―Quiꞌamamakaꞌunuꞌ alaktsꞌich ju ani chiux ni na laccꞌus chai ju lacchakaꞌ ni na lackꞌox.

2 Para akꞌalhtayanalh ju Jesús.

Junich:

―Alaktsꞌintꞌit ju ani lackꞌai kꞌexichakaꞌ.

Pus caminaꞌ avilhchan acsni jantu tuꞌuꞌ catilaꞌucxtavi ju chiux ju ixtꞌachiux.

Chux lana calakꞌalhikꞌocanaꞌ.

3 Pus ju Jesús chai ju ixꞌamamakaꞌui taꞌalh ju akstijun junta ixchꞌancanta ju xaqꞌuiu ju olivos juncan.

Chai ju anch ixtꞌalalacaꞌanita lacakꞌai ixpujitatꞌan ju israelitanin.

Chai acsni tavi ju Jesús pus ju Pitaluꞌ chai ju Jacobo chai ju Xivan chai ju Tilix va isꞌakstuꞌan taquilhasacmi.

Tajuni:

4 ―Aquilajuniuch.

Tas vananch ju catapasayaꞌ ju anuꞌ taxtokni ju xaquilajunau.

Tas acpucꞌatsayau ni chinta ju avilhchan acsni cataꞌuctaxtuyaꞌ chux ju ani taxtokni.

5 Pus ju Jesús alackꞌalhtailh.

Ajuni:

―Alhistꞌaccꞌantꞌit ni jantu xamatiꞌ cataꞌokxchokꞌon.

6 Pus na lhu cataminaꞌ chai catanonach ni yuꞌunchach ju Cristo ju ixnoncan camalakachatachilh ju Dios.

Chai na lhu cataꞌokxchokꞌoyaꞌ.

7 Para acsni akꞌasmatꞌaꞌitꞌit ni alin ju lhilucut chai ni cakꞌostayachokochalh aliꞌ lhilucut alacatam pus jantu atꞌalhananaꞌitꞌit.

Aktsꞌiya tasqꞌuini ni chunch ju catapasayaꞌ.

Para jantiyuꞌ ju ixpuꞌaclanti ju lacamunutpaꞌ.

8 Pus ju amachakꞌan ju kꞌai lakꞌachakꞌan catꞌalasayaꞌ ju amachakꞌan alakatam kꞌai lakꞌachakꞌan.

Chai ju lapanacni ju tachꞌakꞌokꞌai tam kꞌai ucxtin catatꞌalasayaꞌ ju ixlapanacni ju apumatam kꞌai ucxtin.

Catataclhaꞌ ju lacatꞌun ju vaklhun.

Chai caꞌalinaꞌ ju kꞌai chavan chai makꞌalhkꞌajnat.

Pus ju ani va ixputaiꞌulacan ju makꞌalhkꞌajnat.

9 Para ju uxijnan alhistꞌaccꞌantꞌit miꞌakstuꞌan ni alhipꞌincꞌanaꞌitꞌit lacapuꞌucxtin.

Chai ju laꞌixpujitatꞌan ju mintꞌaꞌisraelitanin akꞌainekmacꞌanaꞌitꞌit.

Chai alhipꞌincꞌanaꞌitꞌit laꞌixꞌucxlacapuꞌan ju ucxtinin chai ju lacalackꞌai ucxtinin va ixlacata ni quilalhilacaꞌanau ju quitꞌin.

Pus ju chunch laich aꞌunaꞌitꞌit ju yuꞌunch ju quilacata.

10 Chai ni tucaꞌ chin ju ixꞌaclanti ju lacamunutpaꞌ pus tasqꞌuini ni pꞌulhnan caꞌalacjunkꞌocanaꞌ chux ju lapanacni ta yu lai puꞌancan ju lactꞌiyan.

11 Chai acsni alhipꞌincꞌanaꞌitꞌit junta makꞌaxtꞌakcꞌanaꞌitꞌit lacapuꞌucxtin pus jantu alhamakꞌanininaꞌitꞌit tuchꞌi ju anonaꞌitꞌit ni jantucaꞌ chꞌipꞌinatꞌit.

Nin yuchi ni apꞌastꞌactꞌit tuchꞌi anonaꞌitꞌit.

Para va tuchi cataxtakniyan ju Dios ju lamiꞌalhunutꞌan ju acsnich pantsꞌiquis pus yuchach ju anonaꞌitꞌit.

Chunch ju anonaꞌitꞌit ni jantu uxijnan ju achꞌivinaꞌitꞌit para isꞌakstu ju Spiritu Santu.

12 Chai ju lapanacni catalamakꞌaxtꞌakꞌaꞌ va ixlacaꞌatalh ni axcaican ju quintalhilacaꞌanta quitꞌin.

Pus ju lapanacni catamakꞌaxtꞌakꞌaꞌ ju tam ixlakꞌauꞌan laꞌixꞌaninti.

Chai ju xalacpaꞌitni catamakꞌaxtꞌakꞌaꞌ ju isꞌaskꞌatꞌan laꞌixꞌanintiꞌan.

Chai ju saꞌaskꞌatꞌan catatꞌalasayaꞌ ju ixpaiꞌan chai ixnatichꞌan chai catalhinonaꞌ ixmaknicaꞌan.

13 Pus chux ju lapanacni slivasalh catalhixcayan va ixlacata ni quilalhilacaꞌanau.

Para ju aquilhilaksiyaꞌ tus laꞌixꞌaclanti ju isꞌatsucunti yuchi ju catakꞌalhtaxtuyaꞌ chai laich caꞌanaꞌ ju lactꞌiyan.

14 Ju makꞌaniya lapanac ju Daniel ixjuncan ixnajun ixchivinti Dios.

Chai ju yuchi tsꞌokꞌula junta naulh ni ma caꞌalinaꞌ lamimpujitatꞌan ju tuꞌuꞌ ju na lhitsꞌisi ju Dios.

Chai ixlhiyuchi jantu xamatiꞌ ju milhiꞌuxijnan catanuyaꞌ ju anch.

Pus ju laktsꞌin ju ani chivinti chach machakxa tuchi ju nomputun.

Chai acsni alaktsꞌinaꞌitꞌit ni uctaxtulh ju anuꞌ ju lhichivinilh ju Daniel pus tachi chun ju tavilanalh laxaꞌestado Judea chach taꞌatsꞌalalh.

Cataꞌalh ju lactalhpa.

15 Chai ju caꞌakstitavi lacasotea chakaꞌ va tsꞌalhti catakꞌalhtaju chai caꞌatsꞌalalh.

Para jantu catiꞌalilh ispantsꞌiquis ni lai catanu ju laꞌixchakaꞌ ni va caꞌalh maxtunuꞌ tuꞌuꞌ ju ixtaxtokni.

16 Chai ju chꞌalhcatnan laꞌixcuxtu vachuꞌ caꞌatsꞌalalh.

Chai jantu cataspꞌitchokolh laꞌixchakaꞌ ni va caꞌalh iniꞌ ju ixcutun.

17 Painiꞌitnich ju yuꞌunch ju jantu lacakꞌox chai ju va tatꞌajun matsꞌiquinin isꞌaskꞌatꞌan ju acsnich avilhchan.

18 Atꞌapꞌaininitꞌit ju Dios ni jantu tasqꞌuini ni atsꞌalayaꞌitꞌit lacalhicꞌasnin.

19 Chunch alhisqꞌuinitꞌit ni na lhu catamakꞌalhkꞌajnanaꞌ ju lapanacni ju acs avilhchan.

Catamakꞌalhkꞌajnanaꞌ tachi ju jantu tavanan makꞌalhkꞌajnancanta tus acsni tavanan navicantacha ju Dios ju lacamunutpaꞌ.

Chai jantu aktam chun catamakꞌalhkꞌajnanchokoyaꞌ tavanan.

20 Pus ju quiꞌucxtinꞌan Dios ni jantu caꞌixnaulh ni palai va lacatsꞌunin caꞌixnavi ju anuch avilhchan pus jantu xamatiꞌ caꞌixtakꞌalhtaxtulh.

Ixtanikꞌota.

Para ni na amapaini ju lapanacni ju ixꞌalacsacxtuta pus yuchi va lacatsꞌunin lhinavilh ju anuꞌ avilhchan.

21 Pus ju acsnich jantu xcai ni xamatiꞌ chani catajunan:

“Alaktsꞌich.

Ani ya ju Cristo ju ixnoncan camalakachatachilh ju Dios”.

U chani catajunan:

“Alaktsꞌich anuꞌ ya”.

Pus ni chunch ju catajunan xamatiꞌ jantu alacꞌaꞌitꞌit.

22 Pus ju acsnich caꞌalinaꞌ ju lapanacni ju catanonaꞌ ni yuꞌunch ju Cristo ju ixnoncan camalakachatachilh ju Dios mas jantu.

Chai caꞌalinaꞌ ju lapanacni ju catanonaꞌ ju taꞌaklhtamat chivinti.

Para chunch catachivinaꞌ tachi ju vasalh tatꞌajun nonin ju ixchivinti Dios.

Chai na lhu catanaviyaꞌ ju taxtokni ju catapumavasalaputunach ni vasalh ixlapanacni Dios tajunita mas jantu.

Chai catanaviyaꞌ ju lhamakꞌan ni va laich catapuꞌokxchokꞌolh ju lapanacni ju asacxtuta ju Dios.

23 Para ju uxijnan alhistꞌaccꞌantꞌit.

Iclajuntauch chux ju ani mas tucaꞌ tapasai ni laich acꞌatsꞌayaꞌitꞌit ni chunch ju catapasayaꞌ.

Ju Jesús tailhiꞌalh ixchivinti chai ajuni ju ixꞌamamakaꞌui:

24 ―Ju acsni avilhchan acsni catapasayaꞌ ju anuꞌ makꞌalhkꞌajnat pus catsꞌisaꞌ ju avilhchan.

Chai ju malhquiyuꞌ jantu camapulhcuyaꞌ.

25 Chai catapatajuyaꞌ ju stꞌacu.

Chai tachi chun ju ani catataclhaꞌ.

26 Pus ju acsnich ju lapanacni aquintalaktsꞌinach ju quitꞌin ju quimalakachatachilh Dios ni lapanac actsucuyaꞌ ju ani.

Aquintalaktsꞌinach acsni acminach lacaꞌataputsꞌi.

Chai catacꞌatsayaꞌ ni na alin ju quintachaput chai xakꞌai icjunita.

27 Chai ju acsnich acmalakachatachilh ju quiꞌanquilhnin.

Chai ju yuꞌunch catamakꞌaixtꞌokꞌach ju lapanacni ju icꞌasacxtuta.

Chai ju anuꞌ lapanacni cataminanta ju ixlhilacaputsꞌun ju lacamunutpaꞌ mas palai makat cava ju ani lacatꞌun u ju lactꞌiyan.

28 Alaktsꞌintꞌit tachi ju takꞌayai ju tuꞌuꞌ xaqꞌuiu higo.

Acsni catsucuyaꞌ xajchiniꞌ ju sastꞌi xaxkꞌoi pus pꞌucꞌatsꞌayatꞌit ni vaninch minta ju lacapꞌasni.

29 Pus vana va chun ju ani.

Acsni alaktsꞌinaꞌitꞌit ni catapasayaꞌ ju ani taxtokni pus apꞌucꞌatsꞌayaꞌitꞌit ni slivasalh jantu makꞌan ticꞌacx tus caꞌaclayaꞌ ju lacamunutpaꞌ.

30 Slivasalh ju iclajunau.

Jantu catanikꞌoyaꞌ ju lapanacni ju chavai tatꞌajun tus cataꞌaktsakꞌoyaꞌ tachi chun junima taxtokni.

31 Ju tꞌiyan chai ju lacatꞌun catsꞌankꞌakꞌoyaꞌ.

Para ju quinchivinti aktsꞌiya caꞌuctaxtuyaꞌ.

32 Para jantu xamatiꞌ cꞌatsai tis avilhchan chai tuchi hora ju acminaꞌ ju quitꞌin.

Nin yuꞌunch ju anquilhnin ju tavilanancha lactꞌiyan nin quitꞌin mas istsꞌalh Dios icjunita.

Va isꞌakstu ju quimpai ju cꞌatsai.

33 Pus skꞌalalhch atsꞌucꞌutꞌit.

Alhistꞌaccꞌantꞌit.

Atꞌachꞌivinintꞌit ju Dios ni jantu cꞌatsꞌayatꞌit tavananch ju acminaꞌ.

34 Pus ju acsnich chunch cajunaꞌ tachi acsni an makat tam jokꞌat.

Ni tucaꞌ an pus ajuni ju ixlapanacni ni catalhistaclh ju ixchakaꞌ.

Chai pumatamin axtakni ixlhichꞌalhcat ju catanaviyaꞌ.

Chai juncanch ju ixlhistꞌacꞌa malhtich ni calhistaclich.

35 Pus vana va chun ju uxijnan.

Alhistꞌaccꞌantꞌit ni vachuꞌ jantu cꞌatsꞌayatꞌit tavananch ju acminaꞌ quitꞌin ju miꞌucxtinꞌan icjunita.

U tokꞌoxai.

U paitat tsꞌis.

U acsni paktꞌutu tꞌasata ju chilaꞌ.

U acsni catuncuntilayach.

36 Jantu xcai ni va tam pantsꞌiquis acmilh chai aclalhitajuyau ni tachi ju va lhtꞌatꞌayatꞌit lamiꞌatsucuntiꞌan.

37 Ju tuchi iclajunau ju uxijnan icꞌalacjuni tachi chun ju lapanacni.

Alhistꞌaccꞌantꞌit.