―Ja tanulh ju Spiritu Santu lamiꞌalhunutꞌan acsni xalhilacꞌapꞌinatꞌit ju Jesús.

Pus ju yuꞌunch taꞌakꞌalhtayanalh.

Tajuni:

―Jantu ickꞌasmatꞌau ni caꞌalilh ju Spiritu Santu.

3 Pus ju acsnich ju Pablo ajunich:

―Pus ja jantu laꞌixlhitapakaꞌut ju Jesús ju akpꞌaxtꞌatꞌit.

Chai ju yuꞌunch tajuni:

―Pus tachi ju xaꞌamakpaxanan ju Xivan chunch ju icꞌamakpaxanantauch.

4 Chai ju Pablo ajunich:

―Pus ju Xivan ixmakpaxai tam xamatiꞌ acsni ixmacajun ju macxcai isꞌatsucunti.

Para vachuꞌ ixꞌajuni ni catalhilacaꞌalh ju yuchi ju caminaꞌ astan.

Ju chunch va nomputun ni catalhilacaꞌalh ju Jesucristo ju ixnoncan camalakachatachilh ju Dios.

5 Pus acsni takꞌasmatlh ju chunch taꞌakpaxchokolh laꞌixtapakaꞌut ju kꞌai ixꞌucxtinꞌan Jesús.

6 Chai acsni alacmucꞌanilh ixmacaꞌ ju Pablo pus tanulh ju Spiritu Santu laꞌixꞌalhunutꞌan chai tachivinilh ju chivinti ju jantu aktam ixtachivininta chai vachuꞌ tanaulh ixchivinti Dios.

7 Pus ixchuxꞌan ixtachaꞌantach pumacautꞌui lapanacni.

8 Pus ju Pablo tachi lakatꞌutu malhquiyuꞌ ju antsuculh laꞌixpujitatꞌan ju istꞌaꞌisraelitanin.

Ixꞌamasuni ju lapanacni ixchivinti Dios chai lana jantu ixtalhanan.

Ixꞌalacjuni ju lapanacni ni lhinomputun ju Dios laꞌisꞌatsucuntiꞌan.

Chai ixꞌamalacaꞌiniputun ju ixchivinti Dios.

9 Para ju aliꞌin na pꞌas ixjunita ju ixꞌalhunutꞌan chai jantu ixtalacaꞌiputun chai na macxcai ixtalhichivinin ju ixti Dios laꞌixꞌucxlacapuꞌ ixtalhavat lapanacni.

Pus ju Pablo alacmacoyaulh ju yuꞌunch chai lacatam alackꞌailhiꞌalh ju yuꞌunch ju ixtalhilacaꞌanta Jesús.

Alhiꞌalh laꞌixpamamakaꞌun pumatam ju Tiranno ixjuncan.

Chai anch ixꞌalacmalani ju lapanacni tuncujun tuncujun.

10 Pus tachi lakatꞌui cꞌata ju ixꞌamalaninin ju chunch.

Chai ju chunch tachi chun ju amachakꞌan Asia takꞌasmatlh ju chivinti ixlacata ju kꞌai ucxtin Jesús.

Chux ju israelitanin chai ju jantu israelitanin.

11 Chai ju Dios ixtakni ixtachaput ju Pablo ni lai xanavi ju vasalh kꞌai lhamakꞌan.

12 Mas va ixpayu ju Pablo u tuꞌuꞌ pumpuꞌ ju ismusatocꞌai acsni ixchꞌalhcatnan ni ixꞌalhiꞌanicanch ju takꞌankꞌanin pus lana palai xaꞌalacnavi.

Chai ju lhacaticurulhni ixtataxtui laꞌixlacatunaꞌan ju lapanacni.

13 Pus ju acsnich ixtaꞌalin ju israelitanin alhicujnin.

Ju yuꞌunch va lacatam lacatam ixtaꞌucxuntꞌajun.

Chai ju yuꞌunch ixtanajun ni laich vachuꞌ ixmaxtui ju lhacaticurulhni laꞌixlacatunaꞌan ju lapanacni laꞌixꞌalhicujnutꞌan.

Para astan ixtanajun ni laich vachuꞌ catamaxtulh ju lhacaticurulhni laꞌixlacatunaꞌan ju lapanacni laꞌixtapakaꞌut ju kꞌai ucxtin Jesús.

Chai chani ixꞌajuni ju lhacaticurulhni:

―Iclajunau laꞌixtapakaꞌut ju anuꞌ Jesús ju najun ju Pablo ni catalhilacaꞌalh ju lapanacni.

Iclajunau ni atꞌaxtꞌuch laꞌixlacatuna ju lapanac.

―Chunch ixtanajun.

14 Pus ixꞌalin pumatam israelita ju Esceva ixjuncan.

Ju yuchi xakꞌai pali ixjunita chai ixꞌalin pumatujun istsꞌalan.

Pus ju yuꞌunch vachuꞌ chunch ixtanaviputun.

15 Para acsni chunch tajuni ju lhacaticuru pus ju anuꞌ lhacaticuru chani akꞌalhtayanalh.

Ajunich:

―Icmispaich ju Jesús chai iccꞌatsai tichi chavaich ju Pablo juncan.

Para ju uxijnan jantu alakꞌamispꞌacꞌanatꞌit.

16 Pus ju acsnich ju anuꞌ lapanac ju ixpacxanta ju lhacaticuru lana alactꞌalasa ju anuꞌ tsꞌalan chai alaclhajakꞌo.

Alaclhimakchꞌapulh tus alacmaꞌatsꞌala ju anuch lacachakaꞌ.

Va lackꞌaitsasaꞌunch ixtajunita acsni taꞌatsꞌalalh chai slivasalh na alacmacꞌatsanita.

17 Pus ju ani tacꞌatsakꞌo ju israelitanin chai ju jantu israelitanin ju ixtavilanancha ju lakꞌachakꞌan Efeso.

Pus lana na tatalhanalh ixchuxꞌan chai na ixtalakꞌayai ju kꞌai ucxtin Jesús.

18 Pus ju acsnich na lhu ju ixtalhilacaꞌanta Jesús tamilh nonin ju talakꞌalhin ju ixtanavita ni na ixtalhilacaꞌantacaꞌ ju alacnavinti.

19 Vachuꞌ na lhu ju ixtaꞌalhicujnun tamakꞌaxtakkꞌo ju ixlacꞌalhiquiꞌan chai alacxavakꞌo laꞌixꞌalacꞌavantiꞌan ixchuxꞌan.

Chai acsni aputekꞌecalh ixtapalh ju anuꞌ alhiqui ju alacxavacalh pus chaꞌalh cincuenta milh tumin ju plata ixjunita.

20 Pus ju chunch palai lhu xatalhilacaꞌan ju Jesús.

Lana ixlhichux ixꞌalhunutꞌan ju talhilacaꞌalh ju yuchi.

21 Pus acsni tapasakꞌo ju ani taxtokni pus ju Pablo ixnajun ni caꞌanaꞌ alaktsꞌiniꞌ ju ixtalhilacaꞌanta Jesús amachakꞌan Macedonia chai amachakꞌan Acaya chai cachaꞌanaꞌ tus Jerusalén.

Vachuꞌ ixnajun ni aktsꞌiya caꞌanaꞌ ju lakꞌachakꞌan Roma acsni cataxtuyanta ju Jerusalén.

22 Pus amalakacha ju Macedonia pumatꞌui ju ixꞌalactꞌachꞌalhcatnan.

Yuchi ju Timoteo chaich ju Erasto.

Para ju yuchi tolhchacaꞌ lakatꞌui lakatꞌutu malhquiyuꞌ ju xalacatꞌun Asia.

23 Pus ju acsnich alilh lakatam kꞌai laklakꞌaiti va ixlacaꞌatalh ni ixꞌajuncan ju lapanacni ixlacata ju Jesús.

24 Yuchi ju Demetrio ju taiꞌulalh ju lakꞌaiti.

Ju yuchi ixmaxtajanaꞌ plata ixjunita chai lacaplata ixlacxapalaxtui lactꞌicstꞌi pujitat tachi ixpujitat isdiosꞌan ju Diana ixjuncan.

Pus na lhu lapanacni ju ixtatꞌachꞌalhcatnan chai na lhu ixtapulhajai.

25 Pus ju Demetrio alacmakꞌaixtoklh ju ixlapanacni chai ju aliꞌin lapanacni ju vachuꞌ ixtalacxapalaxtui isdiosnin chai chani alacjuni:

―Quintꞌalapanacni ju uxijnan cꞌatsꞌayatꞌit ni na laklhu pulhajayau ju ani lhichꞌalhcat.

26 Para ju uxijnan laktsꞌintꞌit ju anuꞌ Pablo chai kꞌasmatꞌatꞌit tachi ju chivinin ju yuchi.

Ju yuchi va najun ni jantu vasalh dios ju tuchi navicanta lacamacaꞌ.

Chai na pumalhu ju xamalacaꞌini.

Chai jantu va yuchi ju amachakꞌan ani laquilakꞌachakꞌanꞌan Efeso para vachuꞌ ju amachakꞌan na lakalhu lakꞌachakꞌan laxatꞌun Asia ju xaquimalacaꞌini ju chivinti.

27 Pus ca na lhixcai ni caꞌalinaꞌ ju quivaitiꞌan ni lhu catalacaꞌiyaꞌ tachi ju najun ju Pablo.

Chai vachuꞌ jantu xtuꞌuꞌ calhiulacanaꞌ ju kꞌai ixpujitat quidiosꞌan Diana.

Ju chavai ni si talhilacaꞌan ju yuchi.

Chux ju amachakꞌan Asia chai chux ju lacamunutpaꞌ.

Para astan ca jantu catilakꞌayacalh ju yuchi.

―Chunch ajuni ju lapanacni.

28 Chai acsni takꞌasmatlh junima chivinti pus lana tatalhkꞌamalh.

Na talactꞌasakꞌo.

Ixtanajunch:

―Na kꞌai ju Diana quidiosꞌan ju quijnanꞌan ju amachakꞌan Efeso juntau.

29 Pus ju amachakꞌan anch lana va tꞌilhi tꞌilhi ixtalaich.

Pus ixtavilanancha ju Gayo chai ju Aristarco amachakꞌan Macedonia.

Ju yuꞌunch ixtatꞌaꞌalhtanan ju Pablo.

Pus ju lapanacni tachꞌapalh ju yuꞌunch chai taxakꞌamalhiꞌalh lacakꞌai chakaꞌ junta ixtatakꞌaixtꞌokꞌa ju lapanacni acsni ixꞌalin ju ixjuntaꞌan.

30 Pus ju Pablo ixꞌamputun tanunuꞌ lacatalhavat ni laich ixꞌaxakꞌala ni jantuch va lhu ixtatalhkꞌamalh para ju ixtalhilacaꞌanta Jesús jantu talacasqꞌuinilh.

31 Vachuꞌ ju aliꞌin xalackꞌajin amachakꞌan Asia ni ixꞌamigojni ixtajunita ju Pablo tamalakachanilh chivinti ni jantu caꞌalh talacasunuꞌ laꞌixtalhavat lapanacni.

32 Pus ju ixtalhavat lapanacni va tꞌilhi tꞌilhi ixtalaich.

Ju aliꞌin tam ixtanajun.

Ju aliꞌin tumpa ixtanajun.

Pus na lhu ju lapanacni jantu istacꞌatsai tuchi ixtalhitakꞌaixtꞌokꞌach.

33 Pus ju aliꞌin laꞌixtalhavat lapanacni tamavasalanilh ju lhamakꞌan ju pumatam lapanac ju Alejandro ixjuncan.

Chai ju istꞌaꞌisraelitanin tatisalhiꞌalh junta lai caꞌaxakꞌala ju lapanacni.

Pus ju yuchi tamacyaulh ni va sekch catava.

Va ixꞌajumputun ju lapanacni ni jantu cataxcailich ju israelitanin.

34 Para acsni tamispa ni israelita ixjunita ju Alejandro pus talactꞌasachokopa.

Tachi lakatꞌui hora ixtalactꞌasai.

Ixtanajun:

―Na kꞌai ju Diana quidiosꞌan ju quijnanꞌan ju amachakꞌan Efeso juntau.

35 Pus ju acsnich ju atsꞌoknuꞌ ju anch lakꞌachakꞌan alacjuni ni va sekch catatava chai chani alacjuni:

―Quintꞌalapanacni amachakꞌan Efeso tis chavaich ju jantu cacꞌatsa ni lhistꞌacꞌau ju ixpujitat ju kꞌai quidiosꞌan Diana.

Vachuꞌ lhistꞌacꞌau ju Diana ju patajuta ju lactꞌiyan.

36 Chai ni cꞌatsꞌayatꞌit ni slivasalh ju tuchi xaclajunau pus tasqꞌuini ni va sekch atꞌayatꞌit.

Jantu xtuꞌuꞌ anavitꞌit ni jantu pꞌulhnan kꞌox cꞌatsꞌayatꞌit tuchi ju alin.

37 Va kꞌai tachꞌin naviyatꞌit ju ani tayanalh lapanacni.

Ju yuꞌunch jantu tuꞌuꞌ takꞌalhaꞌuta ju laquimpujitatꞌan nin macxcai catalhichivinilh ju quidiosꞌan ju quijnanꞌan.

38 Pus ju Demetrio chaich ju ixlapanacni ju tatꞌachꞌalhcatnan ni catatꞌalaxcailh xamatiꞌ yuchi lhitavilanalh ju ucxtinin lacakꞌai chakaꞌ.

Laich cataꞌachivimakꞌanalh.

39 Para ni tuꞌuꞌ atumpa ju alhichꞌivimakꞌanatꞌit pus laich anonaꞌitꞌit acsni va catamakꞌaixtꞌokꞌaꞌ ju lapanacni ju ucxtinin.

40 Jantu xcai ni calhichivimakꞌancau ixlacata ju ani lakꞌaiti.

Catanaulh ni va tꞌalasayau ju ucxtinin.

Ni chunch caꞌulhtucau matich tuꞌuꞌ talakꞌalhin ju laich calhiquilhꞌau ixlacata ju ani lakꞌaiti.

41 Chai acsni naulh ju ani chivinti ajuni ju ixtalhavat lapanacni ni cataꞌalh laꞌixchakaꞌan.

Chai taꞌalh.