―Quiꞌalakꞌavin ju quitꞌin jantu icnavita tuꞌuꞌ talakꞌalhin ju laich aclhitalhanalh laꞌixmacni Dios tus chavai.

2 Pus ju acsnich ju xakꞌai pali ju Ananías ixjuncan alacjunich ju lapanacni ju vanin ixꞌalactꞌaya ni catapuquicsalhch.

3 Pus ju acsnich ju Pablo juni:

―Dios ju caꞌulaniyan ju uxintꞌi ni va acxpꞌutꞌiyunun.

Ju uxintꞌi yuchi lhivilhtꞌi ni aqꞌuimpꞌuxcꞌonin ju quintalakꞌalhin tachi ju lhijun lacalhamapꞌaksin.

Pus tajuch ni va navipꞌalai tachi ju jantu lhijun lacalhamapꞌaksin ni qꞌuilhinauch ju quimpuquicsaca.

4 Pus ju ixꞌalactꞌayalh tajunich:

―Tajuch ni laich uni macxcai chivinti ju xakꞌai ixpali Dios.

5 Pus ju Pablo naulhch:

―Jantu xaccꞌatsai ji quiꞌalakꞌavin ni yuchi cava ju xakꞌai pali.

Ni xaccꞌatsa cava pus jantu chun xacjunilh ni laꞌixchivinti Dios ju tsꞌokcanta najun ni jantu macxcai aclhichivinilh tam xakꞌai laquilakꞌachakꞌan.

6 Pus ju Pablo acsni cꞌatsa ni quilhmactam ju ucxtinin ixtalhilacaꞌan ju ixlhamapꞌaksinꞌan ju fariseonin chai ju quilhmactam ixtalhilacaꞌan ju ixlhamapꞌaksinꞌan ju saduceonin pus pꞌas chivinilh lacapuꞌucxtin.

Alacjuni:

―Quintꞌalapanacni ju quitꞌin icfariseo.

Ju quimpai vachuꞌ fariseo ixjunita.

Chai iclhichivimakꞌancanta ni iclacaꞌi ni catataꞌacxtuchokoyaꞌ ju tanitach.

7 Chai acsni naulh ju chunch ju Pablo pus lana tatsuculh laklakꞌainin ju fariseonin chai ju saduceonin.

Chai jantu va lakatam tava ju ixꞌatalacpastꞌacꞌatꞌan.

8 Ju saduceonin ixtanajun ni jantu lai taꞌacxtuchokoi ju tanitach chai matiꞌ ju anquilh nin yuchi ju macxcai un.

Para ju fariseonin tanajun ni lai taꞌacxtuchokoi ju tanitach chai alin ju anquilhnin chai ju macxcai un.

9 Pus na pꞌas talaxakꞌala.

Pus tataya ju aliꞌin ju na ixtalhaꞌatalanininta ju ixlhamapꞌaksinꞌan ju istꞌaꞌisraelitanin ju vachuꞌ fariseonin ixtajunita.

Ju yuꞌunch tanaulh:

―Jantu tuꞌuꞌ talakꞌalhin iclhitajuniyau ju ani ya lapanac.

Ni tuꞌuꞌ xalaktsꞌin tachi ju va laꞌixꞌaklakꞌavanti u ni caxakꞌala ju tuꞌuꞌ anquilh pus kꞌoxich.

Ju quijnan jantu ictꞌalasaputunau ju Dios.

10 Chai ni slivasalh ixtalaclakꞌaji ju sia yuꞌunch pus ju comandante na ixlhimaktalhananch ju Pablo.

Ixnajunch ni jantu xcai ni catamacꞌatsani ju Pablo.

Pus alacjunich ju ixtaropajni ni cataꞌalh chai catataiꞌi ju Pablo laꞌixtalhavatꞌan chai catalhiꞌalh lacacuartel.

11 Pus acsni tatsꞌisi pus ju kꞌai ucxtin Jesús talacasunilh ju Pablo chai junich:

―Jantu atꞌalhan ji Pablo.

Tachi ju xaꞌaꞌuni ju amachakꞌan ani Jerusalén ju quilacata pus tasqꞌuini ni aꞌunaꞌich ju amachakꞌan Roma vachuꞌ.

12 Pus acsni tuncunchokolh ju aliꞌin israelitanin talatꞌatakꞌoxilh ju chivinti ju sia yuꞌunch ta yu laich catamakniyaꞌ ju Pablo.

Talaclajuni:

―Jantu cativajiu nin yuchi ni cakꞌotꞌau tuꞌuꞌ tus ni jantu calaktsꞌimakniyau ju Pablo.

Chai ni jantu camuctaxtuyau pus chach quintamamakꞌalhkꞌajniyan ju Dios.

13 Istapasata tꞌupꞌuxam lapanacni ju ixtanavita junima lhiꞌokxchivinti.

14 Pus ju yuꞌunch taꞌalh laktsꞌinin ju xalackꞌajin palijni chai ju xalacpaꞌitnich ju sia istꞌaꞌisraelitanin chai tajunich:

―Ju quijnan icnavitauch lakatam lacchivinti.

Chai ni jantu acmuctaxtuyau pus chach quintamamakꞌalhkꞌajniyan ju Dios.

Pus ju quijnan jantu tavanan tuꞌuꞌ actiꞌu tus ni jantu iclaktsꞌimakniyau ju Pablo.

15 Pus ju uxijnan chai ju xalacpaꞌitnich ju ani lakꞌachakꞌan aꞌunaꞌitꞌit ju comandante ni vatsꞌisin camaxtuyaꞌ ju Pablo.

Calhimilh lacapuꞌucxtin.

Ju uxijnan chunch alatꞌit tachi ju va kꞌasmatnipꞌutꞌunatꞌit ju tuꞌuꞌ chivinti ju palai stavasalanti cava ixlacata ixlhamakꞌan.

Pus ju quijnan iclakasivilauch ni laich acmakniyauch acsni tucaꞌ chaꞌan lacapuꞌucxtin.

16 Pus ju Pablo ixꞌalin pumatam ispꞌisekꞌe atsiꞌ.

Chai ju yuchi ixꞌalin ju istsꞌalh.

Pus ju anuꞌ tsꞌalh kꞌasmatlh ni apacxantaicanta ju Pablo.

Pus alh juniniꞌ.

Tanu lacacuartel chai quimacꞌatsanicalh ju Pablo.

17 Chai ju Pablo tꞌasanilh pumatam xacapitán chai juni:

―Lamapainin alhiꞌinchich juniya tsꞌalh junta vilhcha ju miꞌucxtinꞌan ju uxijnan.

Ma va alin tuchi ju jumputun.

18 Pus ju capitán kꞌailhiꞌalh ju tsꞌalh junta ixvilhcha ju ixꞌucxtin chai junich:

―Ju anuꞌ tachꞌin ju Pablo juncan quintꞌasanilh chai quintapaininilh ni ma aclhiminin juniya tsꞌalh ni ma va tꞌachivimputunan.

19 Pus ju comandante makchꞌapalh ju anuꞌ tsꞌalh chai tꞌaꞌalh alacatam chai sacmilh.

Junich:

―Tijuch ju qꞌuiꞌumpꞌutꞌun.

20 Pus ju yuchi junich:

―Ju quintꞌaꞌisraelitanin talakꞌoxita ju chivinti junta tanajun ni ma catatapaininiyan ju uxintꞌi ni amaxtꞌuyaꞌich ju lhi ju Pablo chai ma alhipꞌinaꞌ lacapuꞌucxtin.

Ju yuꞌunch ma va catalayach tachi ju ma va takꞌasmatniputunch tuꞌuꞌ chivinti ju palai stavasalanti cava ixlacata ju ixlhamakꞌan.

21 Para tun aqꞌuiclacꞌaꞌitꞌi.

Pus tapasatach tꞌupꞌuxam lapanacni ju tapacxantaji ju Pablo.

Ju yuꞌunch tanavita lakatam lacchivinti junta tanajun ni ma jantu catavainaꞌ nin ma catakꞌotꞌaꞌ tuꞌuꞌ tus ni jantu catalaktsꞌimakniyaꞌ ju Pablo.

Chai ni jantu catamuctaxtuyaꞌ pus ma chach amamakꞌalhkꞌajni ju Dios.

Pus ju chavai ma talakasivilanalh.

Ma va tapacxanvilanalh ju minchivinti tuchꞌi anaviyaꞌ.

22 Pus ju acsnich ju comandante junich ju tsꞌalh:

―Tun xamatiꞌ tꞌiꞌun ni uxintꞌi ju xaqꞌuinqꞌuimacꞌatsꞌaniyachiꞌ ju ani chivinti.

Pus acsni juni ju chunch pus malakachachokolh laꞌixchakaꞌ.

23 Chai astan ju yuchi atꞌasanilh pumatꞌui capitán chai ajunich:

―Amakꞌaixtꞌoktꞌit ju taropajni ju laich alactꞌapꞌitꞌit ju lakꞌachakꞌan Cesarea tachi lakanajatsi hora chavai tokꞌoxai.

Lakatꞌui cientos catachꞌajaxꞌanaꞌ chai setenta lacacaballo cataꞌanaꞌ chai lakatꞌui cientos ju catalhiꞌanaꞌ ju ispadaꞌan.

24 Chai alakꞌasilhipꞌinitꞌit ju caballo ju capuꞌanach ju Pablo chai kꞌox alhipꞌiniyaꞌitꞌit ju gobernador Félix.

―Chunch ju ajuni ju ixlaccapitán.

25 Chai ju comandante atsꞌoknunilh ju Félix lakatam alhiqui ju catalhiꞌaniyaꞌ ju ixcapitán.

Chani juni:

26 “Quitꞌin ju icClaudio Lisias chai va icmacꞌamiyan ji señor gobernador Félix.

27 Ju israelitanin ixtachꞌapata ju ani lapanac chai ixtamakniputun.

Para ju quitꞌin acsni icmachakxalh ni vachuꞌ quilatꞌaputekꞌecantauch ju quijnanꞌan ju romanonin juntau pus icꞌalactꞌaꞌalh ju quintaropajni chai icmakꞌalhtaxtulh laꞌixmacaꞌan.

28 Chai ju quitꞌin ni va xaccꞌatsaputun tuchi talakꞌalhin ju talhichivimakꞌanch pus iclhimilh junta ixtatakꞌaixtokta ju xalacpaꞌitni ju istꞌaꞌisraelitanin.

29 Pus icmachakxalh ni va jantu kꞌox talhiulai ju yuꞌunch tachi ju lhichivinin ju ixlhamapꞌaksinꞌan ju ani lapanac.

Para jantu tuꞌuꞌ talakꞌalhin navita ni laich calhimapalalh ju laꞌixꞌaninti nin yuchi ni lai calhitꞌalhnucalh.

30 Pus icmacꞌatsanicanta ni ixtaꞌapacxantayananch ju istꞌaꞌisraelitanin.

Pus yuchi vatsꞌalhti iclhimalakachanichin ju Pablo.

Vachuꞌ icꞌajunilh ju yuꞌunch ju taꞌachivimakꞌanan ni catanonantach ju lamiꞌucxlacapuꞌ ju uxintꞌi tuchi talakꞌalhin ju tamucꞌani ju Pablo.

Ca va yuchach”.

31 Pus ju taropajni talhiꞌalh ju Pablo tachi ju ixꞌajuncantach.

Tsꞌis ju lhiꞌancalh ju lakꞌachakꞌan Antípatris.

32 Chai acsni tuncunchokopa pus va yuꞌunch ju ixtapuꞌanta ju caballo ju tatꞌaꞌalh ju Pablo.

Ju aliꞌin taminchokolh laꞌixchakaꞌan.

33 Pus ju yuꞌunch ju ixtatꞌaꞌanta ju Pablo acsni tachaꞌalh ju lakꞌachakꞌan Cesarea taxtaknilh ju alhiqui ju gobernador chai vachuꞌ tamakꞌaxtaknilh ju Pablo.

34 Chai ju gobernador acsni laktsꞌinkꞌo ju alhiqui sacmilh ju Pablo tas amachakach.

Tis estado.

Pus ju Pablo juni ni amachakaꞌ Cilicia ixjunita.

35 Ju acsnich ju yuchi juni:

―Ackꞌasmatniyanch acsni va cataminach ju tachivimakꞌananch.

Pus acsni juni ju chunch lhinaulh ixlhiꞌanca laꞌixchakaꞌ ju kꞌai ucxtin Herodes chai ajuni ju taropajni ni catalhistaclh.