchi makꞌanch ixlhilacaꞌanta Jesús.
Ju Pablo alh tꞌachiviniꞌ ju Jacobo
17 Chai acsni icchaꞌauch ju lakꞌachakꞌan Jerusalén pus ju quilhiꞌalakꞌavinꞌan laꞌixmacni Jesús va lhikꞌach quintaꞌamaklhtayanantanch.
18 Chai ni alakatam avilhchan jumpa pus ju Pablo quintatꞌaꞌanch laꞌixchakaꞌ ju Jacobo.
Chai chux ju yuꞌunch ju ixtalhinajun laꞌixpujitatꞌan vachuꞌ ixtatakꞌaixtokta ju anch.
19 Pus ju Pablo alacmacꞌami chai astan ajunkꞌo tuchi ixꞌanavinita ju Dios ju yuꞌunch ju jantu israelitanin tajunita acsni tavanan ixꞌajuni ixchivinti Dios ju Pablo.
20 Pus ju yuꞌunch acsni takꞌasmatnilh ixchivinti ju Pablo talakꞌayalh ju Dios.
Para astan tajuni:
―Kꞌoxich ji quilakꞌau.
Para ju uxintꞌi laktsꞌintꞌa ni na lhu lana ju quintꞌaꞌisraelitaninꞌan ju talhilacaꞌanta Jesús ju chavai.
Para ju yuꞌunch tanajuntacaꞌ ni aktsꞌiya tasqꞌuini ni canaviyau tachi ju ixnajun ju Moisés laꞌixlhamapꞌaksin.
21 Pus ju yuꞌunch va taquikꞌalhakꞌasmatninch ju uxintꞌi ni ma va alacmalaninin ju quintꞌaꞌisraelitaninꞌan ju tamakvilanalh junta tatꞌajun ju yuꞌunch ju jantu israelitanin.
Chai ma alhamalanininch ni jantuch vana catanavi tachi ju ixnajun ju Moisés.
Chai ma va aꞌunich ni ma jantu catiꞌachꞌucꞌucalh ju istsꞌalanꞌan nin yuchi ni ma lai catanavi tachi ju aktsꞌiya lanitau ju quijnanꞌan ju israelitanin juntau.
22 Pus tas calayau.
Ju anuch quintꞌaꞌisraelitaninꞌan ju talhilacaꞌanta Jesús catatakꞌaixtꞌokꞌaꞌ acsni catakꞌasmatꞌaꞌ ni tꞌantꞌach ju uxintꞌi.
23 Pus aclajunau tuchꞌi anaviyaꞌ.
Alin pumatꞌatꞌi lapanacni ju sia lhiquijnanchꞌan ju tatꞌatakꞌoxita ju chivinti ju Dios.
24 Pus alactꞌapꞌitꞌich ju yuꞌunch.
Chai chunch vachuꞌ alatꞌi tachi ju catalayaꞌ ju yuꞌunch ni aktam salaka cajunaꞌ ixꞌalhunutꞌan laꞌixmacni Dios.
Chai amapꞌalaꞌ ju uxintꞌi ixtapalh ju tuꞌuꞌ ju catamakniniyaꞌ ju Dios.
Chai ju chunch laich caꞌasitcanach.
Pus ju chunch catamachakxayach ixchuxꞌan ni jantu slivasalh tuchi takꞌasmatꞌach ju milacata.
Chai catalaktsꞌinan ni vachuꞌ muctꞌaxtꞌui laꞌixlhamapꞌaksin Moisés ju uxintꞌi.
25 Pus ju quijnan icꞌatsꞌoknunitauch ju yuꞌunch ju tamaklacaꞌanita ju Jesús ju jantu israelitanin tajunita.
Icꞌajuniuch ni jantu tasqꞌuini ni catanavi tachi ju ixnajun ju Moisés.
Va yuchi ni jantu cataꞌulh ju taxtokni ju lhikꞌailaktsꞌincanta ju tuꞌuꞌ ju laktsꞌincanta tachi ju dios.
Nin yuchi ni cataꞌulh ju acꞌalhni.
Nin yuchi ni cataꞌulh ju va pixtuchꞌimaknicanta.
Nin yuchi ni va catatꞌatsuculh ju jantu ixpapaꞌan u ixꞌamachakaꞌan.
Tachꞌin navicalh ju Pablo acsni ixvi laꞌixpujitatꞌan ju istꞌaꞌisraelitanin
26 Pus ju acsnich ju Pablo alactꞌaꞌalh ju anuch pumatꞌatꞌi lapanacni chai ni alakatam avilhchan jumpa alactꞌanavi tachi ju talai ju israelitanin ni salaka cava ju ixꞌalhunutꞌan laꞌixmacni Dios.
Chai astan ju Pablo tanu lacakꞌai ixpujitatꞌan ju istꞌaꞌisraelitanin.
Va alh ajuniniꞌ ju palijni tavanan calaktsayaꞌ ju avilhchan acsni lai catalhiminaꞌ ju atapacxat ju catamakniniyaꞌ ju Dios.
27 Pus talhcalh lakatujun avilhchan.
Chai acsni ixchaꞌamputunch ju ixlhilakatujun avilhchan pus ju aliꞌin israelitanin amachakꞌan Asia talaktsꞌilh ju Pablo lacakꞌai ixpujitatꞌan ju istꞌaꞌisraelitanin.
Pus lana tamaktalhkꞌamalh chux ju lapanacni chai tachꞌapalh ju Pablo.
28 Pꞌas ixtalaclatꞌasani ju istꞌaꞌisraelitanin.
Ixtanajun:
―Quintꞌaꞌisraelitanin aquilaꞌaktaijuch.
Ju ani ya lapanac yuchi ju amasuni ju lapanacni ixlhilacaputsꞌun ju lacamunutpaꞌ.
Na macxcai quintalhichivinan ju quijnanꞌan ju israelitanin juntau chai macxcai lhichivinin ju ixlhamapꞌaksin ju Moisés chai ju ani kꞌai quimpujitatꞌan.
Chai ixlhitijtꞌui ju yuchi va kꞌaya amanulh ju yuꞌunch ju jantu israelitanin lacpujitat chai va lakꞌalhilh ju ani kꞌai ixpujitat Dios.
29 Va talhinaulh chunch ni ixtalaktsꞌinta ju Trófimo amachakaꞌ Efeso ni ixtꞌaꞌalhtanan ju Pablo chai ju yuchi jantu israelita ixjunita.
Chai va ixtanajun ni ca ixtꞌatanun ju Pablo ju lacpujitat mas jantu.
30 Pus tachi chun ju amachakꞌan anch lana tatalhkꞌamalh.
Taꞌatsꞌalaminkꞌo chai tachꞌapalh ju Pablo.
Tamaxtulh makspaꞌ lacakꞌai pujitat.
Chai lana tamalacchaulh ju xamalhtich.
31 Ju yuꞌunch ixtamakniputun ju Pablo para quimacꞌatsanicalh ju comandante ni chux ju lapanacni amachakꞌan anch na ixtalaktalhkꞌamantach.
32 Pus ju anuꞌ comandante lana kꞌailhimilh ju xacapitán chaich ju ixtaropajni.
Taꞌatsꞌalalakmilh ju lapanacni.
Chai ixtalhavat lapanacni acsni talaktsꞌilh ju comandante chaich ju ixtaropajni pus tamamacta ixkꞌainekmaca ju Pablo.
33 Pus ju comandante lakꞌalh ju Pablo.
Lhinaulh ixchꞌapaca chai ixmakchꞌica lacakꞌantꞌui cadena.
Chai astan asacmilh ju lapanacni tichi chavaich ju Pablo chai tis talakꞌalhinch ju xanavi.
34 Para ju lapanacni na ixtalactꞌasai chai ju aliꞌin tumpa talakꞌalhin ixtanajun chai ju aliꞌin atumpa.
Pus ju comandante jantu lai ixmachakxai ju stavasalanti.
Pus alai va lhinaulh ixlhiꞌanca lacacuartel.
35 Para acsni tachaꞌalh junta talactsa talactsa junita lacacuartel pus lana tachꞌixlhiꞌalh ju taropajni va ixlacaꞌatalh ni na kꞌox ixtatalhkꞌamanta ju lapanacni.
36 Pus ju ixtalhavat lapanacni ju ixtachꞌakꞌokꞌata va pꞌas ixtachivinin.
Ixtanajun:
―Amaknitꞌitch.
Ju Pablo ajuni ju ixtalhavat lapanacni tuchi ixnavita
37 Chai acsni ixtamanuputunachalh ju Pablo lacacuartel pus ju yuchi xakꞌala ju comandante lacalhigriego.
Junich:
―Lamapainin ictꞌachivimputunan lacatsꞌunin.
Chai ju yuchi juni:
―Laiꞌas chꞌivinin ju lhigriego.
38 Ja jantaꞌas uxintꞌi ju anuꞌ lapanac amachakaꞌ Egipto ju ixtꞌalasaputun ju ucxtin.
Chai jantucaꞌ makꞌan amakꞌaixtoklh lakatꞌatꞌi milh lapanacni amaknininch chai alhiꞌalh makat junta matiꞌ xamatiꞌ tꞌajun.
Ja jantaꞌas uxintꞌi.
39 Pus ju Pablo junich:
―Ju quitꞌin jantiyuꞌ ju anuꞌ lapanac.
Ju quitꞌin icꞌisraelita.
Icꞌamachakaꞌ Tarso.
Lakatam kꞌai lakꞌachakꞌan laxalacatꞌun Cilicia.
Va ictapaininiyan ni alacꞌasqꞌuich ni actꞌachivinilh ju ixtalhavat lapanacni.
40 Pus ju anuꞌ comandante lacasqꞌuinilh.
Chai ju Pablo taya junta talactsa junita lacacuartel.
Chꞌixnilh ju ixmacaꞌ ju ixtalhavat lapanacni ni sekch catataya.
Chai acsni sekch tataya pus ju Pablo tsuculh axakꞌalanaꞌ lacalhihebreo.
Chani ajuni: