Ju Pablo alh laxatꞌun Macedonia chai Grecia
20
Pus ju astan acsni sekch va ju lakꞌaiti pus ju Pablo alactꞌasanilh ju lapanacni ju vachuꞌ ixtalhilacaꞌanta Jesús chai alacmapꞌaksilh.
Astan talamaklhtantailh.
Talamacꞌamilh.
Chai ju Pablo taxtulh.
Va ixꞌamputun ju xalacatꞌun Macedonia.
2 Ju yuchi alhtanatsuculh chux ju anuꞌ lacatꞌun chai ajuni ju amachakꞌan anch ju vachuꞌ ixtalhilacaꞌanta Jesús ni jantu tavanan catacaplh.
Astan ju yuchi alh ju xalacatꞌun Grecia.
3 Ju anch tolhcha lakatꞌutu malhquiyuꞌ.
Astan ixtajuputun lacabarco.
Ixꞌamputun ju xalacatꞌun Siria.
Para acsni cꞌatsalh ni ixtapacxantajitach ju istꞌaꞌisraelitanin pus naulh ni alai alacatamch capuꞌanaꞌ.
Chai minchokolh ju Macedonia.
4 Ju tatꞌaꞌalh ju Pablo tus ju xalacatꞌun Asia yuchi ju Sópater amachakaꞌ Berea chai ju Aristarco chai ju Segundo amachakaꞌ Tesalónica chai ju Gayo amachakaꞌ Derbe chai ju Tíquico chai ju Trófimo amachakꞌan Asia chai ju Timoteo.
5 Ju yuꞌunch pꞌulhnan taꞌalh chai tapacxancha ju Pablo ju lakꞌachakꞌan Troas.
6 Pus ju quitꞌin icLucas chai xacvi ju lakꞌachakꞌan Filipos.
Chai ju Pablo quilakmilh ju anch.
Chai acsni tapasalh ju anuꞌ cꞌatan acsni taꞌui ju xkapavati ju jantu macaꞌanican ju xatꞌin pus ictaxtuchau ju anch.
Ictajuch ju lacabarco chai icꞌalhtanantauch lakaquis avilhchan tus icchaꞌauch ju lakꞌachakꞌan Troas junta icꞌalakmiu ju aliꞌin ju pꞌulhnan tachaꞌalh.
Chai ju anch ictolhchau lakatujun avilhchan.
Malokꞌonicalh ju Eutico
7 Chai acsni chaꞌalh ju lhitumincu pus tatakꞌaixtoklh ju ixtalhilacaꞌanta Jesús ni va ixtaꞌui ju anuꞌ xkapavati ju ixpupastaccan ixꞌaninti ju Jesús.
Pus ju Pablo alacmapꞌaksi.
Chai ni ixnajunch ni cataxtuyach ni catuncunchokoyach pus na panicni ju xachivinin.
Ixꞌamalaninin tus paitat tsꞌis.
8 Pus junta tatakꞌaixtoklh ixlhitantalactꞌutu chakaꞌ ixjunita.
Chai na lhu ixꞌalin ju maclhcu.
9 Chai pumatam tsꞌalh ju Eutico ixjuncan ixvi lacaventana.
Chai ni na panicnich ixchivinin ju Pablo pus ju anuꞌ tsꞌalh lhtatalh.
Chai acsni na ilhtatavi pus tatistꞌalh ju laꞌilhtatat.
Tin pataju ixlhitantalactꞌutu chakaꞌ.
Quisaccalh xanin.
10 Pus ju Pablo soko takꞌalhtaju.
Putamalhch ju anuꞌ tsꞌalh chai lakatanu.
Astan alacjuni ju lapanacni:
―Tuntꞌi na va amakꞌaninintꞌit.
Ju Dios xtaknichokolh ju isꞌatsucunti.
11 Astan ju Pablo tocꞌachokolh ju talaclhman chai vailh.
Chai na panicni alactꞌachivintolhchokolh tus ixtꞌajun tuncuntilanaꞌ.
Acsnich ju alhch.
12 Pus ju anuꞌ tsꞌalh ju ixmalokꞌonichokocanta laꞌixꞌaninti lhiꞌancalh laꞌixchakaꞌ chai jantu va tilacatsꞌunin takꞌachalh ju lapanacni.
Ju Pablo taxtulh ju Troas. Alh ju Mileto
13 Pus ju quijnan pꞌulhnan ictaxtuch.
Ictajuch ju lacabarco.
Icꞌauch ju lakꞌachakꞌan Asón.
Ju Pablo xaquintajuntanch ni anchach aquintapakxtꞌokꞌanch.
Ju yuchi va chꞌajaxꞌalh.
14 Pus acsni ictꞌalapakxtokchau ju Pablo ju lakꞌachakꞌan Asón pus ju yuchi quintatꞌatajunch ju lacabarco.
Icꞌauch ju lakꞌachakꞌan Mitilene.
15 Chai acsni ictaxtuch ju anch ictajuchoko ju lacabarco.
Icꞌauch.
Chai acsni alakatam avilhchan jumpa icchaꞌauch vanin ju xalacatꞌun Quío.
Chai acsni tuncunchokopa icchaꞌauch ju lakꞌachakꞌan Samos.
Chai ictapasauch tus icchaꞌauch ju lakꞌachakꞌan Trogilio junta icꞌastacnauch lacatsꞌunin.
Chai ictaxtuchokoch.
Chai acsni alakatam avilhchan jumpa icchaꞌauch ju lakꞌachakꞌan Mileto.
16 Chunch ju iclauch ni jantu ixꞌamputun ju lakꞌachakꞌan Efeso ju Pablo ni jantu panicni ixtolhputun ju xalacatꞌun Asia.
Ju yuchi va isokꞌoi ni ixnajun ni va laich calalh ixmapasaputunacha ju lakꞌachakꞌan Jerusalén ju ixcꞌatanꞌan ju istꞌaꞌisraelitanin ju Pentecostés ixjuncan.
Ju Pablo alactꞌachivinilh ju xalackꞌajin amachakꞌan Efeso
17 Chai acsni ixvi ju Pablo ju lakꞌachakꞌan Mileto pus malakachalh chivinti ju lakꞌachakꞌan Efeso.
Lhinaulh ixꞌatꞌasanica ju yuꞌunch ju ixtalhinajun laꞌixpujitatꞌan ju anch.
18 Chai acsni talakchincha pus chani alacjuni:
―Ju uxijnan cꞌatsꞌayatꞌit ta yu xaclai acsni xaclatꞌavilau tus acsni tucan icchilh ju xalacatꞌun Asia tus chavai.
19 Quilalaktsꞌintauch ni na xacchꞌalhcatnani ju quiꞌucxtinꞌan Jesús ixlhichux quiꞌalhunut chai jantu xaclhitakꞌayai.
Chai cꞌatsꞌayatꞌit ni na xackꞌalhun acsni jantu xatalacaꞌiputun ju aliꞌin.
Chai cꞌatsꞌayatꞌit ni na xacmakꞌalhkꞌajnan va ixlacaꞌatalh ni na xaquintamamakꞌalhkꞌajniputun ju quintꞌaꞌisraelitaninꞌan.
20 Chai cꞌatsꞌayatꞌit ni iclajunkꞌoju chux tachi ju maktꞌasqꞌuiniyatꞌit ni laich kꞌox atsꞌucꞌuyaꞌitꞌit.
Lacatalhavat lapanacni xaclamasuniyau chai lacalakatamin ju minchakaꞌan.
21 Xaclajunau ju uxijnan ju vachuꞌ quintꞌaꞌisraelitanin untꞌatꞌit chai ju yuꞌunch ju jantu israelitanin tajunita ni amacꞌaꞌuntꞌit ju macxcai miꞌatsucuntiꞌan tachi ju lacasqꞌuin ju Dios chai alhilacꞌapꞌitꞌitch ju Jesús.
22 Chai ju chavai ju Spiritu Santu quijunita ni acꞌalh ju lakꞌachakꞌan Jerusalén mas jantu iccꞌatsai tuchi ju actapasayantach ju anch.
23 Va yuchi iccꞌatsai ni actꞌalhnucananta chai acmakꞌalhkꞌajnanantach.
Chunch ju quimavasalani ju Spiritu Santu acsni ictapasai ju lakatamin lakatamin lakꞌachakꞌan.
24 Para ju ani taxtokni jantu icnavi cuenta.
Nin quiꞌatsucunti jantu tuꞌuꞌ iclhiulai mas aquintamakni.
Va yuchi iclacasqꞌuin ni lai acnavikꞌoyach ju quilhichꞌalhcat.
Laich acmuctaxtuyach ju lhichꞌalhcat ju quixtaknita ju quiꞌucxtin Jesús.
Yuchi ni acꞌajunilh ju lapanacni ni laꞌixꞌamapaininti Dios laich catatakꞌalhtaxtulh chai jantu cataꞌalh ju lacajipi.
25 Ju uxijnan iclajuntau ni lhinomputun ju Dios laquiꞌatsucuntiꞌan.
Para ju chavai iccꞌatsai ni jantu xamatiꞌ ju minchuxꞌan ju uxijnan ju aquintilalaktsꞌinchoko tavanan ju ani lacamunutpaꞌ.
26 Pus ju chavai iclajumputunau ni caꞌalilh xamatiꞌ ju jantu lhilacaꞌanta ju Jesús pus jantu quintalakꞌalhin.
27 Jantu tavanan ju va jantu iclajuniu chux ixlhamapꞌaksin Dios.
28 Pus alhistꞌacchꞌokꞌocꞌantꞌit miꞌakstuꞌan.
Vachuꞌ alaclhistꞌactꞌit ju vachuꞌ talhilacaꞌanta Jesús.
Chunch alatꞌit ni yuchi ju Spiritu Santu ju taꞌulatan ni alhinonaꞌitꞌit sia yuꞌunch.
Pus tachi chun ju talhilacaꞌanta Jesús alhitamocanta laꞌixꞌacꞌalhni.
29 Para astan acsni actaxtuyach iccꞌatsaich ni catalakminan ju lapanacni ju catajunan ni jantu kꞌox ni lhilacꞌapꞌinatꞌit ju Jesús.
Ju yuꞌunch va tamakpitsiputunan ju uxijnan ju lhilacꞌapꞌinatꞌit ju Jesús.
Ju yuꞌunch va talaputun tachi ju tam maktiliꞌ ju na makpitsi ju borregojni acsni alakmin.
30 Chai vachuꞌ lamilhiꞌakstuꞌan catakꞌostayayaꞌ ju lapanacni ju catanonach ju chivinti ju jantu slivasalh.
Va cataꞌokxchokꞌoputunan ju uxijnan ju lhilacꞌapꞌinatꞌit ju Jesús ta yu laich apꞌuchꞌakꞌokꞌapꞌutꞌunaꞌitꞌit ju yuꞌunch.
31 Pus alacpꞌucꞌujtꞌitch.
Chai apꞌastꞌactꞌitch ni lakatꞌutu cꞌata tsꞌis chai tuncuj va tachi xaclamalaniyau.
Chai na xackꞌalhun acsni xaclamapꞌaksiyau.
32 Pus ju chavai ji quiꞌalakꞌavin iclamakꞌaxtakniyau ju Dios.
Chai ju laꞌixchivinti najun ni na amapaininin ju yuchi.
Pus ju anuꞌ ixchivinti na tachapun chai lai taꞌaktaijuyan ni jantu tavanan acꞌaptꞌit ju ixti ju Dios.
Chai ixlacata ju anuꞌ ixchivinti Dios vachuꞌ atꞌakꞌalhtꞌaxtꞌuyaꞌitꞌit tachi ju catatakꞌalhtaxtuyaꞌ tachi chun ju ixlapanacni.
33 Ju quitꞌin jantu iclhacchaꞌanilh ixtumin nin ixpumpuꞌ tam xamatiꞌ.
34 Para ju uxijnan cꞌatsꞌayatꞌit ni laquimacaꞌ quiꞌakstu xacpulhajai ju tuchi xacmaktasqꞌuini ju quitꞌin chai ju ixtamaktasqꞌuinita ju xaquintatꞌaꞌalhtananta.
35 Chunch xaclai ni laich aclaxtakniyau lakatam lhilaktsꞌintaiti ixlacata ju miꞌatsucuntiꞌan.
Ju chunch acꞌatsꞌayaꞌitꞌit ni tasqꞌuini ni achꞌalhcꞌatnantꞌit ni laich aꞌaktꞌaiꞌuyaꞌitꞌit ju alin ixmaktasqꞌuinitꞌan.
Chai ju chunch lai apꞌastꞌacꞌaꞌitꞌit ixchivinti ju quiꞌucxtinꞌan Jesús acsni ma naulh:
“Palai kꞌachan ju tam xamatiꞌ ju caxtakniyaꞌ tuꞌuꞌ apumatam lapanac.
Palai jantu ju va amaklhtayanan tuꞌuꞌ”.
―Pus chunch ju ajuni ju lapanacni ju Pablo.
36 Chai acsni nonkꞌo ju ani ju Pablo pus lana taꞌaktsokotalh.
Tꞌachivinilh ju Dios ju yuchi chai ixchuxꞌan ju ixtalhinajun laꞌixpujitatꞌan ju amachakꞌan Efeso.
37 Pus ju yuꞌunch slivasalh na takꞌalhulh.
Ixtapixtulakatanui ju Pablo.
Tamacchꞌuchꞌulh.
38 Slivasalh lhixcanilh ixꞌalhunutꞌan ju anuꞌ chivinti ju naulh ju Pablo acsni ajuni ni jantu tavanan catalaktsꞌinichokoyaꞌ ju ixꞌucxpuꞌ.
Pus ju astan taquilaktsꞌimuju ju lacabarco.